Informacione te nevojshme rreth shendetit

[RaPSouL]

Dieta me mungesë sheqernash

Shkencëtarët kanë krahasuar ndikimin e dietës me konsumim të ulët të karbohidrateve (sheqernave) në aftësitë njohëse të femrave.

Në studim kanë marrë pjesë 20 femra, me moshë ndërmjet 22 dhe 55-vjeçare. Gjysma e tyre brenda tri javësh i janë nënshtruar dietës me sasi të vogël të karbohidrateve, ndërsa gjysma tjetër kanë mbajtur dietë të zakonshme me zvogëlimin e konsumimit të energjisë në përgjithësi.

Femrat të cilat i kanë larguar karbohidratet nga ushqimi i tyre, e kanë pasur shumë vështirë t’i zgjedhin detyrat që kanë pasur të bëjnë me të mbajturit mend. Në momentin kur karbohidratet janë futur sërish në ushqim, funksionet njohëse janë kthyer sërish në normale.

Shkencëtarët supozojnë se kjo ndodh pasi që largimi i karbohidrateve nga ushqimi ka ndikim të drejtpërdrejtë në tru, duke pasur parasysh se truri e përdor vetëm glukozën si burim energjie.

[RaPSouL]

Shtatzëna kujdes nga kafeina

Një studim i ri ka treguar se femrat të cilat nuk e zvogëlojnë konsumimin e kafeinës gjatë shtatzënisë shtojnë rrezikun për ta lindur foshnjën me peshë më të vogël trupore.

Studimi ka përfshirë mbi 2.600 femra, te të cilat është përcjellë sasia e kafeinës të cilën e kanë konsumuar deri në fund të shtatzënisë.

Rezultatet kanë treguar se konsumimi i më shumë se 200 mg kafeinë në ditë është ndërlidhur me lindjen e foshnjës me masë më të vogël për 60-70 g. Konsumimi më i madh i kafeinës ka rezultuar me zvogëlim edhe më të madh të peshës trupore.

Sasia më e madhe e kafeinës ka ardhur nga kafja, çaji, kokakola dhe çokollata.

Autorët e studimit rekomandojnë që shtatzënat ta zvogëlojnë konsumimin e kafeinës nën 200 mg në ditë, që është ekuivalente me dy filxhanë kafe ose dy filxhanë e gjysmë çaj.

[RaPSouL]

Kafeja e tepërt rrezikon vezoret

Konsumimi i përditshëm i sasive të mëdha të kafesë mund ta shtojë rrezikun e zhvillimit të karcinomës së vezoreve te femrat në menopauzë, njofton studimi i ri.

Në studim kanë marrë pjesë më shumë se 29.000 femra në menopauzë.

Shkencëtarët kanë pohuar se femrat të cilat kishin konsumuar më shumës e pesë filxhanë kafe në ditë, ishin të rrezikuara për 81% për të zhvilluar karcinomë të vezoreve në krahasim me fermat të cilat nuk kishin pirë aspak kafe.

Befasi për shkencëtarët ka qenë fakti se në rritjen e rrezikut për t’u zhvilluar karcinoma e vezoreve ka ndikuar edhe kafeja me kafeinë edhe ajo pa kafeinë, që ka lënë të kuptohet se në zhvillimin e kësaj sëmundjeje ndikojnë edhe disa përbërës tjerë të kafesë.

[RaPSouL]

Sheqeri mund të shkaktojë varësi

Disa hulumtime të fundit amerikane kanë nxjerrë një përfundim paksa të çuditshëm: sheqeri mund të shkaktojë varësi ngjashëm si edhe kokaina dhe heroina.

Rezultatet e testeve të bëra në kafshë kanë treguar se pas konsumimit të një sasie të madhe të sheqerit vjen deri tek ndryshimet në tru të cilat janë të ngjashme me ato që paraqiten pas konsumimit të drogave si heroina dhe kokaina.

Konsumimi i sasive të mëdha të sheqerit ka qenë i lidhur edhe me ndryshimet në sjelljen e kafshëve si dhe me paraqitjen e pasojave afatgjate, të cilat ngjajnë si në përdorimin e drogave.

Sheqeri ka shkaktuar rritje të pranisë së neurotransmetuesit të quajtur dopaminë në tru, ngjashëm si edhe heroina dhe kokaina.

Kur pas një kohe kafshëve eksperimentale u është ndërprerë sheqeri, ato kanë filluar të shfaqin shenja të ankthit dhe tërheqjes, si edhe tek personat të cilët konsumojnë alkool, duhan ose drogë, bëjnë të ditur shkencëtarët.

[RaPSouL]

Ndryshimet gjenetike mbrojnë zemrën

Studimet e reja amerikane bëjnë të ditur se ekzistojnë disa mutacione gjenetike të cilat mbrojnë zemrën nga pasojat e ushqimit jo të shëndetshme, me nivel të lartë të yndyrave.

Magazina shkencore Science, ka publikuar se tek 5% e të hulumtuarve është zbuluar një mutacion që lehtëson zbërthimin e shtresave të triglicerideve në enët e gjakut.

Është zbuluar se ndryshimet tek gjeni me emrin APOC3 janë lidhur me rritjen e përqendrimit të kolesterolit të mirë (HDL) si dhe me uljen e kolesterolit të keq (LDL), gjë që përmirëson gjendjen e enëve të gjakut.

Hulumtuesit besojnë se të dhënat e marra nga 800 persona të hulumtuar, do të ndihmojnë në zhvillimin e një terapie të re për kontrollimin e kolesterolit në gjak.

[RaPSouL]

Nëse është i shëndetshëm nuk do të thotë se s’ka kalori

Shpeshherë ndodh kuptimi i gabueshëm ndaj ushqimit të shëndetshëm dhe jo të shëndetshëm.

Së fundmi është bërë një anketim, i cili ka treguar se vetëm 35% e njerëzve vlerësojnë sasinë e kalorive të cilën e ofron ushqimi të cilin ata e konsumojnë.

Për këtë arsye ekspertët rekomandojnë se të gjithë njerëzit duhet të informohen për sasinë e energjisë të cilën e konsumojnë nëpërmjet një ushqimi të caktuar. Pavarësisht se ai renditet në grupin e ushqimeve të shëndetshme, kaloritë e tepërta mund të shkaktojnë mbipeshë.

[RaPSouL]

Çaj hibiskusi për uljen e shtypjes së gjakut

Një studim i ri klinik tregon se çaji nga hibiskusi ndihmon në uljen e shtypjes së gjakut.

Disa vullnetarë kanë pirë nga tre filxhanë çaj në ditë, ndërsa grupi tjetër i participantëve kanë pirë placebo me shije dhe ngjyrë të njëjtë. Ushqimi dhe aktiviteti trupor te të dyja grupet ka qenë i ngjashëm.

Pas gjashtë javësh, te grupi i cili ka konsumuar çaj nga hibiskusi, është vërejtur ulje e shtypjes së gjakut për 7.2 njësi, ndërsa te ata të cilët kanë konsumuar placebo vetëm për 1.3 njësi.

[RaPSouL]

Sistemi imun funksionon më mirë natën

Shkencëtarët amerikanë nga Universiteti i Stanfordit pohojnë se sistemi imun gjatë natës lufton më fuqishëm kundër infeksioneve.

Testimet më të reja kanë treguar se e kundërta ndodh gjatë ditës, atëherë sistemi imun reagon shumë më dobët në luftimin e infeksioneve bakterore.

Autorët e studimit e shpjegojnë këtë me veprimin e proteinave të cilat punojnë me anë të “orës së brendshme të organizmit”, të cilat gjatë gjumit e përforcojnë funksionin e tyre për shkak se metabolizmi bie, ndërsa energjia përqendrohet në luftimin e infeksionit. Ndërsa gjatë ditës metabolizmi është më aktiv, ndërsa energjia shpërndahet nëpër të gjitha qelizat.

[RaPSouL]

Meshkujt alkoolistë kanë eshtra më të dobëta

Thyeshmëria e eshtrave (osteoporoza) tashmë është e njohur si një pasojë e alkoolizmit, por një studim i fundi ka treguar se kjo është një rast shumë më i shpeshtë tek meshkujt se sa tek femrat.

Rezultatet e grumbulluara nga 57 alkoolistë të moshës nga 27 në 40 vjeçare, kanë treguar se një e katërta e meshkujve kanë masë të zvogëluar kockore. Të gjithë personat e hulumtuar kanë qenë në gjendje të mirë shëndetësore dhe nuk kanë pasur kurrfarë problemesh me mëlçinë.

Shkencëtarët austriak janë befasuar kur nga rezultatet kanë kuptuar se zvogëlimi i masës kockore është vërejtur vetëm te një në 20 femra. Këto rezultate janë shpjeguar me praninë e estrogjenit te femrat, hormon i cili mund të ketë një rol mbrojtës ndaj eshtrave.

Te të dy gjinitë është vërejtur një ulje e dukshme e vitaminës D, që është po ashtu një prej faktorëve kyç për të ruajtur kockat e shëndetshme.

[RaPSouL]

(Ar)miqtë e lëkurës së bukur

Studimi i parë i cili ka analizuar ndikimin e ushqimit në paraqitjen e akneve ka zbuluar se ushqimi, i cili ka për bazë produktet ushqimore me indeks të ulët glikemik si dhe përmban proteina, ndikon në zvogëlimin e akneve në fytyrë për 50%.

Ushqimi i cili dedikohet kundër akneve duhet të jetë i pasur me pemë, perime, drithëra, mish të zier, peshk dhe produkte nga deti. Ndërsa rekomandohet që sheqeri i rafinuar të shmanget maksimalisht.

Autorët e studimit pohojnë se këto njohuri mund t’u shërbejnë personave të cilët kanë lëkurë problematike.

[RaPSouL]

Uji ndihmon lirimin e testosteronit

Dehidrimi mund të ulë nivelin e testosteronit, kanë treguar studimet e fundit të publikuara në magazinën mjekësore Journal of Applied Physiology.

Personat sportiv të cilët kishin qenë të dehidruar para stërvitjeve kishin nivel më të lartë të kortizonit, hormonit të stresit i cili mund të jetë fajtor kryesor për uljen e nivelit të testosteronit.

Autorët e studimit preferojnë që më së shumti 4 orë para angazhimit fizik të pihet 6 ml ujë për çdo kilogram të peshës trupore (që do të thotë rreth gjysmë litre për një person që peshën 80 kg).

[RaPSouL]

Pemët dhe perimet mbrojnë nga kanceri i gjirit

Konsumimi i shpeshtë i pemëve dhe perimeve te femrat e trajtuara nga kanceri i gjirit mund ta zvogëlojë rrezikun e rikthimit të karcinomës, njoftojnë shkencëtarët amerikanë.

Rezultatet e botuara në revistën “Journal of Clinical Oncology” tregojnë se konsumimi i pemëve dhe perimeve në sasi shumë më të madhe sesa rekomandohen, mund ta zvogëlojë për 33% prirjen për shfaqjen e sërishme të tumorit në gji.

Shkencëtarët nga Universiteti i Kalifornisë shpjegojnë se kjo ndodh si rezultat i ndikimit të pemëve dhe perimeve në hormonin estrogjen, i cili është njëri nga faktorët pjesëmarrës në shfaqjen e kancerit të gjirit.

[RaPSouL]

Stresi armiku i zemrës

Një studim i ri pohon se stresi është shprehi e keqe që rrit rrezikun për paraqitjen e sulmit në zemër si edhe problemeve tjera kardiovaskulare.

Në studim janë analizuar ekspozimi ndaj stresit, karakteristikat trupore, konsumimi i alkoolit, pirja e duhanit, aktiviteti trupor dhe niveli i kolesterolit në gjak te 6.576 participantë.

Rezultatet kanë treguar se stresi rrit rrezikun për shfaqjen e sulmit në zemër për 50%, duhani për 41%, mungesa e aktivitetit trupor për 22%, ndërsa alkooli për 2%.

Duke u bazuar në këto rezultate, autorët e studimit kanë ardhur në përfundim se mënyra më e mirë për të pasur një zemër të shëndoshë është të luftohet stresi dhe shprehitë e këqija në mënyrë të kombinuar.

[RaPSouL]

Gërhitja harxhon kalori

Personat të cilët gërhasin harxhojnë dukshëm më shumë kalori gjatë fjetjes, bëjnë të ditur studimet e reja të zhvilluara në Universitetin e Kalifornisë.

Të dhënat e mbledhura nga 212 persona të hulumtuar tregojnë se personat me simptoma më të shprehura të apnesë (personat që gërhasin gjatë fjetjes) djegin mesatarisht 373 kalori në ditë më shumë se sa personat të cilët gërhasin butë.

Shkencëtarët besojnë se shkaktarët e kësaj janë ndryshimet në sistemin nervor të cilat i shkakton apnea.

Apneja shkakton edhe opstrukcion të rrugëve të frymëmarrjes në gjumë, ndërsa për pasojë është zvogëlimi i kualitetit të gjumit, përgjumja ditore si dhe rreziku i shtuar për hipertension dhe çrregullime në sistemin kardiovaskular.

Shkencëtarët shtojnë se në rrethana normale për të harxhuar 373 kalori është e nevojshme të stërvitet së paku gjysmë ore.

[RaPSouL]

Diabeti dhe kanceri

Një studim i ri tregon se personat me diabet të cilët vuajnë edhe nga kanceri, janë për 40% më të rrezikuar që të vdesin nga kanceri, në krahasim me personat të cilët kanë kancer, por nuk kanë diabet.

Këto rezultate kanë dalë nga analizat e 23 studimeve të realizuara në dhjetë shtete ku janë përfshirë 125.000 vullnetarë, ndërsa i kanë realizuar hulumtuesit nga Universiteti John Hopkins.

Shkencëtarët, të cilët studimin e tyre e kanë botuar në revistën “Journal of the American Medical Association”, pohojnë se kontrollimi më i mirë i diabetit rrit shpresën e mbijetesës nga kanceri.

[RaPSouL]

Vitaminat C dhe E dhe kanceri

Rezultatet e një studimi të rri kanë nxjerrë konkluzionin se vitaminat C dhe E nuk ndikojnë në ndalimin paraqitjes së kancerit.

Në studim kanë marrë pjesë 14.000 meshkuj të cilët kanë marrë rregullisht vitaminë C dhe E, ndërsa është përcjellë ndikimi i tyre në kancerin e prostatës dhe në paraqitjen e përgjithshme të kancerit.

Rezultatet e fituara pas tetë vitesh kanë treguar se vitamina E nuk ka pasur asnjë ndikim në zvogëlimin e rrezikut të shfaqjes së kancerit, dhe po ashtu edhe ndikimi i vitaminës C në mbrojtjen nga kanceri ishte shumë i vogël.

[RaPSouL]

Ekspozimi ndaj alergjenëve që në fëmijëri

Rekomandimet e deritanishme në lidhje me ekspozimin ndaj alergjenëve, kanë qenë që duhet të shmangen sa më shumë që është mundur.

Mirëpo, studimet e reja tregojnë se ekspozimi i hershëm ndaj alergjenëve mundëson zhvillimin e tolerancës.

Në një studim janë përcjellë 8.000 fëmijë prej të cilëve gjysma janë ekspozuar ndaj alergjenëve që në moshë nëntë mujore, ndërsa të tjerët nuk janë ekspozuar.

Mundësia e zhvillimit të alergjisë ka qenë gjashtë herë më e madhe te grupi i fëmijëve të cilët nuk iu janë ekspozuar alergjenëve.

Alergjenët janë proteina (në këtë rast, të pranishme në ushqim) të cilat nxisin proceset alergjike.

[RaPSouL]

Pushimi dhe lëngjet zgjidhja më e mirë kundër ftohjes

Marrja e sasive të mëdha të lëngjeve dhe pushimi shtesë është gjëja më e mirë të cilën duhet ta bëni nëse jeni prekur nga ftohja ose gripi, sëmundje që mesatarisht do të zgjatë nga 7 deri në 10 ditë.

Pushimi është një prej hapave më të rëndësishëm që do t’ju bëjë të ndiheni mirë. Të qëndruarit shtrirë do të kursejë energjinë tuaj në këtë periudhë kur keni rënie të munitetit, si dhe do të pengojë që ju të përhapni virusin tek njerëzit e tjerë.

Po ashtu, marrja e sasive të mëdha të lëngjeve do të zëvendësojë atë që keni humbur gjatë temperaturës së lartë të trupit. Lëngjet (sidomos ata të ngrohta) po ashtu lehtësojnë gërvishtjen që ndjeni në fyt si dhe ndihmojnë në hollimin e sekretit që keni në hundë, duke i liruar ato.

Çaji i nxehtë me limon, uji, lëngjet e frutave dhe supa, që të gjitha janë një zgjidhje e mirë për ju.

[RaPSouL]

Stresi para shtatzënisë dhe lindja parakohe

Femrat, të cilat para shtatzënisë kanë përjetuar ndonjë përvojë stresuese, janë më shumë të rrezikuara për të lindur fëmijët parakohe.

Ky konkludim bazohet në studimet e realizuara në Danimarkë, të cilat kanë analizuar më shumë se një milion femra në 24 vitet e fundit.

Rezultatet e botuara në revistën “Human Reproduction” tregojnë se afër 16% e femrave, të cilat kishin pasur ndonjë situatë stresuese deri në gjashtë muaj para shtatzënie, kishin lindur foshnjat e tyre para kohe.

[RaPSouL]

Pirja dëmton arteriet

Pijet alkoolike përmbajnë etanol, pjesa më e madhe e të cilit në organizëm shndërrohet në acetaldehid, që sipas studimeve të fundit shton rrezikun e prekjes nga sëmundjet kardiovaskulare.

Shkencëtarët kanë zbuluar se niveli i rritur i acetaldehidit nxit qelizat e sistemit imunologjik të ngjiten për muret e enëve të gjakut duke nxitur ndezje. Kjo sjellje, rrit rrezikun nga ateroskeloza.

Kjo është edhe një prej shumë studimeve që tregojnë se konsumimi i tepër përnjëherë, dhe jo sasia e përgjithshme e alkoolit e konsumuar, kanë ndikim të dukshëm në paraqitjen e sëmundjeve kardiovaskulare.

Pirje e tepruar, siç ndodh gjatë vikendeve ose festave, llogaritet marrja e së paku 5 pijeve për meshkuj dhe së paku 4 pijeve për femra brenda dy orëve.