Mes atmosferës së gëzuar me këngë greke, shampanjë dhe thirrjeve "Zito (rroftë) Sali Berisha!", kandidati i PBDNJ-së Vasil Bollano është shpallur fitues i zgjedhjeve lokale në Himarë. E vetmja risi në përfundimin e procesit zgjedhor, krahasuar me zgjedhjet e mëparshme lokale, ishin thirrjet e simpatizantëve të Bollanos në gjuhën greke, "Zito Sali Berisha", që në shqip do të thotë, rroftë Sali Berisha. Thirrje të tilla dëgjohen për të parën herë në Himarë. Edhe pse festimet janë shoqëruar me këngë greke, çuditërisht mes simpatizantëve të Bollanos nuk janë valëvitur flamuj grekë dhe nuk ka pasur thirrje nacionaliste apo fyese ndaj Shqipërisë dhe shqiptarëve. Në ndryshim nga tre ditët e numërimit të votave, ku situata ka qenë vazhdimisht e tensionuar dhe në të shumtën e rasteve e bllokuar, dje në Himarë gjendja ka qenë mjaft miqësore, jo vetëm për sa i përket rendit dhe qetësisë publike por edhe mes kandidatëve, të cilët jo vetëm kanë pranuar rezultatin por në mënyrë demonstrative kanë pirë së bashku nga një kafe në qendër të Himarës.
Reagimi
Shqetësimi i shprehur i qeverisë greke dy ditë më parë mbi situatën e bllokimit të numërimit të votave në Himarë, duket se angazhuar seriozisht institucionet shqiptare por edhe përfaqësuesit e partive politike që merrnin pjesë në proces. Bëhet e ditur që vetë kryeministri Berisha i ka kërkuar përfaqësuesve lokalë të Partisë Demokratike që të përfundonin sipas ligjit procesin e numërimit të votave. Kjo ka bërë që vetë kryetari i PD-së për Vlorën, Agron Shima të shkonte në Himarë mbrëmjen e së martës, duke bindur komisionerët e tij të vazhdonin numërimin e votave. Po në të njëjtën mbrëmje në Himarë mbërriti prokurori i Vlorës, i cili urdhëroi shoqërimin e menjëhershëm në polici të komisionerit të Partisë Socialiste, Simon Koka, i cili kishte braktisur KZQV-ën, duke bllokuar procesin e numërimit, ndërkohë që u krye menjëherë zëvendësimi i tij. Pas disa orë pyetjesh dhe sqarimesh, Koka është lënë lirë, ndërkohë që ndaj tij kanë nisur hetimet. I pranishëm në Himarë mbrëmjen e së premtes ishte edhe drejtori i Policisë së Vlorës, Astrit Mehja.
Rezultati
Dita e djeshme në komisionin e numërimit të votave në Himarë, mund të cilësohej si një model për t'u pasur zili. Të dyja grupet e numërimit nisën nga puna që në orën 08 të mëngjesit dhe procesi i numërimit ka vazhduar më se normal. Gjithashtu jashtë godinës së KZQV-së, dje nuk u vërejtën më simpatizantë të Bollanos, të cilët prej tri ditësh ushtronin presion mbi komisionerët e PD-së dhe PS-së. Në kushte e një normaliteti për t'u pasur zili, rreth mesditës së djeshme në Himarë u rikthyen vëzhguesit e OSBE-së, të cilët ishin larguar në mënyrë demonstrative një ditë më parë për shkak të bllokimit të procesit të numërimit të votave. Gjithashtu, rreth mesditë së djeshme në Himarë shkuan kryetari i PBDNJ-së, Vangjel Dule, deputeti i zonës Spiro Peçi si dhe zëvendësministri i Shëndetësisë, Gjergj Leka. Në orën 14:30, kur kishte mbetur pa u numëruar edhe një kuti, kandidati i PD-së dhe ai i PS-së, pranuan humbjen, duke uruar kandidatin e PBDNJ-së Vasil Bollanon për fitoren e arritur. Pas këtij momenti të tre kandidatët kanë pirë nga një kafe së bashku në qendër të Himarës në sy të qindra simpatizantëve të tjerë.
Krijoni Kontakt