Ministri i Jashtëm lë detyrën në prag të zgjidhjes së statusit të Kosovës. Topalli dhe Zogaj, emrat që lakohen
Shkak i dorëheqjes, përplasjet me Kryeministrin për emërimet dhe vizitat
Tronditje në kabinetin qeveritar. Në mënyrë krejt të papritur, shefi i diplomacisë, Besnik Mustafaj, ka dhënë dorëheqjen nga posti i tij, nëpërmjet një deklarate publike në Ministrinë e Punëve të Jashtme. Siç mësohet nga burime pranë qeverisë, menjëherë pas kthimit nga një takim në Ohër të Maqedonisë, Mustafaj ka folur në telefon me Kryeministrin Berisha, ku i ka komunikuar vendimin e tij të parevokueshëm dhe është nisur në zyrën e tij në selinë që ndodhet në bulevardin "Zhan D‘Ark". Është ulur mbi kompjuter dhe ka hartuar tekstin që është shpërndarë në mënyrë të rrufeshme në të gjitha ambasadat e akredituara në Shqipëri dhe në agjencitë kryesore të lajmeve. Më pas, ministri i Jashtëm Besnik Mustafaj ka lexuar para gazetarëve deklaratën e largimit të tij nga qeveria "Berisha", e cila dje ra si një "rrufe në qiell të pastër". Si arsye për largimin e tij, diplomati-shkrimtar Besnik Mustafaj ka përdorur një sqarim fin: "Jam i lodhur nga puna". Ndërkaq, në deklaratën zyrtare theksohet se "ndodhem para jush për t‘ju njoftuar se i kam paraqitur dorëheqjen e parevokueshme Kryeministrit Berisha. Dua të theksoj, me këtë rast, se kjo periudhë që kam punuar në drejtimin e Ministrisë së Punëve të Jashtme është eksperienca më e pasur, më e jashtëzakonshme që kam pasur në jetën time". Duke vlerësuar arritjen në diplomacinë shqiptare, tashmë ish-ministri Mustafaj theksoi se "përfitoj nga rasti që të falënderoj të gjithë ata që kanë kontribuar dhe më kanë ndihmuar në krijimin e kësaj eksperience. Falënderoj në radhë të parë Kryeministrin Berisha, i cili e ka pranuar tre muaj më parë në analizën që i bëri punës së qeverisë 2006, se Ministria e Punëve të Jashtme dhe diplomacia shqiptare kanë qenë tërësisht të suksesshme në kryerjen e misionit të tyre. Falënderoj trupin diplomatik në Tiranë, me të cilin kam pasur një dialog shumë të hapur, shumë të sinqertë dhe të vazhdueshëm. Siguroj trupin diplomatik në Tiranë dhe nëpërmjet tyre siguroj qeveritë e tyre, se do të vazhdoj të mbaj një dialog të hapur dhe miqësor. Shqipëria tashmë ka shumë miq dhe ky është një kapital shumë i çmuar i saj". Megjithëse gjithçka ndodhi papritur dhe u zhvillua shumë shpejt, marrëdhëniet mes ministrit të Jashtëm Besnik Mustafaj dhe Kryeministrit Berisha, prej më shumë se dy javësh ishin tendosur mjaft. Vetë shefi i diplomacisë ka pasur pakënaqësi nga disa diplomatë që ishin përzgjedhur nga lidershipi i selisë blu dhe këto ia ka shfaqur Kryeministrit. Por mësohet se vetë Berisha ka pasur disa debate me ministrin e Jashtëm për punën e tij, ku ka shprehur hapur pakënaqësinë për mosarritjen e organizimit të vizitave të rëndësishme të kreut të qeverisë në disa vende të Bashkimit Evropian, si dhe në Shtetet e Bashkuara të Amerikës. Këto debate kanë acaruar edhe më tej situatën në marrëdhëniet ndër institucionale, që ishin tendosur kryesisht mes Ministrisë së Jashtme dhe Kryetares së Kuvendit, ngaqë Topalli prej kohësh ka nisur një fushatë për të siguruar ratifikimin e MSA-së nga parlamentet e vendeve të BE-së. Kjo situatë tregon në fakt edhe një mundësi për një ndryshim të madh në radhët e qeverisë, ku Kryeparlamentarja Topalli mund të jetë zëvendësuese e mundshme e Mustafajt në postin e shefes së diplomacisë shqiptare. Topalli në fakt e ka kërkuar këtë post që më 3 korrik të vitit 2005, por që nuk është pranuar nga Kryeministri Berisha. Burime në PD bëjnë të ditur se një zëvendësues i mundshëm i Mustafajt është edhe kreu i Komisionit të Jashtëm parlamentar, Preç Zogaj. Por gjithsesi dorëheqja e ministrit të Jashtëm vë në vështirësi qeverinë, pasi riemërimi duhet të nisë procesin nga e para me propozimin në Presidencë dhe votimin në parlament, që përbën një telash jo të vogël për mazhorancën e djathtë.
Reagimi
Berisha: Mirëkuptoj largimin
Kreu i qeverisë, Sali Berisha, ka reaguar menjëherë pas dorëheqjes së ministrit të Jashtëm, Besnik Mustafaj. Në një deklaratë për shtyp, Kryeministri Berisha me keqardhje pranon se e mirëkupton vendimin e Mustafajt për t‘u larguar nga pozicioni i ministrit të Jashtëm. Përpos kësaj, në deklaratën e Kryeministrit theksohej se "Kreu i qeverisë u informua nga ministri Mustafaj për vendimin e tij për të dhënë dorëheqjen nga posti i ministrit të Jashtëm". Në komunikatën e Kryeministrisë, në lidhje me largimin e Besnik Mustafajt nga pozicioni i ministrit të Jashtëm, citohet se "Kryeministri Berisha shpreh vlerësimin dhe falënderimin e tij për bashkëpunimin e çmuar që ka pasur me zotin Mustafaj dhe kontributin e tij si ministër i Jashtëm në përmbushjen e objektivave madhore të qeverisë, si në procesin e Integrimit të Shqipërisë në Bashkimin Evropian, ashtu dhe në afrimin në NATO".
© Gazeta Shqip - 2006-2007
Përgjigju Duke Cituar
Krijoni Kontakt