Shpirt Shqiptari

Kam kënaqësinë e veçantë që të ndaj me ju një lajm të mirë. Duke filluar që sot, çdo anëtar/e i/e regjistruar i/e Forumit Shqiptar, do të ketë mundësi që të krijojë edhe bllogun e tij/saj personal. Një shërbim që ofrohet falas e për të gjithë, si gjithë shërbimet e tjera që forumi ofron. Bile edhe rregullat e postimit në bllogun tuaj personal janë më të lira se sa në diskutimet publike të forumit. Mësoni më shumë më poshtë.

- Çfarë është bllogu personal?

Le të fillojmë me vetë fjalën "bllog" pasi ajo është një fjalë e rë për gjuhën shqipe. Origjina e kësaj fjale është gjuha angleze e Internetit "blog". Bllogu përfaqëson një dritare personale në Internet, ku një person shpreh mendimet ose krijimtarinë e tij/saj me një publik të gjerë. Tematika e mendimeve të shprehura është e shumëllojshme. Dhe ajo që është më e mira është që ju vetë vendosni të shprehni mendimet dhe krijimtarinë tuaj në një liri të plotë.

Ju pëlqen të shprehni mendimin tuaj mbi atë që ngjet në vendlindje apo në shoqërinë ku jetoni? Nëse më përpara ju duhej të dërgonit shkrimin tuaj pranë një redaksie gazete apo televizioni shqiptar, sot nuk keni përse ta bëni më këtë. Mendimi juaj në faqet e forumit shqiptar do të lexohet nga mijëra vizitorë nga mbarë bota në ditët, javët, muajt, vitet në vazhdim. Keni një prirje artistike? Ju pëlqen letërsia, muzika, piktura, fotografia, kërcimi....? Tani mund të ndani me një publik të gjerë shqiptar në bllogun tuaj personal krijimtarinë tuaj artistike. Dhe jo vetëm kaq, por do të kini kontroll të plotë mbi të. Kontroll mbi njerëzit që mund ta lexojnë postimet tuaja. Sa gjatë qëndrojnë të postuara në forum. Kush mund të komentojë për postimet tuaja. Bllogu personal ju lejon edhe të krijoni shoqëri të reja, pasi të gjithë antarët e forumit që ndajnë të njëjtin mendim apo pasion me ju, do të abonohen në bllogun tuaj personal. Dhe sa herë që ju bëni një postim të ri në bllogun tuaj personal, ata do të marrin një njoftim në forum dhe me email.

- Nga ndryshon bllogu personal nga temat e forumit?

Temat e forumit janë diskutime publike ku të gjithë antarët japin mendimin e tyre të lirë. Kurse bllogu personal ka një karakter më individual dhe më personal. Vazhdoni të merrni pjesë në temat e diskutimit në forum, dhe në të njëjtën kohë postoni edhe në bllogun tuaj personal. Si shembull, për një temë të caktuar në forum, ju keni shumë për të thënë e shprehur. Nëse doni të shkruani mendimin tuaj të plotë mbi çështjen në fjalë, duke renditur të gjitha argumentet tuaja, forma e rekomanduar është bllogu personal. Dhe shumë mirë mund ta postoni lidhjen e postimit të bllogut në temën përkatëse në forum, që antarët që kanë marrë pjesë të mund ta lexojnë.

Dallimi tjetër mes bllogut personal dhe temave të forumit është bllogu ju lejon edhe që të postoni vetëm për sytë e miqve tuaj në forum jo për një publik të gjerë. Të gjitha temat e hapura në forum janë publike, që mund të lexohen e komentohen nga të gjithë antarët e forumit. Kurse bllogu ju jep ju lirinë që të diktoni se kush mund të lexojë postimet tuaja në bllogun tuaj personal.

Si mund të hap bllogun tim këtu?

Si anëtar i regjistruar në forum, mjafton që të klikoni mbi lidhjen në krye të forumit që lexon "BLLOGJET". Poshtë saj do të shikoni edhe disa lidhje që kanë lidhje me blogjet, si një lidhje për blogun tuaj personal, një lidhje për bllogjet e antarëve të tjerë të forumit, bllogjet më të lexuara, dhe kontrolli që ju kini mbi bllogun tuaj. Mund të ndryshoni për shembull stilin e paraqitjes së bllogut tuaj personal.



Pasi të klikoni mbi "Bllogje", do të shikoni një buton në krye të faqes djathtas, që ju lejon që të postoni një postim të ri në bllogun tuaj personal.



Në postimin e bllogut tuaj, mund të postoni pak a shumë siç postoni në temat e forumit. Mund të postoni foto, video, tekst dhe lidhje të ndryshme. Ju kujtojmë se fotot tuaja është mirë ti postoni tek Albumet tuaja personale, dhe ti referoni në bllogun tuaj këtu.

- Cilat janë kufizimet e forumit mbi bllogjet personale?

Kufizimet e forumit janë minimale. Moderatorët e forumit rezervojnë të drejtën të ndërhyjnë në postimet e bllogjeve vetëm në ato raste kur ka shkelje të Misionit të Forumit ose të Rregullores së Forumit.. Për aq kohë sa nuk ka fjalor apo materiale të pahijshme të publikuara në bllogun tuaj personal, stafi i forumit nuk ndërhyn në të. Ne ua ofrojmë këtë shërbim falas, me shpresën se ju do të prodhoni vlera që do të pasurojnë jo vetëm faqet e forumit, por do të ndriçojnë mendjet dhe sjellin kënaqësi zemrave të lexuesve tuaj.

Në asnjë kënd tjetër të Internetit nuk keni për të gjetur mbështetje më të madhe për të lëvruar fjalën tuaj të lirë se sa në Forumin Shqiptar. E kemi të qartë që sot ju mund të keni shumë mundësi për të shprehur atë që mendoni. Por ne ju kujtojmë se Forumi Shqiptar ka ekzistuar para se të dilte një Google apo Facebook, dhe do të ekzistojë edhe kur mos ketë më Google e Facebook. Komuniteti ynë shqiptar në Internet është një stafetë brezash dhe si i tillë është i pavdekshëm.

Stafi i Forumit