Banka Botërore publikon raportin “Si të bësh biznes në 2007”, për reformat në ekonomi
Hapat për të hapur një biznes
Raporti: Shqipëria zbret 5 shkallë në nivelin botëror
Mirvjena Dizdari
Kushtet për të bërë biznes në Shqipëri janë vështirësuar. Në raportin e Bankës Botërore “Si të bësh biznes 2007”, Shqipëria ka zbritur 5 shkallë më poshtë duke u pozicionuar në vendin e 120-të, ndërsa në 2005 ndodhej në vendin 115.
Raporti tregon në mënyrë të detajuar të kohën, procedurat dhe kostot, për të hapur dhe për të mbyllur një biznes, në shumë vende të botës.
Një biznesi të mesëm që ushtron aktivitetin në Shqipëri, i duhet të paguajë 41 taksa dhe të shpenzojë 240 orë për pagesën e tyre. Në raportin e fundit të Bankës Botërore “Si të bësh biznes në 2007”, Shqipëria renditet ndër vendet e rajonit që ka ende një numër të madh procedurash për bizneset, të cilat duhet të shkojnë drejt thjeshtimit. Sipas raportit, Shqipëria ka realizuar reformën për uljen dhe thjeshtimin e taksës mbi fitimin, por i duhet të plotësojë edhe shumë reforma të tjera për thjeshtimin e procedurave. Në raport Shqipëria renditet ndër vendet e rajonit që ka ende një numër të madh procedurash për bizneset, të cilat duhet të shkojnë drejt thjeshtimit.
Shqipëria
Sipas Bankës Botërore, për të hapur një biznes në Shqipëri nevojiten mesatarisht 39 ditë. Ndërsa në vendet e rajonit për hapjen e një biznesi duhen 9 ditë dhe në vendet e Evropës Juglindore vetëm 6 ditë. Për t’u pajisur me licencë duhet të plotësohen 344 hapa, shifër kjo shumë herë më e lartë sesa në vendet e rajonit, ku për markën e licencës duhen plotësuar 22 hapa. Por, në Shqipëri një biznes mund të pajiset me licencë në 22 ditë, ndërkohë që në vendet e rajonit koha është shumë më e gjatë. “Në Shqipëri duhen plotësuar 7 procedura kryesore për regjistrimin e pronës dhe kjo mund të realizohet për 47 ditë. Kostoja për regjistrimin e pronës është 3.6 për qind e vlerës së pronës”, theksohet në raportin e Bankës Botërore. Reforma më e përhapur në rajon është ajo e uljes dhe e thjeshtimit të taksës mbi fitimin për biznesin. Vendet që realizuan këtë reformë janë: Shqipëria, Bosnjë-Hercegovina, Estonia, Hungaria, Mal i Zi dhe Turqia. Bosnjë-Hercegovina gjithashtu uli taksën mbi pronën.
“Si të bësh Biznes” i jep mundësi politikanëve të krahasojnë ecurinë e sistemit rregullator me vendet e tjera, të mësojnë nga praktikat më të mira në botë dhe t’i japin prioritet reformave.
Raporti
Për tre vite me radhë vendet e Evropës Lindore realizuan reforma më shpejt se të gjitha vendet e tjera. Secili vend, përveç Sllovenisë, kreu të paktën një reformë. Reformat u nxitën nga konkurrenca në sistemin rregullator të Bashkimit Evropian të zgjeruar. Pavarësisht nga përmirësimet, vendet e Evropës Lindore mesatarisht vazhdojnë të kenë pengesa rregullatore për biznesin, më shumë sesa vendet e OECD dhe Azisë Lindore. Në botë reformat më popullore në 2005-2006 ishin lehtësimi i rregullave për hapjen e një biznesi. Kështu, 43 vende thjeshtuan procedurat, ulën kostot dhe vonesat. Reforma e dytë më popullore, që u zbatua në 31 vende, ishte ajo e uljes së shkallës së taksave dhe procedurave administrative të pagesës së taksave. "Kur reformatorët bëjnë diçka, ata duhet të bëjnë gjithmonë pyetjen: Kush përfiton më shumë? Nëse nga reformat përfitojnë vetëm investitorët e huaj ose të mëdhenj ose investitorë që kanë qenë dikur burokratë, atëherë reformatorët e ulin legjitimitetin e qeverisë", thuhet në raport. Sipas Simeon Djankov, një autor i raportit, reformat duhet të lehtësojnë barrën e të gjitha bizneseve të vogla dhe të mëdha vendase dhe të huaja në fshat dhe në qytet. "Në këtë mënyrë nuk do të ketë hamendje se kur do të kemi bumin e ardhshëm të vendeve të punës. Çdo biznes do të ketë mundësinë për t'u zhvilluar", thotë Djankov. Projekti "Si të bësh Biznes" është bazuar në përpjekjet e më shumë se 5,000 ekspertëve lokalë, konsulentëve të biznesit, juristë, kontabiliste, nëpunës shtetërorë dhe drejtues akademikë nga e gjithë bota, të cilët kanë dhënë ndihmesën e tyre dhe e kanë rishikuar raportin.
120 vendi
ku renditet Shqipëria në raportin "Si të bësh biznes në 2007". Në krahasim me një vit më parë, Shqipëria ka zbritur me 5 shkallë, pasi renditej në vendin e 115-të.
“si te besh biznes” ne Shqiperi
Fillimi i biznesit
Duhen plotësuar 11 procedura
Koha e nevojshme 39 ditë
Kostoja 22,4% e kapitalit fillestar
Marrja e licencës
Duhen plotësuar 344 procedura
Koha e nevojshme 22 ditë
Regjistrimi i pronës
Duhen plotësuar 7 procedura
Koha e nevojshme 47 ditë
Kostoja 3.6% e vlerës së pronës
Taksat që paguhen
Paguhen 41 taksa
Koha e nevojshme 240 ditë
Kostoja e taksave, 55.8% e fitimit
Procedurat e eksporteve
Duhen 7 dokumente për eksportet
Duhen 34 ditë për eksportet
Kostoja e eksporteve 818 USD
Mbyllja e biznesit
Procesi zgjat 4 vjet
Kostoja për mbylljen 38% e pronës
Kostoja për ta rihapur 26.4%
Klasifikimi
Rumania, vendi më aktiv në reforma
Rumania është vendi më aktiv për kryerjen e reformave për të lehtësuar biznesin. Në raportin “Si të bëjmë biznes 2007”, ndër 175 ekonomitë, Rumania ka zbatuar reformat për thjeshtëzimin e licencimit të biznesit për tregtinë, për mundësinë për të siguruar kredi, rritjen e fleksibilitetit të tregut të punës dhe forcimin e mbrojtjes së investitorëve. Ndërsa Kroacia zuri vendin e shtatë në këtë renditje. Ndërkohë, 10 vendet që zbatuan më mirë reformat janë: Gjeorgjia, Rumania, Meksika, Kina, Peruja, Franca, Kroacia, Guatemala, Gana dhe Tanzania. “Si të bësh Biznes në 2007” rendit 175 ekonomitë përsa i përket lehtësisë së kryerjes së biznesit, dhe përfshin 20 ekonomi më shumë krahasuar me raportin e vitit të kaluar. Renditja bazohet mbi treguesit lidhur me kohën dhe koston për të përmbushur kërkesat e qeverisë për të filluar një biznes për të menaxhuar biznesin, tregtinë, taksat dhe mbylljen e biznesit. Kjo renditje nuk merr parasysh faktorë të tillë si: madhësia e tregut, politikat makro-ekonomike, cilësia e infrastrukturës, qëndrueshmëria e monedhës, perceptimi i investitorëve ose shkalla e krimit. Pengesat më të mëdha që ndeshen në rajon janë kërkesat e shumta të licencimit të biznesit, proceset e gjata gjyqësore dhe procedurat për zbatimin e taksave.
Panorama
Krijoni Kontakt