Gazeta TemA:
Shefi i prezencës së OSBE-së deklaroi në Vlorë se ka ende probleme të mëdha me listat e votuesve
Vaçek: Listat, problem i madh për zgjedhjet
Shefi i Prezencës së OSBE-së në Tiranë deklaroi dje se janë vërejtur probleme të theksuara me listat e zgjedhësve. Gjatë një vizite në qytetin e Vlorës, Vaçek tha se ka shumë qytetarë që nuk e dinë se ku do të votojnë. Pas takimeve me përfaqësues të pushtetit vendor, Vaçek u shpreh se 40 përqind e zgjedhësve nuk
kanë numër të banesave. Qyteti i Vlorës duket se është një ndër qytet më të prekura nga problemi i listave, i cili nuk ka gjetur ende zgjidhje. “Ndihem i mirinformuar nga institucionet vendore për gjithë objektivat e zgjedhjeve. Dihet që ka mjaft problem si për shembull rreth 40 % e zgjedhësve ende nuk kanë një numër të caktuar banese, çka sjell probleme. Ka ende mjaft qytetarë, që nuk dinë se ku do të votojnë në çfarë qendre votimi, por çdo qytetar që kërkon të votojë mund ta gjejë atë në një qendër tjetër votimi,” tha Vaçek. Shefi i OSBE Vaçek gjatë vizitës në qytetin e Vlorës, ka bërë edhe disa takime me përfaqësues të pushtetit lokal si dhe me gazetarë të qytetit, të cilët punojnë me mediat lokale si dhe kombëtare. Vaçek zhvilloi fillimisht një takim me kryetarin e Këshillit të Qarkut të Vlorës, Thodhori Shia, me të cilin kanë diskutuar për mbështetjen që ka dhënë dhe do të vazhdojë të japë OSBE, me qëllim të çuarjes përpara të reformës rajonale legjislative, si dhe asistencës që do të jepet në proçesin e decentralizimit.
Takimi ka vazhduar më pas me kryetarin e Bashkisë se Vlorës, Shpëtim Gjika, ku Vaçek ka kërkuar më shumë impenjim për procesin zgjedhor. Gjika e ka informuar
shefin e OSBE së për problemet që kanë hasur në përpilimin e procesit të listave zgjedhore. Gjika është justifikuar për problemet e justifikuara duke thënë se shumë qytetarë kanë qëndruar indiferentë në shikimin e emrave të tyre dhe familjes së tyre në lista, si dhe për t’u angazhuar në korrigjimet përfundimtare. Gjika i ka thënë zotit Vaçek se nga 96 mijë zgjedhës që ka Vlora, 43 mijë nuk kanë adresë shifrore. Shefi i OSBE-së është shprehur se kjo është një shifër
problematike, prandaj u del për detyrë atyre qytetarëve që nuk janë të regjistruar të angazhohen në procesin e regjistrimit, me qëllim që zgjedhësi të gjejë emrin në qendrën, që duhet të votojë dhe jo në qendrën e gabuar. Vaçek ka deklaruar se listat e zgjedhësve si dhe problematika që përfshin këtë proces jetik për vendin, duan angazhim për të gjetur zgjidhje.
Krijoni Kontakt