Gjendja ekonomike ne Kosove

[ganoid]

Mbarëshqiptare

Naim Gashi – Pejë - 14/04/2004

Pejë, austriakët interesohen për fabrikën e baterive “Trepça”

Projekti i përpiluar, sipas menaxherit të përgjithshëm të fabrikës “Trepça”, Ekrem Belegu, kishte hasur në reagime pozitive nga ana e punëtorëve të fabrikës, prej të cilëve rreth 200 nga gjithsej 340 punëtorë kishin nënshkruar marrëveshjen për pjesëmarrje në privatizimin e ndërmarrjes së tyre


Në gushtin e vitit të kaluar kur Agjencia Kosovare e Mirëbesimit kishte paralajmëruar se fabrika e baterive industriale “Trepça” e Pejës do të përfshihet në raundin e tretë të privatizimit, stafi drejtues i fabrikës kishte reaguar menjëherë duke përpiluar një projekt më të cilin punëtorët e saj, vetëm apo edhe me ndonjë partner tjetër jashtë fabrikës, do të konkurrojnë në tenderin e radhës më qëllim privatizimin e saj.
Projekti i përpiluar, sipas menaxherit të përgjithshëm të fabrikës “Trepça”, Ekrem Belegu, kishte hasur në reagime pozitive nga ana e punëtorëve të fabrikës, prej të cilëve rreth 200 kishin nënshkruar marrëveshjen për pjesëmarrje në privatizimin e ndërmarrjes së tyre, prej 340 punëtorëve që punonin në fabrikë.
“Fillimisht, projekti ishte hartuar në bashkëpunim me punëtorët dhe duke respektuar projektin ne kemi bërë edhe deponimin e mjeteve të punëtorëve pjesëmarrës në procesin e privatizimit. Mirëpo më vonë kemi vendosur që në projektin tonë të përfshijmë edhe të tjerë”, - thotë Belegu.
Më të mësuar se fabrika e baterive është futur në listën e shitjes nga AKM-ja, Belegu tha se para dyerve të fabrikës ishin paraqitur dy biznesmenë të interesuar nga Austria, të cilët pasi kishin bërë një vizitë nëpër objektet e fabrikës, iu kishte lënë përshtypje hapësira dhe kapaciteti prodhues i fabrikës. Në takimin me austriakët Belegu i kishte njoftuar me projektin e nënshkruar nga punëtorët dhe qëllimin e tij që bashkarisht të marrin pjesë në procesin e privatizimit.
Partnerët e mundshëm, ndaj të cilëve Belegu nuk fsheh simpatinë, janë biznesmenë austriakë që merren me sigurimin e tregut e jo me prodhime baterish industriale. Bllokimi i procesit të privatizimit që u bë vjeshtën e kaluar, bllokoi edhe përpjekjet e drejtimit të fabrikës për të hyrë në bisedime me afaristët austriakë. “Por fatmirësisht austriakët nuk na kanë harruar”, - thotë Belegu. “Ka gjasa që austriakët ende kanë interesim për partneritet, sepse para dy javëve ata janë lajmëruar që të interesohen për situatën pas trazirave të fundit dhe se a kanë ndikuar negativisht ato në projektin tonë të përbashkët. Kështu, ata treguan se ende nuk kanë hequr dorë nga konkurrimi i përbashkët në tender”, - tha drejtori i “Trepçës”. Interesimin për pjesëmarrje në tenderin për privatizimin e kësaj ndërmarrjeje e kanë shprehur edhe disa biznesmenë kosovarë. Mirëpo, sipas Belegut, asnjëri nga ata deri më tani nuk i ka shikuar objektet e fabrikës. Belegu nuk ka përjashtuar mundësinë që fabrika pavarësisht nga kërkesat të merret edhe për destinime të tjera.
Aktualisht në këtë fabrikë, varësisht nga nevoja, janë të angazhuar 40 deri në 50 punëtorë, të ardhurat e të cilëve sigurohen nga shitja e prodhimeve që bëhet për momentin vetëm në tregun kosovar dhe nga një sasi e vogël baterish që eksportohen në Serbi.
Në vitin 1986, kur fabrika e baterive ishte në zenitin e saj, ishin të angazhuar mbi 700 punëtorë dhe kishte një prodhim prej 10 mijë tonë bateri në vit, prej të cilave 90 për qind janë shitur në ish- Bashkimin Sovjetik. Pas luftës, sipas Belegut, me prodhimet e kësaj fabrike janë ndërruar bateritë e dëmtuara gjatë luftës dhe para luftës në të gjitha trafostacionet e Kosovës.