Një televizion kombëtar në Sofje pretendon për pakicë bullgare në vendin tonë: Duam shkolla e tekste. Videoja hidhet në YuoTube
Nga Bullgaria hidhet teza se në Shqipëri ekziston një minoritet bullgar, numri i të cilëve sipas tyre është rreth 100 mijë. Në fakt, kjo nuk është një deklaratë e Sofjes zyrtare, por në këtë rast kemi të bëjmë me një televizion kombëtar bullgar, i cili ka transmetuar në edicionin qendror të lajmeve të orës 20:00 të datës 22 maj të këtij viti, një kronikë mbi minoritetin e saj në Shqipëri, kronikë e cila është hedhur në internet, në sitin e famshëm "yuotube". Pjesa ku flitet për pakicën bullgare në vendin tonë, prej 2 minutash e 25 sekondash është hedhur edhe në faqen e njohur të youtube-it me titullin e madh "100 mijë bullgarë në Shqipëri". E vërtetë apo jo, shifra e dhënë mbi pakicën sllave në vendin tonë, në reportazh hidhet pretendimi se minoriteti bullgar në Shqipëri kap një shifër të tillë, ndërkohë që nuk ka ende një përgjigje zyrtare të diplomacisë shqiptare në lidhje me këtë debat se sa në të vërtetë është numri i pakicave bullgare në Shqipëri. Sipas gazetares, Maria Ivanova dhe bashkëpunëtorit të saj, Vencizar Milenkov, në Shqipëri ka kolegje dhe shkolla për një grup minoritetesh si turke, greke dhe maqedonase, ndërkohë që shkolla për të mësuar në gjuhën bullgare nuk ekzistojnë, edhe pse numri i bullgarëve që jetojnë në Shqipëri shkon afërsisht në 100 mijë. "Pushteti në Shqipëri, akoma nuk e ka njohur ekzistencën e bullgarëve në tokat e tyre, por gjithsesi, nga çdo strukturë e lartë shtetërore bullgare kjo është çështja e parë, e cila ngrihet fuqishëm", është shprehur spikeri i lajmeve të një televizioni kombëtar bullgar.
Mungesa e shkollave
Bullgaria kërkon hapjen e shkollave bullgare në zonat ku ka minoritet bullgar. Sipas të dhënave, minoriteti sllav jeton në zona të njohura si Prespa, Shishtaveci dhe Golloborda. Gazetarja e cila ka vizituar këto zona në pranverën e këtij viti është shprehur se "hapja e shkollave me literaturë bullgare në zonat ku ka minoritet sllav, është dëshira e 100 mijë bullgarëve të lindur në Shqipëri, të cilët jetojnë atje për më shumë se 1 mijë vjet më parë". Në Shqipëri, gjuha që përdorin ata që konsiderohen si minoritet, është bullgarishtja e vjetër. Gazetarja Ivanova në kronikën e saj është shprehur se "Për këta njerëz, gjuha shqipe është gjuhë e huaj, për këtë ata flasin në gjuhën bullgare dhe këtë gjuhë ua përcjellin edhe fëmijëve të tyre".
Në mungesë të literaturës bullgare, ata vetëm flasin gjuhën e nënës së tyre (bullgarishten e vjetër) dhe nuk shkruajnë në kirilica ashtu siç shkruhet gjuha bullgare, por në latinisht. Banuesi i këtyre zonave, i cili e konsideron veten bullgar me origjinë, Qazim Kurgi, me profesion mjek shprehet se "bullgarishtja është gjuha jonë, megjithëse pa bërë shkollë e kemi mësuar atë vetëm duke dëgjuar gjuhën e nënës". Sipas Kurgit, "shkruajmë si shqiptarë, por jemi bullgarë. Nuk kemi as dokumente bullgare". Vlen të theksohet se procedura për të marrë pasaportën bullgare është e ndërlikuar dhe një person që aplikon për një dokument të tillë duhet të presë afërsisht tre vjet. Për këtë, gazetarja bullgare u shpreh se "e vetmja gjë që ata duhet të bëjnë është të presin dhe të luftojnë për një qëllim që të tregojnë se janë bullgarë". Në faqen e youtube-it gjendet gjithashtu edhe deklarata e kryetarit të shoqatës së Gollobordës për Shqipërinë, Haxhi Pirushi, i cili thotë se "bullgarët që jetojnë në Shqipëri janë më patriotë se ata që jetojnë në Bullgari".
GAZETA SHQIP
Ja edhe videoimazhet:
Krijoni Kontakt