Elbasani

[erzeni]

Shekulli
-----------------

Një 16-vjeçare mbërrin në gjendje kome në spital.
Një nënë bashkë me foshnjen, të prekur nga tifoja


Shpërthen tifo në Elbasan, 14 vetë në spital


Specialistët: Burimi i infeksionit është rrjeti i ujit të pijshëm. Deri tani janë prekur 5 lagje


ELBASAN - Shpërthen epidemia e tifos abdominale (përçues i të cilit është miu), në Elbasan. Burimet zyrtare të spitalit konfirmojnë shtrimin e 14 personave gjatë 48 orëve të fundit, ndërsa disa fëmijë janë nën kontroll mjekësor në Spitalin Pediatrik të Qendrës Spitalore në Elbasan. Tre prej pacientëve janë dërguar me urgjencë në Spitalin e Tiranës, ndërkohë që në rrezik për jetën është një 16-vjeçare e infektuar me virusin e tifos, e cila mbërriti në spital në pasditen e djeshme. Nertila Kuqa mbërriti e infektuar së bashku me të dy prindërit e saj që ndodhen jashtë rrezikut për jetën, thanë për gazetën burime të spitalit të Elbasanit. Burimi i infeksionit të sëmundjes së rrezikshme, sipas specialistëve të Epidemiologjisë, është rrjeti i ujit të pijshëm të qytetit dhe ai deri tani ka prekur pesë lagje dhe konkretisht "Partizani", "Sul Papri", "Beqir Dardha", "Vullnetari" dhe "Haxhias". Të gjitha këto lagje, me mbi 90 mijë banorë, janë të lidhura me njëra-tjetrën. Mjeku Edmond Laho tha për gazetën se "tifo abdominale e evidentuar së fundmi, është një sëmundje epidemike që përçohet nëpërmjet miut, qoftë dhe në ujin e pijshëm që konsumojnë qytetarët". Ndërkohë një ekip i Ministrisë së Shëndetësisë ka mbërritur dje në Elbasan për të parë situatën dhe për të dhënë orientime mbi kapërcimin e saj.
Epidemia
Që prej dy ditësh, në pavionet e spitalit infektiv kanë mbërritur një numët i madh qytetarësh nga lagjet e sipërme të qytetit që ankohen për temperaturë të lartë, ethe të forta dhe gjendje të përgjithshme dobësie që sipas mjekëve janë dhe simptomat kryesore të infektimit nga mikrobi i tifos. Një ekip po qëndron pranë të infektuarve, duke dhënë ndihmën e nevojshme, megjithë kushtet mjaft të këqija të spitalit. Në spital mungojnë kushtet elementare të mjekimit dhe rreziku për përhapjen e epidemisë është mjaft evident. Mjekët Elida Zhuzhuni, Lefter Guxho dhe infermieret Dhurata Ferra e Violeta Kashari, janë duke qëndruar gjatë gjithë kohës në shërbimin e pacientëve me qëllim që "situata të mos precipitojë duke u përkeqësuar". Në disa raste sipas ekipit mjekësor të këtij spitali, pacientët kanë ardhur në gjendje mjaft të rëndë. Rasti më i fundit ishte ai i djeshmi, kur adoleshentja Nertila Kuqa mbërriti në gjendje koma. Burime të ekipit mjekësor thanë se, "gjendja e vajzës është mjaft e rëndë". Infermierja e turnit Dhurata Ferra thotë se, "në rastin e vajzës 16-vjeçare kemi të bëjmë dhe me një gjendje febrile, të shoqëruar me gastroenterit akut që sjell simptoma të një gjendjeje serioze për jetën". Josif Kuqa 45 vjeç, babai i 16-vjeçares që ndodhet në gjendje koma, tha për gazetën se "menduam se ishim helmuar kur pamë disa shenja, por kur u shtruam na thanë se ishim infektuar nga tifo e miut, që vinte nëpërmjet ujit të pijshëm". Lefteria nëna e adoleshentes tregon se "ne kemi përdorur ujë të pijshëm nga rubinetet dhe na është thënë vazhdimisht se ai është i përshtatshëm". Ndërsa më tej shtron pyetjen: "Si ka mundësi që ne të infektohemi nga uji që paguajmë?" Fatmira Çoku 42 vjeç nga lagjja "Vullnetari" thotë se "ndodhem prej disa ditësh këtu pasi jam prekur nga tifo". Gruaja, nënë e 5 vajzave, thotë se është prekur nga virusi i tifos pa e kuptuar edhe pse tregon një kujdes të madh në konsumin e ushqimit. Ajo pohon se "këto dy ditët e fundit janë të paktën dhe tetë persona të tjera që janë shtruar në spital. Ata janë nga lagjet "Haxhias", "Partizani" etj". Epidemia ka prekur dhe nënat me fëmijë të porsalindur. Drejtori i Spitalit Obstetrik Gjinekologjik Ardian Kadaifçiu tha për "Shekulli"-n se "një grua 35- vjeçare nga Lagjja "Partizani" që sapo kishte lindur fëmijën e saj në kushte shtëpiake, u dërgua me urgjencë në spitalin infektiv pasi që të dyja rezultuan të infektuara nga tifoja abdominale, shkaktuar nga përdorimi oral i ushqimit apo pijeve të ndryshme në mjedise shtëpiake".
Shkaqet
Burime nga drejtoria e Shëndetit Parësor thanë se janë njohur me gjendjen dhe se deri dje paradite kishin regjistruar 11 raste të prekjes nga epidemia e tifos, në tre lagje kryesore të qytetit. Për këtë u vunë në lëvizje të gjitha strukturat shëndetësore të Qarkut dhe u sinjalizuan dhe specialistë të Tiranës. Dje në Elbasan pas kërkesës së Institutit të Shëndetit Publik mbërriti një ekip i Ministrisë së Shëndetësisë që po vëzhgon nga afër situatën. Specialisti i Institutit të Higjienës dhe Epidemiologjisë, Agim Vërçani, thotë se në bazë të analizave të bëra është konstatuar salmonelatifi, tifo abdominale (e barkut), e shkaktuar nga depërtimi i virusit të tifos në rrjetin e ujit të pijshëm që i shpërndahet popullatës. Mësohet se në rrjetin tejet të amortizuar të shpërndarjes së ujit të pijshëm kanë depërtuar viruset e tifos duke u përhapur më pas tek popullata.
Masat
Bluzat e bardha në Spitalin Infektiv thanë se "duhet të tregohet një kujdes në konsumin e ujit të pijshëm". Ata këshilluan qytetarët që të ziejnë ujin për të evituar një përhapje të mëtejshme të epidemisë. Mjekët thanë se pacientët e ardhur në spital janë mjekuar intensivisht me kloramfenikol, kemiceptinë dhe serume. Epidemiologu i Institutit, Agim Vërçani tha se "menjëherë u morën masat për dezinfektimin e zonave të prekura nga virusi i tifos". Sipas tij, është hedhur një sasi e madhe hipoklorit kalciumi. Ndërkohë është lëshuar një urdhëresë për kompaninë gjermane Elber shpk që të lëshojë ujë 24 orë për popullatën, të paktën në zonat aktualisht problematike. Specialistët e Epidemiologjisë e motivuan këtë masë me faktin se nuk duhet të krijohen boshllëqe në rrjet, pasi aty kanë depërtuar mikrobet e tifos që bëhen shkak i epidemisë. "Rrjeti i ndërtuar shumë dekada më parë është plotësisht i amortizuar dhe si rrjedhim ka një probabilitet të madh për t'u shndërruar në vatra të infeksionit", thanë specialistët e epidemiologjisë. Burime të kësaj kompanie konfirmuan se urdhri ka nisur të ekzekutohet menjëherë dhe popullatës së Elbasanit po i jepet ujë 24 orë pa ndërprerje. Burimet shtuan se janë marrë masa duke u hedhur në rrjetin e ujit të pijshëm, një sasi e madhe klori që do të ndikojë në eliminimin gradual të virusit të tifos në tubacionet e ujit të pijshëm nga dhe furnizohet popullata.
Qytetarët
Gjatë ditës së djeshme qindra qytetarë të lagjeve te prekura nga virusi i tifos, kanë braktisur konsumimin e ujit të pijshëm nga tubacionet e ndërmarrjes së ujësjellësit. Shumë prej tyre pohojnë për gazetën se kanë frikë të përdorin për pirje e gatim ujin e rubineteve, ndërsa ka një fluks të madh të shitjeve në njësitë tregtare, të ujit të ambalazhuar. Kjo dukuri nuk ishte hasur në Elbasan që në mesin e vitit 1997 kur u dha alarmi se uji ishte helmuar nga njerëz të papërgjegjshëm, gjatë trazirave të atij viti. Nisur nga gjendja e vështirë ekonomike e pjesës më të madhe të familjeve elbasanase, blerja e ujit për konsum vlerësohet nga banorët si një "luks" i tepërt, që nuk mund t'ia lejojnë gjatë vetes.
Soni Kurani

-----------------





Elbasani mban rekordin e vetvrasjeve me bar miu
ose Fotoksine.
Miu vete ben kerdine e Fotoksina vret njerzit perdite.

[Exotica13]

kam lexuar qe koeht e fundit elbasani esh ber numer njeshi ne vetvrasje shuem keq

[Chocolat]

Ej une e kam shtepine tek "Partizani",po familja ime ishte ok gjate epidemise....
Ca bohet me ju???
Metem me dore ne zemer