Uest Hem: Nuk e kemi kërkuar shqiptarin

[White_Angel]

Klubi anglez përgënjeshtron "La Sicilia"

Uest Hem: Nuk e kemi kërkuar shqiptarin


Nga Londra
Muhamed Veliu


Në blerjet e sivjetshme të klubeve angleze janë lakuar edhe emrat e
futbollistëve shqiptar. Ndër më të fundit është ai i Erjon Bogdanit
që shkëlqeu me fanelën e Veronës sezonin që shkoi. Sipas të
përditëshmes italiane "La Sicilia", klubit të Rexhinës që zotëron
edhe kartonin e lojtarit, i ka ardhur një ofertë nga klubi londinez
i Uest Hem Junajtid. Lidhur me këtë, "Gazeta" u interesua më tej dhe
mori një përgjigje negative nga ana e klubit të sapo rikthyer në
Premier Ligë. Zëdhënësi për shtyp i këtij klubi bëri të ditur se
emri për të cilin "Gazeta" interesohej nuk figuronte në listën e
blerjeve të kësaj skuadre. "Nuk e kemi këtë futbollist në listën
tonë të blerjeve - deklaroi ai-aq më tepër që qëllimi ynë është që
të sjellim në skuadër lojtarë të rinj nga ekipet zinxhir". Lajmi i
publikuar në gazetën italiane ngjalli interes veçanërisht nga
pikpamja financiare, si për klubin e Rexhinës ashtu edhe për vetë
qendërsulmuesin shqiptar. Gjithashtu, lidhur me këtë publikim u
ekzaltua shumë edhe komuniteti i shqiptarve që jetojnë në Londër,
sidomos ata që jetojnë në zonën Apton Park, ku ndodhet edhe stadiumi
i Uest Hemit. Bashkatdhetarët tanë, në rast të ndonjë realizimi të
kësaj hipoteze, do të kishin mundësi të shihnin bomberin e tyre
live. Gjithsesi, biseda telefonike me zëdhënësin për shtyp të
skuadrës së pjesës lindore të Londrës nuk la shumë hapësira për të
shpresuar se Erjon Bogdani mund të shkelë tapetin e blertë të Uest
Hemit për sezonin tjetër. Sipas këtyre gjasave, duket se shtatlarti
shqiptar edhe vitin e ardhshëm do të jetë protagonist në kampionatin
Italian, ku në pole position për të marrë shërbimet e tij është
skuadra e Kievos. Ofertat në adresë të sulmuesit shqiptar nuk kanë
munguar asnjëherë, madje mund të thuhet se tashmë Bogdani është
shndërruar në një nga emrat më të përfolur në merkaton italiane.
Nëse sulmuesi i kombëtares sonë do të trasferohej në kampionatin
anglez, që konsiderohet edhe si kampionati më i fortë në botë, do të
ishte një tjetër arritje për atë. Gjithsesi Bogdani ka deklaruar
disa ditë më pare, se e rëndësishme për të është që ai të luajë në
një skuadër me nivel dhe të aktivizohet rregullisht, në mënyrë që
emri i tij të mos jetë asnjëherë i lëkundur në listat e Brigelit. Me
këtë sulmuesi ka tregur edhe një herë se sa e rëndësishme është
kombëtarja për të. Tani për tani lojtari është në pronësi të
skuadrës së Rexhinës, dhe një ndër gjërat e para që i duhet të
zgjidhë është qëndrimi i klubit ndaj tij: nëse do ta mbajnë në
skuadër apo dëshirojnë ta shesin. Mbi këtë problem drejtuesit e
skuadrës kanë qenë shpesh të varur nga ikja apo jo e sulmuesit
tjetër të kësaj skuadre, çka ka sjellë hapur edhe kundërshtimin e
shqiptarit, i cili i ka kërkuar skuadrës të saktësojë përfundimisht
qëndrimin e saj lidhur me të ardhmen e tij.

Shqiptari me nënshtetësi finlandeze vendos të ardhmen

Kuqi nënshkruan për Blekburn Rovers

Futbollisti me nënshtetësi finlandeze, Shefki Kuqi, do të vazhdojë
të luajë në Angli. Edhe pas disa kërkesave të bëra nga klube jashtë
Anglisë, Kuqi ka vendosur të qëndrojë të paktën edhe për dy vjet në
kampionatin anglez. Kosovari 28 vjeçar është në hapat e fundit të
nënshkrimit të kontratës me skuadrën e Blackburn. Fillimisht
sulmuesi e ka refuzuar ofertën e bërë nga drejtuesit e Blackburn,
por më pas vendosi që të nënshkruante kontratën një vjeçare me
opsion edhe për një vit tjetër. Tashmë tratativa po proçedon me
vizitat mjekësore, që do të thotë se tashmë zyrtarisht Shefki Kuqi
është sulmuesi i ri i skuadrës së Blackburnit. Kuqi ka bërë
paraqitje shumë të mirë me skuadrën e Shefilld Uensdei ku në 86
takime ka shënuar 32 gola. Pas largimit nga skuadra e Ipsuiçit në
verën e 2003, Kuqi arriti të gjente më së miri veten në skuadrën e
Shefilld Uensdei. Forma e tij bëri që disa klube nga kampionate të
tjera si Gjermania dhe Spanja të interesoheshin për kosovarin me
pasaportë finlandeze. Në fillim u duk se futbollisti ishte i prirur
të largohej nga Anglia, por më pas ndryshoi qëndrim dhe vendosi që
të paktën edhe për një vit të jetë protagonist i një prej
kampionateve më të bukur dhe më të fortë në botë. Kuqi ka deklaruar
se nuk e mohon asnjëherë fillimin e ndonjë aventure të re jashtë
Anglisë. Sipas tij, mjafton që të jetë një skuadër me nivel dhe të
përmbushë kushtet financiare dhe gjithçka mund të jetë e
realizueshme. Megjithatë, të paktën edhe për një vit tjetër atij do
ti duhet të lërë mënjanë dëshirat për të luajtur jashtë Anglisë dhe
të përkushtohet për të dhënë maksimumin për skuadrën e tij të re, që
ju desh jo pak kohë dhe mund që ta bënte të vetin sulmuesin e
talentuar. Gjithsesi, duket qartë që nënshkrimi me skuadrën e
Blackburnit është një tregues pozitiv për karrierën e futbollistit,
dhe për më tepër që në këto tratativa kanë ndërhyrë edhe skuadra të
tjera nga kampionate të ndryshme të Evropës.
Mu. Ve.