Gruaja e dashuruar pas elbasanlliut 28 vjeçar detyrohet të shesë
shtëpinë për 150 mijë paund
Shqiptari 'zhigolo' mashtron anglezen
I mer 270 milionë duke u shtirur se është në burg
Nga Londra, Muhamed Veliu
Gazeta Shqiptare
Plotësimi i dëshirave seksuale, duke përdorur një "zhigolo"
shqiptar, i ka kushtuar 150 mijë paund (afërsisht 270 milion lekë të
vjetra) një anglezeje 50 vjeçare. Nuk bëhet fjalë për ndonjë
trashëgimi apo dhënie parash "cash" shqiptarit falë aftësive të tij
seksuale, por për një supermashtrim nga ky i fundit, i denjë për një
skenar filmi spektakolar. "Gazeta Shqiptare" ka mundur dje të
sigurojë të plotë dëshminë e një shokut të "zhigolos" i cili ka
treguar me detaje të gjithë skemën e mashtrimit nga miku i tij, i
cili tashmë i gëzohet një pasurie me gjashtë zero pas.
Shqiptari "zhigolo"
"Nuk janë të pakët shqiptarët të cilët fitojnë shuma të majme
parash, duke shitur shërbime seksuale për anglezet, kryesisht grave
të shëndosha dhe të vjetra në moshë". Kështu e fillon rrëfimin e tij
për gazetën Gazi F., nga Berati njeriu i cili njeh me detaje
mashtrimin e ndërmarrë nga miku i tij nga Elbasani me emrin Luan D.
Duke folur me Gazin tek sa po pinte një kafe në një bar algjerian në
lagjen Finsbury Par, prapa stacionit të metrosë, ai tregon se është
njohur rastësisht me elbasanlliun, i cili ka tregur se kishte disa
vite që ishte regjistruar me një agjensi shoqërimi për gratë. "Luani
ishte një djalë i pashëm rreth të 28 vjeç, shkonte në palestër
përditë dhe kujdej shumë për veshjen. I binte që të shkonte me 3 ose
katër kliente në javë. Mesatarisht për një orë fitonte 200 deri në
300 paund, nga të cilat 20 përqind i merte agjencia", tregon shoku I
tij. "Anglezja 50 vjeçare kishte pasur disa të dashur nga të cilët
kishte mbetur shumë e zhgënjyer si nga trajtimi i tyre dhe edhe nga
jeta seksuale e varfër. Luani që ishte prezantuar si Leo, italian
nga Napoli, për anglezen shumë shpejt do të bëhej në "yll seksi". Ja
donte puna të ishte i tillë". Tregon duke qeshur Gazi tek sa tymos
një cigare "Marlboro" dhe pi kafen "espresso".
Mashtrimi
"Luani më thoshte se 'plaka' angleze kishte rënë brënda me të",
rrëfen Gazi mardhënien midis shqiptarit dhe anglezes së dashuruar
marrëzisht pas tij. "Një gjë e tillë e nuhatur nga elbasanlliu nuk
është lejuar të shkojë dëm", thotë ai duke treguar më tej hollësi
nga lidhja midis tyre. Ai megjithëse ishte 22 vjeç më i vogël në
moshë se anglezja i premton kësaj të fundit se do të martoheshin së
bashku dhe do të jetonin të lumtur në krahët e njëri-tjetrit. Për ti
bërë qejfin "burrit" të ardhshëm, ajo i ble për ditëlindje një
makinë që kushtoi 10 mijë paund. Por makutëria e shqiptarit shtohet.
Edhe pse anglezja nuk ishte shumë e pasur, nga ajo kishte se ç'farë
mund të përfitonte. Ajo ishte pronare e një shtëpie në një lagje të
qetë në veri të Londrës, dhe punonte si menaxhere në një dyqan
veshjesh. Fillimisht elbasanlliu shkon në Itali nga ku së bashku me
miqtë e tij fillojnë zbatimin e planit. Luani i telefonon anlgezes
duke i treguar se ishte në burg për tentativë vrasje pas një sherri
në një disko. Për të filluar procesin mbrojtës nga një avokat ai
fillimisht kërkonte 10 mijë paund. Anglezja u tregua e gatshme ti
niste paratë. Pasi prek suksesin, arkitekti i planit të mashtrimit
ishte gati për të përgatitur goditjen përfundimtare. Fillimisht
përgatit situatën, duke gjetur edhe një pseudoavokat dhe përkthyer
në anglisht një dosje të tërë sipas së cilës ai akuzohej për vrasje.
Më tej Luani i telefonon anglezes dhe i thotë se nëse avokatit nuk i
paguhej një shumë e madhe parash, ai rrezikonte të dënohej me një
burgim të gjatë. Shqiptari mendonte se ajo do ti drejtohej bankës
për të marrë ndonjë kredi, por supriza do të ishte akoma më e madhe.
E vënë në një pozitë të vështirë dhe njëkohëisht e dashuruar
marrëzisht me shqiptarin "zhigolo", anglezja në pamundësi që të
gjente paratë e duhura në një kohë të shpejtë, vendos të ndërmarrë
një hap që do të ishte fatal. Të shiste shtëpinë dhe me ato para të
pagunte avokatin e të dashurit që i dhimbsej pasi ai ishte në burg.
Kështu edhe bën duke mbetur në mes të Italisë me sytë nga qielli pas
zhdukjes së bashku me 150 mijë paund të të gjithë personave me të
cilët krijoi lidhje aty.
Precedenti, beratasi mashtroi bankën më të njohur angleze
Në fakt janë të shumtë shqiptarët të cilët ia kanë dalë mbanë që me
anë të mashtrimeve të fitojnë shuma të mëdha të hollash në Angli.
Një ndër ta ka qenë edhe një shqiptar nga Berati i cili arrin të
mashtrojë oficerët e kredive të një prej bankave më të fuqishme
angleze. Me anë të dokumentave false të identifikimit, sipas të
cilave ishte nga Kosova, beratasi fillimisht merr një sasi të vogël
të hollash nga banka "Lloyd" duke I kthyer më pas me përpikmëri.
Porse pak kohë më pas ai aplikon sërish në të njëjtën bankë, këtë
radhë me cilësinë e një klienti të besueshëm. Borxhi që kap shifrat
10 mijë paund do të përdorej për të krijuar një sipërmarrje të vogël
punimesh në banesa, si lyereje apo suvatime. Pasi shlyen këstin e
parë të këtij borxhi të dytë shqiptari kërkon një kredi më të madhe,
50 mijë paund, duke argumentuar se aktiviteti i tij kishte premisa
për zgjerim. Kështu arrin t'i marrë bankës 50 mijë paund (rreth 90
milionë lekë të vjetra) dhe kthehet në Berat.
Krijoni Kontakt