Shteti që tradhton shtetasit e tij

[Beqari002]

KOMENT

Shteti që tradhton shtetasit e tij


Andrea STEFANI

Deri kur shteti shqiptar do të vazhdojë të lërë në baltë shtetasit e tij? Deri kur shqiptari do të ndihet i braktisur para krimit, korrupsionit dhe mashtruesve? Ka disa muaj që po përkundemi nga qetësia e marrëveshjes Nano-Berisha. Protesta, shtylla tensioni të rrëzuara, shishe me benzinë, ujsjellësa të hedhur në erë, kërcënime dhe sharje masive me "shporrje" nuk ka më. Në sipërfaqe duket aq qetë sa edhe të huajt (ata gjithmonë "gënjehen" nga sipërfaqja) na përgëzojnë dhe na premtojnë asocim. Kjo qetësi na bën të pyesim gjithë shpresë: mos vallë u ngrit shteti?

Duam të themi "po" por nuk mundemi. Dhe tani janë kullat Hawai që na pengojnë.

Konflikti i tipit si ky për ndërtimet e El-Sayed, nuk është i ri. I vjetër sa tranzicioni shqiptar, ai vetëm rinovohet në forma të reja dhe më e fundit, është kjo e dy kullave. Eshtë i njejti mekanizëm idiot. Strukturat e shtetit heshtin, verbohen, shurdhohen nga korrupsioni dhe rryshfetet e mashtruesve. Këta ngrenë piramida financiare, importojnë dhe shesin mallra të skaduara, ndërtojnë apartamente pa leje dhe me cilësi të dobët. Dhe të gjitha këto ja u shesin njerëzve. Shumë njerëz kanë humbur paratë në piramida, shumë janë helmuar nga ushqimet, shumë kanë blerë apartamente me cilësi të keqe e ndoshta edhe me radioaktivitet.Dhe kanë paguar blerjen e tyre shumë shtrenjt.

Por befas, pas 10 vjet gërrhitje, shteti zgjohet dhe vendos të veprojë. Sytë e tij ende të përgjumur, ndalen mbi El-Sajedin. Kjo sepse sepcialistët thonë që ndërtimet e tij janë pa leje dhe me cilësi të dobët. Të shkatërrohen kullat! - urdhëron shteti. Eshtë një rrufe në qiellin pa re të botës së mashtrimit. Qytetarët që kanë paguar për apartamentet, marrosen. Eshtë jeta, gjaku i tyre i investuar atje që rrezikon të shndërrohet në gërmadhë. Ku ishte shteti gjer më sot? - pyesin ata. Pse na la të kontraktojmë dhe të parapaguajmë këtë mashtrues? Përse noterët nuk na treguan se ai nuk ishte në rregull me gjithçka?

Shteti ka shumë të drejtë të ndërhyjë kundër ndërtimeve pa leje. Por ai po ndërhyn shumë vonë dhe pikërisht kjo vonesë, ka bërë që shumë qytetarë të zhyten thellë në kënetën e mashtrimit. Pikërisht për këtë shteti nuk mund të tregohet cinik duke i treguar qytetarëve ftohtë derën e gjykatës. Shteti duhet të marrë energjikisht të gjithë masat - brenda dhe jashtë shtetit - që ata të dëmshpërblehen. Ai nuk mund t'i trajtojë qytetarët si palë në mashtrim. Ata janë viktima edhe sespe shteti është fajtor me reagimin e tij të vonuar, fajtor që nuk e ndaloi El-Sajedin që kur hapte themelet, apo të paktën kur ngriti katin e 1, të 2, të 3, të 4...

Po përse u vonua shteti duke lejuar hapësirë që shkelja e ligjit të bëhej me shumë kate? Ngaqë ata pak inspektorë që ka nuk e panë ose nuk ju ra rruga për dy vjet rresht andej nga Selita? Vështirë ta besosh. Ka më shumë të ngjarë që "shteti" e dinte por nuk donte. Sespe ndërtimet pa leje janë një biznes që po vazhdon me ritme galopante prej shumë vitesh dhe se mbrapa tij qëndrojnë shpesh njerëz të pushtetshëm. Janë pikërisht këto interesa korruptive dhe jo mungesa e inspektorëve, që e kanë penguar shtetin të veprojë.

Nuk është hera e parë që ndodh kështu. Dhe nuk duhet të habitemi. Qeveritarë e parlametarë shqiptarë, në shumicë, nuk udhëhiqen nga interesi publik por vetëm nga ai i tyri, privati. Ky është thelbi i atij që shajmë me emrin Korrupsion. Ky është ai thelb që e vonoi edhe Parlamentin shqiptar të vepronte në kohë kundër piramidave finaciare. Shumë parlamentarë kishin investuar paratë në piramida dhe trembeshin se një denoncim i tyre do të bënte që t'i humbisnin. Ata heshtën për të mbrojtur interesat e tyre private, duke i shërbyer thellimit të tragjedisë publike. Ajo heshtje, që përgatiti Marsin e Zi '97, ishte tradhëtia e parë që shteti i bëri qytetarëve të tij dhe vetes. Dhe kur piramidat ranë, qeveria ju tha qytetarëve: e gjithë kjo ishte si një lojë bixhozi, vetë e keni fajin që hodhët paret në të!

Dhe ja sot gati e njeta skenë. Përsëri turma qytetarësh të mashtruar. Këtë herë jo për piramida por për "kulla". Po përse do të shkatërrohen dy kullat? Nuk besojmë thjesht sepse janë pa leje. Po të qe kështu duhet të shkatërroheshin edhe kush e di sesa kulla të tjera të ngritura në Tiranë. Ato janë gjithashtu pa leje. Por dy kullat në fjalë do të shkatërrohen sepse - kështu thuhet të paktën - janë ndërtuar me cilësi të dobët dhe rrezikojnë jetën e banorëve që mund të strehoen në to. Shteti duhet ta bëjë një shkatërrim të tillë sot për të shpëtuar jetët e njerëzve nga një rrezik i nesërm. E megjithatë nuk mund të mos pyesim: në cilin vend të botës është blerësi ai që verifikon vetë cilësinë e ndërtimit, të betonit, të hekurit, të qëndrueshmërisë së nëntokës ku ngrihet godina? A nuk janë struktura shtetërore që garantojnë cilësinë e mallit apartament, sikundër edhe cilësinë e mallrave të tjera si gjalpi, djathi, mishi apo vera? Ja përse shteti mban përgjegjësi dhe ai duhet të kujdeset që qytetarët e tij të dalin të pa lagur nga ky mashtrim dhe mashtruesit të ndëshkohen. Shteti nuk mund të bëjë Pilatin dhe tu thotë përsëri qytetarëve: vetë e nënshkruat! Kur një qytetar shtrohet në spital i helmuar nga alkooli metilik i tretur në pije, shteti nuk mund t'i thotë dot atij: vetë e ke fajin, nuk të thashë unë ta pije atë gotë! Pra nëse do të ndodhë përsëri kështu, nëse qeveria do të lajë duart me padijen dhe pafuqinë e qytetarëve, atëhere ne do të kuptojmë se shteti, pavarësisht nga tangoja Nano-Berisha, nuk ka bërë asnjë hap para nga fillimet e tranzicionit apo marsi '97. Do të kuptojmë se qytetari është i braktisur në një botë ku mbretëron vetëm liria e mashtrimit. Shteti nuk e mbron por i thotë me cinizëm: hap sytë! Por puna është se ka shumë mashtrime që nuk kapen dot me sy. Se nuk është fjala për një palë këpucë që i rrotullon në duar dhe ja përkul me gishta cilësinë e lëkurës. Është fjala për gjëra ose shumë të imta si për shembull, fekalet në ujin e paketuar ose edhe shumë të mëdha, si cilësia apartamenteve Haëai. Këto qytetari nuk i verifikon dot sikur edhe t'i plasë sytë.

Shteti nuk është debati shterpë politik. Shteti është tërësia e qytetarëve që kanë lidhur një kontratë me njeri-tjetrin për t'ju nështruar disa rregullave me qëllim që të përfitojnë ca liri e të drejta. Ndër këto të drejta, nga më themeloret është prona. Qytetarët zgjedhin ca përfaqsues që quhen deputetë dhe paguajnë ca taksa për disa punonjës publikë (që quhen ministra dhe kryeministra) që duhet të shërbejnë pikërisht për të mbrojtur të drejtat, pronën e qytetarëve. Ky është detyrimi i parë i shtetit. Dhe kur prona e qytetarit nuk mbrohet, atëhere shteti nuk ekziston. Sepse një shtet i vërtetë është në radhë të parë një mburojë për qytetarët e vet. Në të kundërt, ai mund të ketë flamur, president, fasada ministrish, burokraci dhe politikanë që nuk shahen më mes tyre, por shtet nuk është. Eshtë vetëm një fasadë prapa së cilës hedhin valle minjtë e korrupsionit duke thurur kurthe për qytetarët.

Rizgjimi i ligjit është një shpëtim. Por ai nuk mund të vijë kurrë si një ndëshkim për qytetarët viktima por vetëm për mashtruesit e viktimave. Shteti nuk bëhet më i fortë kur në themelet e tij bëhen kurban "për arsye shtetërore" interesat e qytetarëve të mashtruar. Asnjë arsye shtetërore nuk mund të jetë justifikim për këtë. Sa herë që ligji të vonojë shteti duhet të shohë aty përgjegjësinë e vet, fajin e vet. Ndaj ai nuk duhet ta lerë dëmin "kopil" në dyert e qytetarëve pa shtëpi duke ja u nxirë jetën dhe shpresat "në emër të ligjit" që "harroi" ta zbatonte për shumë vjet.
----------------------------
--------------------------------
Oj sharki e lehte si era , a ka ardhur ne Shqiperi pranvera?

[dodoni]

Ma ha mendja se tani e tutje, per derisa kemi gazetar si Andrea dhe te tjeret dhe edhe nga forcimi ekonomik i shtetit dhe politik i faktorit shqiptar edhe shteti do te vihet me shume ne interes dhe mbrojtje te shqiptareve jo vetem ne Shqiperi dhe trojet shqiptare por edhe kudo ne bote.
Te gjitheve qe punojne per kete gje ju uroj shume suksese dhe arritje te qellimit sa me shpejte qe eshte e mundur kurse te gjithe te tjeret i porosis qe te punojne sa me shume ne kete drejtim.
Te gjitha behen dhe do te behen me pune dhe hapa pas hapi
Pshd.
Dodoni
Oj sharki e lehte si era, ka ardhur dhe do te vijne me miliona pranvera ne Shqiperi si gjithmone (kane nderruar kohet tani dhe ndryshe kendohet kjo kenge)