Lejet, pengesa kryesore e ndërtuesve

[Xhuxhumaku]

Qendra për Kërkim dhe Zhvillim anketon ndërtuesit, të cilët ankohen për mungesë lejesh e legjislacionin fiskal

Lejet, pengesa kryesore e ndërtuesve

190 kompani ndërtuese në qytetet kryesore të vendit, nxjerrin problemet kryesore që pengojnë zhvillimin e tyre

Gladiola Bendaj

TIRANË - Megjithë përmirësimin në dukje, të konfirmuar tashmë edhe nga vetë drejtuesit e kompanive ndërtuese, mungesa e lejeve të ndërtimit, apo vonesa e procedurave për miratim, vazhdojnë të konsiderohen pengesa kryesore në sektorin e ndërtimit. Është ky, vlerësimi që i ka bërë Qendra për Kërkim dhe Zhvillim (QKZH) në Tiranë, vlerësimit të situatës së biznesit në sektorin e ndërtimit. Kështu, për 3 mujorin e fundit, nga 190 kompani ndërtuese të anketuara në qytetet Tiranë, Durrës, Shkodër, Elbasan, Fier dhe Vlorë, 58 për qind e tyre cilësojnë si faktorin kryesor pengues, mungesën e lejeve për ndërtim. Situata paraqitet ndryshe nga një vit më parë, ky problemi ishte në një fazë më kritike. Sipas rezultateve të anketimit, niveli i shqetësimit për lejet e ndërtimit, është gjashtë pikë më i ulët se në të njëjtën periudhë të vitit të kaluar. Megjithatë, pasojat e këtij fenomeni duket se do të reflektohen gjatë, në masën e gjerë të konsumatorëve. Jo më larg se një muaj më parë, Drejtori Ekzekutiv i Shoqatës së Ndërtuesve Shqiptarë, Shkëlqim Bumçi, gjatë një deklarate për shtyp, pranoi se mungesa e lejeve të ndërtimit ka pasur një ndikim të drejtpërdrejtë në rritjen e çmimit të apartamenteve, kryesisht për Tiranën. “Mungesa e lejeve për ndërtim ka një influencë të drejtpërdrejtë mbi koston. Është e qartë që nëse marrja e lejeve të ndërtimit, nuk do të jetë kaq problematike, oferta nga ana jonë do të rritet, çmimet do të vijnë drejt rënies dhe natyrisht edhe kërkesa e konsumatorit do të rritet”,- është shprehur ai. Një faktor shqetësues në ndërtim, gjithashtu duket se është instabiliteti makroekonomik, i cili është përmendur nga 42 për qind e të anketuarve. Ky nivel është 10 për qind më i ulët se një vit më parë, ku problemi ishte rivlerësimi i shpejtë i lekut. Konkurenca e pandershme nga tregu i zi në sektorin e ndërtimit, po bëhet një faktor me fuqi konstante. Kjo, pasi këtë faktor, për më se një vit rrjesht e kanë përmendur 34-38 për qind e të anketuarve. Gjithashtu, ndikimi i legjislacionit fiskal frenon rreth 44 për qind të kompanive ndërtuese të anketuara, nivel ky që është relativisht më i ulët se ai i regjistruar në dy anketimet e fundit.
Optimizmi
Megjithëse në muajin korrik 2005 treguesi i besueshmërisë në sektorin e ndërtimit shënon një vlerë prej 5 pikësh më të ulët se 3 muaj më parë, niveli aktual është 18 pikë më i lartë se ai i krahasuar një vit më parë dhe 8 pikë më i lartë se në muajin janar 2005. Ky optimizëm i shprehur nga drejtuesit e firmave, lidhet me garancinë që kanë ata për volumin aktual të kontraktimeve dhe parashikimeve optimiste për 3 muajt e ardhshëm. Përmirësimi i klimës së biznesit në ndërtim, shikohet qartë gjithashtu në treguesin e ecurisë së aktivitetit të ndërtimit në 3 muajt e fundit. Nga krahasimet e të dhënave grafike, duket se ky faktor paraqitet 3 pikë më i lartë se në të njëjtën periudhë të vitit të kaluar. Ndërkaq, sipas një vështrimi më të largët, të dhënat e anketimeve tregojnë qartë se pika e kthesës në sektorin e ndërtimit, duhet të ketë filluar në 3 mujorin e katërt të vitit 2003. Ndërkaq, përsa i takon nivelit të punësimit, të dhënat e nxjerra nga anketimi i 190 firmave të ndërtimit, tregojnë se parashikimet për 3 muajt e ardhshëm, janë në nivele pozitive dhe renditen në nivele më të larta se një vit më parë. Kjo tendencë për rritjen e punësimit edhe në 3 mujorin e tretë të këtij viti, japin një indikacion të qartë, se të paktën edhe për 3 mujorin e ardhshëm, sektori i ndërtimit do të shënojë përsëri rritje. Përsa i takon nivelit të kontraktimeve, nga përgjigjet e drejtuesve të kompanive, rezulton se ky faktor ka pësuar një ulje relative krahasuar me tre muaj më parë, por megjithatë, për momentin, ky ngelet në nivele të kënaqshme, po të kihet parasysh që një vit më parë, ndërtuesit paraqitën nivel më të lartë shqetësimi, përsa iu takon kontratave të nënshkruara.




28/07/2005
KATEGORIA: Ekonomi.Shekulli.