Nje 43 vjeçar rikthen edhe njehere firmat piramidale

[ClaY_MorE]

Si për të vërtetuar se kujtesa e shqiptarëve është e shkurtër, një 43-vjeçar ka krijuar një tjetër firmë piramidale dhe më pas është zhdukur, bashkë me paratë.

Nazmi Mulleti, me profesion ekonomist, iu mbushte mendjen “kreditorëve” të tij se shumë shpejt do të fitonte tenderat e veshmbathjeve në Ministri të Brendshme, nëpërmjet të cilave paratë e investuara do të shumëfishoheshin në një kohë të shkurtër.

Për t’u bërë i besueshëm, ai firmoste edhe kontrata për paratë e marra, ku parashikoheshin edhe interesat, por njësoj si në raste të ngjashme, 43-vjeçari Mulleti është zhdukur bashkë me paratë, duke lënë të zhgënjyer huadhënësit e tij, që i janë drejtuar për ndihmë policisë.

Policia e Tiranës ka shpallur dje në kërkim Nazmi Mulletin, i akuzuar për vjedhje me anë të mashtrimit.

Hetimi për të ka filluar me denoncimin e dy qytetarëve, të cilët e akuzonin ekonomistin që punonte si tregtar rrobash të importuara nga Turqia për vjedhjen e 80 mijë dollarëve.

Burime nga grupi hetimor pohuan për “Shekullin” se i akuzuari i mashtronte njerëzit, duke iu thënë se do të fitonte tendera në Ministri të Brendshme.

Madje, ai përmendte edhe emra, që sipas tij i kishte miq dhe garantë për marrjen e tenderave.

Policia pohon se deri më tani, personat e mashtruar nga Mulleti janë më tepër se pesë të identifikuar, ndërsa shtohet se po kërkohen edhe persona të tjerë të mundshëm që mund të jenë dëmtuar nga piramida më e fundit e zbuluar.

Kërkimet e policisë mbi të kërkuarin nuk kanë rezultuar të suksesshme, ndërsa agjentët e antikrimit ekonomik kanë nisur gjurmimin e të denoncuarit.


Marre tek: http://www.a1tv.com.al