Welcome to Myzeqeja University!

[Davius]

Drini Imami

Është e dhimbshme të ndjekësh nga afër zhvillimet dhe "produktet" e tranzicionit të gjatë dhe kaotik në arsimin shqiptar, të të gjitha niveleve. Universitetet duhet të ishin paraprijëse të zhvillimit dhe progresit, por për fat të keq janë shndërruar në vatra korrupsioni dhe shterpësie intelektuale, shkencore dhe shoqërore. Në vend që ato të luanin rol deciziv në reformë dhe përparim, moralisht dhe profesionalisht, ato janë të zhytura në kapsllëk inovacioni dhe diare paudhësish dhe dembelizmi. Dukuritë e mitëmarrjes dhe formave të tjera të shëmtuara të abuzimit pranohen gjerësisht si normalitete karakterizuese të jetës universitare, ndërsa fjala shkencë tingëllon e huaj.

Pikërisht në kushtet e një krize të tillë alarmante të sistemit të arsimit, që duket sikur nuk alarmon askënd në "shtresat e larta të këtij vendi", vjen një reformë e stërtrumbetuar e qeverisë Berisha, ajo e universitarizimit të mbarë Shqipërisë. Diku, duke rritur numrin e studentëve në universitete ekzistuese, diku duke licencuar universitete private nga Konispoli deri në Vermosh, dhe pse jo duke hapur universitete të reja publike si ai i shumëpremtuar i Myzeqesë (Myzeqeja University). Brenda pak vitesh, shtohet numri i universiteteve dhe studentëve me një dinamikë që do e kishte zili jo vetëm Evropa, por edhe Amerika.

Ndërsa në Suedinë e largët nordike është hapur një debat kohët e fundit për të ulur numrin e universiteteve. Kancelari i ri për universitetet në Suedi, Anders Flodström, ka provokuar një debat me deklaratën e tij, ku sugjerohet që numri i universiteteve në këtë vend të ulet nga 16 në 5. Madje, profesori i mirënjohur suedez, Bo Rothstein, propozon që të mbyllet Universiteti i Uppsalës, një ndër më prestigjiozët në Suedi dhe Evropë. E gjitha kjo me synim rritjen e cilësisë dhe mbrojtjen e parimeve në bazë të së cilave duhet të funksionojnë universitetet. Ky debat pason një debat tjetër të hapur më parë në lidhje me një plan të qeverisë pak kohë më parë, për të rritur numrin e studentëve me rreth 10% në një hark kohor disavjeçar, plan ky që u kundërshtua fort nga akademikë, me frikën se rritja e sasisë mund të dëmtonte cilësi. Të gjitha këto debate dhe shifra lidhen me një vend që ka pothuajse trefishin e popullsisë së Shqipërisë dhe çka është më e rëndësishme, një nivel shumë herë më të lartë zhvillimi ekonomik dhe financimi universitetesh. Vlen shembulli i Suedisë, meqenëse është konsideruar si një ndër vendet më të zhvilluara dhe reformatore, duke qenë edhe e para në Evropë që përqafoi epokën e internetit dhe teknologjisë së informacionit. Sidoqoftë, Suedia është vetëm një nga shembujt e shumtë.

Sllovenia, një vend i ngjashëm me Shqipërinë për nga përmasat dhe background-i historik, numëron vetëm 3 universitete publike. Sllovenia karakterizohet nga një ekonomi dinamike dhe është ndër vendet me të zhvilluara në grupin e anëtarëve të rinj të BE. Vitin e shkuar, pas shumë pune u vendos që të hapej një universitet i katërt, privat, por si fryt i bashkëpunimit me sektorin publik dhe me financim të përbashkët. Në Slloveni, reforma arsimore konsiderohet si relativisht e ngadaltë dhe planifikohet hapja e universiteteve të reja në të ardhme, për të cilat sigurisht që duhen vite të tëra për t‘u projektuar dhe krijuar në kushtet e një vendi normal.

Sigurisht që mund të thuhet se nëse Suedia do drejtohej nga udhëheqësit tanë legjendarë akademikë (e kam fjalën për Prof. Dr. Politikanët Albanicum), numri i universiteteve do të trefishohej brenda një mandati qeverisës (duke pasur parasysh që për fat Suedia është pak më e zhvilluar se Shqipëria). Në rastin e Sllovenisë, qeveritarët tanë mbase do mjaftoheshin vetëm me dyfishimin e universiteteve si fillim, duke marrë shkas nga zhvillimi jo aq i madh sa Suedia.

Shqipëria, apo më saktë qeveria shqiptare, ndjek një strategji ambicioze, atë të fenerit ndriçues të Evropës. Mjafton një VKM për të hapur universitete të reja, për të rritur apo dyfishuar numrin e studentëve. Ndërsa numrat rriten në mënyrë galopante, koncepti, madje dhe fjala cilësi, janë bërë gjithmonë e më të huaja për universitetet shqiptare. Absurditet dhe çoroditje pa fund... Welcome to Myzeqeja University!

GAZETA SHQIP

[EdiR]

Davius,
Artikull shume i mire ai i joti por pak si pa vend per kushtet e Shqiperise. Me te vertete qe nuk ka nje strategji te qarte dhe eksperience ne kete drejtim por eshte gje pozitive qe po lejohet hapja e ketyre universiteteve. Ne sistemin e ekonomise se lire do te jene vetem ato me te mirat qe do ti rezistojne kohes.
Per mendimin tim, Shqiperi ka nje nivel te ulet te njerzeve te edukuar dhe kjo besoj eshte arsyeja me e madhe per problemet e shoqerise Shqiptare. Eshte me mire te kemi njerez te edukuar qe bejne pune te rendomta sesa njrez te paeduakuar qe drejtojne vendin. Shqiperia ka akoma nje ekonomi te dobet qe te mund te imponoje nje universitet te vetem, dhe duke qene afer mendoj se shume njerez ndjehen me te lehtesuar kur vajza e tyre shkon aty.
Kalofshi mire kudo qe jeni dhe per mendimin time nuk ka nje gje te tille si shkolle e keqe.
Ed