Gazeta Elektronike: "Futbolli Ndërkombtar" (Nr.3)

[viganv]

Ronaldo: Po rrezikoj vendin e titullarit



Pas fitores së Brazilit ndaj Argjentinës, sulmuesi Ronaldo deklaroi se vendi i tij prej titullari nuk ishte i sigurtë në ekipin e "Selesaos". Megjithatë, sulmuesi i Realit të Madridit nuk ishte penduar për vendimin për të mos marrë pjesë në Kupën e Konfederatave. Ronaldo mungoi në kompeticionin 2-javor, pasi kërkoi të pushonte dhe zëvendësuesi i tij, Adriano, e shfrytëzoi më së miri mundësinë e dhënë, duke u shpallur golashënuesi më i mirë i Kupës së Konfederatave, me 5 gola. "Trajneri Parreira deklaroi se vendi im në kombëtare është i garantuar, por unë nuk e mendoj kështu. Jam i bindur se në qoftë se nuk arrij të shënoj gola, nuk do ta kem të sigurtë vendin e titullarit. Brazili ka shumë sulmues të talentuar dhe këtë e tregoi edhe në Kupën e Konfederatave. Adriano është i jashtëzakonshëm dhe këtë ai e ka treguar edhe tek ekipi i Interit. Edhe Robinjo është zhvilluar teknikisht dhe është një ndër pretendentët për një vend në Botërorin e Gjermanisë. Nuk mora pjesë në këtë kompeticion, pasi kisha nevojë të pushoja. Nuk pendohem për vendimin tim, sepse ishte e nevojshme për mua në prag të botërorit të ardhshëm. Dëshiroj të jem 100% gati për në botërorin e ardhshëm. Dëshiroj që viti 2006, të jetë viti i jetës sime. Jam i lumtur për paraqitjen e Brazilit në Kupën e Konfederatave, por në botëror dua të luaj dhe të shënoj rregullisht", - deklaroi Ronaldo.

[Davius]

Parreira: Të përsëritemi vitin e ardhshëm



Brazili do të mbrojë titullin e kampionit të botës, si favorit në botërorin që do të zhvillohet në Gjermani vitin e ardhshëm. Kështu mendon trajneri i "Selesaos", Karlos Alberto Parreira, pas fitores që skuadra e tij arriti 4-1 në finalen e Kupës së Konfederatave, ndaj Argjentinës. Brazili, në botërorin koreano-japonez nuk shihej si favorit, për shkak të formës së dobët të disa prej futbollistëve bazë, por arriti të fitonte. "Do ta fillojmë botërorin si pretendentët kryesorë, si skuadra për t'u mundur, dhe kjo jo vetëm se jemi kampionët në fuqi, por edhe sepse jemi skuadra më e fortë. Por duhet të kemi kujdes, sepse gjatë historisë Brazili ka fituar atëherë kur nuk ishte pretendent dhe jo kur është dhënë si favorit. Humbja në Francë dhe sukseset në Amerikë e Japoni e tregojnë këtë." Gjithsesi, Brazili, ndryshe nga Argjentina, ende nuk e ka siguruar një vend për në finalet e Kupës së Botës. Por, nga ana e tij, Parreira krenohet me mënyrën se si e ka interpretuar skuadra e tij këtë edicion të Kupës së Konfederatave: "Patëm një shans të mirë për të testuar skuadrën. Nuk është vetëm një trofe u fituar. Skuadra e mbrojt mirë dhe luajti shpejt në aksionet me një takim. Në rast se luajmë në mënyrë të tillë edhe vitin e ardhshëm, jam i bindur se do të shpallemi kampionë bote."
Trajneri, i cili e ka fituar një titull kampion bote me Brazilin gjatë Botërorit USA '94, përcakton edhe rivalët më të rrezikshëm për skuadrën e tij në botërorin gjerman: "Skuadra vendëse ka një avantazh të konsiderueshëm. Më pëlqen Holanda. Çekët janë të fortë. Edhe Anglia me Portugalinë kanë bërë shumë

[viganv]

Robinjo pas fitores: Dua Realin


Sulmuesi brazilian Robinjo ka thënë pas fitores së Brazilit ndaj Argjentinës, se do t'i pëlqente të luante sezonin e ardhshëm me Realin e Madridit. "Shpresoj të luaj te Reali. Kam biseduar me ta dhe mendoj se është hapi i duhur për karrierën time," - tha talenti 20-vjeçar për një televizion brazilian. Robinjo ka dalë kështu edhe një herë kundër dëshirës dhe fjalës së presidentit të Santosit, Marselo Teikseira, që e ka mohuar një kalim të sulmuesit në Madrid. Santosi kërkon 50 milionë dollarë dhe Reali është gati të ofrojë vetëm 25. Gjithsesi, dëshira e futbollistit për të luajtur në "Bernabeu", duket se do të ndikojë në arritjen e një marrëveshjeje përfundimtare. Në vazhdimin e deklaratës së tij, Robinjo u shpreh: "Në Brazil nuk mund të jetoj i qetë. Kam pasur shumë strese që nuk më kanë lejuar të përqendrohem totalisht te futbolli. Për këtë do të më pëlqente Spanja dhe sidomos Madridi. Atje do të kem fatin të punoj me një trajner që e njoh mirë, siç është Vanderlei Luksemburgo."

Adriano: Jemi gati për 2006-n


Pas shënimit të dy golave në finale ndaj Argjentinës, Adriano u shpall lojtari më i mirë i këtij kompeticioni. Pas ndeshjes në Frankfurt, ai deklaroi: "Ishte shumë e rëndësishme të fitonim Kupën e Konfederatave, si një pjesë përbërëse e përgatitjeve për në Botërorin e 2006-s. Jam shumë i kënaqur që arrita të fitoja këtë trofe. Për mua kjo është më e rëndësishme se trofeu i lojtarit më të mirë. Arritëm të fitonim, pasi luajtëm sipas stilit brazilian. Për ne, kjo nuk ishte një hakmarrje ndaj Argjentinës, por thjesht një finale e fituar me meritë. Ne duam të fitojmë gjithmonë në kompeticione ndërkombëtare. Gjithashtu donim të tregonim se jemi gati për Botërorin e Gjermanisë. Kjo gjë na ndihmoi të kalonim lodhjen e sezonit të kaluar. Argjentina luajti mirë, por nuk mundi të ndiqte ritmin e lojës sonë. Golat ia dedikoj familjes sime, e cila më ka përkrahur edhe këtu në Gjermani".

[viganv]

Milani humb Krespon, por fiton Kalaxen



Sa vijnë e reduktohen mundësitë dhe shpresat që Hernan Krespo të qëndrojë te Milani. Edhe pse argjentinasi ia ka ritheksuar disa herë Çelsit dëshirën e tij, madje edhe publikisht, për të qëndruar në Itali, klubi anglez e ka grumbulluar për stërvitjen e fazës përgatitore sulmuesin, që fillon të mërkurën e ardhshme. Ndërsa dje, Kakhaber Kalaxe, që mund të shkonte te Çelsi si pjesë "këmbimi" për Krespon, ka rinovuar kontratën me Milanin deri më 2010-ën.
Janë gjithnjë e të kundërta rrugët mes Hernan Krespos dhe Milanit, që për ta zyrtarizuar lojtarin, i mungonte vetëm një formalitet. Në këtë pikë nuk është e gabuar të thuhet që konfirmimi i argjentinasit është bërë tepër i pamundur, pavarësisht se prej disa javësh ai vazhdon të deklarojë dëshirën e tij për të qëndruar në Milano, për motive si "teknike", ashtu edhe familjare (sapo është martuar me Alesian, një vajzë italiane). I ardhur verën e shkuar i huazuar nga Çelsi te Milani, Krespo rezultoi si një nga surprizat më kryesore të klubit kuqezi. Madje mendohej që shitja e Kalaxez te "blutë", plus një shumë parash, do të mjaftonte për të mbajtur "Valdaniton". Por bisedimet u vështirësuan në mënyrë të papritur dhe pavarësisht nga përpjekjet e bëra nga lojtari dhe menaxheri i tij Hidalgo, është tashmë e sigurtë që Çelsi nuk kërkon të dorëzohet për amerikano-latinin. Eshtë një dëshmi direkte fakti që skuadra e drejtuar nga portugezi Mourinjo, sipas asaj që shkruan edhe shtypi anglez, e ka përfshirë Krespon në listën e grumbullimit të lojtarëve për stërvitjen e fazës përgatitore, e cila nis të mërkurën që vjen. "Është lojtari ynë, ndaj pse nuk duhet të vijë në stërvitje, - ka deklaruar një lojtar i Çelsit. - Mesatarja e tij e golave është e shkëlqyer dhe ai duhet të jetë një nga pikat e referimit të skuadrës". Përshtypja është që klubi i Abramoviçit paska vendosur ta mbajë Krespon, pasi ka dështuar një herë për të blerë Adrianon, Shevçenkon dhe Trezegenë. Për t'ia mbyllur ndoshta një herë e përgjithmonë dyert Krespos, është para së gjithash edhe nënshkrimi i Kalaxes, që ka rinovuar dje me Milanin deri më 2010-ën. Një lëvizje e rëndësishme që del kundër shitjes së tij. "Përsa i përket Krespos, nuk kam asnjë lajm për t'ju dhënë", - ka deklaruar drejtori i përgjithshëm kuqezi, Ariedo Braida.
Përsa i takon Kalaxes, mbrojtësi 27-vjeçar e ka parandjerë rinovimin e kontratës teksa pati thënë: "Kontrata ime skadon më 2006-ën, - shpjegoi gjeorgjiani pak para nënshkrimit. - Në Milano ndihem mirë, problemi im është vetëm teknik, kam luajtur pak. Megjithatë do të përpiqem të arrij një marrëveshje me drejtuesit kuqezi për një rinovim". Dhe Kalaxe ia arriti.

[viganv]

Zamparini: Karaçiolo-Toni, e ardhmja jonë



Pronari i Palermos, Mauricio Zamparini, përmes mikrofonëve të agjencisë radiofonike Grt, i ka bërë një ultimatum Lotitos për binjakët Filipini dhe ka dhënë sqarime për çështjen "Toni". Në plan të parë ka qenë një kalim i mundshëm i Filipinëve te Roma: "Ka edhe tri skuadra të tjera të interesuara të Serisë A, por nuk ka asnjë prishje përfundimtare me Lacion. Nëse Lotito nuk nxitohet të na ofrojë shumën e duhur dhe vazhdon të luajë me uljet e çmimeve, duke përdorur pretekstin e pagave të larta të Filipinëve, ka mundësi që marrëveshja të prishet." Ndërkohë, për Karaçiolon është thuajse arritur gjithçka: "Besoj se do të zyrtarizohet nesër (sot) në mëngjes. Por në përgjithësi jemi marrë vesh për gjithçka." Kapitulli Toni: "Është me pushime sikurse edhe unë. Problemi nuk ka të bëjë me pagën e tij, por me përzgjatjen e kontratës edhe dy vite të tjera dhe me këtë temë do të përballemi kur të grumbullohemi në Austri. Ne synojmë ta mbajmë në gjirin tonë, sepse mendojmë se me Tonin dhe Karaçiolon mund të formojmë një nga dyshet sulmuese më të mira të kampionatit."

[viganv]

Preciozi: S'kam blerë kurrë asnjë ndeshje


Enriko Preciozi ka rrëfyer pafajësinë e tij në një intervistë për të përditshmen sportive italiane "La Gazzetta dello Sport". "Nuk kam blerë kurrë asnjë ndeshje, aq më tepër që vetëm një i marrë mund të mendonte të blinte një ndeshje, rezultati i së cilës nuk kishte asnjë rrugë tjetër përveç se fitores së Xhenoas. Unë jam i vendosur për të dalë i pastër nga kjo çështje dhe askush nuk mund t'ia heqë Serinë A Xhenoas, sepse ka arsye dhe unë kam besim te drejtësia sportive dhe tek organet hetuese."

[viganv]

Mareska, pjesë "këmbimi" për Xhilën?


Sipas shtypi italian, Juventusi qënka gati të tentojë "mësymjen" për Xhilardinon, duke afruar si këmbim teknik kartonin e Enco Mareskës, që sapo është "ripeshkuar" nga Firence në Torino. Ardhja e sulmuesit të Parmës te bardhezinjtë, do të hamendësonte edhe një shitje të mundshme të David Trezegesë në Angli

[viganv]

Juventusi më 11 korrik ngre "siparin"


Pushimet e Juventusit kanë hyrë në dhjetë ditëshin e fundit. Po, sepse kampionët e Italisë, do ta ngrejnë "siparin" e sezonit 2005-2006 më 11 korrik, kur bardhezinjtë do të bashkohen në Torino për t'u nisur më pas në Saliçe Terme, që për të dytin vit rradhazi, do të jetë zona e përgjithshme mikpritëse për skuadrën e Kapelos.

[viganv]

Takim Inter?Njukasëll për Emrenë


Dje pritej përgjigjja që do t'i jepte Van der Meide Monakos. Anësori holandez kishte kërkuar disa ditë për të vendosur. Dje ishte në program një takim mes drejtuesve të Interit dhe atyre të Njukasëllit, për të mundësuar kalimin e Emresë në Angli. Lojtari ka disa ditë që e ka arritur marrëveshjen me klubin britanik.

[viganv]

Park: Mançesteri, çmimi i punës sime



Mesfushori koreanojugor Ji Sung Park tha të shtunën, gjatë prezantimit të tij me fanelën e Mançesterit, se ndihej kranar për kalimin e tij te skuadra e Fergusonit. Park, pasi i kaloi me sukses testet mjekësore, e la përfundimisht Eindhovenin dhe lidhi një kontratë katërvjeçare me Mançester Junaitedin. 24-vjeçari, sapo mbërriti në aeroportin e Mançesterit tha për gazetarët: "Presonalisht jam krenar për kalimin te Mançesteri. Do të luaj në një nga skuadrat më të forta në Premier Ligë, dhe kjo tregon se kam bërë punë të mirë te PSV-ja dhe me fanellën e kombëtares. Eshtë një çmim për të gjithë punën time si futbollist profesionist". Park, sëbashku me bashkatdhetarin e tij Jong Pio Li kaluan te PSV-ja në verën e vitit 2002. Park, në sezonin që sapo u mbyll, ka qenë një nga protagonistët e skuadrës së Eindhovenit që fitoi titullin në Holandë, dhe u eliminua vetëm në gjysmëfinalet e Ligës së Kampioneve nga Milani. "Kur vesha fanelën e Mançesterit m'u duk se po përjetoja një ëndërr. Më pas pashë "Old Trafordin" dhe u ndieva krenar që do të kem mundësi të luaj në këtë stadium. Nuk mund të gjeja një skuadër më ideale se Mançesteri për ta vazhduar karrierën time. Jam shumë optimist për sezonin e ardhshëm. Jam i lumtur, por gjatë ecurisë së botërorit 2002 kam përjetuart çastin më të lumtur të jetës sime. Besoj se gëzimi i ndjerë pas fitores ndaj Italisë nuk do të përsëritet më për asnjë nga futbollistët e Koresë që luajtën në atë takim historik." - përfundoi deklaratën e tij mesfushorit aziatik. Park në kampionatin e fundit botëror shënoi vetëm një gol, atë ndaj Portugalisë. Tani ai do të jetë figura kryesore e klubit të Fergusonit, gjatë turneut miqësor që Mançesteri do të zhvillojë në Azi në mesin e muajit korrik.

[viganv]

Mourinjo: Çelsi nuk ndalet më...


Trajneri i Çelsit, Hoze Mourinjo, beson verbërisht te Çelsi i tij dhe mendon se "blutë" do të fitojnë titullin kampion edhe sezonin e ardhshëm. Portugezi, në sezonin e tij të parë si trajner në Premier Ligë, i dha skuadrës londineze titullin kampion që i mungonte prej 50-vitesh. Gjatë një spektakli televiziv në Portugali ishte i ftuar edhe Mourinjo, i cili, kur iu desh të fliste për futbollin, tha: "Në tri vitet e fundit kam thënë gjithmonë se do të fitoj titullin kampion dhe ia kam dalë mbanë, dy herë me Porton dhe një herë me Çelsin." Më pas, Mourinjo vazhdoi: "Eshtë normale që ndonjë sezon edhe nuk do të fitoj dhe janë të shumtë njerëzit që presin këtë moment, por të paktën për vitin e ardhshëm ndihem i sigurtë për suksesin. Kam besim te Çelsi dhe zotëroj skuadrën e duhur për të synuar fitimin e gjithçkaje." Në merkaton e verës, Çelsi ka qenë relativisht më i qetë se në dy edicionet e kaluara. Nga "blutë" janë larguar Skot Parker dhe Mikael Forsel, dhe ka ardhur Asier Del Horno. Abramoviç ka dështuar në synimin e tij për të kaluar emra të mëdhenj si Shevçenko, Eto apo Trezege në "Stemford Brixh", por Mourinjo është i kënaqur me grupin që ka në dispozicion: "Vjet fituam pas 50 vitesh dhe jam i bindur se kjo skuadër nuk do të ndalet më. Ne jemi të kompletuar, por më duhet të pranoj se është shumë e vështirë të blesh futbollistë të mëdhenj, sepse skuadrat që zotërojnë pronësinë e tyre, nuk kanë ndër mend t'i shesin."

[viganv]

Çelsi, kur paratë nuk mjaftojnë...


Edhe pas miliona eurove të ofruara nga Roman Abramoviç, drejtuesit e Çelsit nuk kanë arritur t'i japin një sulmues të klasit të lartë Hoze Mourinjos. Kësisoj, zërat për një rikthim të Krespos në "Stemford Bridxh", pas një sezoni hua te Milani, bëhen gjithnjë e më të besueshme. Eshtë e habitshme që presidenti më i pasur në botë, Abramoviç, i ndihmuar nga projektuesi i Mançesterit të madh, Piter Kenion, nuk arrijnë të marrin një sulmues. Kështu, pasi në dy vjet shpenzuan 200 milionë paund, duke ndërtuar një skuadër që fitoi titullin pas 50 vitesh, "blutë" duhet të përjetojnë një merkato "të shterptë". Tani Mourinjos i kanë mbetur në skuadër vetëm Drogba dhe Gudjohnsen në sulm, pasi Kezhmani ka kaluar tek Atletiko e Madridit.
Gjashtë kanë qenë sulmuesit që së bashku me klubet e tyre kanë refuzuar ofertën e londinezëve. Adriano i Interit, Eto i Barcelonës, Henri i Arsenalit, Shevçenko i Milanit, Trezege i Juventusit dhe Ferrnando Torres i Atletikos kanë preferuar të qëndrojnë në klubet e tyre. Sipas zërave të merkatos, shuma që u ka ofruar Çelsi për të gjashtë këta lojtarë së bashku, është rreth 370 milionë euro. Zyrtarisht, klubet kanë deklaruar se nuk duan t'i shesin "yjet" e tyre. Në fillim erdhi refuzimi i ofertës së bërë për Adrianon. Morati nuk pranoi t'i fillonte bisedimet për shitjen e brazilianit, por duhet thënë se Abramoviçi nuk këmbënguli. Ishin vetëm ditët e para të merkatos dhe presidenti rus mendoi se nuk kishte arsye përse të nxitohej, Henri ishte në mendjen e tij. Por edhe kjo kartë doli e pavlefshme, kur Peter Kenion dhe Hoze Mourinjo u takuan me Eshli Kolin në një restorant të Londrës, për të biseduar për kalimin e mbrojtësit në "Stemford Bridxh". Arsenali zbuloi gjithçka dhe ishte e pamendueshme që "topçinjtë" të pranonin largimin e Henrisë. Futbollisti i tretë në radhë kronologjike që e refuzoi Çelsin, ishte Samuel Eto. Kenioni e bindi Abramoviçin t'i ofronte Barcelonës 70 milionë euro për të marrë Etonë. Katalanasit ishin "të detyruar" të pranonin, por në momentin e fundit Laporta ndërroi mendje dhe udhëtoi personalisht në Kamerun për të rinovuar kontratën me ish-sulmuesin e Majorkës. Në javën e fundit, Çelsi mori edhe dy "jo" nga Seria A. Në fillim nga Milani për Shevçenkon, kuqezinjtë e refuzuan ofertën rekord prej 80 milionë eurosh dhe më pas nga Juventusi për Tregezenë. Bardhezinjtë, ashtu si disa skuadra të tjera pretendente në Itali, ka të ngjarë ta kishin pranuar ofertën për "yjet" e tyre, në rast se do të vinte nga ndonjë klub. Për t'u habitur, por drejtuesit e klubeve të mëdha duken "të trembur" nga paratë e Çelsit. Së fundi, edhe Atletiko e Madridit nuk e ka pranuar kërkesën e bluve për Ferrando Torresin, por drejtuesit madrilenë, më saktësisht, presidenti Enrike Kerezo tha: "Presidenti i Çelsit duhet ta harrojë Torresin. Fernando është një futbollist i Atletikos dhe duhet të qëndrojë edhe për disa vite në Madrid. Eshtë i pashitshëm dhe me këtë dua të largoj çdo spekullim që mund të dalë në shtyp."

[viganv]

Barcelona, Eto dhe Mesi rinovojnë



Dje ka ardhur zyrtarizimi i rinovimit të kontratës nga Samuel Eto. Marrëveshja ndërmjet dy palëve ishte arritur prej kohësh, por vetëm dje sulmuesi nga Kameruni hodhi firmën mbi kontratën e Laportës. Pas firmës, sulmuesi tha se dëshironte të fitonte Ligën e Kampioneve në sezonin e ardhshëm. 24-vjeçari Eto, i cili shënoi 24 gola në kampionatin që sapo u mbyll, refuzoi një ofertë të Çelsit dhe zgjodhi të rinovonte me Barcelonën. Pas Ksavit dhe Dekos, afrikani u bë i treti futbollist nga titullarët e Barçës që pranoi rinovimin deri në vitin 2010. Ndërkohë, Laporta mendon edhe për të ardhmen. Me një kontratë deri në vitin 2010, ai ka "blinduar" dy talentët, Damia Abela dhe Lionel Mesi, futbollistë 20-vjeçarë, të cilët kanë shkëlqyer në kampionatin për të rinj që po zhvillohet në Holandë. Gjithnjë sipas Laportës, dita e parë e stërvitjes së Barcelonës për sezonin e ardhshëm futbollistik do të përkojë me rinovimet e Rajkardit dhe Ronaldinjos.

[viganv]

Di Vaio: Jam gati për konkurrencën



Sulmuesi i Valencias, Marko Di Vaio, nuk ka ndër mend të largohet nga kjo skuadër, pavarësisht konkurrencës së shumtë në sulm. Sezonin e ardhshëm, atij do t'i duhet të konkurrojë për një vend titullari me Klaivertin, David Vilën, Mistën dhe Korradin, por italiani nuk heq dorë: "Ndihem një sulmues i rëndësishëm për Valencian dhe kjo më jep forcë për t'u përballur me konkurrencën dhe rivalitetin brenda skuadrës. Gjatë karrierës sime jam mësuar me situata të tilla."

Atletiko, pranë Maksi Rodrigezit


Atletiko e Madridit ka rënë dakord me Espanjolin për të marrë mesfushorin argjentinas, Maksi Rodrigez. Kryeqytetasit janë gati të paguajnë gjashtë milionë euro për të marrë futbollistin, aktualisht të impenjuar me kombëtaren "çeleste" në Kupën e Konfederatave. Rodrigezi, autor i 15 golave në sezonin e kaluar, është kërkuar me ngulm nga trajneri ri i Atletikos, Karlo Bianki. Për të mbyllur marrëveshjen, madrilenëve u ka mbetur vetëm të plotësojnë kërkesat ekonomike të futbollistit."

[viganv]

Klaivert: Te Valencia për të fituar



Patrik Klaivert është prezantuar dje përpara gazetarëve, në stadiumin "Mestaja", si sulmuesi i ri i Valencias për sezonin 2005-06. Holandezi është shprehur entuziast pas firmosjes së kontratës trivjeçare, e cila ka një klauzolë mjaft të veçantë. Në rast se futbollisti nuk do të bëjë një jetë profesioniste jashtë fushës së futbollit, klubi ka të drejtë të bëjë prishjen njëpalëshe të kontratës. Në fjalët e tij të para si futbollist i Valencias, ish-sulmuesi i Ajaksit, Milanit, Barcelonës dhe Njukasëllit tha: "Jam shumë i lumtur që do të luaj me Valencian. Kam tre vjet që nuk fitoj asgjë dhe kam ardhur këtu i etur për sukses. Shpresoj që pritjen e ngrohtë t'ua shpërblej me një paraqitje dinjitoze dhe me gola në fushën e lojës. Kam biseduar me presidentin dhe jam i kënaqur me kushtet e kontratës." Klaiverti u prezantua vetëm dje si futbollist i Valencias, edhe pse marrëveshja me drejtuesit e klubit spanjoll ishte arritur që në fillim të qershorit. Kjo vonesë u shkaktua nga problemet e Klaivertit më gjurin e majtë. Ai nuk i kaloi vizitat e para mjekësore, të bëra nga mjekët e Valencias. Tani situata ka ndryshuar, por gjithsesi Klaiverti deklaroi se nuk u tremb për asnjë moment se mos dështonte rikthimi i tij në Primera Divizion: "Pas bisedës që pata me drejtuesit e Valencias, u binda se ata dëshironin me çdo kusht shërbimet e mia dhe një problem i vogël në gju nuk do të prishte gjithçka. Kërkova dy javë kohë dhe pas një terapie personale, gjuri im është gati të përballojë çdo test. Më duhej edhe pak kohë për t'u riaftësuar nga dëmtimi i pësuar te Njukasëlli. Kjo është e vërteta." Pyetjes se çfarë mund t'i sjellë Klaiverti Valencias, sulmuesi holandez iu përgjigj: "Shpresoj që me përvojën që kam fituar, të mbyll sa më mirë aksionet e skuadrës. Dua të fitoj besimin e shokëve të mi dhe të tifozëve, duke shënuar." Klaiverti është rikthyer në Spanjë, pas gjashtë viteve të tij me Barcelonën, por sulmuesi 28-vjeçar nuk mendon për hakmarrje: "Kam kaluar gjashtë vite të lumtura në Barcelonë dhe nuk kam asnjë revansh për të marrë ndaj katalanasve. Ata do të jenë gjithmonë në zemrën time. Barcelona është një ekip i fortë dhe unë do të bëj të pamundurën që Valencia të rivalizojë me të, për të marrë titullin kampion." Në fund, Klaiverti flet për objektivat e së ardhmes: "Kam parë projektet e skuadrës dhe emrat që do ta përbëjnë Valencian sezonin e ardhshëm. Duhen ende dy muaj nga fundi i sezonit, por mendoj se Valencia do të jetë midis katër skuadrave më të forta të Spanjës në fund të kampionatit." Entuziast për kalimin e holandezit në "Mestaja" ka qenë edhe presidenti i Valencias, Soler, i cili tha gjatë ceremonisë së prezantimit: "Arritëm të sjellim një tjetër "yll" të nivelit botëror në "Mestaja" dhe jam shumë i lumtur për këtë. Klaiverti ka shënuar 130 gola në Primera Divizion dhe kjo shifër duhet vënë re te një sulmues 28-vjeçar. Patrikut i duhej dhënë një mundësi, ne e bëmë diçka të tillë dhe jam i bindur se do të dalim të fituar."

[viganv]

Eto: Laporta refuzoi 70 milionë euro për mua



Sulmuesi kamerunas, Samuel Eto, ka lëshuar intervistën e tij të parë pas rinovimit deri në vitin 2010 me Barcelonën. Autori i 24 golave në sezonin e fundit ka filluar prej pak ditësh pushimet, pasi ka përfunduar impenjimet e tij me kombëtaren e Kamerunit. Eto planfikon sezonin e ardhshëm dhe flet për dashurinë katalanase, që e detyroi atë të refuzonte milionat e Çelsit. Ja cila ka qenë intervista e tij:
- Laporta, pas vizitës në Kamerun, është shprehur i mrekulluar me atë vend dhe ju ka quajtur si "Mbretin" e Kamerunit. Si do ta vlerësonit këtë elozh të presidentit?
- Jam shumë krenar. Kameruni ka rreth 15 milionë banorë dhe është një popull i dashuruar pas futbollit, më vjen mirë që unë i përfaqësoj në futbollin elitar.
- Në vitin tuaj të parë te Barcelona, për një gol më pak se Forlan, nuk u shpallët shënuesi më i mirë i Primera Divizionit...
- E rëndësishme është që fituam ligën. Skuadra bëri një kampionat të jashtëzakonshëm. Unë shënova 25 gola, edhe pse një gol i imi u konsiderua si autogol në fund të ndeshjes. Pak rëndësi ka, sepse titulli kampion është mbi të gjitha.
- Do të jetë e vështirë të përsëriteni vitin e ardhshëm?
- Njerëzit kërkojnë më shumë nga kampionët dhe për këtë jemi të detyruar të japim më shumë. Gjithsesi, jam i bindur se me skuadrën që kemi, do t'ia dalim mbanë. Nuk jemi të ngopur dhe jemi gati për të fituar sfida të tjera.
- Keni rinovuar me Barçën. Përse zgjodhët sërish katalanasit?
- Nuk kishte asnjë arsye përse të largohesha, ndërsa arsyet për të qëndruar ishin të pafundme.
- Keni pasur kontakte me Çelsin?
- Menaxherit tim i ka ardhur një ofertë nga Çelsi, por për asnjë koment nuk kemi biseduar me ta. Që në momentin e parë që shtypi ka filluar të spekullojë për një transferim timin në Angli, unë kam dalë përpara gazetarëve dhe kam thënë që isha i gatshëm të rinovoja me Barcelonën, për të evituar çdo keqkuptim.
- Jeni në dijeni të shifrave të ofruara nga Çelsi për të marrë shërbimet tuaja?
- Po. Laporta refuzoi 70 milionë euro dhe më propozoi rinovimin e kontratës. Presidenti dhe trajneri Rajkard besojnë tek unë. Kjo më bën krenar dhe më mbush me optimizëm për sezonin e ardhshëm. Gjithashtu, më del si detyrë t'ua shpërblej këtë besim.
- Cila është ëndrra juaj?
- Pasi jam shpallur futbollisti më i mirë afrikan në dy vitet e fundit, dua të fitoj edhe "Topin e artë". Këtë mund ta bëj vetëm në rast se Barcelona do të fitojë trofe.
- Mund t'ju pyesim se ç'do të bëni pas 2010-s. Do të jeni 28 vjeç dhe jashtë kontratës me Barçën. Keni ndonjë plan të largët?
- Sinqerisht e kam të vështirë të mendoj një të ardhme larg Barcelonës. Në 2010-n do të fillojmë bisedimet për të qëndruar edhe dhjetë vite të tjera në "Kamp Nou". Personalisht nuk do të ndahesha kurrë nga Barcelona.

[viganv]

Saki projekton rikthimin e "galaktikëve"



Arrigo Saki ka filluar nga puna për të ndërtuar skuadrën e Realit të Madridit, për sezonin e ardhshëm futbollistik. Nuk do të jetë aspak e lehtë, por drejtori teknik i "merengesëve" ka një objektiv të qartë për sezonin e ardhshëm: "Duhet të formojmë një skuadër që të luajë mirë dhe të fitojë titullin." Në sezonin e ardhshëm, duke filluar nga presidenti Perez dhe deri te rezerva e fundit madrilene, do të kenë si objektiv fitimin e trofeve. Dy vjet duarbosh janë shumë për "Santiago Bernabeun", tifozët e të cilit kërkojnë rikthimin në majat e futbollit botëror. Në lidhje me këtë, Saki thotë: "Në këto dy vitet e fundit nuk kemi fituar asgjë, edhe pse kemi pasur futbollistët më të mirë të planetit në skuadër. Kjo tregon se ndeshjet e veçanta edhe mund të fitohen vetëm falë ndonjë "ylli" që ke në skuadër, por titujt i fiton vetëm duke luajtur si një ekip i vërtetë gjatë gjithë sezonit. Dhe ky është objektivi ynë: të ndërtojmë një skuadër." Italiani është i vetëdijshëm që te Reali i Madridit nuk vlen vetëm të fitosh: "Eshtë normale që duhet të fitojmë duke kënaqur njerëzit që mbushin "Bernabeun". Kjo është një traditë që vazhdon prej vitesh në këtë stadium. Kam besim se në sezonin e ardhshëm nuk do të zhgënjejmë, pasi skuadra është e etur për trofe." Më pas, Arrigo Saki kujton kohën kur nuk rrinte i mbyllur në zyrë, por vishte tutat dhe punonte me skuadrën në stërvitje. Ish-trajneri i Parmës, Milanit dhe kombëtares italiane u shpreh: "Në futboll duhet të dish të sulmosh dhe të mbrohesh. Duhet të dish të mbash nën presion kundërshtarin dhe të sulmosh për 90 minuta, por duhet edhe të dish të përdorësh kundërsulmin. Duhet të luajmë si një trup i vetëm dhe të shfrytëzojmë në maksimum qarkullimin e rrjedhshëm të topit." Saki i premton liri të plotë Luksemburgos në zgjidhjet e tij dhe e ndihmon trajnerin brazilian: "Trajneri është ai që vendos. E rëndësishme është të fitojë skuadra dhe jo nëse luan apo jo ndonjë "galaktik". Vjet përbënte më shumë lajm formacioni i Realit, sesa rezultati i ndeshjes. Një sezon është i gjatë 70 ndeshje dhe asnjë futbollist, sado i aftë qoftë, nuk mund të jetë gjithmonë titullar." Saki vazhdon deklaratën e tij duke dhënë nga një mendim për disa nga futbollistët aktualë të Realit: "Rauli është ende i ri dhe mendoj se do të japë më shumë për Realin vitin e ardhshëm. Në rast se do të më duhej të përshkruaja futbollistin më perfekt brenda dhe jashtë fushës, do të zgjidhja Zidanin. Udgejti është riaftësuar dhe do të jetë pjesë e skuadrës vitin e ardhshëm. Guti? Dera për të është e hapur. E ka në dorë të ardhmen e tij, sepse ne nuk duam të mbajmë në skuadër futbollistë që nuk kanë dëshirë të qëndrojnë." Në fund, italiani flet për merkaton e Realit dhe për punën që po bën në këtë aspekt së bashku me Butragenjon dhe presidentin Perez: "Eshtë një merkato konfuze. Ka shumë futbollistë që janë të gatshëm të luajnë për ne, por klubet e tyre kërkojnë çmime stratosferike. Marrëveshjet janë shumë të vështira, sepse futbolli është shndërruar në një biznes të vërtetë dhe nuk është e vërtetë që gjatë verës pushon. Eshtë e vërtetë që nuk luhet në fushë, por në zyrat e presidentëve vendosen fatet e sezonit. Pablo Garsia dhe Serxhio Ramos janë dy futbollistë që më pëlqejnë, por ende nuk kemi arritur një marrëveshje me ta."

[viganv]

Trapatoni: Italia mendon se jam plakur...



Xhovani Trapatoni ka filluar dje aventurën e tij të re si trajner i Shtutgartit. Kjo, pasi skuadra gjermane ka filluar përgatitjet për sezonin e ardhshëm futbollistik, i cili do të fillojë me ndeshjen e parë të Bundesligës më 5 gusht. Ish-trajneri i Benfikës, me të cilën fitoi titullin në sezonin e kaluar, do të ketë përkrah tij si ndihmës Andreas Bremenin. Ish-futbollisti gjerman ka qenë pjesë e Interit të drejtuar nga Trapatoni në vitin 1988. Por në deklaratën e tij të fundit përpara nisjes për në Gjermani, trajneri 66-vjeçar ka "sulmuar" Italinë e tij: "Ndihem ende i ri dhe me energji, por italianët më mendojnë të plakur. Për gjermanët jam ende një profesor dhe kësisoj vendosa të shkoja atje ku vlerësohem, edhe pse një ofertë nga Seria A nuk do ta kisha refuzuar." Në ditën e parë të stërvitjes, për arsye të ndryshme, Trapatoni nuk është takuar me Hildebrandin, Hinkelin, Hitzlsperger, Hlebin dhe Meirën, futbollistët kryesorë të skuadrës gjermane.

[viganv]

Përcaktohet kalendari i Bundesligës 2005-2006



Eshtë përcaktuar kalendari i kampionatit të ardhshëm të Bundesligës. Futbolli gjerman do ta ketë startin më 5 gusht dhe ndeshja e parë do të zhvillohet në stadiumin e ri "Allianz Arena", ndërmjet Bajernit dhe Borusias së Mynshengladbahut. Ndërkohë, Trapatoni do të debutojë si trajner i Shtutgartit në Duisburg. Ja ndeshjet e javës së parë të kampionatit gjerman: Bajern-M'gladbah, Këln-Mainz, Diusburg-Shtutgart, Shalke?K'lautern, Hamburg?Nurenberg, Volfsburg?Dortmund, Verder?Bielefeld, Eintraht?Leverkusen, Hanover?Herta.

Ze Roberto, edhe një vit me Bajernin



Ze Roberto ka përgënjeshtruar të gjitha zërat për një largim nga Mynihu dhe ka firmosur një kontratë, e cila do t'i japë mundësi të luajë edhe për një vit me Bajernin në Bundesligë. Mesfushori, i cili është i impenjuar me kombëtaren braziliane në Kupën e Konfederatave, do të luajë për bavarezët deri në fundin e sezonit të ardhshëm dhe do ta vendosë të ardhmen vetëm pas finaleve të Kupës së Botës. Pas kërkesave të shumta nga trajneri Magat, drejtuesit e Bajernit kanë arritur ta bindin Ze Roberton që të qëndrojë. Pas arritjes së marrëveshjes, Uli Hënes, drejtori teknik i klubit gjerman, tha: "Duke përfituar edhe nga dëshira e futbollistit për të mos u larguar, gjetëm gjuhën e përbashkët me menaxherin e tij, kësisoj do të kemi edhe për një vit shërbimet e Ze Robertos. Braziliani ka luajtur 115 ndeshje zyrtare me fanellën e Bajernit.

[viganv]

Premier Liga


Arsenali, më pranë Baptistës



Zv.presidenti i ekipit të Arsenalit, Daeidid Dein, udhëtoi dje për në Spanjë, për të diskutuar klauzolat për rinovimin e kontratës së Rejesit. Ky rast ka shërbyer për të hapur tratativat për blerjen e sulmuesit të Sevilias, Hulio Baptista. Në muajt e fundit, sulmuesi brazilian ka arritur të impresionojë në kampionatin sopanjoll, duke shënuar 18 gola në sezonin e kaluar. Reali dhe Barcelona kanë hequr dorë për sulmuesin brazilian, pas çmimit të lartë të vënë nga klubi i Seviljas. Arsenali ka bërë gati një ofertë prej 15 milionë eurosh, por klubi andaluzian kërkon të paktën 20 milionë euro për kartonin e Baptistës. Ardhja e brazilianit në "Hajbëri" mund t'i hapë rrugën kalimit të Robert Piresit drejt ekipit të Juventusit. Megjithatë, për të arritur tek Hulio Baptista, Arsenali mund të shesë edhe mesfushorin e talentuar, Patrik Vieiranë, i cili pëlqehet shumë nga drejtuesit e ekipit të Juventusit.