Daniella Relph
BBC, Uashington
Biblioteka qendrore në Dallas të Teksasit është kritikuar për shkak të një vendimi për të ndaluar hyrjen e njerëzve që bien erë të keqe.
Grupet e bamirësisë thonë se kodi i ri i sjelljes po godet në mënyrë të pandershme të varfërit dhe të pastrehët që shpesh herë e përdorin ndërtesën për strehim.
Por drejtuesit e bibliotekës këmbëngulin se rregullat e reja kanë si qëllim të krijojnë një atmosferë miqësore për lexuesit.
Kodi i ri i bibliotekës së Dallasit ndalon disa aktivitete si fjetja, larja, ecja pa këpuce dhe marrëdhëniet seksuale, por rregulli që ndalon erërat e rënda është ai që ka zemëruar shumë vetë.
Që prej muajit shkurt, pas rritjes së numrit të ankesave, personelit iu dha urdhër që të nxirrnin jashtë ndërtesës çdo person që mbante erë të keqe apo shqetësonte frekuentuesit e bibliotekës.
Shoqata Amerikane e Bibliotekave e mbështeti ndryshimin dhe tha se ishte jashtë mase e arsyeshme që t'u kërkohej që të largoheshin njerëzve që nuk respektonin rregullat minimale të higjenës.
Por grupet e bamirësisë thonë se ky rregull godet të pambrojturit.
Ata akuzojnë autoritetet se nuk kanë arritur të sigurojnë strehëza të mjaftueshme dhe vende kur të pastrehet mund të lahen, duke i detyruar ata që të përdorin avantazhet e bibliotekës.
Krijoni Kontakt