Nga sot hiqen taksat doganore për eksport-importet

[DYDRINAS]

Nga sot hiqen taksat doganore për eksport-importet

1 Dhjetor 2006

Rehn: Brenda vitit 2008 ratifikohet MSA dhe marrëveshja e tregtisë së lirë

Marrëveshja e Ndërmjetme, e cila do t’i mundësojë Shqipërisë dhe BE-së të nisin nga përfitimet që rrjedhin nga rritja e shkëmbimeve tregtare me njëri-tjetrin, hyn sot në fuqi. Duke nisur nga 1 dhjetori, Shqipëria do të përfitojë nga një akses pa taksa, praktikisht i pakufizuar në tregun e BE-së. Në një deklaratë për mediat, Komisioneri për Zgjerimin, Oli Rehn, është shprehur se kjo marrëveshje është “e ndërmjetme”, sepse ajo do të jetë në fuqi deri në ratifikimin nga të gjitha shtetet anëtare të BE-së dhe hyrjen në fuqi të MSA ndërmjet Shqipërisë dhe BE-së. "Shpresoj që kjo do të përfundojë në 2008-ën. Si MSA-ja, ashtu edhe Marrëveshja e saj e Ndërmjetme, të dyja mund të sjellin potencialisht përfitime të mëdha për BE-në dhe Shqipërinë", tha Rehn. Ai ka theksuar se nënshkrimi i MSA-së para pak muajsh është një gur i rëndësishëm në rrugëtimin e Shqipërisë drejt BE-së. "Ajo është po ashtu një hap i rëndësishëm për vetë BE-në, ngase me të ne konfirmojmë dhe thellojmë marrëdhëniet tona kontraktuale me Shqipërinë", tha Rehn. Nënshkrimi u bë i mundur nga përparimi i Shqipërisë në çuarjen më tej të reformave dhe duke treguar se institucionet e saj demokratike mund të funksionojnë. "Nuk ka skema automatike, ritmi me të cilin një vend ecën drejt afrimit me BE-në, varet nga meritat dhe aftësia e tij në vënien në zbatim të reformave politike dhe ekonomike. MSA-ja shënon fillimin e një faze të re në marrëdhëniet e BE-së me Shqipërinë. Ajo ofron për BE-në dhe Shqipërinë një kuadër të miratuar ndërsjelltasi për të punuar së bashku në një sërë rrafshesh, si edhe krijon strukturat nëpërmjet të cilave ne do të monitorojmë bashkërisht ecurinë e procesit", nënvizoi Rehn. Zbatimi i MSA do të jetë një sfidë për Shqipërinë, siç është për çdo vend që ka një marrëveshje të tillë. Marrëveshja sjell detyrime të rëndësishme lidhur me tregtinë, shtetin ligjor, të drejtat e njeriut, standardet demokratike, bashkëpunimin rajonal dhe futjen e ligjeve të reja.

"Por, së pari e mbi të gjitha, MSA-ja përbën një mundësi të rëndësishme ekonomike dhe politike. Liberalizimi i tregtisë do të sjellë përfitime ekonomike të konsiderueshme për Shqipërinë, por edhe për BE-në. Harmonizimi i legjislacionit shqiptar më atë të BE-së do ta afrojë Shqipërinë me standardet evropiane dhe do të ndihmojë në forcimin e mëtejshëm të lidhjeve ndërmjet nesh. Treguesit e mirë në zbatimin e MSA-së (edhe periudha e ndërmjetme ka peshën e vet) janë gjithashtu një parakusht për fazën e mëtejshme në procesin e integrimit evropian, e cila në rastin e Shqipërisë është arritja e statusit të “vendit kandidat”. Komisioni Evropian do të bëjë ç’është e mundur për të siguruar arritjen e rezultatit maksimal nga MSA dhe Marrëveshja e saj e Ndërmjetme. Natyrisht, të njëjtën gjë shpresoj të kemi edhe nga partnerët tanë shqiptarë", tha Rehn.

Gazeta Metropol

[DYDRINAS]

Shqipëria në zonën e Tregut të Lirë. Efekti financiar i zbatimit të MSA, 57 milion euro në koston e saj të parë

700 produkte industriale në listën me tarifa doganore të reduktuara

Duke filluar që nga 1 janari, mbi 700 produkte agroindustriale që prodhohen në vendet anëtare të BE-së, nisën të eksportohen drejt vendit tonë me tarifa doganore 0, në kuadër të Marrëveshjes së MSA. Marrëveshja e Ndërmjetme "Interim" me BE-në, parashikon krijimin e një zone të Tregtisë së Lirë, ku parashikohen stadet e hapjes së tregut vendas për eksportet e BE-së, ku të dy palët, janë angazhuar për të hequr tarifat doganore për mallrat me origjinë nga vendet e palëve, bëjnë të ditur burime nga Ministria e Integrimit.

Ndërkohë, tarifat doganore ulen nga 10% në 9% për disa lloje produktesh të përpunuara qumështi, si gjalpë, djathë i përpunuar, perime të ngrira (speca, ullinj, patëllxhan, spinaq, etj), fruta pylli (arra, lajthi, ananas) agrume, niseshte, vaj kikiriku, vaj ulliri, makarona dhe cigare të markave të ndryshme.

Gjithashtu, ulen tarifat doganore nga 15% në 14% për prodhime agroindustriale dhe të frutikulturës si karafila, farëra bimësh dekorative, fruta të konservuara, lëngje frutash, ujë mineral, pije joalkoolike etj.

Tarifat doganore nga 2%, ulen në 0% për gjedhë shtëpiakë, zogj pule, kërpudha, speca të konservuar, rrush i thatë, oriz i zhveshur, fara bimësh foragjere, vaj peshku, vaj soje e luledielli i papërpunuar, vaj misri, panxhar sheqeri, farëra duhani, ëmbëlsira të ziera, bukë me erza etj.

Ndërkohë që për birrën, verën e pijet alkoolike raki, votka e konjak, tarifa doganore ulet nga 10% në 0%.

Por në këtë kuadër, përjashtohen vetëm mallrat e përfshira në listën e produkteve sensitive, tarifat doganore të të cilave, nuk do të ndryshojnë, ndaj dhe janë lënë jashtë Marrëveshjes. Marrëveshja "Interim" përmban 56 nene, 4 anekse dhe 5 protokolle, të cilat lidhen me lëvizjen e lirë të mallrave, konkurrencën dhe dispozita të tjera, që kanë të bëjnë me transportin tokësor. Marrëveshja "Interim" me BE-në është komplementare me MTL Rajonale dhe Marrëveshjen e Organizatës Botërore të Tregtisë (OBT). Ajo përmban të gjitha dispozitat e një Marrëveshjeje të Tregtisë së Lirë, si dhe MTL e nënshkruar me vendet e rajonit, në bazë të nenit XVIII të OBT-së.

RD

[DYDRINAS]

Prodhimet shqiptare të papërgatitura për BE


Liberalizimi taksave doganore për import-eksportet me vendet e Bashkimit Europian ka krijuar përpos shanseve konkuruese, edhe paqartësi e mungesë inisiative për biznesin shqiptar

Disa nga drejtuesit e dhomave të tregtisë në rajonin jugor shprehen jo fort optimistë me listën e produkteve që mund të eksportohen me tarifa doganore të ulëta ndërkohë që deklarojnë se prodhimi vendas do të mbetet i pambrojtur. Biznesi shqiptar duket jo shumë i përgatitur për këtë system konkurimi, duke mosnjohur legjislacionin dhe standartin europian.


Sapo ka nisur epoka e re, ajo e liberalizimit të taksave doganore për import-eksportet shqiptare me vendet e B.Europian dhe hallet e vështirësië e biznesit shqiptar duket se nuk kanë të mbaruar. Vetë prodhuesit shqiptarë, kryesisht ata të industrisë së lehtë e ushqimore, ku është dhe fusha që shpresohet të rriten eksportet shqiptare, duket se nuk janë të përgatitur për të njohur rregullat e tregut e për të përballuar konkurencën.


Disa nga drejtuesit e dhomave të tregtisë në rajonin jugor shprehen jo fort optimistë me listën e produkteve që mund të eksportohen me tarifa doganore të ulëta ndërkohë që deklarojnë se prodhimi vendas do të mbetet i pambrojtur. Ilir Gushi, drejtues i dhomës së tregtisë në Gjirokastër thotë se prodhuesit e ndryshëm të produkteve ushqimore ende nuk dinë listën e produkteve të lejuara, nuk kanë standartin europian në prodhimet e markat e tyre.

Por për të përballuar këtë problem mjaft të rëndësishëm po ndërmerren një varg seminaresh trainuese me prodhues e biznesmenë për të përvetësuar sistemin e rregullat e konkurencës europiane. Këto trainime po kryhen në rajonet Korcës, Gjirokastrës e Vlorës, rajone që kanë potenciale prodhuese për industrinë e lehtë e ushqimore. Drejtore ekzekutive e institutit shqiptar të cilësisë Renata Kongoli, shprehet se po punohet për të përvetësuar sistemin Hasap, një standart europian në industrinë ushqimore, që është një system i detyrueshëm për kompanitë që duan të eksportojnë prodhimet e tyre në tregjet europiane.

Ndërkaq vetë Bashkimi Europian po ndërmer masat e veta për të mbrojtur prodhimet dhe eksport-importet që vijnë ose hyjnë në vendet joanëtare të tij. Në pikëkalimin kufitar të Kakavijes është ngritur dhe funksionon laboratori i parë i kontrollit për produktet ushqimore, laborator i ngritur me investimin e Bashkimit Europian.

Për ekonominë dhe bizneset shqiptare duket se tashmë ka mbërritur koha e provës në rrugën drejt integrimit europian. Megjithë vështirësitë e panumërta dhe përvojën e traditën fillestare, biznesi shqiptar duket i vendosur në përballimin e sfidës, që në vetvete është dhe sfida e ngritjes ekonomike shqiptare.

Odise Kote
DW

[Gunnar]

Di ndonjeri ndonje gje konkrete persa i perket zhdganimit te makinave te ardhura nga BE?