Dua universitet me pagesë?

[Letersia 76]

Dua universitet me pagesë!

Plotësohen edhe kuotat e fakulteteve me pagesë, gjithsej 707

Ankesat: Të shpallet lista e atyre që janë regjistruar për shkollim me pagesë. Të jenë transparente listat që të mënjanohen abuzimet mes konkurrentëve që duan të vazhdojnë universitetin me pagesë!

Belina Budini

TIRANË - Tani e kanë radhën ata që paguajnë. Nis gara tjetër për në universitete. Ajo e kuotave dytësore me pagesë. Asnjë vend nuk ka për të mbetur bosh. Për këtë janë të sigurt specialistët e Ministrisë së Arsimit dhe Shkencës, ndërsa marrin si model vitin e shkuar kur u plotësuan të gjitha vendet e përcaktuara për studime me pagesë. Sivjet pranimet janë shtuar me 200 vende të tjera në të gjitha universitetet shqiptare. Ndërkaq kanë nisur të shfaqen edhe paqartësitë e para në lidhje me plotësimin e këtyre kuotave. Shqetësimet kanë mbërritur edhe në Ministrinë e Arsimit e Shkencës.
Pagesat nuk ndryshojnë
Nuk janë rritur pagesat për degët e studimit në universitetet shqiptare. Ato më të preferuarat si mjekësia, stomatologjia, gazetaria, gjuha angleze dhe farmacia mund të ndiqen vetëm nëse paguan çdo vit një shumë prej 3 milionë lekësh. Degët e shkencave sociale vijojnë të jenë të disponueshme për pagesa 2 milionëshe. Por çdo gjë ndryshon kur bëhet fjalë për universitetet e rretheve, jo ato të Tiranës, që kanë mbetur më të shtrenjtët edhe këtë vit. Degët e preferuara të universiteteve të Tiranës, në Elbasan, Shkodër apo Gjirokastër mund të ndiqen duke paguar gjysmën e shumës. Kështu për degë si juridiku paguhen 1,5 milionë lekë. Degët më pak të preferuara si ato të inxhinierive mekanike a elektrike, ndiqen edhe duke paguar vetëm 600 mijë lekë të vjetra në vit. Këto, sipas specialistëve të arsimit në ministri janë ndër të vetmet degë që kanë patur pak kërkesa dhe ku mund të ketë vende të lira me pagesë. Megjithatë, nga universitetet përkatëse ende nuk kanë mbërritur listat në Ministrinë e Arsimit dhe nuk është nxjerrë ende vendimi i kësaj ministrie për kuotat në fjalë.
Kuotat, rekord financa
Vjet kanë ndjekur shkollat e larta me pagesë në gjithë universitetet shqiptare 500 studentë, sivjet do të pranohen 707. Kuotat më të larta sivjet janë paracaktuar për studentët e Universiteteve të Tiranës, por edhe në ato të rretheve ka të tilla. Rekordin e thyen dega Financë e fakultetit të Ekonomisë së Tiranës, ku sivjet do të pranohen 63 studentë me pagesë. Pas financës, dega më e favorizuar për studime me pagesë radhitet ajo e mjekësisë, për të cilën janë lënë 14 vende të posaçme për ata që nuk fitojnë nga kuotat e drejtpërdrejta dhe vendosin të paguajnë 3 milionë për çdo vit që të ndjekin studimet në degën e preferuar. Tani është radha e atyre që do të paguajnë për të konkurruar me njëri-tjetrin. Kështu në universitetin e Tiranës, dega histori do të konkurrojnë gjithë studentët e regjistruar për kuotat me pagesë për pesë vende. Në degën e gjeografisë do të shkojnë 4 studentë me pagesë. Gjuhë-Letërsia do të ketë në auditoret e saj këtë vit të ri akademik 2002-2003 tetë studentë me pagesë. Anglishten me pagesë do ta ndjekin sivjet 10 studentë, nën vijën e fituesve, frëngjishten shtatë të tillë, italishten shtatë dhe gjermanishten gjashtë. Degë si matematika, fizika, etj, nuk kanë kuota me pagesë. Ndërsa për biologji-kimi do të ketë 10 kuota me pagesë. Për informatikë, ku sivjet konkurrenca ka qenë si asnjë herë tjetër e fortë, do të ketë shtatë kuota me pagesë. Në degë të tjera si punë sociale dhe filozofi-sociologji, fakultete që ndiqen me dy milionë lekë do të ketë nga nëntë kuota dytësore pranimi. Në shkencat politike do të pranohen 5 studentë me pagesë, ndërsa në drejtësi 13. Me tre milionë në vit, do ta ndjekin stomatologjinë vetëm pesë studentë, farmacinë katër, infermierinë asnjë, ndërsa financën 63 vetë. Në Universitetin Politeknik të Tiranës do të ketë 10 kuota dytësore për inxhinieri elektrike, 10 për elektronikë, 13 për Ndërtim, tetë për arkitekturë, pesë për hidroteknikë. Në Universitetin Bujqësor do të ketë tetë kuota shtesë për ekonomi dhe politikë agrare, tetë për drejtimin e fermave dhe AGB, tre për inxhinieri pyjore etj.

Problemi
Pse nuk shpallen të regjistruarit me pagesë?

As me kuotat dytësore nuk shkojnë të gjitha punët vaj. Paqartësitë e para kanë mbërritur në zyrat e ministrisë. Kështu një e interesuar pyeste dje në zyrën e specialistëve të arsimit të lartë se si do të procedohet për ata që duan të ndjekin një shkollë të lartë me pagesë, por që nuk janë regjistruar për të përfituar nga këto kuota. Ajo kërkonte që çdo gjë të jetë transparente. Pra, të afishohet komplet lista e atyre që janë regjistruar për kuota me pagesë, në mënyrë që të mos futen në pjesë individë të tjerë, të paregjistruar për këto kuota, ose të shtuar në këtë listë minutat e fundit. Nga ana tjetër, specialisti Valer Peshkëpia i shpjegonte zonjës së shqetësuar se nuk ka për të patur asnjë abuzim të tillë, përderisa të ndiqet klasifikimi i përfituesve nga kuotat dytësore sipas pikëve që ata kanë marrë në konkurs. Ai nuk përjashtoi mundësinë që do të ketë edhe nga ata që janë regjistruar për pagesë e që nuk kanë për të patur mundësi ta realizojnë këtë, pasi do të konkurrohen nga më të mirët, ata që janë më pranë vizës së zezë, që ndan fituesit nga humbësit.

Mbledhja
Asnjë shtesë me emra
Sapo është zhvilluar një mbledhje me gjithë drejtuesit dhe specialistët e Ministrisë së Arsimit, mbledhje ku është qartësuar se këtë vit nuk do të lejohet të bëhen si vjet shtesa me emra pushtetarësh. Madje, specialistët shprehen, se pavarësisht atyre që janë thënë në media, as shtesa për socialistët e rinj, FRESSH-istët nuk ka për të patur, pasi përkatësia e tyre politike është shumë e mjegullt e nuk mund të jetë e përcaktueshme në mënyrë të qartë. Në këtë mënyrë, kjo sipas specialistëve të ministrisë mund të bëhet shkas për abuzime. Ndërkohë pritet vendimi për kuotat dytësore. Të hënën është caktuar dita kufi kur të gjithë universitetet duhet të paraqesin në Ministrinë e Arsimit listën e shtesave që kërkojnë për secilin fakultet, duke përfshirë edhe kuotat me pagesë, për të cilat do të procedohet në fund. Deri tani në ministri ende nuk ka mbërritur lista në fjalë. Vendimin për shtesat Ministria e Arsimit do ta marrë më pas.


Kuota dytësore në universitetet e rretheve
Universiteti i Elbasanit
Histori-gjeografi - 9
Gjuhë-Letërsi -12
Anglisht -6
Frëngjisht -3
Italisht -4
Gjermanisht -4
Cikli i Ulët -17
Cikli parashkoll.-9
Bio-kimi -9
Financë -9

Universiteti i Gjirokastrës
Histori-gjeografi -7
Gjuhë-letërsi -7
Anglisht -7
Cikli i Ulët -7
Bio-kimi -7
Financë -9


Universiteti i Shkodrës
Histori-gjeografi -10
Gjuhë-letërsi -10
Anglisht -8
Italisht -5
Drejtësi -8
Infermieri -10
Financë -8
Marketing -8

[Glendis]

Cila eshte lenda baze e Deges Finance ??