Shkruar nga Elisabeta Dosku
Tashmë një dyshimi penaliteti mund të merret në mënyrë elektronike pa qenë nevoja të qëndrosh në radhë para institucioneve. Kryeministri Berisha inauguroi dje, në ambientet e Ministrisë së Drejtësisë, sistemin e certifikatave elektronike të gjendjes gjyqësore. Në deklaratën e tij, kryeministri vuri në dukje edhe një herë prioritetet e vitit në vijim. Sipas tij, dy janë objektivat kryesore të këtij viti, privatizimet e mëdha edhe qeveri elektronike. Dëshminë e penalitetit e kërkojnë 25 institucione, dhe për rrjedhoje vetëm këto institucione mund ta përdorin, duke qenë të lidhur me serverin qendror. Kryeministri Berisha ishte i shoqëruar edhe nga ministri i Drejtësisë, Enkelejd Alibeaj.
Funksionimi
Çdo person i interesuar për një dokument të posaçëm, një pasaportë, apo një vend pune, duhet patjetër të tërheqë një dëshmi penaliteti. Dëshmitë e penalitetit janë nga dokumentet, të cilat kërkohen nga institucionet zyrtare shqiptare dhe ndërkombëtare. Marrja e tyre në mënyrë të drejtpërdrejtë kërkon kohë dhe krijon radhë para institucionit përkatës. “Deri para instalimit të këtij sistemi dixhital, qytetarët shqiptarë përjetonin radhë të gjata e të mundimshme për të marrë një dokument për të cilin ata kanë të drejtë ligjore ta kenë”, u shpreh kryeministri. 25 institucioneve publike apo private, vendase apo të huaja, u jepet e drejta e kodit të hyrjes dhe e drejta e marrjes së të dhënave në mënyrë të drejtpërdrejtë nga regjistri elektronik, duke garantuar teknikisht pamundësinë e manipulimit të këtij regjistri, nëpërmjet sistemit elektronik fingerprint. Në këtë mënyrë, çdo qytetar mund të dorëzojë formularin e plotësuar në institucionin ku paraqiten për problemin e tyre, dhe 25 institucionet, të cilat kërkojnë këtë certifikatë janë të lidhura me serverin qendror.
Deklaratat
Duke e cilësuar moshë digjitale për Shqipërinë, kryeministri Berisha inauguroi dje sistemin e certifikatave elektronike të gjendjes gjyqësore. ”Sistemi i mëparshëm krijonte radhë të gjata, të mundimshme dhe hordhi sekserësh”, u shpreh Berisha. Sipas tij, marrja e dëshmisë penale në këtë mënyrë eliminon abuzimet e shumta dhe radhët e qytetarëve nëpër sportelet e institucioneve.
“Janë 25 institucione, të cilat e kërkojnë këtë certifikatë dhe të gjitha këto institucione janë të lidhura me serverin që ne pamë sot bashkërisht, në mënyrën më hermetike, më sekrete. Ju e patë që aktivizimi i serverit bëhej me shenjat e gishtërinjve të punonjësit dhe kjo bën të mundur që askush të mos mund të futet në të dhënat personale”, u shpreh shefi i qeverisë. Edhe ministri i Drejtësisë, Enkelejd Alibeaj e konsideroi këtë si një hap të madh drejt dixhitalizimit të shërbimeve.
Enkelejd Alibeaj
“Nuk do t'u kërkohen më individëve këto lloj procedurash, por do të krijohen thjesht dhe vetëm nga ana e institucioneve shtetërore, ndërsa qytetarët do të mjaftohen vetëm me vetëdeklarimin. Qytetarët trajtohen tashmë në mënyrë më ligjore, më fisnike, ashtu siç edhe u takon, duke mos u krijuar asnjë barrë dhe procedura korruptive
Sali Berisha
Janë 25 institucione, të cilat e kërkojnë këtë certifikatë dhe të gjitha këto institucione janë të lidhura me serverin që ne pamë sot bashkërisht, në mënyrën më hermetike, më sekrete. Ju e patë që aktivizimi i serverit bëhej me shenjat e gishtërinjve të punonjësit dhe kjo bën të mundur që askush të mos mund të futet në të dhënat personale”
Institucionet përfituese
1. Këshilli i Ministrave
2. Ministria e Mbrojtjes
3. Drejtoria e Përgjithshme e Doganave
4. Këshilli i Lartë i Drejtësisë
5. Garda e Republikës
6. Shërbimi Informativ i Shtetit
7. Min. e Punëve Publike, Transportit
8. Komisioni Qendror i Zgjedhjeve
9. Kabineti i Presidentit
10. Kuvendi
11. Drejtoria e Përgjithshme e Burgjeve
12. Ministria e Financës
13. Prokuroria e Përgjithshme
14. Drejtoria e Përgjithshme e Tatimeve
15. Departamenti i Administratës Publike
16. Ministria e Punës,
17. Banka e Shqipërisë
18. Ministria e Brendshme
19. Interpol Tirana
20. Drejtoria e Përgjithshme e Policisë së Shtetit
21. Ministria e Ekonomisë
22. Ministria e Jashtme
23. Përfaqësia e Bashkimit Evropian
24. Përfaqësia e Këshillit të Evropës
25. Përfaqësia e NATO-s
Tirana Observer
Krijoni Kontakt