Pesticidet ne Shqiperi

[Zemrushja]

Vite më parë ishte kërkuar heqja e helmeve të skaduara

Shpërthejnë pesticidet, në gjendje të rëndë 55-vjeçari

Aleksandër NDOJA

RRËSHEN- Një shpërthim i fuqishëm ka tronditur sot në mesditë pothuajse të gjithë qytetin e Rrëshenit. Shpërthimi ka vënë në alarm banorët, ndërkohë që vetëm pak minuta më pas është mësuar që shpërthimi nuk kishte të bënte me ndonjë sasi tritoli. Njëra prej dhjetëra fuçive të mbushura me pesticide dhe të lëna në mëshirë të fatit kishte shpërthyer, teksa një banor i kësaj lagjeje kishte tentuar që t’i groposte, për t’i shpëtuar erës së rëndë që çlirohej prej kohësh nga ajo magazinë. Dhjetëra punonjës të ish SMT-së që kanë qenë shumë pranë ngjarjes janë nisur menjëherë drejt magazinës, ku kanë gjetur të plagosur rëndë Gjon Kaçorri, 55 vjeç. Menjëherë e kanë nisur në drejtim të spitalit të Rrëshenit, ku edhe ka marrë ndihmën e parë. Ndërsa duke qenë se gjendja e tij ka qenë mjaft e rëndë, mjekët e Rrëshenit kanë thirrur në ndihmë një helikopter, i cili e ka dërguar për në Spitalin Ushtarak në Tiranë. Ndërkohë që policia e Mirditës ka rrethuar vendin e ngjarjes dhe është në pritje të ekspertëve për të zbardhur ngjarjen e rëndë. E gjithë zona është pushtuar nga era e rëndë e pesticideve të skaduara, çka dëmton rëndë rrugët e frymëmarrjes për banorët e shumtë të kësaj zone. Banorët aty pranë konfirmuan se ishte hera e tretë që kishin dëgjuar shpërthime, por ato kishin qenë më të vogla.

Ngjarja

Ka ndodhur rreth orës 13.30 të ditës së mërkurë. Gjon Kaçorri, pronar i tokës ku gjendej magazina, ka udhëtuar nga Tirana ku banon dhe në orët e para të ditës ka hapur një gropë të madhe në oborr. Duket se ai kishte vendosur që t’i groposte ato, për t’i dhënë fund një herë e mirë ankesave të banorëve të lagjes së SMT-së, të cilët ankoheshin për erën e rëndë që vinte nga kjo magazinë. Por gjatë transportit të fuçisë së parë, sapo ajo është nxjerrë nga magazina, në kontaktin e parë me rrezet e diellit ajo ka shpërthyer. Karroca në të cilën ishte vendosur fuqia ka fluturuar në ajër dhe pasi ka kaluar godinën e repartit të tornerisë brenda kompleksit të SMT-së, është shembur si llamarinë në oborr. Kjo i ka alarmuar punëtorët, të cilët janë gjendur në vendngjarje. Zef Leka thotë se jemi gjendur në një situatë të rëndë, teksa kemi gjetur Gjon Kaçorrin të mbuluar nga gjaku. Ai është transportuar menjëherë në spitalin e Rrëshenit dhe pas një ndihme nga ana e kirurgut Gjovalin Bushi, Kaçorri është dërguar në Spitalin Ushtarak të Tiranës. Sipas mjekëve, gjendja e tij ka qenë mjaft e rëndë, me dëmtime serioze në zonën e barkut.

Magazina e pesticideve disa herë është bërë problem për rrezikshmërinë e saj. Një vit më parë disa media kanë dhënë alarmin për rrezikun që mbartin ato. Përgjegjësi i mbrojtjes për civilët pranë prefektit Pal Gjokola tha se një vit më parë, kur ky problem u bë prezent në media, nga zyra përkatëse e Bujqësisë më ka mbërritur një shkresë zyrtare, sipas të cilës konfirmohet se këto pesticide nuk përbëjnë asnjë rrezik për jetën.

Gjin Baloj, specialist i mbrojtjes së bimëve

“Kjo ishte një fatkeqësi e paralajmëruar prej kohësh, sidomos prej medias. Të gjithë janë fshehur si struci, ndërsa shkrirja e sektorit të mbrojtjes së bimëve pranë Drejtorisë së Bujqësisë ka bërë që këto helme tejet të rrezikshme të jenë jashtë kontrollit dhe mund të paraqesin rreziqe edhe më të mëdha”.

Zef Leka, tornitor pranë vendit të ngjarjes

“Ka qenë rreth orës 13 e pak, kur kam dëgjuar një shpërthim të fuqishëm. Kam parë që mbi kokën time në vendin e punës ranë copa nga tavani. Një sasi e tavanit ra mbi kokë, ndërkohë që fika tornon. Kur dola jashtë, pashë edhe një hekur në oborr, që ishte karroca mbi të cilën kishin pas vendosur fuçinë me pesticide”.

Tirana Observer

[Zemrushja]

K.Bushi
27-04-2007



MIRDITË- Ende asnjë masë për ngjarjen e rëndë, që ndodhi dje në magazinat e ish- Degës së Bujqësisë në Mirditë, ku pas shpërthimit të pesticideve mbeti i plagosur rëndë pronari i tokës ku janë këto magazina, Gjon Kaçorri. Vetëm prokuroria dhe policia janë në fazën e hetimit të ngjarjes, ndërsa gjendja shëndetësore e të plagosurit vazhdon të jetë e rëndë. Burime pranë spitalit konfirmojnë se përveç plagëve, Kaçorri ka pësuar edhe helmim në gjak në momentin e shpërthimit të fuçisë me mbetje toksike. Kjo sepse në momentin kur ai është plagosur, pluhuri i rëndë dhe helmues ka depërtuar në plagë. Ndërsa në vendin e ngjarjes ende nuk është marrë asnjë masë për mbrojtjen e jetës së njerëzve të shumtë që banojnë aty pranë. Nga drejtoria rajonale e Bujqësisë nuk ka asnjë konfirmim për sasinë dhe për helmet që janë të grumbulluar në këtë magazinë. Fuqitë e tjera që janë të mbushura dhe pa asnjë etiketë treguese, mund të rrezikojnë seriozisht shpërthime të tjera, ndërkaq gjithçka është fokusuar në hetimin e policisë për këtë ngjarje. Banorët janë mjaft të shqetësuar për situatën, pasi në këtë magazinë ka edhefuçi të tjera, që mund të përbëjnë rrezik shpërthimi, sapo dikush të tentojë që t'i lëvizë nga vendi.

Shekulli

[Zemrushja]

Gj.M
28-04-2007



Mirditë- Gjon Kaçorri, i plagosur tri ditë më parë nga shpërthimi i pesticideve ka ndërruar jetë pasditen e djeshme në Spitalin Ushtarak në Tiranë. Mësohet se ai nuk mundi dot t'i mbijetonte plagëve të rënda të marra në organet jetike, shumica në pjesën e barkut dhe në kraharor, ndërkohë që në plagë kishte depërtuar sasi e konsiderueshme lënde helmuese.

Ngjarja ndodhi, teksa Kaçorri, pronari i tokës ku ishte magazina e pesticideve po punonte për groposjen e fuçive dhe njëra prej tyre shpërtheu duke e lënë të plagosur rëndë.


Shekulli