Sipas burimeve policore-shetit i lire rrugeve te Tiranes,por denohet ne mungese

[Beqari002]

Ferdinand Kamberi mashtroi 14.955 kreditorë dhe ka një borxh prej 64.610.369 dollarësh amerikanë

Gjykata: 18 vjet burg për Kamberin

Ish-presidenti i piramidës "Kamberi", u gjykua dhe u dënua në mungesë

Alma Çuka
TIRANË - Dje në orët e para të mëngjesit, gjyqtari Fehmi Petku dënoi me 18 vjet burg në mungesë të pandehurin Ferdinand Kamberi, për akuzën e vjedhjes me anë të mashtrimit. Kjo masë dënimi erdhi pas kërkesës së bërë nga prokurori Albert Demirneli, i cili e deklaroi fajtor të pandehurin dhe kërkoi për të dënimin me 20 vjet burg. Ndërsa avokati i caktuar kryesisht nga gjykata, Pelivan Luçi, kërkoi për klientin e tij (të cilin nuk e ka takuar asnjëherë, madje as ka komunikuar me familjarët e tij) pafajësi. Luçi tha dje para gjykatës së në bazë të nenit 27 të Kushtetutës, askush nuk mund të dënohet penalisht për një detyrim kontraktor. Për Kamberin në gjykatë u zhvilluan 36 seanca gjyqësore.
Kamberi
Kamberi akuzohet se ka mashtruar 14 955 kreditorë dhe ka një borxh që kap vlerën e 6.373.166.862 lekë ose 64.610.369 USD. Aktivitetin e tij Kamberi e ka nisur fillimisht në qytetin e Vlorës. Në datë 15 prill 1994 është regjistruar si person juridik në qytetin e tij të lindjes Vlorë, si Shoqëri me Përgjegjësi të kufizuar dhe si ortak i vetëm. Qendrën e shoqërisë Kamberi e ka regjistruar në Vlorë dhe me kohëzgjatje më shumë se dhjetë vjet. Kapitali fillestar me të cilën e ka regjistruar shoqërin e tij Kamberi ka qenë 1.500 000 mij lekë. Ndërsa objekti i shoqërisë ishte komplekse blegtorale deri bar -bufe dhe restorante, transport udhëtarësh interurban dhe mallra të ndryshme, tregtim mallrash me shumicë e pakicë. Sipas akuzës, Kamberi më pas e ka regjistruar shoqërinë e tij edhe në Gjykatën e Tiranës në datë 7 nëntor 1994 dhe ka bërë shtesë në objektin e shoqërisë duke shtuar edhe tregtinë e karburanteve.
Akuza
Prokurori tha në konkluzionet e tij se në fund të vitit 1994 shoqëria "Kamberi""shpk rezulton me aktivitet mjaft të vogël dhe vlera e bilancit për këtë vit ka qenë 7. 583 355 lekë. Ndërkohë, Kamberi nuk i ka rezistuar dot tundimit të huamarrjes. Në korrik të vitit 1995 ai ka filluar aktivitetin e huamarrjes dhe vlerat më të mëdha të këtij aktiviteti janë evidentuar në gjysmë e dytë të vitit 1996. Në 23 janar të viti 1997 veprimtaria huamarrëse e Kamberit u mbyll me ligj nga parlamenti. Sipas akuzës, Kamberi të gjitha paratë e grumbulluara i derdhte në arkën e thesarit në Vlorë. Gjatë veprimtarisë së tij Kamberi ka patur interesa mjaft të larta. Kështu interesat e premtuara luhateshin nga 8-10% ndërsa afati për një depozitë ishte 3 - 6 muaj. Sipas prokurorit, persona të ndryshëm kanë arritur të marrin interesa deri në 10 % brenda një dite kur depozitat e tjera kishin një afat pagimi të interesave jo më shpejt se një herë në muaj. Kamberi ka shpenzuar miliona lekë për të bërë reklama dhe sponsorizime. Ndërsa deri në korrik të vitit 1996 Kamberi nuk ka mbajtur me saktësi me anë të ekonomistëve vlerën e borxhit të tij. Një nga magësitë e kësaj firme të cilën e deklaroi prokurori ishte edhe fakti se "Kamberi" nuk ka zbatuar ligjin mbi kontabilitetin. Regjistrimit në këtë fushë kanë qenë të pjesshme.
Asetet
Kamberi ka fshehur të gjithë aktivitetin e tij bankar që nga viti 1994 deri në janar të vitit 1997 kur aktiviteti i tij u mbyll me ligj. Prokurori nxori dje para gjykatës edhe faktin se Kamberi ka tërhequr nga arka e thesarit 247. 671.128 lekë dhe u ka dhënë para pa kthim personave të tretë në forma të ndryshme duke cënuar interesin e kreditorëve. Akuza tha dje se shoqëria dispononte një vlerë kontabël të aseteve në masën 686 965 561 lekë me të cilat ajo do të mund të shlyente 10 % të vlerës së borxhit. Vetë i pandehuri nuk ka qenë i pranishëm në sallën e gjyqit për t'u mbrojur në lidhje me akuzën e mashtrimit në shuma të mëdha. Pas largimit, që prej vitit 1997 Kamberi është denoncuar në prokurori nga kreditorët e tij. Akuza tha se Kamberi i mashtronte kreditorët duke u thënë se kishte asete të mëdha dhe me vlerën e tyre ai mund të shlyente huamarrjen. Burime të policisë së Tiranës u shprehën se gjatë kohëve të fundit Kamberi është parë të shëtisë i lirë rrugëve të kryeqytetit.
-------------------------
-----------------------------