Kongresi i Autoriteteve Rajonale e Vendore, “dush të ftohtë” qeverisë “Berisha”. Akti më i fundit normativ i qeverisë për t’i dhënë kompetenca prefektëve për mbledhjen e Këshillave vendore të Rregullimit të Territorit, si dhe deklaratat aspak delikate të ministrit të Transporteve, Lulzim Basha mbi peshën e Kongresit të Autoriteteve Rajonale e Vendore të KE-së të krahasuar me OJQ, kanë shqetësuar seriozisht këtë organizëm ndërkombëtar. Këtë shqetësim, Presidenti i Kongresit të Autoriteteve Rajonale e Vendore, Giovanni di Stasi, ia ka bërë prezent nëpërmjet një letre Kryeministrit Sali Berisha. Teksti i saj i është dërguar për dijeni edhe ministrit Basha si dhe autoriteteve të tjera me të cilat delegacioni pati takime gjatë qëndrimit të tij në Tiranë. Delegacioni i KE-së ishte vënë në lëvizje pas ankesës së kryetarit të Bashkisë së Tiranës Edi Rama për “bllokimet që qeveria” bëri ndaj disa veprave publike në kryeqytet dhe vecanërisht për rrëzimin e projektit të mbikalimit te Zogu i Zi.
Shqetësimi
Di Stasi shprehet i befasuar në letrën e tij, kur ka mësuar se kohët e fundit është paraqitur nga ana e Qeverisë “Berisha” në Parlament një projektligj që synon dhënien e më shumë pushteteve Prefektit dhe Qeverisë qendrore, brenda Këshillave vendore të Rregullimit të Territorit. “Ne nuk jemi të sigurt lidhur me faktin nëse këto masa kufizojnë më tej kompetencat e autoriteteve vendore në planifikimin urban (neni 10 i Ligjit Organik mbi organizimin dhe funksionimin e qeverisjes vendore). Mua personalisht më vjen keq gjithashtu, që ky projektligj nuk u përmend aspak në diskutimet që patëm me ju dhe përfaqësues të tjerë të Qeverisë suaj gjatë vizitës sime në Tiranë”, - shkruan Di Stasi në letrën e tij, duke lënë të kuptohet se nuk po e gëlltit lehtë faktin e një mungese transparence nga ana e Kryeministrit, në bisedimet me delegacionin e Kongresit të Autonomisë vendore të KE. Në këtë kontekst, theksohet në letër, “përgatitja e një raporti monitorues lidhur me situatën e demokracisë rajonale dhe vendore në Shqipëri, duket se është e rëndësishme dhe e dobishme”.
Replika
Në këtë letër, Di Stasi shpreh shqetësim serioz edhe për termat e përdorur nga ministri Basha, ndonëse pa e cituar direkt emrin e tij, lidhur me etiketimin e Kongresit të Autonomisë Vendore të KE-së, si një shoqatë. Në një vizion diametralisht të kundërt me Bashën, Di Stasi sqaron se Kongresi i Autoriteteve Rajonale e Vendore, është një institucion i Këshillit të Evropës. Sipas tij, një nga kompetencat e tij bazë brenda sistemit të KE-së, përcaktuar në Kartën e tij të adoptuar nga Komiteti i Ministrave, është të përgatisë, në mënyrë të rregullt raporte vend pas vendi, mbi situatën e demokracisë rajonale dhe/ose vendore në të gjitha vendet anëtare. “Do ta vlerësoja pozitivisht në rast se ju do të njoftonit ministrat e Qeverisë suaj lidhur me këtë”, - ka tërhequr vëmendjen e Berishës Di Stasi, në përpjekje që të mundësojë sqarimin e kësaj çështjeje pranë ministrit Basha. Di Stasi nënvizon se raportuesit e Kongresit, do të vazhdojnë të ndjekin nga afër situatën dhe do të njoftojnë autoritetet shqiptare, lidhur me afatin e përgatitjes prej tyre të raportit. “Vizita e parë e raportuesve mund të zhvillohet në pranverë të vitit 2006, dhe unë do të shpresoja që dialogu midis tyre dhe Qeverisë shqiptare të ishte i frytshëm”, - përfundon letrën e tij Di Stasi.
Berisha
Kryeministri Berisha, në dallim nga ministri Basha për hir të realitetit, u shpreh me tone mjaft vlerësuese lidhur me vizitën e delegacionit të Kongresit të Autonomisë Vendore të KE-së. Ai shkoi më tej, madje duke pranuar edhe disa mangësi të legjislacionit shqiptarë, sa i përket përbërjes së KRTRSH-së dhe kompetencave të Policisë Ndërtimore. Këto mangësi u evidentuan nga delegacioni i KE-së. Berisha premtoi reforma në fushën e urbanistikës, si dhe riorganizimin e Policisë Ndërtimore, e cila sipas tij, mund të ketë nevojë për një rikompozim në aspekte të shumta.
LETRA
Zotit Sali Berisha
Kryeministër i Shqipërisë
I dashur zotëri!
Pas përfundimit të vizitës sime zyrtare në Shqipëri, dëshiroj t’u shpreh falenderimet e mia, ju personalisht, për mikpritjen që i rezervuat delegacionit të Kongresit dhe për diskutimet dhe shkëmbimin e informacionit që delegacioni ynë pati me ju dhe përfaqësuesit e Qeverisë suaj.
Megjithatë, u befasova kur mësova se kohët e fundit është paraqitur nga ana e Qeverisë suaj në Parlament një projektligj që synon dhënien e më shumë pushteteve prefektit dhe Qeverisë qendrore brenda Këshillave vendore të Rregullimit të Territorit. Ne nuk jemi të sigurt lidhur me faktin nëse këto masa kufizojnë më tej kompetencat e autoriteteve vendore në planifikimin urban (neni 10 i Ligjit Organik mbi organizimin dhe funksionimin e qeverisjes vendore). Mua personalisht më vjen keq, gjithashtu, që ky projektligj nuk u përmend aspak në diskutimet që patëm me ju dhe përfaqësues të tjerë të Qeverisë suaj gjatë vizitës sime në Tiranë.
Në këtë kontekst, përgatitja e një raporti monitorues lidhur me situatën e demokracisë rajonale dhe vendore në Shqipëri duket se është e rëndësishme dhe e dobishme. Shfrytëzoj këtë rast për të theksuar se Kongresi i Autoriteteve Rajonale e Vendore është një institucion i Këshillit të Europës dhe se një nga kompetencat e tij bazë brenda sistemit të Këshillit të Europës, përcaktuar në Kartën e tij të adoptuar nga Komiteti i Ministrave, është të përgatisë, në mënyrë të rregullt, raporte vend pas vendi mbi situatën e demokracisë rajonale dhe/ose vendore në të gjitha vendet anëtare. Do ta vlerësoja pozitivisht në rast se ju do të njoftonit ministrat e Qeverisë suaj lidhur me këtë.
Raportuesit e Kongresit dhe ekspertët për demokracinë rajonale e vendore në Shqipëri
Raportuesit e Kongresit do të vazhdojnë të ndjekin nga afër situatën dhe do të njoftojnë autoritetet shqiptare lidhur me afatin e përgatitjes prej tyre të raportit. Vizita e parë e raportuesve mund të zhvillohet në pranverë të vitit 2006 dhe unë do të shpresoja që që dialogu midis tyre dhe Qeverisë shqiptare të ishte i frytshëm.
Pres që bashkëpunimi ynë të vazhdojë më tej
Sinqerisht juaji, Giovanni Di Stasi
Krijoni Kontakt