Mashtrimi me Viktoria Bekam: "Rrëmbimi ishte plani im"

[White_Angel]

Pendohet informatori i gazetës "News of the World". Kosovari futi në
kurth shqiptarët

Mashtrimi me Viktoria Bekam: "Rrëmbimi ishte plani im"



Nga Londra
Muhamed Veliu






Superinvestigimi i gazetës Angleze "News of the World" për rrëmbimin
e Viktoria Bekam, ishte një trillim. Tre vjet më vonë familja Bekam
rezultoi me harxhime të kota për shtimin e badigardëve. Rreziku që i
kanosej, nuk ishte gjë tjetër vetëm një skenar i sajuar nga
informatori kryesor investigues i "News of the World". Një fytyrë e
vrazhdë, vetulla të trasha dhe sy bojëqielli është përshkrimi i
Florim Gashit, personit që ka rrëzuar sa hap e mbyll sytë piramidën
investiguese të ngritur nga gazetari i kësaj gazete, Mazher Mahmood.
Sikur të mos mjaftonte kjo, Gashi ka deklaruar se pothuajse të
gjithë investigimet e iniciuara nga ai dhe të shkruara nga Mahmood,
kanë qenë të trilluara. Kjo punë natyrisht që ka sjellë edhe
përfitimet financiare jo vetëm të Gashit dhe Mahmood, por edhe të
vetë gazetës, e cila krenohej me "kriminelët" që kishte vënë pas
hekurave të qelive. Pendimi i kosovarit Florim Gashi ka detyruar
hetuesit anglezë që të nisin hetimet mbi këtë fakt, ndonëse kanë
dyshime të rezervuara mbi vërtetësinë e faljes publike të bërë nga
Gashi.

Pendimi

Informatori kosovar i gazetës "News of The World", ka pranuar se ai
është përgjegjës për ngritjen e kurtheve të njerëzve të pafajshëm,
duke i ekspozuar në faqet e kësaj gazete. Florim Gashi ka vendosur
që t'i tregojë avokatëve të personave të dëmtuar të gjitha "mëkatet"
e kryera gjatë investigimeve të ndërmarra për llogari të gazetarit
Mazher Mahmood.
Ai ka deklaruar se superinvestigimi për tentativën e rrëmbimit të
Viktorias, bashkëshortes së kapitenit të ekipit kombëtar të
futbollit anglez, ishte i gjithi një truk. "Isha unë që i sugjerova
Lulëzim Balliut nga Elbasani dhe katër emigrantëve rumunë që të
organizonim rrëmbimin e Viktoria Bekam",- mësohet të jetë shprehur
Gashi përpara hetuesve anglezë. Pas publikimit të këtij lajmi, Gashi
ka përfituar 10 mijë stërlina, ndërsa Lulëzim Balliu dhe katër
rumunët u arrestuan. E njëjta praktikë është ndjekur edhe në
denoncimin e një nëne, e cila donte të shiste fëmijën e saj. Ka qenë
sërish Gashi, i cili ka nxitur të dashurin e gruas që të shiste
fëmijën dhe më pas kjo ngjarje iu servir opinionit si një fakt real.
Florim Gashi ka treguar edhe plot 13 raste të tilla, kur ka
inskenuar ngjarje nga më të ndryshmet, të cilat më pas janë shkruar
si investigime të gazetarit Mezher Mahmood në gazetën "News of the
World". Pas një pune të tillë disa vjeçare, informatori kosovar i
gazetën angleze, duket se është penduar. "Unë jam përgjegjës për
futjen në burg të njerëzve të pafajshëm. Unë i kam mashtruar ata.
Ndjehem i turpëruar. Është koha për të treguar të vërtetën",- është
shprehur ai.

Hetimi

Policia dhe hetuesit londinezë kanë filluar një hetim masiv ndaj
investigimeve të firmosura nga gazetari Mahmood dhe të iniciuara nga
informatori kosovar Gashi. Hetimet kanë filluar menjëherë pasi ky i
fundit ka kontaktuar me policinë duke rrëfyer se ai ka shërbyer si
provokator dhe ka siguruar materiale kompromentuese për individë të
ndryshëm, të cilët më pas janë publikuar si histori sensacionale
për "News of The World". Sipas burimeve policore, dy oficerë para
tre javësh udhëtuan për në Vjenë dhe janë takuar me Gashin, nga i
cili kanë siguruar të tjera dëshmi në lidhje me mashtrimet e tij.
Aktualisht tre oficerë të tjerë ndodhen në Kroaci për të
intervistuar ish-informatorin e gazetës. Zëdhënësja e Scotland
Yard, në Londër, ka konfirmuar se hetimet për ato që Gashi ka
deklaruar, do të vazhdojnë.

Njihet si matrapaz lajmesh dhe supergënjeshtar

Hetuesit anglezë të pasigurt në rrëfimin e Gashit

Florim Gashi tashmë njihet si një matrapaz lajmesh dhe një
supergënjeshtar që ka arritur të manipulojë njërin nga reporterët më
të njohur investigativë, jo vetëm në Angli, por edhe në botë. Pas
një veprimtarie të tillë disa vjeçare, Gashi pendohet dhe tenton të
tregojë të vërtetën. Një hap i tillë ka ngritur shumë dyshime tek
hetuesit anglezë, rreth qëllimit për t'u rrëfyer. Jozyrtarisht,
oficerët e hetimit pranë kësaj çështjeje, janë shprehur se Gashi
ndoshta me këtë hap që ka ndërmarrë po kërkon të rivendoset në
qendër të vëmendjes së opinionit publik. Pse jo, më vonë mund të
publikojë një autobiografi të tillë, e cila do ti sillte fitime disa
milionëshe. Sipas burimeve policore të Londrës, ai në të kaluarën ka
qenë i përfshirë në një sërë incidentesh, nga ku është dënuar me
gjoba për pandershmëri. Ai ka pranuar përpara gjyqtarëve se shpesh
herë ka gënjyer me vetëdije dhe për qëllime të caktuara, të cilat
kanë qenë kryesisht për përfitime. Me një person të tillë, që
pendohet dhe fillon të rrëfejë mëkatet e tij krejt papritur,
hetuesit kanë deklaruar se duhet tepër kujdes në mënyrë që të mos
bien viktima të mashtrimit të radhës.

[romeoOOO]

PO PO. ne e hajm sido qe te vije puna.
A na u bo reklama keqe, varja mrapa se ca justifikohen!
PO u thy vazo, aha s'ngjitet mo.

[Ina_19]

puuuuu cfare sna ngjojne veshettt ajde se do te rregullohet....