Idajet Gjeci, vrasesi qe bredh i lire.

[Brari]

RD
----------

Idajet Gjeçi ishte dënuar me 13 vjet burg për plagosjen e deputetit Azgan Haklaj në prill të vitit ‘98

Gjykata liron vrasësin e Azem Hajdarit

Gjeçi u la i lirë pas një takimi të zhvilluar me Fatos Klosin, ish-kreun e SHISH-it, në qelitë e Komisariatit të Krujës. Pas atij takimi menjëherë ndaj Gjeçit rifilloi një proces gjyqësor formal, i cili i ktheu atij pafajësinë dhe lirinë

TIRANË - Gjykata e Shkallës së Parë Lezhë, liroi nga burgu Idajet Gjeçin, njërin prej vrasësve të Azem Hajdarit. I dënuar më parë nga e njëjta gjykatë me 13 vjet heqje lirie, "për vrasjen e mbetur në tentativë" të deputetit të PD Azgan Haklaj, Idajet Gjeçi ka lënë qelitë e Komisariatit të Policisë së Krujës, për t’iu rikthyer lirisë. Burime të Gjykatës së Shkallës së Parë të Lezhës, kanë bërë të ditur se Idajet Gjeçi u la i lirë pas një takimi që ai ka zhvilluar me Fatos Klosin, ish-kreu i SHISH-it, në qelitë e Komisariatit të Krujës ku ai vuante dënimin. Pas atij takimi, menjëherë ndaj Gjeçit rifilloi një proces gjyqësor formal, i cili i ktheu atij pafajësinë dhe lirinë.

Në dosjet e Prokurorisë së Përgjithshme, Idajet Gjeçi figuron si një nga personat që ka marrë pjesë në vrasjen e Azem Hajdarit, deputetit demokrat, mbrëmjen e 12 shtatorit të vitit 1998 para selisë së PD në Tiranë. Pjesëmarrjen e Gjeçit në vrasjen e Azem Hajdarit e ka dëshmuar në sallën e gjyqit edhe dëshmitari Agim Logu, ish-shoferi i automjetit tip "Iveco", që shoqëroi vrasësit natën e krimit. Logu, ka shpjeguar në sallën e gjyqit, të gjitha lëvizjet e Idajet Gjeçit në ditët e vrasjes me autoveturën e tij tip "Benz", ngjyrë ulliri. Megjithëse "i skeduar" si një nga pjesëmarrësit në vrasjen e Azem Hajdarit, Idajet Gjeçi, asnjëherë nuk u muar si i pandehur për këtë krim, megjithëse prej kohësh ndodhej i izoluar në dhomat e izolimit të Komisariatit të Policisë së Krujës. Jo vetëm kaq, por emri i tij u shmang nga procesi gjyqësor, duke mos u thirrur as me cilësinë e dëshmitarit në këtë vrasje.

Idajet Gjeçi, në akuzën e "vrasjes së mbetur në tentativë", vuante dënimin me 13 vjet heqje lirie. Ishte e njëjta gjykatë, Gjykata e Shkallës së Parë e Lezhës, e cila kishte dhënë këtë dënim ndaj Gjeçit, për atentatin me pasojë plagosje të bërë ndaj Azgan Haklajt në 4 prill të vitit 1998, në qendër të qytetit të Bajram Currit. Pas këtij atentati, Gjeçi i pashqetësuar nga policia lëvizte i lirë, duke marrë pjesë edhe në vrasjen e Azem Hajdarit. Në 14 dhjetor të vitit 1999, ai u arrestua nga policia dhe që prej asaj kohe vuante dënimin e Gjykatës së Shkallës së Parë të Lezhës, me 13 vjet heqje lirie.

Në momentin e lirimit të Gjeçit nga dhomat e izolimit të Komisariatit të Policisë së Krujës, ai i ishte nënshtruar hetimeve mbi akuzat që rëndojnë mbi të për vrasjen e Shkëlqim Hakës. Në bazë të provave të ekzaminuara e të sjella nga Italia, si gjurmët e gjakut të gjetura në rrobat e tij, të cilat i përkisnin Shkëlqim Hakës për vrasjen e të cilit ai akuzohej.

Idajet Gjeçi, për organin e akuzës, është një person i njohur si mik dhe anëtar i bandës së Fatmir Haklajt e Jaho Salihit. Si ish-efektiv i Komisariatit të Policisë së Tropojës, Idajet Gjeçi, ka punuar edhe shofer me Fatmir Haklajn dhe Jaho Salihin, në kohën kur edhe këta ishin efektivë të këtij komisariati policie. Pozicioni i shoferit të Haklajt e Salihit, ka bërë që Gjeçi të ketë marrë pjesë edhe në krimet dhe vrasjet e kryera nga Fatmir Haklaj dhe Jaho Salihi. Bashkëpunimin me Haklajn e Salihin, Gjeçi e ka pranuar edhe vetë, duke u mbrojtur me shprehjen se "unë isha thjesht shoferi i tyre". Dosja e krimeve të Idajet Gjeçit është e pasur edhe me krime të tjera, për të cilat Prokuroria asnjëherë nuk ka dashur t’i zbardhë ato. Rreth tre vjet më parë, në mes të qytetit të Bajram Currit, u vra Ago Ymeri. Pas kësaj vrasje, akuzat ranë mbi Idajet Gjeçin.

Në serinë e vrasjeve që rëndojnë mbi Gjeçin, janë edhe vrasje të periudhës së konfliktit në Kosovë. Dy ushtarë të UÇK-së të vrarë në qytetin e Bajram Currit, akuzojnë si pjesëmarrës në vrasje edhe Idajet Gjeçin.

Vrasjet nuk janë të vetmet akuza që rëndojnë mbi Idajet Gjeçin. Disa thyerje bankash dhe grabitje të të hollave të konsiderueshme nga ato, janë cilësuar si vepra kriminale që për të akuzuar ka pasur edhe Idajet Gjeçin si bashkëpunëtor. Thyerjen e Bankës, brenda një harku kohor shumë të shkurtër pak vite më parë, në Bajram Curri, ka nxjerrë në dosjet e organit të akuzës edhe Gjeçin si pjesëmarrës në këto thyerje e grabitje. Ndërkohë në thyerjen e Bankës në Gjirokastër, së bashku me Idajet Gjeçin është identifikuar si pjesëmarrës dhe bashkëpunëtor edhe kunati, vëllai i nuses së tij.

Lirimi së fundi me vendim të Gjykatës së Shkallës së Parë të Lezhës, i Idajet Gjeçit, njërit prej vrasësve të Azem Hajdarit, shton edhe një fakt më shumë në morinë e përpjekjeve për degjenerimin e procesit gjyqësor ndaj të akuzuarve për këtë vrasje. Më se tre muaj më parë, Gjykata e Shkallës së Parë e Tiranës, argumentoi motive banale të vrasjes së Azem Hajdarit në dhënien e vendimeve ndaj të akuzuarve. Ndërkohë kjo gjykatë zhveshi nga përgjegjësia Fatmir Metën e Isamedin Haxhinë, dy prej të akuzuarve, liria e të cilëve u konfirmua disa ditë më parë edhe nga Gjykata e Apelit në Tiranë.

Artur BEGA