Duke filluar nga sot, ulen kostot e bisedave telefonike
AMC, Vodafone dhe Telekom nënshkruajnë marrëveshjet
Kompanitë AMC dhe Vodafone kanë nënshkruar marrëveshjet e interkoneksionit me kompaninë Albtelekom.
Sipas këtyre marrëve-shjeve, vlerat për tarifën e aksesit dhe të terminimit të thirrjeve në rrjetin fiks pësojnë ulje në masën 12 për qind; tarifa e terminimit të thirrjeve nga rrjeti fiks në rrjetin celular, dhe nga rrjeti celular në rrjetin tjetër celular rezulton me ulje në masën 43 për qind. Duke filluar që nga dita e sotme, kanë hyrë në fuqi marrëveshjet e reja të interkoneksionit. Logjikisht, ulja e këtyre tarifave duhet të shoqërohet me ulje të çmimeve të bisedave me celularë. Megjithëse urdhri i Entit Rregullator të Telekomunikacionit për nënshkrimin e marrëveshjes ishte i detyrueshëm, kjo nuk do të thotë që kompanitë do ta kenë të detyrueshme të ulin tarifat e tyre të bisedave telefonike.
Tarifat
Kompanitë celulare do të kenë një zbritje në kostot e tyre për afrimin e shërbimit celular. Tarifat e interkoneksionit për vitin 2006 përfaqësojnë nivele mesatare evropiane, e cila krahasuar me nivelin e tarifave të interkoneksionit të aplikuara në marrëveshjet e lidhura nga subjektet në fund të vitit 2004, shënon një ulje të ndjeshme. “Synimi i ERT-së në këtë vendimmarrje është që tarifat e interkoneksionit të shërbejnë krahas vendosjes së barazisë midis operatorëve në treg, edhe si premisë për uljen e tarifave të përdoruesve të shërbimeve telefonike”, thuhet në deklaratën zyrtare të ERT-së. ERT sqaron më tej në deklaratë se është kompetence ekskluzive e operatorëve vendas negocimi me operatorët përkatës ndërkombëtar përsa i përket tarifave për shërbimin e trafikut ndërkombëtar.
Marrëveshjet
Më datë 18 maj 2006, Albtelekom deklaroi pranë ERT-së dështimin e bisedimeve për lidhjen e marrëveshjeve të interkoneksionit për vitin 2006 me operatorët e telefonisë se lëvizshme (celulare) AMC dhe Vodafone Albania. Marrëveshjet e interkoneksionit u bënë molla e sherrit ndërmjet Albtelekomit dhe kompanive celulare, AMC dhe Vodafone. Në fillim të muajit maj, kompania Albtelekom u përfshi në një konflikt, ku dy punonjës të kompanisë akuzuan drejtorin, Ilirian Kuko, për afera me dy kompanitë celulare. Negociatat, të cilat deri në atë moment ishin thuajse në përfundim, duket se u rikthyen edhe njëherë nga fillimi. Në një raport në formë akuze dërguar Avokatit të Popullit, kreut të Këshillit Mbikëqyrës të Albtelekomit dhe vetë drejtorisë së kompanisë, dy punonjës të Albtelekomit kanë bërë publike akuza ndaj kreut të kompanisë, Ilirian Kuko. Bëhet fjalë për të ardhurat që duhet të përfitojë Albtelekomi për bisedat nga numrat fiks në ato celularë dhe e kundërta, si dhe tarifat për lidhjet ndërkombëtare.
te dhenat per celularet
12 për qind
Sipas urdhrit të Entit Rregullator të Telekomunikacioneve, vlerat për tarifën e aksesit dhe të terminimit të thirrjeve në rrjetin fiks pësojnë ulje në masën 12 për qind
43 për qind
Sipas urdhrit, tarifa e terminimit të thirrjeve nga rrjeti fiks në rrjetin celular dhe nga rrjeti celular në rrjetin tjetër celular rezulton me ulje në masën 43 për qind
781 mijë
është afërisht numri i abonentëve të kompanisë celulare AMC. Në vitin 1999, para privatizimit të AMC, kompania kishte vetëm 11 mijë abonentë
260 mijë
është numri i abonentëve të telefonisë fikse në fund të vitit 2005. Ky numër ishte parashikuar të ishte 2 herë më i lartë deri në fund të 2005-ës
1.4 milionë
është numri i klientëve të telefonisë celulare. Ky numër rezulton se është 5 herë më i lartë se numri i abonentëve të telefonisë fikse
Operatori i tretë
“Eagle Mobile”, gati për privatizim
Kompania e tretë celulare “Eagle Mobile”, do t’i nënshtrohet tarifave të reja të interkoneksionit, në momentin që do të vihet në funksionim. Kompania e tretë celulare parashikohet të vihet në funksionim në vitin 2007, ndërkohë që kompania Albtelekom do t’i nënshtrohet sërish procesit të privatizimit në fund të këtij viti. Operatori i tretë i telefonisë celulare “Eagle Mobile”, ka marrë licencën që prej dy vjetësh, por ende nuk është vënë në funksionim. Kryetari i Entit Rregullator të Telekomunikacioneve ka deklaruar se për kompaninë e tretë celulare nuk i është shtyrë licenca, por afati i hedhjes në treg. “ERT në vendimet që ka marrë vetëm sa ka respektuar një pikë të marrëveshjeve përkatëse, ku thuhet që për arsye të mbështetura në ligj apo në dispozitat përkatëse ligjore dhe nënligjore shtyhet afati i prezantimit në treg të operatorëve. Pra, nuk është shtyrë licenca, por është shtyrë afati i lëshimit në treg të operatorit Eagle Mobile”, u shpreh Kopani. Mungesa në tregun e telefonisë së lëvizshme të “Eagle Mobile” ndikon financiarisht dhe në përcaktimin e mekanizmave të çmimeve. Ky është vlerësimi që jepet në raportin vjetor të kryetarit të Entit Rregullator të Telekomunikacionit, Hydajet Kopani, i prezantuar disa muaj më parë në Komisionin Parlamentar të Veprimtarisë Prodhuese.
4 operatore
Në Shqipëri janë gjithsej 4 operatorë të nivelit të klasit të parë me licencë kombëtare. “Albtelekom”, “AMC”, “Vodafone” dhe “Eagle Mobile” janë 4 operatorët e klasit të parë
2 vjet
është koha e licencimit të kompanisë së tretë celulare “Eagle Mobile”. Kjo kompani ende nuk është vënë në funksionim, ndërkohë që afati i saj është shtyrë disa herë
AMC: Pas marrëveshjes së interkoneksionit, gati të dalim me paketë të re
Kompanitë: Do ulim tarifat për telefonat celularë
Marrëveshjet e reja të interkoneksionit do të pasohen me ulje të tarifave për bisedat me celularë.
Shumë shpejt kompania AMC, pas nënshkrimit të marrëveshjes, do të hedhë në treg një paketë të re e cila parashikon ulje tarifash për klientët e saj. Ndërsa kompania Vodafone, vetëm 1 muaj më parë, uli me 25 për qind tarifat për bisedat ndërkombëtare. Dy kompanitë celulare deklaruan se i kanë nënshkruar marrëveshjet e interkoneksionit, me të njëjtat kushte që ishin parashikuar në udhëzimin e ERT-së. Burime pranë kompanisë AMC kanë deklaruar, se sa herë që marrëveshjet e interkoneksionit kanë ndryshuar, kjo është pasqyruar menjëherë tek klientët, të cilët do të përfitojnë shërbime më cilësore dhe tarifa më të ulëta.
AMC
Kompania AMC ka deklaruar se marrëveshjet e reja të interkoneksionit do të reflektohen në ulje të tarifave të bisedave për klientët e AMC-së. Burime brenda kësaj kompanie kanë deklaruar se shumë shpejt do të hidhet në treg një paketë interesante për të gjithë klientët e AMC-së. “Sa herë që marrëveshjet e interkoneksionit kanë pësuar ndryshime, ne këtë e kemi reflektuar në tarifat e bisedave. Edhe këtë herë jemi duke përgatitur një paketë mjaft favorizuese për të gjithë abonentët tanë. Paketa do të jetë prezente në treg brenda një kohe të shkurtër”, ka deklaruar i njëjti burim pranë AMC.
Vodafone
Që prej ditës së premte, kompania e telefonisë celulare Vodafone ka nënshkruar marrëveshjen e interkoneksionit me kompaninë Albtelekom, duke iu përmbajtur udhëzimit të Entit Rregullator të Telekomunikacioneve. Kompania Vodafone kishte rënë dakord që në fillim me tarifat e vendosura nga ERT-ja. Zyrtarë të Vodafone deklarojnë se marrëveshjet e interkoneksionit nuk mund të shoqërohen detyrimisht me ulje të tarifave për klientët, pasi këto janë dy lloje të ndryshime tarifash. Megjithatë, kompania Vodafone synon gjithmonë e më shumë që të ofrojë tarifa të favorshme për klientët. “Një muaj para se të nënshkruhen marrëveshjet e interkoneksionit, pra në fillim të qershorit, ne aplikuam ulje tarifash për thirrjet ndërkombëtare, në masën 25 për qind”, kanë deklaruar zyrtarë të Vodafone.
Abonentët
Sipas ERT-së, numri i përdoruesve celularëve në Shqipëri është rritur me ritme të shpejta. Në fund të gjashtëmujorit të parë të vitit 2005, sipas raportit të ERT-së, numri i përdoruesve të shërbimeve të lëvizshme rezulton pesë herë më i madh se ai i përdoruesve të telefonisë fikse, ose 1.4 milionë me 260 mijë telefonues. Rritja e shpejtë e komunitetit të përdoruesve të celularëve kushtëzohet edhe me mungesën e zgjedhjes së qytetarëve rezident ose jo në Shqipëri. Penetrimi i shërbimit të telefonisë së lëvizshme të ofruar nga AMC dhe Vodafone është 38.6 për qind. Dy operatorët celularë përfaqësojnë më shumë se 70 për qind të tregut të të ardhurave të telefonisë në vendin tonë.
Drejtori i Financave, Robert Wood, i dërgon letër Kopanit
AMC ankohet në ERT: Telekom zvarriti negociatat
“Nuk pranoi propozimin e AMC për thirrjet ndërkombëtare”
Kompania AMC, me anë të një letre zyrtare, informon ERT-në në lidhje me miratimin e propozimeve të AMC nga ana e Albtelekom për tarifat e aplikueshme për trafikun ndërkombëtar. AMC ka njoftuar ERT-në për nënshkrimin e marrëveshjes 1-vjeçare të Interkoneksionit ndërmjet AMC sh.a. dhe Albtelekom sh.a. “Njëkohësisht përfitojmë nga rasti për të shprehur shqetësimin tonë lidhur me mënyrën se si Albtelekom, përveç zvarritjeve të qëllimshme për të cilat ju kemi informuar në vazhdimësi, me shkresën e datës 29 korrik 2006 keqinformon ERT, duke shtrembëruar të vërtetën. Paradoksalisht, në kohën kur ky komunikim arriti në adresën tonë, përfaqësues të AMC ishin ende në zyrat e Albtelekom, duke u përpjekur në mirëbesim për të arritur mirëkuptim lidhur me Marrëveshjen e Interkoneksionit”, thuhet në letrën e AMC-së. Sipas Robert Wood, drejtor i Departamentit të Financës, propozimet e AMC-së kanë qenë që në fillim në përputhje të plotë me rekomandimet e ERT-së, përsa i përket tarifave të aplikueshme për trafikun kombëtar. Përsa i përket trafikut ndërkombëtar, pasi u arrit marrëveshja në parim për tarifat e aplikueshme, AMC sugjeroi që në mbështetje të legjislacionit në fuqi të trajtohej në një marrëveshje të veçantë me afat të pacaktuar për të reflektuar realitetin e një tregu plotësisht të liberalizuar. “Kjo kërkesë, në mënyrë të pakuptimtë dhe aspak profesionale u hodh poshtë, duke ndërprerë përpjekjet tona të sinqerta për të krijuar një shtrat afatgjatë bashkëpunimi në një segment të tregut, i cili ka vuajtur në vite nga çmime nën nivelin e tregut ndërkombëtar duke dëmtuar jo vetëm interesat ekonomike të AMC, por dhe të vetë Albtelekomit dhe të tregut të telekomunikacioneve në përgjithësi”, theksohet në letrën e Robert Wood, drejtuar ERT-së.]
Mirvjena Dizdari
Panorama
Krijoni Kontakt