Shkroi shqip fjalët mbi vakëf, kisha ndalon punimet
14/07/2007 - 09:55
• Trëndafile Visha
Gjirokaster - Një tjetër incident është shënuar në Gjirokastër, që ka si protagonist klerin ortodoks. Pas skandalit të zhvarrimit të eshtrave në fshatin Kosinë të Përmetit, që daton më shumë se një vit më parë, dhespoti Dhimitris i Gjirokastrës ka urdhëruar ndërprerjen e punimeve për ndërtimin e një vakëfi që po investohet nga një shqiptar në fshatin Terihat të këtij rrethi. Ndonëse, biznesmeni Kiço Thimjo kishte siguruar leje nga vetë Këshilli i Kishës për ngritjen e vakëfit (vend i shenjtë), dhespoti që është njëkohësisht anëtar i këtij këshilli ka ndërruar mendje. Ai është penduar për lejen e dhënë, në momentin që ka konstatuar se objekti i kultit ishte në përfundim e sipër. Ajo që e ka irrituar më shumë dhespotin e Gjirokastrës, ka qenë fakti se punonjësit që po ndërtonin vakëfin kanë gdhendur në gur emrin e biznesmenit shqiptar Kiço Thimjo. Jo vetëm kaq, por Dhimitris ka pezulluar nga puna dhe priftin e komunës së Dropullit të Poshtëm, Spiro Bashën, pasi ka "lejuar" ndërtimin e vakëfit në fshatin e banuar nga minoritarë. Paralelisht me reagimin e dhespotit ka ardhur edhe reagimi i krerëve të komunës së Dropullit të Poshtëm, të cilët kanë shkuar në vendin e shenjtë dhe kanë urdhëruar ndërtuesit që të ndërpresin punimet. Ata e kanë justifikuar kërkesën e tyre duke u shprehur se biznesmeni nuk kishte leje. Ndërkaq, Thimjo pohon për "Gazeta Shqiptare", se ka investuar 500 mijë lekë për ndërtimin e vakëfit dhe këtë e ka bërë në shenjë humanizmi kundrejt besimtarëve të zonës por edhe shumë besimtarëve të tjerë të feve të ndryshme.
VAKËFI
Bri rrugës nacionale Gjirokastër-Kakavijë dhe në afërsi të fshatit Terihat ndodhet një vend i shenjtë, ku besimtarë të komunës së Dropullit të Poshtëm por dhe besimtarë të tjerë të feve të ndryshme shkojnë e ndezin qirinj e i luten Zotit për mirësi. Afër vakëfit ushtron aktivitet privat një prej biznesmenëve më të njohur të zonës, Kiço Thimjo. Nisur nga fakti se vendi i shenjtë frekuentohet nga shumë besimtarë, Thimjo ka vendosur të rindërtojë vakëfin me të ardhurat që siguronte nga aktiviteti i tij. Një vit më parë ai kishte siguruar lejen përkatëse nga Këshilli i Kishës së Gjirokastrës. Pas dhënies së lejes, biznesmeni shqiptar ka nisur punën për ndërtimin e objektit të kultit. Në momentin që punimet ishin në përfundim e sipër është shënuar dhe përplasja me dhespotin Dhimitris. Ka qenë një banor i fshatit Terihat dhe pikërisht Vangjel Vaso ai që është ankuar tek dhespoti, duke shprehur indinjatën e tij se vakëfi po ndërtohet nga një shqiptar. Vaso i ka treguar Dhimitris, se personat e punësuar kishin gdhendur në gurët e murit të vakëfit emrin e biznesmenit që kishte investuar për ngritjen e këtij objekti.
DHESPOTI
Mesa duket, Dhimitris nuk kishte besuar se një shqiptar do të investonte për ndërtimin e vakëfit. Ai është penduar për lejen e dhënë dhe ka thirrur urgjentisht priftin e komunës së Dropullit të Poshtëm, Spiro Bashën. Dhespoti e ka kritikuar ashpër priftin për këtë "mëkat" dhe i ka komunikuar pezullimin nga puna. Ndërkaq, Dhimitris ka urdhëruar ndërprerjen e punimeve për ngritjen e vakëfit në fshatin Terihat. Gjithashtu, kanë reaguar dhe drejtuesit e komunës, të cilët kanë ndërhyrë për bllokimin e punimeve. Biznesmenin Kiço Thimjo u ka thënë se për ngritjen e këtij objekti kulti kishte leje nga Këshilli i Kishës së Gjirokastrës. Ndonëse ai ka paraqitur dokumentacionin, kërkesa e tij për përfundimin e punimeve nuk është marrë parasysh.
Gazeta Shqiptare
Krijoni Kontakt