Sonila Reka "Suksesi im me poezi në anglisht"

[Shijaksi-London]

Amazon.com dhe libraritë britanike "Waterstones" shesin librin e shqiptares

Sonila Reka "Suksesi im me poezi në anglisht"

Londër. 16-vjeçarja publikon librin e saj të parë "Njëmijë milje larg"

Nga Londra
Muhamed Veliu


"Përmes poezisë së shkruar në anglisht shpreh atë që ndiej në zemrën time për çështje të ndryshme". Ky citim për cilindo që do ta lexonte do të dukej tejet normal si i dalë nga goja e një poeteje anglishtfolëse. Në fakt, nuk është kështu.

Ky citim është fillimi i një interviste për "Shqip" e një gjashtëmbëdhjetëvjeçareje me origjinë nga Laçi që jeton në Londër.

Ajo quhet Sonila Reka. Po bën pak kohë që ajo ka publikuar librin e saj të parë me poezi titulluar "A thousand miles Away" (Njëmijë milje larg).

Pozitë janë shkruar me kujdes duke prekur tema të vështira sociale për vetë moshën e autores si: droga, divorcet, aborti, vdekja, dashuria. "Unë mundohem të shkruaj për gjërat që më interesojnë dhe i kuptoj. Shkruaj e frymëzuar nga pasionet dhe e vërteta ime, sepse vetëm këto janë gjërat që njoh me të vërtetë", thotë Reka në parathënien e librit që e ka shkruar vetë"

Në ato pak rreshta parathënie, që në fillim të krijohet përshtypja se kjo vajzë e re me shumë inteligjencë mendon për gjëra të cilat shkojnë shumë milje larg. Si për të mos mjaftuar kjo, Sonila, një vajzë e bukur me flokë të gjata shpjegon filozofinë e mënyrës së të shkruarit të poezisë së saj duke thënë: "Në qoftë se libri im nuk ka jetë në mendjen time, atëherë s‘ka se si të ketë në mendjen tuaj. Më ka pëlqyer gjithmonë të shkruaj dhe tani në moshën gjashtëmbëdhjetëvjeçare jam në gjendje të ndaj punimet e mia me ju. Fjalët, sigurisht, janë droga më e fortë e përdorur nga njerëzimi, gjithsesi jo të gjithë e dinë si t‘i përdorin fjalët, por ata të cilët dinë, nuk mund të ndahen prej fjalëve, dhe unë jam një prej këtyre të fundit". Poezitë e saj janë shkruar me një anglishte të pastër, shumë të pasur në përmbajtje, e cila ka ngjallur kureshtje dhe interes në kritikën letrare të kësaj moshe.

Takimi

Është një e diel pasdite. Në librarinë e zonës Wood Green në veri të Londrës, Reka e shoqëruar nga mamaja e saj dhe motra kanë ardhur për të promovuar librin. Bashkëkombësit e saj vinë një e nga një, takohen me Sonilën, e cila ka rastin të provojë ndjesinë e firmosjes së librit me nënshkrimin e saj.

E pyesim cila është poezia që ajo ka për zemër, duke filluar kështu të zbuluarin e poezisë së saj. "Njëmijë milje larg", përgjigjet ajo duke shtuar "Më prek sa herë e lexoj dhe ka një kuptim domethënës".

Ajo, fillimisht ka filluar të shkruajë në shqip kur ishte 9 vjeç. Një vit më vonë, pasi mbërriti në Angli, filloi të studiuari gjuhën angleze dhe të shkruajë poezi në këtë gjuhë. "E kam të lehtë të ulem dhe të hedh në letër mendimet e mia. Kjo më kënaq pa masë", shprehet ajo. Po ku e gjen inspirimin Sonila të shkruajë për çështje që mund të thuhet nuk i përkasin ende moshës së saj? Me një të folur të avashtë në shqip, e ndrojtur të mos bëjë gabime, ajo sqaron se poezitë e saj janë produkt i të përditshmes të atyre ngjarjeve që ajo i përjeton ose dëgjon nga të tjerët.

"Unë shikoj njerëzit që më rrethojnë. Mënyrën e sjelljes së tyre. Nuk shkruaj se kam eksperiencë në të shkruar, por më krijohet një ndjesi brenda zemrës time, të cilën e hedh në letër mes fjalëve. Reka, përveç shkrimit të poezive, pëlqen mësimin e gjuhëve të huaja dhe udhëtimet. "Natyrisht që më pëlqen të lexoj poezi gjatë të gjithë kohës, pasi dua të bëhem shkrimtare. Fillimisht, unë dua të jem një lexuese e mirë". Natyrisht që për këtë vajzë shqiptare në Londër, ky libër apo thjesht të shkruarit poezi nuk do të mund të arrihej pa mbështetje aq më tepër inkurajim. Dhe Sonila nuk vonon të na tregojë forcën shtytëse për të shkruar, që është nëna e saj. "Me anë të këtij libri, kam plotësuar një ëndërr, e cila kurrë nuk do të ishte bërë realitet nëse nëna ime nuk do të ishte në ç‘do çast afër meje kur më është dashur."

Fama

Libri i Sonila Rekës ku në kopertinë është vetë ajo buzë një bregdeti ka tërhequr vëmendjen e distributorëve të librit në Britani, madje edhe në Amerikë.
Fillimisht, ka qenë kompania e mirënjohur Amazon.com që nuk ka hezituar ta shesë librin e shqiptares on-line, më pas kompania më e madhe e librarive në Britani "Waterstones" e ka futur në stendat e saj për shitje këtë libër me 101 poezi. Sonila, e cila jeton në zonën Chingford në lindje në Londrës nuk i ka shpëtuar vëmendjes së medias lokale. Gazeta e zonës i ka kushtuar një shkrim të sajin shqiptares Reka, duke e cilësuar atë si një poete fantastike.

Libri në shqip?

Mbase ky libër nëse do të përkthehej në shqip do të mbushte sado pak boshllëkun e librarive shqiptare me libra të kësaj moshe. Sonila pohon se ka dëshirë ta bëjë një gjë të tillë, por sipas saj, do t‘i duhet të shkruajë poezi të tjera në shqip. "Nëse poezitë e mia të shkruara në anglisht në këtë libër do të përkthehen në shqip, ato do të humbin bukurinë e tyre. Besoj se poezia ime është pëlqyer dhe ka sukses, pasi është shkruar në anglisht, gjuhë ku mund të shprehem më lirshëm për atë që mendoj dhe inspirohem të shkruaj", sqaron ajo.