shtypi boteror mbi Rugoven dhe Lindjen e Mesme

[tear-drops]

E përditshmja britanike Daily Telegraph, i ka bërë një përshkrim të shkurtër të dëshmisë së presidentit të Kosovës, Ibrahim Rugova në gjyqin kundër Sllobodan Milloshevicit.
Herën e fundit që u takuan, Rugova u çua në vilën e Millosheviçit në Beograd për t’i dhënë dorën atij dhe për të bërë thirrje para televizionit për ndërprerjen e bombardimeve ajrore – nis artikulli për të shtuar se
në rrëfimin e djeshëm, Rugova i paraqiste faktet e tij me një ton të qetë dhe të matur, ndërsa refuzonte të shikonte nga Millosheviçi.
“Beogradi qartësisht vendosi të shkatërrone Kosovën nëpërmjet dhunës dhe luftës” i tha Rugova tribunalit të Hagës për krimet e luftës në ish-Jugosllavi.
Për të siguruar një dënim, prokuroria duhet të japë prova se Millosheviçi dinte ose duhet të kishte dijeni për mizoritë në Kosovë.
Zoti Rugova, zyrtari më i lartë që ka dëshmuar në gjyq deri më tani, - vijon Daily Telegraph, pohoi se gjatë takimit të tyre në Beograd, ai i pati thënë Millosheviçit që forcat serbe po i përzinin shqiptarët nga shtëpitë e tyre. “ Së pari shpreha shqetësimin tim për bashkëatdhetarët e mi dhe i thashë se njerëzit po përziheshin nga Kosova nga policia, ushtria dhe grupet e tjera. I kërkova që të zbulonte se ku qëndronte problemi dhe të bënte diçka, Milosheviçi po degjonte”-tha Rugova.
Kur foli për “dëbimet, vrasjet” Millosheviçi “ fajësoi komunitetin ndërkombëtar për gjithë këtë”- shtoi më tej ai.
Asokohe shtrëngimi i tyre i duarve në televizion dhe apeli i zotit Rugova për dhënien fund bombardimit, çoi në akuzat se ai kishte bashkëpunuar me diktatorin, veçanërisht kjo pasi ai nuk qe në gjendje të thoshte qartë se deklaratat i kishte bërë nën presion – kujton Dejli Telegraf, për të raportuar se dje, presidenti i Kosovës tha se takimi ishte inskenuar nga Millosheviçi, për të përçarë rezistencën shqiptare ndaj regjimit serb. “Sigurisht ata menduan se do më kompromentonin politikisht dhe do të më diskreditonin në sytë e shqiptarëve të Kosovës”, tha zoti Rugova. “ Nuk ishte ajo çfarë unë dëshiroja, por këtë ma kërkoi Millosheviçi, duke më thënë se në të kundërt do të kisha pasoja. Nuk kisha çfarë të diskutoja. Unë isha i burgosur.”-citon Dejli Telegraf presidentin e Kosovës.
Millosheviçi e pyeti disa herë Ibrahim Rugovën nëse UÇK-ja ishte një organizatë terroriste, ndërsa Rugova iu përgjigj se “këto janë thëniet e gazetave, UÇK-ja ishte një organizatë, e cila iu përgjigj represionit dhe dhunës tuaj me qëllimin e fitimit të lirisë për popullin”, citon e përditshmja britanike për të përmbyllur:
Ish presidenti Jugosllav përballet me një total pre 66 akuzash midis të cilave ato për vrasjen e shqiptarëve etnikë dhe dëbimin e 800 000 të tjerëve nga Kosova.

Ndërkaq Washington Post vlerëson me tone pozitive deklaratën e sekretarit amerikan të Shtetit, Kolin Pauell, për mbajtjen e një konference ndërkombëtare për Lindjen e Mesme në Uashington.
Me propozimin e një konference të tillë, administrata Bush ka marë angazhime më të thella në një konflikt, impenjim që deri tani ishte përpjekur ta shmangte – konstaton Uashington Post. Në vetvete kjo është diçka e mirë e po ashtu forcimi i kuartetit diplomatik të Shteteve të Bashkuara, Bashkimit Evropian, Rusisë dhe Kombeve të Bashkuara, të cilat gjenden pas kësaj nisme. Deri tani është e qartë për shumicën e palestinezëve dhe izraelitëve, se ata nuk do jenë në gjendje t’i japin kurrë fund luftës së 18 muajve të fundit, pa një ndërhyrje energjike të Shteteve të Bashkuara dhe komunitetit ndërkombëtar. Duke e zgjeruar procesin me përfshirjen e shteteve arabe dhe ngritjen e një aleance të plotfuqishme për ta drejtuar atë, administrata Bush mundet të apelojë nëse jo tek politikanët, tek publiku i të dyja krahëve – vëren Uashington Post në editorialin e sotëm.