Babai përdhunues del para togave të zeza
Th.Nika
SARANDË-Një baba i akuzuar për përdhunimin e së bijës 12-vjeçare ka dalë paraditen e djeshme para togave të zeza. Ka nisur kështu gjykimi i incestit familjar që dyshohet të ketë ndodhur verën e vitit të kaluar në qytetin e Delvinës. I pyetur rreth ngjarjes që e çoi në pranga gjashtë muaj më parë, i pandehuri Bujar Elmazi, prind i tre fëmijëve, nuk ka pranuar autorësinë e veprës penale për të cilën akuzohet. Ai është përpjekur të rrëzojë e të quajë të sajuara të gjitha pretendimet e ngritura nga bashkëshortja dhe vajza e tij. Gruaja e tij, Bardhyle Elmazi, ka dhënë shpjegimet e veta rreth ngjarjes së turpshme për të cilën akuzon burrin e saj, ndërkohë që ajo ka përsëritur kërkesën për dënim maksimal ndaj tij. Akuza e ka klasifikuar veprën penale për të cilën akuzohet Bujar Elmazi të dënueshme nga nenet 100/2 dhe 22 i Kodit Penal, duke rrezikuar 25 vjet heqje lirie.
Sipas gjykatës së Sarandës, në seancën e zhvilluar me dyer të mbyllura, vajza N.E. e ka pasur të pamundur t’u përgjigjet pyetjeve që iu drejtuan nga trupi gjykues. Në këto rrethana është vendosur shtyrja e seancës. “Në seancën e radhës do të kërkohet prania e një psikologu në sallë, për të marrë deponimet e vajzës, për të mësuar vërtetësinë ose jo të pretendimeve të ngritura nga e mitura dhe e ëma e saj”,-dekalroi dje gjykata. 52-vjecari Bujar Elmazi, banor i lagjes Papuci të qytetit të Delvinës, me origjinë nga Vlora, u arrestua në fillim të korrikut të një viti më parë, kur u denoncua nga gruaja dhe e bija se kishte kryer marrëdhënie seksuale me të miturën, ndërkohë që bashkëshortja gjendej tek prindërit e saj
------------------------SHEKULLI---------------------------
Krijoni Kontakt