Fajdet

[dodoni]

Arrestohet tre shqiptarë të Kosovës për rrëmbimin e një bashkëqytetari të tyre

Kosovarët marrin peng pushuesin në Vlorë

Rrëmbimi ndodhi për shkak të një borxhi të vjetër, arrestimi u bë në Vau i Dejës

Anila Peçi

Tre shqiptarë të Kosovës kanë marrë peng në Vlorë një tjetër kosovar, i cili ndodhej me pushime në Vlorë. Ngjarja është konstatuar shumë shpejt nga policia dhe pengu është liruar në afërsi të Shkodrës, ndërsa janë vënë në pranga tre pengmarrësit. Arben Kuçi nga Deçani i Gjakovës është marrë peng pasditen e djeshme po nga tre kosovarë, ku shkak ka qenë një borxh i vjetër, por që është kërkuar në një vlerë shumë herë më të madhe nga pengmarrësit. Marrja me dhunë në bagazhin e makinës ka zgjatur jo më tepër se 24 orë për pushuesin nga Kosova, pasi policia ka arritur të ndalojë shtetasit pranë Vaut të Dejës, duke mos lejuar që ata të kalojnë kufirin.
Ngjarja
Ka zgjedhur Vlorën për pushime 33-vjecari Kuçi dhe ka mbërritur në bregdet 5 ditë më parë, por duket se pushimi nuk ka shkuar siç e priste. Një zile në celular një ditë më parë, duket se ka prishur qetësinë e tij.Tre bashkëqyetarë të mbërritur në Vlorë e kanë ftuar atë për një kafe dhe 33-vjeçari është drejtuar për tek ta, por biseda nuk ka përfunduar shumë miqësisht për 33-vjeçarin. “Isha vendosur te hotel “Delfini” thotë Arbeni, i dërguar dje në ambientet e komisariatit të Vlorës. Më marrin në telefon tre kosovarë dhe më ftojnë për kafe. Shkova se i njihja që në Gjakovë, por ata më kërkuan një shumë të madhe lekësh, që unë nuk u kisha aq. Pasi nuk pranova, më futën në bagazhin e makinës dhe më lidhën në këmbë dhe në duar, shenjat e të cilave i kam ende në dorë dhe në këmbë. Nuk më ka ndodhur asnjëherë më parë të kem probleme, po shyqyr nga policia që më shpëtoi.” Sinjali i parë është dërguar në policinë e Vlorës nga bashkëshortja e kosovarit, e cila ka qenë në dijeni të tre personave që kanë dalë me bashkëshortin e saj. Pasi ka pritur që i shoqi të vinte në shtëpi dhe ka kaluar më tepër kohë se një e pirë kafeje, ajo është shqetësuar dhe i është drejtuar policisë së Vlorës për ndihmë.
Policia
Sipas shefit të zyrës së informacionit në policinë e Vlorës, Vladimir Sadikaj, është bërë menjëherë vlerësimi i situatës, në bazë të të gjitha përshkrimeve që ka dhënë gruaja në komisariatin e Vlorës dhe nga veprimet e para është arritur të përcaktohet mjeti me të cilin është marrë kosovari, një benz Mercedes 190, ngjyrë të gjelbër, si dhe janë saktësuar targat e tij. Menjëherë policia e Vlorës është lidhur me të gjitha qendrat e tjera të policisë deri në Shkodër, pasi mendohej që makina të jetë nisur drejt kufirit verior. Pa vajtur në Shkodër, tre pengmarrësit janë ndaluar, në afërsi të Vaut të Dejës, ku kanë qenë forcat speciale që kanë finalizuar bllokimin e kapjen e tyre. Manol Gjidoda 31-vjeç, lindur në Gjakovë dhe banues në Planqor të Gjakovës, dhe dy vëllezrit Ambroz dhe Preng Frrokaj, përkatësisht 37-vjeç dhe 31-vjeç, lindur dhe banues në Planqor, janë tre personat të cilët në bashkëpunim me njëri- tjetrin kanë organizuar pengmarrjen. Të tre ata ndodhen në dhomat e verifikimit të komisariatit të Vlorës, ndërsa mbi ta rëndon akuza e heqjes së paligjshme të lirisë së tjetrit.




25/08/2006


Tre pengëmarrësit u arrestuan nga policia e Shkodrës


Anila Dushi

Policia e Shkodrës ka kapur tre shtetasit kosovarë që kishin rrëmbyer një tjetër kosovar në Vlorë, pas një njoftimi nga kolegët e tyre në Vlorë. Rreth orës 24:15, shërbimet e policisë në Laç të Vaut të Dejës në Shkodër kanë ndaluar mjetin me targë 260 KS 987, i cili udhëtonte drejt Pukës. Në këtë mjet kanë qenë duke udhëtuar 4 shtetas kosovarë, njëri prej të cilëve ishte rrëmbyer nga tre të tjerët. Ngjarja kishte ndodhur në Vlorë rreth ores 20.10 dhe nga salla operative e policisë së këtij rrethi ishte dhënë njoftimi nëpër të gjithë komisariatet e policisë së vendit. Shërbimet e policisë së Shkodrës janë vënë në gatishmëri, nisur dhe nga fakti se nga ky qark ka rrugë tokësore drejt Kosovës dhe ishte e mundshme që të kërkuarit bashkë me të rrëmbyerin të kalonin andej. Nga postblloku në Vaun e Dejës është ndaluar mjeti tip Benz 190 me ngjyrë të gjelbërt, dhe katër personat që ndodheshin aty janë shoqëruar në komisariatin e policisë në Shkodër. Pas marrjes në pyetje ka rezultuar se njëri prej tyre ishte personi i rrëmbyer e marrë peng, Arben Kuçi, 33-vjeç nga Deçani i Kosovës, ndërsa tre të tjerët ishin rrëmbyesit Ambroz Gjon Frrokaj 37-vjeç , Manjol Ndue Gjidodaj 31-vjeç dhe Prengë Gjon Frrokaj 31-vjeç, që të tre nga Gjakova. Menjëherë, katër personat janë shoqëruar nga Blutë e Shkodrës drejt Vlorës, policia e së cilës është njoftuar menjëherë për kapjen e personave të shpallur në kërkim prej saj, madje blutë e Vlorës janë takuar rrugës me ato të Shkodrës dhe kanë marrë në dorëzim prej tyre 4 kosovarët .




25/08/2006

marre nga Shekulli

Ky duket te jete nje shembull tipik i fajdeve. Flitet se fajdet kane lulezuar ne Kosove dhe fajdexhinjte ne Kosove jane njerezit me te pasur per momentin, dhe e gjithe pasuria e tyre vjen ne kete menyre, duke e shkaterruar biznesin vendes dhe ekonomine ne teresi.

Cfare mendoni ju per fajdet?

Si mund te luftohet nje dukuri e tille tejet negative per shoqerine dhe te ardhmen tone?

Ne Kosove flitet se njerezit nuk guxojne te lajmerojne raste te tilla nga pasojat qe mund ti kene ata. Poashtu, flitet se as policia nuk guxon te intervenoj ne te tilla raste dhe as gjykatat lokale nuk guxojne te mirren me to, por vetem UNMIK dhe gjykata nderkombetare.