ANGLI/ Rrëfimi për "Daily Mail" i minorenes lituaneze e dënimi i 3 trafikantëve
"Shqiptarët më shitën e blenë tri herë rresht"
--------------------------------------------------------------------------------
Nga Londra,
Muhamed Veliu
Gazeta Shqiptare
vpressuk@yahoo.co.uk
ANGLI
Tmerrin e vuajtjet si skllave seksi në duart e disa shqiptarëve i ka artikuluar me disa fjali të thjeshta. "Më janë mbaruar lotët. Kam qarë pafundësisht. Por, atyre nuk iu bëhej vonë. Ishin mizorë dhe më shkatërruan jetën". Kështu ka filluar të rrëfehet minorenia lituaneze përpara gazetarit anglez Nigel Bunyan, i së përditshmes "Daily Mail", i cili arriti ta gjejë vajzën 16-vjeçare në Vilnus të Lituanisë, një vit më pas nga koha kur ajo u detyrua të bëhej prostitutë në Britaninë e Madhe. Lituanezja minorene u shit disa herë nga njëri shqiptar te tjetri në disa qytete të Anglisë, vetëm e vetëm për të bërë prostitutën dhe fituar para për xhepat e tyre. Tani tutorët e saj dergjen burgjeve angleze, ndërsa ajo mundohet të kalojë traumat e shkaktuara nga ata. Gazetari shkruan se, gjatë takimit të tij me vajzën, ajo qëndron ulur në një divan, i cili natën shndërrohet në një krevat ku ajo fle me motrën e saj. Kanë kaluar nëntë muaj që atëherë kur vajza kurajoze u shpëtoi trafikantëve, të cilët e futën në skllavërinë e seksit. Pas kësaj, në pranga përfunduan Shaban Maka, 34 vjeç, Ilir Bajrami, 25 vjeç, dhe Xhevahir Pisha.
Shitblerja
Pasi i është premtuar punë dhe pagesë e mirë, vajza e mitur ka pranuar të shkojë në Angli. Por, gjërat nuk kanë dalë ashtu siç i kishte parashikuar dhe që në aeroport ajo ka rënë në duart e trafikantëve. Sikur të ishte një send shtëpiak, Elena vitin e shkuar u shit në disa duar tutorësh, në fillim me çmimin prej 4 mijë paundësh dhe në fund për 1 mijë e 500. Vlera e saj binte gjithnjë e më shumë. Shqiptarët që e blenë, ndiheshin të lirë ta përdhunonin atëherë kur ajo nuk prostituonte. Disa e bënin një diçka të tillë vazhdimisht. Njëri e kërcënoi se do ta vriste. Në fund, kur vuajtjet po bëheshin më të mëdha, ajo tentoi vetëvrasjen. Ajo gjeti forcë që të arratisej nga një klub nate në Shefild, në Agli, ndërsa një grup vajzash u tërhoqën vëmendjen tutorëve të saj, duke i dhënë kohë të mjaftueshme për të kërkuar ndihmë në polici.
Shqiptarët
Menjëherë pas denoncimit, në pranga përfunduan tre shqiptarët, të cilët gjykata e Shefildit, në Veri të Anglisë, do t'i dënonte pak muaj më parë. Kështu, Shaban Maka u dënua me 18 vjet burg, Ilir Bajrami me 15 vjet burg dhe Xhevahir Pisha me 7 vjet. Ndërsa dy miq të tyre lituanezë, të cilët organizuan trafikun deri në Britaninë e Madhe, gjykohen në vendin e tyre.
Krijoni Kontakt