Shpirt Shqiptari

Legjenda e Wall St, Martin Armstrong, shpenzoi 4 dekada duke menaxhuar miliarda dollarë për llogari të klientëve të tij në mbarë botën. Në të njëjtën kohë, ai ishte edhe personi që pushtetarët thërrisnin sa herë që hasnin në kriza ekonomike. Për 40 vjet, ai këshilloi këta pushtetarë falas, pa pagesë. Kur ndjekësit e tij të shumtë e pyetën se pse nuk u merrte para këtyre shteteve që i kanë xhepat plot, ai u tha: "Nëse unë do të pranoja para si këshilltar, atëherë unë do të isha i blerë si ata dhjetra këshilltarët e tjerë, që u thonë politikanëve atë që ata duan të dëgjojnë. Duke mos marrë para, ata e dinë se unë nuk kam asnjë interes, dhe do t'iu them jo atë që ata që duan të dëgjojnë, por atë që unë e gjykoj si zgjidhje të problemit. E nuk dua t'ia di fare nëse ata bëjnë siç i këshilloj, apo e injorojnë këshillën time".

Sot Martin Armstrong është në të 70-tat, dhe thotë se: "Nuk më kanë zënë sytë klasë politike më injorante në botën e qytetëruar perëndimore në gjithë jetën time." Në sytë e tij, udhëheqës të zotë shikon vetëm në Rusi e Kinë. Sipas Armstrong: "Politikat e tyre qeverisëse janë në shërbim të qytetarëve të vendeve të tyre. Kurse në Perëndim, këta politikanë janë të blerë e shitur, e nuk punojnë për interesat e qytearëve, punojnë për interesat e tyre dhe njerëzve që i kanë blerë me para."

Pse Donald Trump nuk është politikan si gjithë të tjerët

Armstrong u tregon ndjekësve të tij në blogun e tij, se për 40 vjet, ai njohu nga afër politikanë e pushtetarë të të gjitha ngjyrave në mbarë botën. Dhe sipas tij, arsyet se përse këta politikanë i hynë politikës ishin dy: për t'u pasuruar ose për të bërë famë. Kish nga ata që i hynin politikës si mënyra më e thjeshtë për t'u pasuruar në një kohë rekord. Por kish edhe nga ata që vinin nga familje aristokrate të pasura, këta nuk hynin në politikë për të bërë para, këta e kishin paranë, e hynin për të bërë emër e famë në histori.

Sipas Martin Armstrong, dalja e Donald Trump në skenën politike amerikane, ishte një risi pozitive. Sipas tij, Donald Trump ishte miliarder i pasur me biznese në mbarë botën. Emri i tij ishte edhe shumë famoz, duke qenë se kish patur një emision televiziv të suksesshëm në ekranet televizive amerikane për vite me rradhë. Pozitivja e daljes së Trump në skenë ishte se ja tek kemi një biznesmen amerikan të suksesshëm që nuk ka nevojë as për para e as për famë, e flet hapur atë që mendon për problemet e shoqërisë e vendit të tij. Fillimisht Armstrong ishte skeptik për Donald Trump, por ai u bind plotësisht se Trump ishte pro interesave të qytetarëve amerikanë kur ai u dha fund konflikteve në Siri pasi u zgjodh president. Sipas Armstrong, "Asnjë politikani karriere në Uashington D.C nuk ia mban të dali kundër luftës dhe interesave të kompleksit industrial të luftës. Ishte kënaqësi për mua të dëgjoja Trump të shpallte publikisht qëndrimin e tij kundër luftës."

Nuk mund ta kthesh politikën në karrierë

"Po do të kuptosh se sa i korruptuar është sistemi politik në Amerikë", thotë Armstrong, "hidhi një sy se kush janë përfaqësuesit e popullit amerikan në Kongres. Shumica e tyre janë politikanë karriere që kanë gjithë jetën e tyre në Uashington. Shembulli konkret: Joe Biden. 50 vjet në Uashington. Profesioni i vetëm që ka patur gjithë jetën e tij ka qënë profesioni i politikanit."

Sipas Armstrong, politika nuk duhet parë si një karrierë, por si një shërbim civil të përkohshëm. Politika duhet parë si një sakrificë që qytetarët bëjnë, duke lënë profesionin e tyre privat për një kohë të shkurtër, e për t'u angazhuar në politikë. Motivimi për t'i hyrë politikës është zgjidhja e një problemi shoqëror. Nëse ti ke një ide se si duhet t'i jepet zgjidhje një problemi që shqetëson gjithë shoqërinë ku ti jeton, kjo duhet të jetë shtysa për t'i hyrë politikës. Dha pasi shërben në politikë për 4 apo 8 vjet, ti largohesh nga politika dhe i kthehesh profesionit privat.

Martin Armstrong nuk është optimist për të ardhmen e demokracisë amerikane, vendit ku ai ka lindur e ka shpenzuar gjithë jetën e tij. Hapi i vetëm që do të luftonte korrupsionin në sistemin politik amerikan sipas Armstrong është një amendament i kushtetutës amerikane, ku vendosen limite në numrin e mandateve që përfaqësuesit mund të shërbejnë në Kongres. Nëse nuk vënë limite në dy mandate, politika amerikane do të vazhdojë të gjëlojë në një kënetë korrupsioni.

A kemi politikanë karriere në politikën shqiptare?

- Edi Rama
- Lulzim Basha
- Ilir Meta
- Albin Kurti
...
...
...

Çfarë kanë të përbashkët të gjithë këta politikanë shqiptarë?
A kanë patur ndonjë profesion tjetër në jetën e tyre përveç politikës?

Këto janë pyetje retorike, përgjigjet e të cilave të gjithë i njohim.

Me sa duket, ato për të cilat Martin Armstrong flet më lart, vlejnë jo vetëm për politikën amerikane, por edhe për atë shqiptare.