Qeveria gjermane investon 14 milion euro për turizmin e Pogradecit

[Albo]

Ministri Bode dhe përfaqësuesit e KFW-së, Campen dhe Luetke, nënshkruan marrëveshjen për dhënien e grantit


Qeveria gjermane çon në 14 milionë euro financimin për turizmin në Pogradec


Totali i financimeve gjermane në Shqipëri arrin në 680 milionë euro dhe Christian Campen tha se, qëllimi më i rëndësishëm i ndihmës gjermane është hyrja e Shqipërisë në strukturat euroatlantike dhe financimet do të vazhdojnë në një kuadër më të gjerë për shpejtimin e reformave dhe zhvillimit ekonomik, me synim anëtarësimin e Shqipërisë në BE



Banka gjermane për zhvillim (KFW) ka nënshkruar dje, financimin e një projekti prej pesë milionë eurosh për mbrojtjen e liqenit të Pogradecit. Në të vërtetë, financimi i djeshëm do t’i shtohet një financimi të dhënë më parë, me një vlerë prej mbi nëntë milionë euro, duke e çuar në total në vlerën e katërmbëdhjetë milionë eurove. Projekti, tashmë ka hyrë në fazën e dytë dhe parasheh rehabilitimin e sistemit të kanalizimeve të qendrës së Pogradecit dhe lidhjen me sistemin e ri. Gjithashtu, do të bëhet edhe rehabilitimi i rrjetit sekondar për kanalizimet e sektorit industrial të Pogradecit. Në emër të KFW-së nënshkruan përfaqësuesit e lartë të bankës, z. Christian Campen dhe Christian Luetke Woestmann, ndërsa për qeverinë shqiptare ishte ministri Ridvan Bode, ai që nënshkroi këtë marrëveshje. Ministri i Financave falënderoi qeverinë gjermane dhe KFW-në për kontributin e dhënë deri më tani dhe theksoi se realizimi i këtij projekti do të ndikojë në përmirësimin e kushteve të turizmit në Pogradec. “Përfundimi i kanalizimeve do të shoqërohet me një investim tjetër, që është duke u programuar nga qeveria shqiptare dhe që ka të bëjë me ngritjen e një kolektori përgjatë bregut të liqenit, për të bërë të mundur mbrojtjen e tij dhe kthimin e kësaj zone në një zonë turistike atraktive”. Ndërkohë, z. Campen ka vlerësuar bashkëpunimin e mirë që ekziston mes dy vendeve, duke theksuar edhe vazhdimësinë e bashkëpunimit në të ardhmen. Kostoja totale e projektit do të jetë 5.5 milionë euro. Nga këto, kontributi financiar i KFW-së është 5 milionë euro. 500 mijë euro parashikohet të jetë kontributi shqiptar. Nga pjesa shqiptare e kontributit, tashmë janë dhënë 80 mijë euro gjatë vitit 2006, ndërsa pjesa tjetër do të bëhet e disponueshme gjatë viteve 2007 dhe 2008. Republika Federale e Gjermanisë ka financuar direkt projekte të shumta në Shqipëri për zhvillimin ekonomik dhe social, që kapin vlerën e mbi 367 milionë eurove gjatë 17 viteve të fundit. Sipas burimeve nga zyra e Bankës për Zhvillim KFW në Tiranë, qeveria gjermane është aktive prej mbi 17 vjet në Shqipëri, në sektorë strategjikë të ekonomisë si në atë të furnizimit me ujë të pijshëm dhe me energji elektrike, ashtu dhe në atë të mbështetjes së ekonomisë private, në veçanti të ndërmarrjeve të vogla dhe të mesme. "Në kuadër të bashkëpunimit për zhvillim në nivel dypalësh, Gjermania ka vënë në dispozicion të palës shqiptare që prej vitit 1988 më shumë se 367 milionë euro dhe po të shtohen edhe kontributet e Gjermanisë në nivel donatorësh shumëpalësh, ndërmjet BE-së, Bankës Botërore, Kombeve të Bashkuara etj. Mbështetja gjermane për Shqipërinë shkon në më shumë e 680 milionë eurove", - u shpreh përfaqësuesi i bankës KFW, Christian Campen. Sipas tij, qëllimi më i rëndësishëm i ndihmës gjermane është hyrja e Shqipërisë në strukturat euroatlantike dhe financimet do të vazhdojnë në një kuadër më të gjerë për shpejtimin e reformave dhe zhvillimit ekonomik me synim, anëtarësimin e Shqipërisë në BE.

Gazeta Tema

[YaSmiN]

Bravo.Urime dhe shpresoj qe te jet nje projekt i mire edhe i zhvilluar sipas kushteve te Ballkanit.