Workgroup i mbrojtur

[aldo-1.618]

Kam nje problem me rrjetin.
Marr internetin me ane te nje ruteri dhe e shperndaj ate ne disa kompkutera.
Keta kompjutera jane ne nje workgroup,pasi me duhet te shkembej materiale midis tyre.
Nje komshiu im me kerkoi internet .Keshtu qe une bera nje lidhje midis PC te tij dhe routerit tim.Por ne kete menyre ai eshte ne rangun tim te IP-ve,dhe ne kete menyre ai mund te shohe dokumentet e mia qe jane share.
A ka ndonje menyre qe mund ta evitoj kete,mbase ti ve workgroup-it ndonje pasword,apo e vetmja menyre eshte te perdor nje Firewall?

[edspace]

Ka disa mënyra për të mos lejuar komshiun të hapë skedarët e ndarë.
I. Vendos fjalëkalim për llogarinë guest
II. Përdor firewall
III. Cakto lejet për çdo përdorues


T'i zëmë me radhë...

I. Vendos fjalëkalim për llogarinë guest.

Kur dikush mundohet të lexojë një skedar në rrjet, Windows XP identifikohet me llogarinë guest. Kjo llogari ekziston në të gjithë kompjuterat dhe fjalëkalimi është bosh. Nëse kompjuteri që ka ndarë skedarët nuk e ka ndryshuar këtë llogari, atëherë kompjuterat e tjerë të rrjetit kanë leje të lexojnë/shkruajnë skedarët e ndarë. Nëse kësaj llogarie i vendos një fjalëkalim, atëherë kompjuterat e tjerë në rrjet nuk do mund të identifikohen me llogarinë guest (sepse nuk punon fjalëkalimi) dhe kompjuteri do i pyes të identifikohen me një emër dhe fjalëkalim tjetër.

Fjalëkalimi duhet të ndryshohet në të gjithë kompjuterat që kanë ndarë skedarë.

II. Përdor Firewall

Në Windows XP SP2 mund të konfigurosh firewall që të lejojë ndarjen e skedarëve vetëm për disa kompjutera të caktuar.

Ndarja e skedarëve bëhet në disa porta të caktuara:
UDP: 137, 138
TCP: 139, 445

Duke përdorur firewall, këto porta mund t'i lejosh vetëm për kompjuterat me adresa IP të caktuara. Psh: Nëse kompjuterat e lejuar kanë adresat: 192.168.1.1, 192.168.1.2, 192.168.1.3 dhe kompjuteri i komshiut ka adresën 192.168.1.4, atëherë lejon vetëm tre të parat të kalojnë firewall. Ndiq këto hapa:

Shiko figurën e bashkëngjitur.

1. Hap panelin e kontrollit
2. Kliko dy herë mbi murrin mbrojtjës (firewall)
3. Tek tabela e parë aktivizoje firewall (zgjidh ON)
4. Tek tabela e përjashtimeve (exceptions) zgjidh Ndarja e Skedarit dhe Printerit (File and Printer Sharing) dhe shtyp butonin redakto (edit).
5. Në dritaren që do hapet shtyp butonin Ndrysho Mundësitë (Change Scope).
6. Aty zgjidh opsionin e listës (custom list) dhe shkruaj adresat IP të kompjuterave, të ndara me presje, që do kenë leje të lexojnë skedarët e ndarë.
7. Mbylli të gjitha dritaret e hapura duke aplikuar ndryshimet.

E keqja e kësaj mënyre është se duhet të sigurohesh që kompjuterat kanë gjithnjë të njëjtën adresë IP. Prandaj duhet të konfigurosh routerin që t'u japë kompjuterave të njëjtën adresë IP në bazë të adresës MAC. Gjithashtu, hapat më lart duhet t'i zbatosh për të gjithë kompjuterat që ndajnë skedarë në rrjet.

Nëse komshiu merr vesh nga kompjuterat, mund ta ndryshojë adresën IP në një adresë të kompjuterave të lejuar dhe do mund të lexojë skedarët. Nëse ke router të mirë që i mbron adresat e rezervuara, atëherë nuk e vjedh dot adresën komshiu.

[edspace]

III. Cakto lejet për çdo përdorues

Tek dosjet që ndan, mund të caktosh lejet për çdo përdorues të rrjetit. Ti duhet t'u japësh leje vetëm përdoruesve të tjerë, jo komshiut.

Për të bërë këtë gjë duhet të zbatohen këto hapa:
1. Çaktivizo ndarjen e thjeshtë (simple file sharing)

1. Hap My Computer.
2. Tek menuja në krye zgjidh tools > folder options.
3. Boshatise opsionin "enable simple file sharing".

2. Konfiguroje kompjuterin që të mos lejojë identifikimin me guest.

Këtë mund ta bësh duke ndryshuar fjalëkalimin, siç e shpjegova më lart, ose duke ndryshuar rregulloren e sigurisë:

1. Tek paneli i kontrollit hap veglat e administratorit (administrator tools).
2. Hap rregulloren lokale të sigurisë (local security policy).
3. Në të djathtë zgjidh Local Policy > Security Options
4. Tek lista në të majtë gjej opsionin Network Access: Sharing and security model for local accounts dhe ndryshoje në Classic: Local users authenticate as themselves.

3. Hard disku yt duhet të jetë formatuar si NTFS, jo FAT32.

Lexo këtë temë për ta kthyer në NTFS nëse përdor FAT32.

4. Krijo llogaritë që do kenë leje të hapin skedarët e ndarë.

Psh: Nëse kompjuterat përdorin llogaritë Agim, Artan, Beni, Genti, atëherë tek kompjuteri që ka ndarë skedarët duhet të krijosh që të katërta llogaritë dhe t'u vendosësh të njëjtët fjalëkalime si ata që përdorin për të hyrë në kompjuter. Të gjitha këto llogari duhet të kenë fjalëkalim; fjalëkalimi nuk mund të jetë bosh.

Si të ndash skedarët

Pasi ke ndjekur hapat më lart, mjafton të klikosh me butonin e djathtë mbi një dosje dhe zgjidh ndarja dhe siguria (sharing and security). Aty (1) zgjidh opsionin ndaje kete dosje (share this folder) dhe (2) shtyp butonin lejet (permissions). (3) Shto vetëm emrat e llogarive që do të kenë leje të hapin skedarët dhe ndrysho të drejtat (vetëm lexo, lexo dhe shkruaj, apo kontroll të plotë) sipas dëshirës.

Në figurën e bashkëngjitur kemi ndarë dosjen "dosje e ndarë" dhe i kemi dhënë leje Agimit të lexojë skedarë.

Udhëzimet më lart janë një përmbledhje e hapave që duhet të ndjekësh. Për më shumë detaje dhe ilustrime mund të ndjekësh hapat e shpjeguar në këtë faqe (në anglisht).

[aldo-1.618]

shume faleminderit edspace,ajomenyra e firewall-it mu duk interesante.Ta provoje nje here.