Bashkia e Tiranës, në funksion të mbrojtjes së mjedisit dhe shtimit të hapësirave të gjelbra në kryeqytet, prezantoi nismën “1 Qytetar - 1 Pemë”, në bashkëpunim me Bankën Popullore, pjesë e grupit ndërkombëtar Société Générale, e cila aderoi në këtë nismë duke i dhuruar Bashkisë 170 pemë për 170 punonjësit e saj në Tiranë.
Duke prezantuar këtë nismë, Kryebashkiaku Edi Rama u shpreh se: “Kjo është dallëndyshja e parë e programit “1 Qytetar-1 Pemë” dhe këtë dallëndyshe e sjell “Société Générale”, e cila i dhuron qytetit 170 pemë për 170 punonjësit e saj. Ky është një program i cili synon që t’u japë të gjitha sipërmarrjeve të qytetit tonë, mundësinë për të bërë të njëjtën gjë dhe njëkohësisht përmes sipërmarrjeve të qytetit tonë të rrisë në mënyrë të ndjeshme përmasën e gjelbër të qytetit dhe vetëdijen se sa më i gjelbër të jetë qyteti ynë, aq më e shëndetshme është e ardhmja e fëmijëve tanë”
Ndërkohë, i njëjti aktivitet në bashkëpunim me bashki të tjera po kryhet edhe në 29 qytete të tjera ku është e pranishme Banka Popullore me degët e saj, nën moton “1 Punonjës-1 Pemë”. Ky kontribut direkt dhe domethënës në shtimin e sipërfaqeve të gjelbra në Tiranë dhe është pjesë e strategjisë së Përgjegjësisë Sociale të Grupit Société Générale.
23.02.2008
Krijoni Kontakt