Fatmir Sejdiu u zgjodh President i ri i Kosovës

[ideus]

Deputetët e Kuvendit të Kosovës zgjodhën sot Fatmir Sejdiun nga radhët e LDK-së President të ri të Kosovës.
Nëpërmjet një votimi të fshehtë, pas tri raundeve, Fatmir Sejdiu, kandidati i vetëm për kreun e vendit, mori 8O vota, kundër ishin 12 dhe 17 fletëvotime ishin të pavlefshme.
Fatmir Sejdiu, sekretar i përgjithshëm i LDK-së, në postin më të lartë të vendit trashëgon Presidentin e ndjerë Ibrahim Rugova, i cili u nda nga jeta më 21 janar 2OO6.
Sipas Kornizës Kushtetuese, Presidenti i Kosovës mund të zgjidhet me dy të tretat e votave të 12O deputetëve sa ka parlamenti ose me shumicën e thjeshtë prej 61 votave pro.
Në raundin e parë, nga 11O deputetë të pranishëm, pro votuan 78, ndërkaq 8 ishin kundër dhe 24 fletëvotime ishin të pavlefshme. E njëjta situatë u përsërit pothuajse edhe në raundin e dytë kur pro votuan 77 deputetë, 9 ishin kundër dhe 24 fletëvotime ishin të pavlefshme.


Biografia e Fatmir Sejdiut

Fatmir Sejdiu u lind më 23 tetor 1951 në Pakashticë, komuna e Podujevës, Kosovë. Shkollimin fillor dhe të mesëm i ka mbaruar në Podujevë. Ka mbaruar Fakultetin e Drejtësisë në Universitetin e Prishtinës më 1974, ku ka kryer edhe studimet pasuniversitare. Po në këtë Universitet ka mbrojtur disertacionin e doktoratës.
Dr. Fatmir Sejdiu është profesor në Fakultetin Juridik dhe atë të Shkencave Politike të Universitetit të Prishtinës.
Për studime të thelluara, Prof. Sejdiu ka qëndruar në Francë (Universiteti Paris 2 ) dhe në SHBA (Arizona State University), ndërsa ka pasur qëndrime më të shkurtra studimore edhe në universitete të tjera. Ka marrë pjesë në shumë simpoziume shkencore vendore dhe ndërkombëtare. Ka publikuar shumë punime shkencore nga fusha juridike - historike dhe juridike kushtetuese. Është autor librash të veçantë nga këto fusha.
Fatmir Sejdiu ka qenë pjesëmarrës i Kuvendit themelues të Lidhjes Demokratike të Kosovës (LDK) më 23 dhjetor 1989. Në Kuvendin e Parë Zgjedhor në vitin 1991 është zgjedhur anëtar i Këshillit të Përgjithshëm dhe më 1992 anëtar i Kryesisë së LDK së, ndërsa më 1994 Sekretar i Përgjithshëm i LDK së, detyrë të cilën e kryen edhe sot.
Ka qenë anëtar i Komisionit Qendror për organizimin e Referendumit për Pavarësinë e Kosovës, mbajtur më 1991. Ka qenë ndër njerëzit kryesorë për përgatitjen dhe organizimin e zgjedhjeve parlamentare dhe presidenciale të Republikës së Kosovës, që janë mbajtur më 1992 dhe 1998.
Fatmir Sejdiu është zgjedhur deputet në Kuvendin e Republikës së Kosovës më 1992 dhe më 1998. Po kështu, më 1998 është zgjedhur Sekretar i Përgjithshëm i Kuvendit dhe kryetar i Komisionit për Çështje Kushtetuese.
Më 2001, në zgjedhjet e para demokratike të pasluftës, është zgjedhur deputet në Kuvendin e Kosovës dhe anëtar i Kryesisë së Kuvendit. Deputet dhe anëtar i Kryesisë së Kuvendit është zgjedhur sërish më 2004. Z. Sejdiu është gjithashtu anëtar i Komisionit për Bashkëpunim Ndërkombëtar dhe Integrime Euroatlantike.
Fatmir Sejdiu komunikon në frëngjishte dhe anglishte.
Eshtë i martuar dhe ka tre fëmijë. Jeton në Prishtinë.

[ideus]

Fatmir Sejdiu

[mbreta]

Perhajr i qofte Kosoves Kryetari i ri.

[bijonda]

perhajr ju koft e na koft fatmir sejdiu urrrrrrrrrrrrrrrrrra

[RTP]

Urime Kosovë

Duke Uruar qe amanetin e dr.Rugoves ta qojme ne vend.
Lutem dhe ju uroj pune te mbare!



Familja e Presidentit Rugova në një mesazh urimi përshëndet zgjedhjen e Fatmir Sejdiut President të Kosovës

http://www.forumishqiptar.com/showth...t=60475&page=5

[RTP]

Fatmir Sejdiu bëri homazhe para Presidentit Rugova




Prishtinë, 1O shkurt - Presidenti i sapozgjedhur i Kosovës, Fatmir Sejdiu, menjeherë pasi mori votëbesimin e Kuvendit të Kosovës, bëri homazhe para Presidentit Ibrahim Rugova dhe vuri lule të freskta mbi varrin e tij.

[Cappuccino]

Urime edhe nga Medicusi e Zoti i japt kurajo ta pershpejton punen deri ne arritjen e cakut perfundimtare te shumemirepritur - pavaresise.

Medicus

[Brari]

Shum zgjedhje e mire!

Per Hajr na koft Presidenti Fatmir Sejdiu e sa ma shpejt ne Kosoven Republike!


Pergezime deputeteve qe e Votuan e i dhan mundesi Kosoves me ec perpara ku na kerkon Bota e perparuar!

Ata bukurosh-bukuroshet 12 + 17 le ta mbajn me dor!

lol

[Thatcher]

Perhajr i qofte Kosoves Kryetari i ri.

. . . . . . amin.

[Besi_11]

Inshalla na jepet e mbara e urime te gjitheve per Kryetarin e ri te Kosoves

[Musi]

Urime te gjith atyre qe e ndjen vetn qytetar te kosoves presidentin e posa zgjedhur Fatmir Sejdiu

[ideus]

Menjëherë pas përfundimit të votimeve dhe shpalljes së rezultatit të votimit, kryetari i posa zgjedhur Fatmir Sejdiu iu adresua Kuvendit, duke iu falënderuar për votat “Unë zgjidhem në këtë detyrë dhe marr postin që ka mbajtur Presidenti ynë i parë dhe tashmë historik, Dr. Ibrahim Rugova. Këtë post të lartë Presidenti Rugova e bënte edhe më të madh me figurën e vet të veçantë prej njeriu e prijësi të papërsëritshëm”, u shpreh ai.


“Presidenca e Kosovës, nën udhëheqjen time, do të bashkëpunojë ngushtë me institucionet e tjera të Kosovës, me partitë politike në pushtet dhe në opozitë, me grupet etnike dhe të gjithë qytetarët e Kosovës për të siguruar unitetin e popullit dhe funksionimin demokratik të institucioneve të vendit, si dhe përshpejtimin e proceseve për zhvillimin ekonomik, prosperitetin e përgjithshëm dhe mirëqenien e plotë të të gjithë qytetarëve. Kjo është detyrë e imja kushtetuese, ky është obligim qytetar i imi dhe i secilit institucion e qytetar të vendit, sidomos tani që përmbushja e synimit tonë për Kosovën shtet të pavarur e sovran është afër”, tha Sejdiu. Si kryetar, ai tha se do të vazhdojë bashkëpunimin e ngushtë me UNMIK-un dhe KFOR-in, TMK-në dhe SHPK-në, për të forcuar më tej institucionet e Kosovës dhe sigurinë e vendit. “Fillimi tashmë i një procesi të gjithanshëm ndërkombëtar për përcaktimin e statusit të Kosovës shtron para nesh detyra esenciale” u shpreh ai, duke shtuar do ta ketë angazhim parësor udhëheqjen dhe vazhdimin e punës së Ekipit Negociator të Kosovës si ekip i unitetit, ashtu si e kishte strukturuar kryetari Ibrahim Rugova. Në këtë kuadër, ai tha se bashkëpunimi i ngushtë me Emisarin e OKB-së për Statusin e Kosovës, Presidenti Maarti Ahtisaari, ka rëndësi të veçantë. “Po ashtu, zotohem se unë dhe ekipi im do të bashkëpunojmë ngushtë me SHBA-të, Unionin Evropian, dhe Grupin e Kontaktit, me qëllim që Kosovën ta bëjmë shtet në paqe me veten dhe fqinjët e vet, një vend që do të garantojë të gjitha liritë qytetare, njerëzore dhe të pakicave, në pajtim me standardet më të larta që ka vendosur bota demokratike. Dhe në të njëjtën kohë të shprehim denjësinë tonë për të qenë partner i integruar në strukturat euro-atlantike. Nga ky vend, nga Kuvendi i Kosovës, që është insitucioni më i lartë që mbledh përfaqësuesit e të gjithë qytetarëve të Kosovës, të të gjitha përkatësive etnike, u bëj thirrje të gjithë qytetarëve, në veçanti pjesëtarëve të komunitetit serb, të punojmë së bashku për një Kosovë demokratike, prosperuese dhe tolerante, ku respektohen dhe nderohen veçantitë e secilit”, tha Sejidu. Në fund, kryetari Fatmir Sejdiu u betua se do të ruajë dhe mbrojë unitetin e popullit, tërësinë tokësore të vendit, dhe do të siguroj funksionimin demokratik të institucioneve të Kosovës.

[ideus]

Shefi i UNMIK-ut Soren Jesen Petersen vlerësoi se zgjedhja e kryetarit të ri të vendit është një ditë e mirë për Kosovën. Duke folur menjëherë pas përfundimit të votimin në parlament, kreu i UNMIK-ut tha se deputetët kosovarëkanë dëshmuara se janë të gatshëm të lëvizin përpara procesin e statusit.”Jam i kënaqur që do të shkoj në Këshillin e Sigurimit dhe të them se pas vdekjes tragjike të kryetarit Rugova, kosovarët kanë arritur që për një periudhë më pak se tre javore në institucionet demokratike kanë arritur të zgjedhin një president të ri të Kosovës”.

Edhe shefi i zyrës amerikane vlerësoi se zgjedhja e kryetarit të ri dëshmon përgjegjësinë politike të institucioneve të Kosovës. ”Ishte një ngjarje e bukur kur presidenti Sejdiu mori 80 vota në raundin e fundit të votimit. Kjo ka një rëndësi simbolike. Shtetet e Bashkuara të Amerikës do ta mbështesin presidentin Sejdiu dhe ekipin negociues që do të udhëhiqet nga ai, në mënyrë që të ndihmojmë lëvizjen përpara të procesit final”, tha Goldberg. Kryeministri Kosumi vlerësoi se me zgjedhjen e kryetarit të ri të vendit, udhëheqësit politik të Kosovës kanë dëshmuara se në momente të rëndësishme për vendin dijën si të veprojnë. Kryeparalmentari Nexhat Daci pohoi menjëherë pas votimit se ndihej i relaksuar që presidenti është zgjedhur në kohën e duhur. Kryetari i partisë më të madhe opozitare në vend Hashim Thaçi tha se zgjedhja e kryetarit është një lajm shumë i mirë për tërë Kosovën ndërsa kryetari i partisë Ora, Veton Surroi, tha se zgjedhje e kryetarit dëshmon seriozitetin që e ka Kuvendi i Kosovës.

[Davius]

Fatmir Sejdiu u zgjodh kryetar i ri i Kosovës

Prishtinë, 14:15


Deputetët e Kuvendit të Kosovës zgjodhën sot Fatmir Sejdiun nga radhët e LDK-së për kryetar të Kosovës.

Nëpërmjet një votimi të fshehtë, pas tri raundeve, Fatmir Sejdiu, kandidati i vetëm për kreun e vendit, mori 8O vota, kundër ishin 12 dhe 17 fletëvotime ishin të pavlefshme.

Fatmir Sejdiu, sekretar i përgjithshëm i LDK-së, në postin më të lartë tëvendit trashëgon kryetarin e ndjerë Ibrahim Rugova, i cili u nda nga jeta më 21 janar të vitit 2006.

Sipas kornizës kushtetuese kosovare, kryetari kosovar mund të zgjidhet me dy të tretat e votave të 12O deputetëve sa ka parlamenti ose me shumicën e thjeshtë prej 61 votave pro.

[ideus]

Zoti Sejdiu, karrierën e tij politike e ka filluar në vitin 1989, duke qenë edhe pjesëmarrës i themelimit të partisë së parë politike, LDK-së, pas rëniës së sistemit njëpartiak.

Në kuvendin e parë të LDK-së, është zgjedhur anëtar i këshillit drejtues të saj.

Që nga ajo kohë, zoti Sejdiu ka qënë njëri prej bashkëpunëtorëve më të ngushtë dhe më besnikë të presidentit Rugova.

Për asnjë moment nuk është shkëputur nga veprimtaria e LDK-së, duke kryer edhe detyra të rendësishme në udhëheqjen e saj.

Në 12 vitet e fundit, ai ka qenë Sekretar i Përgjithshëm i LDK-së, detyrë kjo të cilën vazhdon ta kryej ende.

Fatmir Sejdiu ka qenë njëri prej arkitektëve të ndërtimit të politikave të LDK-së.

Ai ka qenë dy herë pjesëmarrës në zgjedhjet parlamentare dhe ka dalë fitues i këtyre zgjedhjeve, duke u bërë kështu një nga deputetët e LDK-së në dy legjislacione të Kuvendit në periudhën e pasluftës.

Që sot, ai do të jetë presidenti i dytë i Kosovës në historinë e saj.

[Arb]

Urime zgjedhja e Kryetarit te ri!

LDK-ja edhe kesaj rradhe tregoj madheshtine dhe vendosmerine e saj, duke u treguar besnike, e kujdesshme, e shkathet, ne momente vendimtare per ceshtjen e statusit perfundimtar te Kosoves. LDK-ja tregoj edhe nje here se me veprimet e saj arsyeton besimin e vazhdueshem qe e ka marrur nga populli.

Zoteri Fatmir Sejdiut, te urojme pune te mbare ne detyren e re!

Te tregoheni i durueshem, i matur dhe i vemendshem ne detyren qe keni ma
rrur, per te drejtuar Anijen e Shqiptareve te Kosoves, drejte (edhe njohjes formale te) pavaresise. Do te keni mbeshtetjen dhe besimin e plote te qytetareve te Kosoves.

Z. Sejdiu,

Le te finalizoni me besnikeri, durim, guxim, dhe kembengulje, ate mision madhor te ish Presidentit (te pa-vdekeshem) Rugova, dhe te qytetareve te Kosoves.

Pune te mbare dhe sukses ne detyren e re!

[Arb]

Fatmir Sejdiu bëri homazhe para Presidentit Rugova



Prishtinë, 1O shkurt - Presidenti i sapozgjedhur i Kosovës, Fatmir Sejdiu, menjeherë pasi mori votëbesimin e Kuvendit të Kosovës, bëri homazhe para Presidentit Ibrahim Rugova dhe vuri lule të freskta mbi varrin e tij.

[Arb]

Familja e Presidentit Rugova në një mesazh urimi përshëndet zgjedhjen e Fatmir Sejdiut President të Kosovës

Prishtinë, 1O shkurt - Familja e Presidentit Ibrahim Rugova në një mesazh urimi përshëndet zgjedhjen e sotme të Fatmir Sejdiut, President i ri i Kosovës, me urimet më të mira për njohjen sa më të shpejtë të pavarësisë së vendit tonë, Kosovës.

"Me gjithë dhembjen që ndiejmë në këto momente për humbjen e bashkëshortit e babait tonë të dashur, përshëndesim zgjedhjen e Presidentit të ri të Kosovës, duke shprehur urimet më të sinqerta për zotin Fatmir Sejdiu në krye të vendit dhe për njohjen sa më të shpejtë të pavarësisë së Kosovës.

Shprehim bindjen e plotë se Presidenti i ri, bashkë me të gjitha forcat demokratike, do të vazhdojë të punojë me ngulm për sendërtimin e idealeve të shenjta për një Kosovë të pavarur e demokratike, të integruar në NATO, në BE dhe në miqësi të përhershme me SHBA-të, ideale këto për cilat punoi i dashuri ynë, Ibrahim Rugova, deri në frymën e fundit.

Po ashtu shprehim bindjen tonë se populli i Kosovës në një të ardhme të afërt do t'i bashkohet familjes së madhe të bashkësisë së popujve evropianë", thuhet në një mesazh urimi të familjes së Presidentit Rugova: bashkëshortja Fana, djemtë Mendimi e Uka dhe vajza e Teuta.

[Arb]

Kryeministri Berisha ka uruar Presidentin e sapozgjedhur të Kosovës, Fatmir Sejdiu

Tiranë, 1O shkurt - Kryeministri i Shqipërisë Sali Berisha ka uruar Presidentin e sapozgjedhur të Kosovës, Fatmir Sejdiu, përmes një bisede telefonike të zhvilluar teksa z.Sejdiu ndodhej ende në sallën plenare të Parlamentit të Kosovës.

"Shpreh besimin e madh se Kosova ka zgjedhur garantin e saj të vërtetë të një Kosove të lirë, të qytetarëve të barabartë para ligjit dhe të pavarur. Ju përshëndes ju, përshëndes me këtë rast të gjithë deputetët e Kosovës dhe ju uroj shumë sukese në detyrën tuaj. Urimet më të përzemërta edhe një herë ju dhe të gjithë lidershipit të Kosovës. Ka qenë me të vërtetë një ngjarje e madhe për Kosovën, një garanci e madhe për Kosovën, por edhe për Shqipërinë dhe për rajonin. Është një zgjedhje e shkëlqyer z.Sejdiu.

Z.President Urimet më të mira dhe më të përzemërta!", u shpreh kryeministri Berisha gjatë bisedës telefonike me Presidentin e Kosovës, Fatmir Sejdiu, pak minuta pas votimit në Kuvendin e Kosovës, për zgjedhjen e z.Sejdiu në këtë detyrë.

[Arb]

Intervistë ekskluzive e Presidentit të sapozgjedhur të Kosovës, Fatmir Sejdiu dhënë QIK-ut



Në asnjë moment nuk do të heqim dorë nga pavarësia e Kosovës

Presidenti i sapozgjedhur Dr.Fatmir Sejdiu, konsiderohet si njëri nga bashkëpunëtorët më të ngushtë të Presidentit tashmë historik, Ibrahim Rugova. Z.Sejdiu është një njohës i shkëlqyeshëm i historisë së shtetit, fushë në të cilën ka kontribuar me studime dhe libra, ndërsa ka marrë edhe thirrjen shkencore po në këtë lëmi. Kontributi i tij ka qenë i jashtëzakonshëm gjatë këtyre viteve të përpjekjeve të mëdha shqiptare për liri e pavarësi, jo vetëm në aspektin politik, por veçmas në atë juridik dhe legjislativ. Ai është njëri nga tre pjesëmarrësit shqiptarë në hartimin e Kornizës Kushtetuese aktuale. Ndërsa, është profesorë në Fakultetin Juridik dhe në Degën Shkencave Politike. Zoti Sejdiu në intervistën ekskluzive dhënë QIK-ut flet për pikëpamjet dhe rolin e tij në misionin e madh për arritjen e pavarësimit të vendit.

Z.President, cili është mesazhi juaj për qytetarët me rastin e zgjedhjes suaj President i Kosovës, në kohën që ju po e merrni përsipër funksionin më të lartë të vendit në çaste delikate historike, dhe të zbrazëtisë së thellë që ka lënë Presidenti Rugova?

Presidenti Sejdiu: Së pari shpreh falënderimin tim për deputetët e Kuvendit që shprehën besimin që unë të marrë mandatin nga Kuvendi si Kryetar i Kosovës, bashkë me këtë falënderoj subjektin politik të cilit i takoj LDK-së, që poashtu ka shprehur besimin e vet pa dilemë dhe poashtu për mbështetjen e përgjithshme që thjesht e shoh nga qytetarët. Natyrisht se gjendemi në një kohë të sfidave të mëdha. Do të bëj përpjekje të vazhdoj atë që është arritur deri tani me kontributin e jashtëzakonshëm të Presidentit Rugova, i cili në këtë fazë, vërtet na ka lënë një boshllëk të thellë, dhe në këto përpjekje duke transmisuar drejtpërdrejt vizionin e tij, të bëjmë një luftë të përbashkët me gjithë faktorët relevantë në Kosovë, me institucionet e vendit dhe me partitë politike, pozitën dhe opozitën, që pavarësia e Kosovës të jetë objektiv themelor, dhe natyrisht të ketë njohje ndërkombëtare. Dhe në këtë aspekt kemi nevojën e bashkëpunimit të drejtpërdrejtë edhe me faktorin ndërkombëtar, dhe në veçanti me SHBA-të dhe me vendet e Unionit Evropian, për të shpejtuar këtë proces të rëndësishëm.

Cili do të jetë qëndrimi juaj politik për procesin e bisedimeve dhe zgjidhjen e statusit?

Presidenti Sejdiu: Po ju e dini një qëndrim që është shprehur edhe në fazat e mëhershme, se rruga më e mirë dhe pa ekuivoke, dhe që nënkupton njohje të realiteteve të reja të krijuara, është njohja e drejtpërdrejtë e pavarësisë së Kosovës, atë që Presidenti Rugova e kërkonte në vazhdimësi, dhe çështja tjetër plus që është një pjesë që lidhet me vendimin e Këshillit të Sigurimit, që të fillohet një rrugë e definimit të statusit, në bashkëpunim ndërkombëtar, mendoj se poashtu e ka këtë qëllim dhe ne nuk kemi variant tjetër sërish veç pavarësisë. Për ne, është shumë me rëndësi që në këtë proces të involvohet zëshëm të themi, zëri i qytetarëve të Kosovës, apo vullneti politik i tyre dhe që poashtu e shoh se ka një mbështetje të rëndësishme të themi edhe nga faktori ndërkombëtar, posaçërsisht nga vendet me fuqi dhe influencë të madhe si SHBA-të, Britania e Madhe dhe ndonjë vend tjetër evropian, si dhe vet qëndrimi i Grupit të Kontaktit se duhet respektuar vullneti i shumicës.
A do të jeni trashëgimtar edhe i udhëheqësit të Grupit Negociator?

Presidenti Sejdiu: Është një proces normal, që e bën të qartë pozicioni i Kryetarit të Kosovës, dhe që udhëheq edhe me Grupin Negociator. Ju e dini, edhe në fazën e mëhershme të nominimit të grupës plus në këtë rol nga ana e Kryetarit të Kosovës dhe ajo ka kaluar në Kuvend dhe unë mendoj se duhet të jetë i njëjti proces i udhëheqjes edhe në fazat e mëtejshme me një nevojë të bashkëpunimit të thellë, me të gjithë ata që përfaqësojnë institucionet, por edhe opozitën.



Në këtë kontekst kur kanë filluar deklarimet e para të vendeve të fuqishme të GK-së për njohjen e pavarësisë së Kosovës, duket se ka mbetur vetëm çështja e modalitetit të saj, nëse mund të thuhet kështu, dhe të negocimit të “çështjeve teknike” përfshirë decentralizimin. Si udhëheqës i ardhshëm i Grupit Negociator që pritet të jeni, çfarë kompromisesh mund të bëhen?

Presidenti Sejdiu: Unë thashë se ka deklarime të drejtpërdrejta rreth të ardhmes së Kosovës, dhe pavarësisë së saj, që shpreh në esencë qëndrimin e vendeve anëtare të Grupit të Kontaktit dhe vendeve me influencë, dhe natyrisht që janë të përputhshme me atë që ne kemi kërkuar vazhdimisht që të respektohet vullneti i popullit. Natyrisht se ka një qasje që të përfillet një rrugë e bisedimeve e bazuar në vendimin e Këshillit të Sigurimit, e cila hë për hë, ka të bëjë me çështje që kanë të bëjnë me ato të karakterit thjesht teknike, siç do t'i cilësonit, por që nuk është krejt asisoji, si çështja e reformës së pushtetit lokal, e cila është një qasje e bisedimeve, në këtë drejtim me faktorin ndërkombëtar, me të cilën do të nënkuptohet një reformë, e cila do të jetë e kapshme për qytetarët e Kosovës, jo si një reformë që mund të ketë privilegje për një entitet apo për një entitet tjetër. Dhe në këtë drejtim, ne mendojmë se kjo rrugë apo kjo qasje kësisoji, që do të ketë në vete thjesht shtimin e parimeve themelore, në fakt edhe dokumenti i përgatitur nga grupi strategjik quhet edhe si i tillë, do të jetë i përputhshëm me standardet ndërkombëtare, apo me modelet e mira që janë bërë në këtë fushë në Evropë. Natyrisht se ne do të vazhdojmë që kjo ofertë të jetë serioze, nuk do të jetë ofertë që nënkupton në asnjë moment, heqjen dorë nga opcioni ynë themelor, opsioni i pavarësisë së Kosovës, dhe natyrisht këtu japim përgjigjen se pavarësia ose është pavarësi, ose nuk është pavarësi. Praktikisht të gjitha variacionet e tjera që kemi pasë rastin t'i dëgjojmë herë pas here në qarqet e ndryshme, nënkuptojnë relativizimin e saj. Po ne kuptojmë se pavarësia si e tillë, me njohje të sovranitetit të plotë nënkupton gatishmërinë e Kosovës, që pastaj në proceset e tjera integruese do të veprohet natyrisht në bazë të standardeve ndërkombëtare, sikur që kanë vepruar edhe vendet anëtare të Unionit Evropian.

Si e mendoni të jetë imazhi juaj kundruall imazhit të Presidentit Rugova?

Presidenti Sejdiu: Unë e kam parasysh si edhe çdo qytetar tjetër i Kosovës, punën e madhe që ka bërë Presidenti Rugova dhe e quaj poashtu njeri të fatit veten time dhe njerëzit e brezit tim që kemi punuar bashkë me të. Jemi përpjekur, që të krijojmë thjeshtë një harmoni të përgjithshme të veprimeve tona dhe ajo ka ekzistuar si e tillë. Dhe do të përpiqem që në këtë fazë që po vjen të bëjë punët, të cilat në radhë të parë janë të përputhshme me vizionin politik të Presidentit Rugova, por edhe të popullit të Kosovës sepse ai ka qenë një artikulim, apo mishërim me ndjenjat e popullit të Kosovës për liri dhe pavarësi, dhe kjo është busulla ime themelore dhe natyrisht të realizojë obligimet kushtetuese duke dëshiruar që të jap gjithëçka çka unë mund të bëjë si njeri dhe natyrisht në bashkëpunim me të tjerët.

Cilat nga objektivat e tjera të Presidentit Rugova, i cili u nda herët nga jeta, që kanë mbetur pa u përmbushur mendoni se gjatë këtij mandati të mbetur mund t'i përmbushni?

Presidenti Sejdiu: Po mendoj se çështja themelore është ajo e arritjes së pavarësisë dhe njohjes së saj ndërkombëtare, dhe në këtë kontekst të thellimit të bashkëpunimit të mëtejshëm me të gjithë faktorët ndërkombëtarë. Atë që Presidenti e quante me plotë zemër, jo me plot gojë, një miqësi të përhershme me SHBA-të dhe me vendet e BE-së, dhe një tjetër çështje e rëndësishme është çështja e ngritjes së potencialeve ekonomike, që do të jetë sfida e posaçme për Qeverinë e Kosovës, dhe institucionet e tjera dhe natyrisht roli i Presidentit mund të jetë, në drejtim të koordinimit të veprimeve, dhe është shumë me rëndësi që proceset integruese, që janë të domosdoshme për Kosovën, të jenë nga qarqet themelore në të ardhshmen. Në këtë kuptim nënkuptoj edhe një bashkëpunim të mirë me të gjitha vendet fqinje, duke pasur parasysh se Kosova nuk do të definohet apo të gjejë një identitet të saj për të qenë e mbyllur, por do të jetë e hapur në komunikime normale, dhe të nevojshme dhe për të qenë faktorë i rëndësishëm stabiliteti dhe besoj se këtë e kemi të trasuar mirë deri tash, por, do ta vazhdojmë edhe në të ardhmen.

Kur do të miratohen ndryshimet kushtetuese, apo edhe kushtetuta e re, dhe kur pritet të ndodhë kjo, krahas bisedimeve apo pas përfundimit të tyre, pra njohjes së shtetësisë së Kosovës?

Presidenti Sejdiu: Është një punë që duhet të bëhet paralelisht, dhe ne të jemi të gatshëm në momentin e përcaktimit të statusit të Kosovës, konform vullnetit politik dhe natyrisht se do të kemi edhe dokumentet bazike, siç është Kushtetuta akti më i lartë, dhe si i tillë, më kujtohet nga puna në grupin strategjik, ka pasë ide që të veprohet drejtpërdrejtë. Ju e dini, janë themeluar edhe ekipet e veçanta dhe për çështje kushtetuese, dhe kjo punë që është bërë deri më tash, si një nismë e mirë, duke pasur parasysh edhe ofertat e mëhershme të një varg projektesh, sigurisht se do të kurorëzohet me një tekst të mirë, i cili do të bëjë përpjekjen e vet për të ndërtuar, të themi, edhe në aspektin e marrjes së identitetit të Kosovës.

Cili besoni se do të jetë ritmi drejt përfundimit të çështjes së njohjes së pavarësisë së Kosovës?

Presidenti Sejdiu: Edhe më parë e thashë se janë dy rrugë, një është ajo që ne insistojmë dhe sa e shoh se ka edhe një mirëkuptim nganjëherë në qarqet ndërkombëtare që mund të shkohet edhe me njohje të drejtpërdrejtë të pavarësisë, që nuk është non sens, është një praktikë që ka ndodhur edhe me vendet e tjera të ish-federatës, pjesë përbërëse e cilës kemi qenë. Dhe mundësia tjetër që të vazhdohet me këtë cikël të bashkëpunimit ndërkombëtar dhe sipas asaj që z.Ahtisari e thekson se mund të jetë nëntori, koha e përfundimit të bisedimeve, ne dëshirojmë që kjo të nxitohet edhe më shpejtë, nga arsyeja se thjeshtë një gjendje e status kuos, apo një gjendje e tillë e stërzgjatur do të ishte një rrezik i veçantë edhe për Kosovën, edhe në përmasa më të gjera, dhe insistojmë që ky nxitim të jetë, nxitim kualitativ.

Ju falëmnderit z.President!

Intervistoi: Idriz Morina