DURRËS
Gjendet e mbytur, në rrethana misterioze, me një rrip pantallonash, një 9-vjeçare nga Durrësi. Tragjedia ka ndodhur dje në familjen Këllezi, me banim në lagjen e ish-kënetës në qytetine Durrësit.
Vajza 9-vjeçare Enxhi Këllezi, është gjetur e mbytur në mesditën e djeshme, ndërkohë që sipas hetimeve të para të policisë, mendohet se vogëlushja i ka dhënë fund jetës për motive ende të panjohura. Sipas policisë që shkoi në vendngjarje, vajza është gjetur pa jetë me rripin e pantallonave në fyt, ndërsa pranë krevatit u gjend dhe një thikë dhe një palë gërshërë. Sipas policisë, në barkun e vogëlushes kishte gjak. Mendohet se vajza ka dështuar në tentativën për t’i dhënë fund jetës me thikë, apo gërshërë.Ekspertët nuk kanë dhënë asnjë version zyrtar lidhur me këtë ngjarje tragjike,
ndonëse për momentin pista më e mundshme mbetet ajo e vetëmbytjes në kushte depresive. Gjithsesi burimet zyrtare thanë se po hetohet edhe në pista të tjera.
Në familje
Heshtje dhe lot në familjen Këllezi për humbjen e Enxhit, që vdiq në mënyrë tragjike. Askush nga të afërmit e saj nuk pranoi të flasë për median. Madje sipas ekspertëve ata kanë dhënë pak informacione edhe për grupin hetimor. Ndërsa të afërmit e vogëlushes kanë heshtur, fqinjë, shokë dhe shoqe të Enxhit kanë mundur të tregojnë diçka rreth familjes së saj. Familja e 9- vjeçares përbëhej nga 6 pjesëtarë. Kryefamiljari, Gramozi, baba i katër vajzave, prej disa muajsh jetonte dhe punonte në Greqi. Ndërsa nëna, Loli, punonte nga mëngjesi në mbrëmje, në rrobaqepësi, së bashku me vajzën e madhe Lelën, 17 vjeç. Tre vajzat e tjera të familjes, Ada 14 vjeç, Enxhi, 9 vjeç, dhe Jana, 3 vjeç, shkonin në shkollë dhe në kopsht. Familja e Gramoz Këllezit jetonte në një ndërtesë 3 -katëshe së bashku me familjet e dy vëllezërve të tij dhe të një kushëriri. Sipas banorëve të zonës, familja e Enxhit kishte vetëm dy muaj që ishte zhvendosur nga qyteti i Korçës në atë të Durrësit.
Dëshmia e shoqes
Ajo që e njihte më mirë Enxhin ishte Sonila 12- vjeçare. Vajza ka parë të pajetë shoqen e saj dhe ka mbetur e tronditur nga skena. Ajo të thotë se e para që e ka gjetur Enxhin të vdekur, ka qenë motra e saj, Ada. “Ada e gjeti çelësin e njërës dhomë poshtë një kutie me pluhur rrobash. Ajo hapi derën e shtëpisë dhe menjëherë doli duke qarë prej andej. Më pas në dhomë u futën komshinjtë, pasi nëna dhe motra e madhe e Enxhit ishin në punë, në rrobaqepësi”,- thotë Sonila. Ata që e panë mirë Enxhin të vdekur, thotë më tej Sonila, treguan se fyti i saj ishte i nxirë. Pranë trupit u gjet dhe një thikë buke. Madje dhe një palë gërshërë. “Enxhi ishte një vajzë e urtë. Ajo gjithmonë luante në oborr me kushërirën e saj. Ishte e dashur me shoqet. Nuk e kam parë ndonjëherë që të takohet me njerëz të sekteve të ndryshme”,- të thotë Sonila. Nisur nga rastet e fundit të vetëvrasjeve të fëmijëve, që më së shumti janë lidhur me sektet fetare, Sonila të thotë se në shtëpinë e saj kishin ardhur një herë dy persona nga një sekt fetar, por babai i saj nuk i kishte lejuar që të hynin brenda. “Enxhin nuk e kam parë ndonjëherë me njerëz të fesë”,- thotë 12-vjeçarja. Sonila kujton se një ditë para ngjarjes nuk e kishte parë Enxhin që të luante në oborr, ashtu siç bënte zakonisht. Po ashtu Enxhi nuk është parë rreth e rrotull edhe gjatë paradites së djeshme.
Pista më e mundshme, vetëmbytja
Ndonëse në vendngjarje është gjetur një thikë dhe një palë gërshërë, ndërsa barku i vajzës ka qenë i gjakosur, ekspertët thanë se pista më e mundshme mbetet vetëmbytja. Mendohet se pikërisht rripi i
pantallonave i ka marrë jetën 9- vjeçares, pasi plagët në bark nuk kanë qenë vdekjeprurëse. Burimet zyrtare nga drejtoria e policisë së Durrësit thanë se po punohet intensivisht për të arritur në një version përfundimtar lidhur me këtë ngjarje tragjike. Policia ka marrë në pyetje dhe mësues të shkollës "Qemal Mici" ku mësonte Enxhi. Këta të fundit mësohet të kenë thënë se viktima ishte një vajzë e urtë që mësonte sa mundej, dhe ishte e sjellshme në klasë. “Rrallë herë ajo ka pasur dhimbje koke dhe ka pirë paracetamol. Një ditë para ngjarjes Enxhi nuk ka qenë në shkollë”,- kanë thënë burime nga shkolla. Nuk dihen ende motivet se përse ka munguar vajza në shkollë, ndërsa mësohet se po punohet intensivisht për të zbardhur çdo detaj lidhur me këtë ngjarje. Mësohet se rreth orës 17:00 trupi pajetë i 9-vjeçares u dërgua në morg, ku dhe do t’i nënshtrohet ekspertizës.
Shoku i klasës: Enxhi ishte besimtare
DURRËS- Sindriti, shok klase me Enxhin, thotë për gazetën se ajo kishte pak kohë që kishte ardhur në klasën e tyre dhe se ishte vajzë shumë e mirë dhe e sjellshme. “Të gjithë e donin në klasë”,- shprehet ai. Sindriti të thotë madje se kishte dëgjuar se Enxhi besonte shumë, por ai nuk e kishte parë ndonjëherë atë me njerëz të ndonjë sekti fetar. Këtë fakt bëhet e ditur se e ka konfirmuar dhe një nga xhaxhallarët e viktimës që ka thënë se nuk di që vajza të jetë ndikuar ndonjëherë nga përfaqësues të sekteve të ndryshme. Banka e Enxhit dje pasdite ishte bosh. Aty shokët dhe shoqet e saj kishin vendosur një tufë me lule.
Burimi: Shekulli.
Krijoni Kontakt