Propozimi i rrallë për Shqipërinë: Meshkujt kanë përgjegjësi
Edhe pse mund të duket e çuditshme për burrat tradicionalë shqiptarë, meshkujt shqiptarë mund të marrin të gjitha përgjegjësitë, ashtu si dhe femrat. Para, gjatë, e sidomos pas shtatzënisë. Në shumë vende të botës ligjet në fuqi apo aktet nënligjore i lejojnë çiftit të ndajë se cili prej tyre do ta marrë lejen e lindjes, gruaja apo burri. E kështu zgjedhin mes tyre se cili do të jetë kujdestari kryesor i fëmijës, e cili do të vazhdojë punën. E ndërsa në vendet nordike është ulur shkalla e lindshmërisë, ligjet në fuqi i lejojnë nënat të kenë të paktën 3 vjet leje lindjeje. Kështu, gjatë kësaj kohe mund të planifikohen të lindin jo vetëm 1, por dy fëmijë. Këtë vit, në ditën e popullsisë, raporti i UNFPA-së sqaron se burrat kanë të njëjtat përgjegjësi ashtu si dhe gratë, në planifikimin familjar, në kujdesen për bashkëshorten para, gjatë dhe pas shtatzënisë. "Burrat mund të kujdesen për nevojat apo zgjedhjet e grave gjatë shtatzënisë dhe pas lindjes së fëmijës, nëse ata kanë informacionin e duhur. Ata duhet të përfshihen që herët në shtatzëni, që të kuptojnë nevojat shëndetësore dhe rreziqet gjatë shtatzënisë apo lindjes. Gruaja dhe burri duhet të përgatiten së bashku për t‘u siguruar për lindjen e fëmijës", thuhet në raportin e UNFPA-së. Sipas këtij raporti, përfshirja e burrave në parandalimin dhe në kujdesje ndan të drejtat dhe përgjegjësitë gjatë shtatzënisë, si dhe informimin mbi planifikimin familjar apo aspekte të tjera të shëndetit riprodhues. Në këto kushte, edhe pse për Shqipërinë do të dukej e vështirë, ndarja e përgjegjësive ose detyrave nënkupton të gjitha pjesën e kujdesjes për fëmijën. Edhe lejen e lindjes për burrat. Shembullin e kësaj përvoje e sjellin vendet evropiane, por një projekt-propozim konkret do të bëhej nga shoqatat e specializuara për këtë punë, apo nga ekspertë të fushës shëndetësore. Me aktet nënligjore që tanimë ka Shqipëria, maksimumi që mund t‘u ofrohet burrave është informimi.
Konkretisht në ditën e popullsisë, me moton "burrat pjesë e rëndësishme e shëndetit riprodhues të grave", raporti i UNFPA-së tregon se më shumë se 500 mijë gra humbasin jetën gjatë shtatzënisë, rreth 99 për qind në vendet e zhvilluara. Një pjesë tjetër kanë komplikacione. Por të gjitha këto janë të parandalueshme. "Baballarët e kujdesshëm mund të kenë një rol të rëndësishëm në shfaqen e dashurisë për fëmijët, përkujdesje apo në dhënien e ushqimit", thuhet në raport. Kujdesi i burrave përfshin shtatzëninë dhe periudhën pas shtatzënisë, lindjes së fëmijës. Por burrat luajnë rol të rëndësishëm edhe në planifikimin familjar, në dhënien e ndihmës në raste urgjence. Një nga objektivat e mileniumit për përmirësimin e shëndetit amtar është partneriteti me burrat. Kjo strategji është e rëndësishme për përmirësimin e shëndetit dhe të drejtave.
"Në ditën e popullsisë na lejoni të inkurajojmë burrat të bëhen partnerë dhe faktorë ndryshimi për të mbështetur të drejtat e grave në të gjitha mënyrat dhe për të ndërtuar një botë me një shëndet më të mirë, me mundësi për të gjithë".
Roli i burrave
Para, gjatë dhe pas shtatzënisë
Burrat mund të ndihmojnë dhe të kujdesen që gratë të marrin kontracepsionin e nevojshëm për të parandaluar shtatzënitë e padëshirueshme dhe për të bërë një planifikim familjar. Burrat mund të ndihmojnë që gratë të kenë asistencën e nevojshme gjatë lindjes, si dhe gjatë emergjencave obstetrike.
Në ditën e popullsisë është e rëndësishme të theksohet se çdo shtatzëni është e dëshiruar, çdo lindje është e siguruar, çdo person është i mbrojtur nga HIV/AIDS dhe çdo grua dhe vajzë trajtohet me dinjitet dhe respekt. Tema e këtij viti në ditën e popullsisë është "burrat partnerë në shëndetin amtar".
Krijoni Kontakt