Lajme ekonomike

[Gerrard]

Gati gjobat për më shumë se 1 mijë biznese të vogla
Biznesi i vogël, që nuk ka paguar detyrimet tatimore, ende do të gjobitet me gjoba me vlerë më të lartë se vetë sigurimet shoqërore

Silvana Sinaj
Të gjitha ato biznese të vogla, që nuk kanë paguar detyrimet për sigurimet shoqërore e shëndetësore brenda datës 20 prill, do të gjobiten. Afati i fundit i vendosur nga bashkia për pagesën e tatimeve dhe taksave për biznesin e vogël ka përfunduar dje. Sipas të dhënave nga Bashkia e Tiranës, deri tani, pranë Bashkisë Tiranë janë regjistruar 10 700 biznese të vogla, ndërsa një vit më parë numri i bizneseve të regjistruara ishte rreth 12 800. Matematikisht, kjo do të thotë se më shumë se 1100 subjekte të biznesit të vogël do të gjobiten pasi nuk kanë dorëzuar në kohë deklaratën e sigurimeve shoqërore e shëndetësore. Një situatë e tillë, që detyroi të shtynte dhe afatin e pagesës së taksave vendore edhe 20 ditë më shumë nga sa e parashikon ligji, nuk ka sjellë asnjë lehtësim për biznesin pasi masa e gjobave që do t’i duhet të paguajë biznesit të vogël e kalon dhe vetë masën e detyrimit tatimor. Sipas ligjit “Për mbledhjen e kontributeve të sigurimeve shoqërore e shëndetësore”, Neni 20, ku flitet për gjobat, thuhet se kur punëdhënësi dorëzon me vonesë deklaratën e kërkuar sipas këtij ligji dhe paguan me vonesë shumën e kontributit, gjobitet me 10 për qind të shumës së kontributit të deklaruar me vonesë, por jo më pak se 10 000 (dhjetë mijë) lekë. Ndërsa në rastet kur personi, i detyruar të paguajë kontributet, dorëzon me vonesë deklaratën e kërkuar sipas këtij ligji dhe paguan me vonesë shumën e kontributit, gjobitet me 10 000 (dhjetë mijë) lekë. Shuma këto të konsiderueshme nëse i referohemi shumave të kontributeve që derdhin bizneset e vogla që janë kryesisht për një ose 2 të punësuar apo të vetëpunësuar.
Bashkia fajëson tatimorët
Edhe pse Bashkia e Tiranës i ka bërë thirrje biznesit të vogël që të realizojë pagimin e detyrimeve brenda afatit ligjor, që është data 20 prill, shumë biznese kanë mbetur pa u regjistruar. Pas kësaj date, të gjithë ata që nuk kanë paguar do të përballen me sanksione sipas ligjit. Burime zyrtare nga Bashkia e kryeqytetit konfirmojnë për “Albania”-n se “të gjitha vonesat kanë ardhur nga tatimorët pasi të gjitha subjektet para se të paguajnë tatimet e taksat duhet të paguajnë më parë sigurimet shoqërore pranë zyrave të tatim-taksave të biznesit të vogël”. Ky është dhe problemi pasi sipas zyrtarëve të bashkisë “tatimorët i kanë vonuar subjektet e biznesit të vogël duke iu zvarritur pagesat e sigurimeve shoqërore”.
Amullia e krijuar në Bashkinë e Tiranës dhe vonesat që i janë krijuar biznesit për pagesën e sigurimeve ka ardhur pasi është viti i parë që në të gjithë vendin taksat e biznesit të vogël do të administrohen dhe mblidhen nga ana e pushtetit vendor.
Kalimi i taksave të biznesit të vogël nën juridiksionin e pushtetit vendor është një kërkesë e hershme e bashkive dhe komunave në të gjithë vendin. Përfaqësues të Bashkisë bëjnë të ditur se do të kontrollojnë territorin e tatimpaguesve të kryeqytetit nëpërmjet Policisë Bashkiake dhe inspektorëve tatimorë. Edhe këtë vit, llogaritja e tatim-fitimit bëhet mbi bazën e librit të xhiros dhe vetëdeklarimit të subjekteve.
Sipas ligjit të ri të miratuar që në vitin 2006, bashkitë kanë më shumë akses në administrimin e bizneseve të vogla. Tashmë, bashkitë dhe komunat kanë kompetencë thelbësore fiskale brenda kufijve të dhëna me ligj, me një tolerancë prej (+/-) 30% të çdo niveli tregues të kësaj takse. Në këtë mënyrë, pushtetit vendor i jepet e drejtë ligjore që, në përputhje me kushtet dhe interesat e tyre, të përcaktojnë nivelin e taksës brenda kufijve të përcaktuar me këtë ligj. Gjithashtu, këshillat bashkiakë apo komunalë do të përcaktojnë afatet e këstet e pagimit, kushtet lehtësuese, detyrat e përgjegjësitë e zyrës së taksave, mënyrën e mbledhjes së taksës, detyrimet e ndërsjella, rregullat e dokumentimit të kontrollit, sanksionet, mënyrën e zgjidhjes, ankimimin te kryetari e më pas në gjykatë nëse nuk janë të kënaqur me këtë vendim.

[Gerrard]

100 biznese shqiptare kanë marrë pjesë në panairin “Resale”, në fushën e makinerive, që po zhvillohet në qytetin Karlsruhe të Baden Wurtemberg.

Biznesi gjerman ka shprehur interes për tregun shqiptar si dhe gatishmërinë për të bashkëpunuar me kompanitë shqiptare. Interesi i palës gjermane është bërë publik në një takim të organizuar në Landin Baden Wurtemberg. Një delegacion me 15 biznese shqiptare së bashku me ministrin Ruli, si dhe me kreun e Dhomës së Tregtisë dhe Industrisë, Gjok Uldedaj, zhvilluan një takim në Ministrinë e Ekonomisë të Landit Baden Wurtemberg me përfaqësues të Dhomës së Tregtisë të Shtutgartit, të Bankës së Landit, të Bankës për Garanci Burgerschaftsbank, të Qendrës së Manaxhimit dhe Produktivitetit të Landit, etj.
Pjesëmarrësit gjermanë, që morën fjalën në takim, shprehën gatishmërinë për një bashkëpunim më të ngushtë ndërmjet Shqipërisë dhe Landit Baden Wurtemberg. Nënshkrimi i Memorandumit të Bashkëpunimit nga dy ministrat e Ekonomisë, që shoqëroi bashkëbisedimin mes kompanive të biznesit, institucionalizoi bashkëpunimin ndërmjet ministrive dhe përfaqësuesve të biznesit që do të konkretizohet në muajin tetor, kur, ndërmjet të tjerave, do të realizohet “Java Ekonomike Shqiptare” në Shtutgart, me një pjesëmarrje të gjerë të ndërmarrjeve të mesme gjermane dhe kompanive shqiptare.
Prof. Gjokë Uldedaj shprehu gatishmërinë e Dhomës së Tregtisë dhe Industrisë Tiranë për të drejtuar një veprimtari të tillë të gjerë ekomomike e tregtare, e cila do të përfshijë biznesin privat, që ka interes ndaj teknologjisë gjermane dhe kërkon një bashkëpunim të gjerë investues dhe tregtar gjerman.
Rreth 100 kompani shqiptare janë të pranishme në panairin “Resale”, një nga më të mëdhenjtë në fushën e makinerive, që po zhvillohet në qytetin Karlsruhe të Baden Wurtemberg

[Gerrard]

Një delegacion me biznese kroate që punojnë në Shqipëri, me në krye kreun e Dhomës së Tregtisë e Industrisë Tiranë, ka zhvilluar një takim me zëvendëspresidenten e Dhomës Kroate të Tregtisë në Kroaci. Gjatë takimit, zëvendëspresidentja e Dhomës së Tregtisë Kroate, tha se “kompanitë më të mëdha kroate që punojnë në Shqipëri në sektorin e energjetikës, të ndërtimit, në port, në rrugë, në shpim nafte, tregti, etj., kanë interes ta rrisin aktivitetin në Shqipëri”. Gjatë kësaj vizite, Dhoma kroate organizoi takime bilaterale ndërmjet kompanive shqiptare dhe atyre kroate, sipas fushave të biznesit. Një takim i veçantë u realizua me ministrin e Ekonomisë të Kroacisë, i cili shoqërohej nga titullarët e kompanive më të mëdha kroate që punojnë në Shqipëri: Koncar, Montmontazha Group, Konstruktor, TPK Armatura, Delekovod. Të dy ministrat e Ekonomisë ranë dakord për një bashkëpunim institucional në kuadrin e CEFTA, të qendrës së SME për Europën Juglindore në Kroaci dhe për një përkrahje të sektorit privat. Ndërsa përfaqësuesit e kompanive private folën për eksperiencat e tyre në Shqipëri dhe shprehën gatishmërinë për të vazhduar me projektet që i kanë fituar në tendera ndërkombëtarë dhe për shtrirjen më gjerë të aktiviteteve të tyre. Kryetari i Dhomës së Tiranës, Prof. Gjokë Uldedaj, mori përsipër realizimin e pjesëmarrjes në panairin kryesor të përgjithshëm të Zagrebit në shtator të këtij viti.


Ruli: “Ngërçi i reformave të qeverisjes demokratike, administrata publike”

Administrata shtetërore është vënë sot në qendër të kritikave të kryeministrit Berisha, por edhe të ministrit të Ekonomisë, Genc Ruli. Kjo hallkë duket se është bërë një nga pengesat kryesore për realizimin e reformave për përmirësimin e klimës së biznesit. Në një takim me biznesmenë, gjatë diskutimit për reformën rregullatore, Berisha tha se nëse qeveria përmirëson procedurat për regjistrimin e biznesit, administrata ecën me shpejtësinë e një breshke për t’i zbatuar ato. “Ky është një problem serioz që duhet të marrë zgjidhje me shpejtësi. Kemi shumë respekt për administratën, por nuk është kristalizuar akoma sensi i të shërbyerit. Interesi i vendit për investimet tuaja dhe të te tjerëve është më shumë jetik se çdo vend tjetër i Europës. Shqipëria ka nevojë për investime. Në rast se çdo zyrtar do të kishte parasysh këtë fakt, jam i sigurt se do të rriste 3-4 herë shpejtësinë e bashkëveprimit me ju”, - tha Berisha.
Nga ana tjetër, ministri Ruli është shprehur se administrata prish natën atë që ekzekutivi bën ditën. “Progresi në fushën e tokës dhe ndërtimit është i pjesshëm. Ka patur aktivitete të paralizuara në fushën e doganeve dhe tatimeve. Zbatimi i parimit të konsultimit periodik me biznesin kërkon një reformë të harmonizuar dhe jo takime parciale dhe spontane”, - tha Ruli. Plani i vitit 2006 njeh mosrealizime, të cilat, sipas ministrit Ruli, kanë ardhur nga parashikimi shumë optimist i aktiviteteve, mungesa e ekspertizës në sektorë të caktuar dhe jo në pak raste edhe nga ngadalësia dhe mentaliteti refraktar i një pjese të administratës publike”. Megjithë seriozitetin e konsultimeve me biznesin në reformimin e sistemit të licensimit, regjistrimit dhe deri diku të lejeve të ndërtimit, në fushat e tjera të Reformës Rregullatore ka patur një mungese të ndjeshme të konsultimeve me biznesin.

[Gerrard]

144 kryekomunarë gjobiten 30 mijë lekë nga Inspektoriati i Lartë i Deklarimit të Pasurive për mosdeklarim të pasurisë së tyre për 2006-n

Një pjesë e mirë e ish-kryekomunarëve të vendit janë gjobitur nga Inspektoriati i Lartë i Deklarimit të Pasurive për llogari të vitit 2006. Janë 144 zyrtarë të pushtetit lokal, kryesisht kryetarë komunash e bashkish, që ende nuk kanë deklaruar pasuritë e tyre për vitin 2006. Nga rakordimet e kryera me shkresat zyrtare të dërguara nga vetë institucionet, sipas këshilltarit për shtyp të Inspektoriatit të Lartë të Deklarimit të Pasurive, z. Albi Serani, ”rezulton se deri ditën e sotme, 20 prill 2007, nuk e kanë përmbushur detyrimin ligjor 144 zyrtarë, kryesisht drejtues të nivelit lokal”. Një pjesë e këtyre subjekteve, siaps Seranit, rezultojnë që nuk janë më në funksionet e tyre të mëparshme, por kanë qenë në detyrë deri më 31 dhjetor 2006 dhe për këtë arsye mbartin detyrim për deklarim. Inspektoriati i Lartë i Deklarimit dhe Kontrollit të Pasurive (ILDKP) e konsideron të mbyllur afatin ligjor të deklarimit të interesave private periodike/vjetore. Këta zyrtarë, emrat e të cilëve gjenden në listat bashkëngjitur, duhet të paraqesin pranë ILDKP-së arsyet ligjore me dokumentacionin përkatës të vonesës së dorëzimit të deklaratës (shërbime jashtë vendit, sëmundje, etj). Në të kundërt, ndaj tyre do të zbatohen sanksionet e parashikuara në Nenin 44, Pika 3 e ligjit mbi ”Konfliktin e interesave”, sipas të cilit: ”Për mosdeklarim periodik në afat dhe pa shkaqe të arsyeshme, zyrtari ose personi i lidhur me të, që mbart detyrimin për deklarim, dënohet me gjobë nga 20 000 (njëzet mijë) lekë deri në 30000 (tridhjetë mijë) lekë”. Në bazë të Nenit 4 të Ligjit Nr. 9049, dt.10.4.2003, “Për Deklarimin dhe Kontrollin e Pasurive, të Detyrimeve Financiare të të Zgjedhurve dhe të Disa Nëpunësve Publikë”, subjektet deklarues, që nisin me Presidentin e Republikës e deri te nëpunësit e administratës tatimore dhe doganore, duhet të deklarojnë brenda datës 31 mars të çdo viti gjendjen deri më 31 dhjetor të vitit paraardhës të pasurive, burimet e krijimit të tyre, si dhe të detyrimeve financiare. Po ashtu, në bazë të Pikës 3 të Nenit 42 të Ligjit Nr. 9367, dt.7.4.2005 “Për Parandalimin e Konfliktit të Interesave në Ushtrimin e Funksioneve Publike”, Autoritetet Përgjegjëse, strukturat që kryejnë koordinimin e ILDKP me institucionet publike qendrore e vendore, ”... mbledhin dhe i dërgojnë Inspektoriatit të Lartë, brenda datës 15 prill të çdo viti, deklaratat e plotësuara të interesave, si dhe e njoftojnë atë për rastet e mosdeklarimeve...”

3400 subjekte ende nuk kanë bërë deklarimin
Në rreth të kuq nga Inspektoriati i Lartë i Deklarimit të Pasurive janë rreth 3400 subjekte që nuk i kanë dorëzuar deklaratat e tyre pranë Inspektoriatit. Serani sqaron se ”Pas shqyrtimit të listave të mbërritura nga institucionet për zyrtarët që mbartin detyrim për deklarim periodik/vjetor, rezulton se për periudhën 1 janar - 31 dhjetor 2006, numri i subjekteve që duhet të dorëzojnë dokumentin zyrtar ”deklaratë e interesave private” është 3500 subjekte”. Gjithashtu, sipas Seranit, ”Inspektoriati u kujton të zgjedhurve për herë të parë në drejtimin e njësive të pushtetit vendor që duhet të përmbushin detyrimin ligjor të deklarimit të interesave private”. Nga dokumentacioni publik i Komisionit Qendror të Zgjedhjeve, rezulton se deri tani janë zyrtarizuar si fitues për herë të parë 106 persona (lista bashkëngjitur). Këta zyrtarë, sipas Seranit, si dhe të tjerë që mund të shpallen fitues për herë të parë në ditët e ardhshme nga strukturat përkatëse, duhet të plotësojnë brenda 30 ditëve nga marrja e mandatit deklaratën e pasurisë.

[Gerrard]

Me anë të një njoftimi zyrtar ky dikaster ka ftuar të gjitha bankat, që brenda datës 30 prill 2007 të ofrojnë ofertat e tyre pranë kësaj ministrie. Shuma e kërkuar për t'u marrë borxh me interesa tregtare, është 200-230 milionë euro.

Nëse fondet nga privatizimet e parashikuara, fondi i konvergjencës, mosrealizimet nuk do të mjaftojnë për të mbyllur detyrimet për kreditë tregtare, atëherë do të rialokohen fonde nga çdo projekt tjetër, i cili ka prioritet më të vogël për qeverinë.

Ministria e Financave ka njoftuar se është në kërkim të financuesve për segmentin e rrugës Rrëshen-Kalimash, pjesë e projektit të rrugës Durrës-Kukës-Morinë. Me anë të një njoftimi zyrtar ky dikaster ka ftuar të gjitha bankat, që brenda datës 30 Prill 2007 të ofrojnë ofertat e tyre pranë kësaj ministrie. Shuma e kërkuar për t'u marrë borxh me interesa tregtarë është 200-230 milionë euro. Por kjo nuk është kredia e vetme që është marrë për financimin e kësaj rruge. Njoftime nga ana e qeverisë, bëjnë të ditur se janë duke u negociuar miliona euro të tjera kredi, që do të merren nga Banka Botërore dhe institucione të tjera financiare. Kjo rrugë është e ndarë në tri pjesë, ku e para Milot-Rrëshen, do të kushtojë 32 milionë Euro dhe do të financohet kryesisht nga Banka Botërore, segmenti i dytë është ai Kalimash-Morinë, i cili do të kushtojë 38 milionë euro dhe do të financohet tërësisht nga buxheti i shtetit. Ndërkohë që segmenti më problematik është ai i ndërmjetëm, i cili parashikohet që të ketë një kosto prej 500 milionë euro. Kjo shumë është mbi 5.5% të Prodhimit të Brendshëm Bruto dhe qeveria ka dëshirë ta realizojë në periudhën 2006-2009. Madje, për realizimin e projektit, për këtë segment është përzgjedhur dhe konsorciumi që do ta ndërtojnë. Borxhi që pritet të merret për ndërtimin e kësaj rruge, duket se do të jetë një "peshqesh" për ata që do të menaxhojnë financat publike pas vitit 2009. Fondi Monetar Ndërkombëtar, në fillim duket se ka qenë tepër skeptik për marrjen e një shume kaq të madhe kredie, që pritet të jetë më interesa të larta.

[Gerrard]

Qeveria i ka kërkuar që në fillim të këtij viti Fondit Monetar Ndërkombëtar, që të rrisë tavanin e vendosur për kreditë tregtare që mund të marrë vendi. Kryeministri Berisha me anë të një letre drejtuar FMN-së, ka deklaruar se qeveria nuk i ka paratë për rrugën, që është vlerësuar edhe si projekti madhor i këtij mandati. Marrja e një borxhi që mund të mbërrijë në 400 milionë euro, me interesa tregtare për vitin 2007, mund të paraqesë vështirësi në menaxhim gjatë viteve të ardhshme. Megjithëse qeveria ka negociuar me FMN-në për këtë aksion financiar të parealizuar ndonjëherë, kostoja e këtij borxhi do të bjerë gjatë viteve të ardhshëm mbi taksapaguesit shqiptarë. "Rritja e riskut të borxhit buxhetor afatmesëm si pasojë e ndërtimit të rrugës Durrës-Morinë, është i pashmangshëm",- shprehen krerët financiarë të vendit në dokumentin që i dorëzon FMN-së. Megjithatë, qeveria ka marrë disa angazhime për të tejkaluar këtë situatë. Së pari, duke qenë se ky projekt do të jetë prioritet i qeverisë për buxhetin e disa viteve me radhë, do të merren masa që fondi i kontigjencës të rritet me 1% të GDP-së. Kjo, bazuar në ligjin organik të buxhetit, do të bëhet me qëllim që të sigurohen më shumë burime parash, për t'ia kaluar ndërtimit të rrugës Durrës-Morinë. Një tjetër, manovër do të jetë që fondet e rialokuara nga mosrealizimet do të destinohen përsëri në ndërtimin e kësaj rruge. Kurse burimi tjetër i financimit të rrugës Durrës-Morinë që ka menduar qeveria, është që çdo privatizim që do të bëhet, 50% e fondit do të kalojë për ndërtimin e rrugës.

[Gerrard]

Nëse fondet nga privatizimet e parashikuara, fondi i konvergjencës, mos realizimet nuk do të mjaftojnë për të mbyllur detyrimet për kreditë tregtare, atëherë do të rialokohen fonde nga çdo projekt tjetër, i cili ka prioritet më të vogël për qeverinë. Ky është mekanizmi, me të cilin qeveria ka menduar që të financojë një nga prioritet e saj më të mëdha.

[Gerrard]

Ministria e Financave i garanton bankave, se është e aftë të kthejë në kohë borxhin

Në njoftimin zyrtar në faqen e Ministrisë së Financave në internet, bëhet e ditur se qeveria shqiptare ka një histori të mirë në drejtim të kthimit të borxheve. "Republika e Shqipërisë ka pasur raporte korrekte dhe në kohën e duhur të të gjitha pagesave për shërbimin e borxhit, duke shënuar një histori pozitive në këtë drejtim",- sqaron Ministria e Financave. Gjithashtu, në njoftimin ku financat i bëjnë ofertë bankave për investimin e kripur, bëhet e ditur se "siguria në këtë fushë është kusht i rëndësishëm për ekonominë shqiptare, në drejtim të përfitimit të kredive tregtare dhe janë pjesë e strategjisë sonë për ndryshime të tilla në periudhat që vijnë. Aktualisht, Shqipëria është blend borrower country dhe ndjek me kujdes nivelin e borxhit për mbajtjen e tij nënivele të menaxhueshme dhe të qëndrueshme",- deklaron Ministria e Financave.

[Gerrard]

Me anë të kësaj kredie, qeveria e përfaqësuar nga Ministria e Financave, synon të sigurojë financimin e investimeve që do të kryhen në zbatim të Kontratës Tregtare të datës 06/10/2006, lidhur ndërmjet Qeverisë së Republikës së Shqipërisë dhe "Bechtel International Inc.", për ndërtimin e Seksionit Rrëshen-Kalimash të Autostradës Durrës- Morinë, dhe kërkon oferta nga ana e bankave për financimin e këtij investimi. Ky projekt parashikohet që të kryhet gjatë periudhës 2006-2009. Seksioni i Autostradës Rrëshen-Kalimash, për të cilin do të merret kredia 230 milionë euro, ka një gjatësi 60 km dhe përfshin ndërtimin e një tuneli me gjatësi afërsisht 6 km.

[Gerrard]

Qëllimi i Kredisë : Financimi i investimit që do të realizohet në zbatim të Kontratës Tregtare datë 06/10/2006, për ndërtimin e segmentit të autostradës Rrëshen-Kalimash.

Blerësi/Porositësi : Qeveria e Republikës së Shqipërisë, përfaqësuar nga Ministria e Punëve Publike, Transportit dhe Telekomunikacionit e Shqipërisë.

Kontraktor/Furnitor : "Bechtel International Inc.".

Huamarrës : Qeveria e Republikës së Shqipërisë, përfaqësuar nga Ministria e Financave;

Shuma e kredisë:200-230milionë EUR, për t'u disbursuar sipas skedulit në vijim:

·Viti 2007 deri në 110 milionë EUR

·Viti 2008 deri në 95 milionë EUR

[Gerrard]

Koha e regjistrimi të biznesit, në dy vitet e fundit është shkurtuar vetëm me 2 ditë

Kostoja e hapjes së një biznesi për 2006, ishte 2 herë më e lartë se mesatarja e rajonit

Në bashkëpunim me projektin e mësipërm, Ministria e Ekonomisë, Tregtisë dhe Energjetikës ka propozuar krijimin e Qendrës Kombëtare të Regjistrimit, me autonomi të plotë vendimmarrëse, në lidhje me procesin e regjistrimit tregtar, si një "zyrë me një ndalesë ("one-stop-shop") " për regjistrimin e biznesit.

Procesi i reformimit të regjistrimit do të realizojë nëpërmjet kësaj qendre, shndërrimin e procesit të regjistrimit nga një proces miks (gjyqësor dhe administrativ) në një proces tërësisht administrativ. Regjistrimin në një ditë të vetme, me një hap të vetëm, më pranë përfituesve dhe tërësisht elektronik.

Për t'u regjistruar, një biznesi të ri edhe për 2006 i janë dashur 11 veprime procedurale, 39 ditë dhe 580 USD. Të dhënat jepen nga raporti i Bankës Botërore "Doing Business 2006". Vështirësitë për të bërë biznes në Shqipëri, janë pranuar dje edhe nga ministri i Ekonomisë, Genc Ruli, gjatë një takimi me biznesmenë. Ruli ia ka hedhur fajin për këtë situatë administratës shtetërore, e cila, sipas ministrit të Ekonomisë është e paaftë. "Ky është një problem serioz që duhet të marrë zgjidhje me shpejtësi. Kemi shumë respekt për administratën, por nuk është kristalizuar akoma sensi i të shërbyerit. Interesi i vendit për investimet tuaja dhe të të tjerëve, është më shumë jetik se çdo vend tjetër i Evropës. Shqipëria ka nevojë për investime.

Në rast se çdo zyrtar do të kishte parasysh këtë fakt, jam i sigurt se do të rriste 3-4 herë shpejtësinë e bashkëveprimit me ju",- tha ministri i Ekonomisë, Ruli. Nga ana tjetër, ministri Ruli është shprehur se administrata prish natën atë që ekzekutivi bën ditën. "Progresi në fushën e tokës dhe ndërtimit është i pjesshëm. Ka patur aktivitete të paralizuara në fushën e doganave dhe tatimeve. Zbatimi i parimit të konsultimit periodik me biznesin, kërkon një reformë të harmonizuar dhe jo takime parciale dhe spontane",- tha Ruli. Gjatë fjalës së tij, Ruli ka vlerësuar se procesi i regjistrimit vazhdon të jetë i fragmentarizuar, i bazuar kryesisht në kontaktin e drejtpërdrejtë ndërmjet të interesuarve dhe nëpunësve shtetërore. "Për t'i dhënë zgjidhje kësaj situate, Qeveria Shqiptare dhe Qeveria e Shteteve të Bashkuara të Amerikës nënshkruan me 3 prill 2006, Marrëveshjen e Pragut të Sfidës së Mijëvjeçarit për Shqipërinë, i cili po asiston në tri projekte të mëdha, ndër të cilat edhe ai i reformimit të procesit të regjistrimit",- ka deklaruar Ruli.

[Gerrard]

Të nisësh një biznes të ri në Shqipëri, kërkon një afat ditor prej 39-ditësh. Sipas raportit të fundit të Bankës Botërore, "Nisja e një biznesi më 2006-ën", Shqipëria është nga vendet e rajonit që ka koston më të lartë ditore për të hapur një biznes të ri. Kjo, kuptohet, për shkak të procedurave mjaft burokratike e ligjore. Për të nisur një aktivitet, një biznesmeni shqiptar i kushton shumë më tepër se homologut në rajon dhe të vendeve të tjera të zhvilluara. Sipërmarrësit duhet të kalojnë 11 hapa për të hapur një aktivitet, për një kohë totale prej 39 ditësh. Nga ana tjetër, si numri i ditëve dhe i procedurave, është më i lartë në krahasim me mesataren e vendeve të rajonit. Ndërsa kostoja e hapjes së një biznesi është shumë më e lartë në Shqipëri. Kostoja totale e nisjes së një biznesi për Shqipërinë, llogaritet të jetë rreth 578 dollarë në 2006, nga 647 dollarë që ishte në vitin 2005.

Në krahasim me vitin 2005, kemi një rënie me 69 dollarë të kostos, për të hapur një biznes. Ndërkohë që në fqinjin tonë, Maqedoni, ku ditët e hapjes së një biznesi janë 18, pagesa për hapjen e një aktiviteti të ri, janë 1.3 herë më pak sesa ato në Shqipëri, 267 dollarë. Pra, ende jemi në një gjendje të vështirë, pasi fqinjët tanë kanë procedura më të shpejta dhe kosto më të ulët. Vendi tjetër i rajonit, Bullgari, që ka një numër prej 32 ditësh për hapjen e një aktiviteti të ri, ka një kosto totale prej 270 dollarësh. Në këtë studim të bën përshtypje edhe rasti i Turqisë, e cila e ka përmirësuar procesin për fillimin e një biznesi, duke shkurtuar kohën që nevojitet, nga 38 ditë në 9 ditë. Kroacia, Hungaria, Letonia dhe Polonia, futen me rregulla më lehtësuese për punësimin, duke i dhënë mundësi biznesit ta shtojë prodhimin.

[Gerrard]

Kërkesave të vazhdueshme të biznesit për mosmiratimin e ligjit të gjobave, i ka ardhur në mbështetje edhe Parlamenti Evropian. Me anë të një letre zyrtare drejtuar kryeministrit Berisha, eurodeputetja dhe anëtarja e Komisionit të Tregtisë Ndërkombëtare, Kristiana Muscardini, e cila kryeson edhe Grupin e të Djathtëve në Parlamentin Evropian, kërkon nga ana e qeverisë shqiptare që të rishikojë edhe njëherë ligjin për procedurat tatimore, të miratuar gjatë kësaj jave në Parlament.

Me anë të këtij ligji qeveria vendosi që biznesi të paguajë apriori detyrimin tatimor dhe 15% të gjobës, para se të shkojë për apelim në gjykatë. "Dëshiroj të shpreh shqetësimin tim se ky ligj, ashtu siç është ndërtuar, mund të shkaktojë krijimin e një klime mosbesimi në radhët e investitorëve, duke provokuar dekurajimin dhe trembjen e bizneseve që operojnë në Shqipëri",- thuhet në letrën e euro-parlamentares.

Sipas saj, e gjitha kjo është në dëm të zhvillimit ekonomik dhe funksionimit të administratës publike, kushte këto të domosdoshme për zhvillimin e mëtejshëm të vendit. Ndërkohë, në tentativën e radhës, 10 shoqata të biznesit i kanë çuar një letër Presidentit të Republikës për mosmiratimin e ligjit. Me anë të një letre, shoqatat e biznesit kërkojnë që Presidenti të mos dekretojë ligjin që ka pasoja shkatërruese në aktivitetin e sipërmarrjes.

Shekulli

[de Balzak]

pse mendoni ju se ekonomia e shqiperise vazhdon akoma te jete e prapambetur,dhe si mundet ajo te zhvillohet?

[LAINA]

Kjo mund te qendroje si kryeteme me shume nentema te tjera, eshte shume e gjere per ti dhene nje pergjigje te pergjithshme...

[Gerrard]

Plani i investimeve publike është realizuar në masën 95 për qind

Projektet e mëdha si rruga Durrës-Kukës dhe korridoret e jugut, gllabërojnë fondet

Investimet publike duket se kanë ecur në ritmin e duhur. Rreth 6 miliardë lekë më shumë se tremujori i parë I 2006, janë investuar në infrastrukturën rrugore. Zëvendësministri i Financave Sherefedin Shehu tha për “Metropol” se këto para janë destininuar për projektet e mëdha të Qeverisë si rruga Durrës-Kukës, dhe njëkohësisht edhe korridoret e jugut. “Duke e krahasuar me tremujorin e parë të vitit 2006, janë investuar 6 miliardë lekë ose 35 për qind më shumë. Muaji mars ka qenë edhe muaji ku ka pasur një rritje të dukshme. Kryesisht këto fonde kanë shkuar për projektet e mëdha që ka përcaktuar edhe Qeveria”,-tha Shehu. Miratimi i Buxhetit të Shtetit në fundin e muajit nëntor duke se ka ndihmuar për lëvrimin e shpejtë të fondeve. Njëkohësisht, projektet kanë qenë gati dhe kjo ka qenë edhe një ndihmesë tjetër që Ministria e Financave të lëvrojë fonde për investime publike. “Mungesa e projekteve ka qenë njëra nga pengesat që kemi pasur gjatë vitit 2006, pasi Qeveria e mëparshme e shpërndante në shumë pjesë buxhetin. Përqendrimi i fondeve në projekte të mëdha ka bërë që rialokimi i tyre të jetë i shpejtë”,-shpjegon Shehu. Duket se ekzistenca e projekteve të tjera si korridoret e jugut, do të bëjë që të lëvrohen fonde të tjera për ndërtimin e tyre. Ministria e financave është në suficit buxhetor ose ka teprisë parash në arkë, dhe pret vetëm që projektet që të jenë gati. Për këtë të gjitha ministritë përkatëse kanë marrë sinjalin nga Qeveria për të përfunduar hartimin e projekteve për t’i paraqitur ato për miratim. Përfundimi i çdo projekti do të shoqërohet edhe me fondin përkatës duke i hapur rrugën prokurimeve të këtyre veprave. Fondet kryesisht janë përqendruar në projekte madhore të infrastrukturës. Njëkohësisht edhe Buxheti Afatmesëm tre vjeçar, ka si synim shtimin e fondeve në infrastrukturë pasi kjo është edhe synimi dhe platforma qendrore e qeverisë. Buxheti Afatmesëm duke se ka përcaktuar edhe mënyrën e ndarjes së fondeve. Duket se arsimi, shëndetësia, transportet dhe mbrojtja do të jenë prioriteti i Qeverisë për 3 vitet në vijim, që do të gllabërojnë buxhetin. Ministritë përkatëse të këtyre prioriteteve kanë paraqitur në Qeveri, projektet e tyre në lidhje me investimet publike. Është pikërisht viti 2007, që do të ndiejë këto ndryshime. Qeveria do të rrisë investimet për këto ministri, me nga 75 për qind më shumë nga ç’ishte parashikuar. Deri në vitin 2009 këto do të jenë prioritetet e qeverisë, ku vit pas viti shpenzimet do të ulen në masë të ndjeshme. Këto ministri dhe shpenzimet operative në lidhje me administratën do të kenë më shumë fonde nga buxheti i shtetit. Investimet publike do të përcaktohen në bazë të projekteve, që paraqiten në mënyrë të detajuar nga çdo ministri. Njëkohësisht edhe për institucionet e tjera do të punohet njësoj. Asnjë shumë nuk do të paracaktohet për institucionet, por vetë ato duhet të paraqesin projekte për investime publike dhe që do të miratohen nga këshilli i ministrave. Ligji organik i buxhetit do të fillojë përcaktimin e kritereve për çdo institucion, që nga fillimi i vitit 2007. Ndërkohë, Ministria e Financave u ka shpërndarë ministrive udhëzime, ku u kërkon që të përgatisin kërkesat për vitin e ardhshëm.

6 miliardë lekë më shumë se në tremujorin e parë të 2006, ose e përkëthyer në përqindje ka qenë më masën e 35 përqindëshit më shumë. Pritet që fondet të shtohen më shumë në muajt në vijim.

Projektet e mëdha si korridoret e jugut dhe rruga Durrës-Kukës kanë qenë projektet të cilat kanë përfituar pjesën më të madhe të fondeve. Ekzistenca e projekteve ka bërë që fondet të jepen më shpejt.

Njëkohësisht edhe Buxheti Afatmesëm tre vjeçar, ka si synim shtimin e fondeve në infrastrukturë pasi kjo është edhe synimi dhe platforma qendrore e qeverisë. Duket se arsimi, shëndetësia, transportet dhe mbrojtja do të jenë prioritete.

[Gerrard]

Kërkesë BE-së për më shumë fonde në infrastrukturë

Ministri I Transporteve Lulzim Basha dhe homologu tij malazes Andrey Lompar, kanë dërguar një peticion pranë Bashkimit Evropian që të mbështesin vendet për më shumë fonde. Kërkesa e fondeve është specifikuar në ndërtimi e një lidhje ujore midis Malit të Zi dhe Shqipërisë me anë të tragetit duke kaluar nëpërmjet liqenit të Shkodrës. Të dy ministrat kanë vizituar Aeroportin e ri “Nënë Tereza”, ku ministri malazes u shpreh se ky terminal është për t’u patur zili. Ndërkohë Basha ka informuar se me homologun e tij është biseduar edhe për projekte të tjera në fushën e infrastrukturës që do të lidhin më shumë të dyja vendet. “Kam informuar Ministrin malazes se Shqipëria po fillon ndërtimin e njësërë projektesh të rëndësishme në të gjithë vendin s në jug ashtu edhe në veri të tij. Këto projekte do të ndihmojnë edhe për lëvizje më të shumta midis dy vende fqinje”,-tha Basha. Ministri malazes Lompar, tha se tashmë do të rritet më tej bashkëpunimi midis vendeve dhe se këtë vizitë e ka shfrytëzuar për të folur për më shumë projekte për të ardhmen. Ministri shqiptar Basha nuk la pa përmendur edhe aeroportin ndërkombëtar të Kuksit që sipas tij tashmë ky aeroport është në studim trafiku, dhe së shpejti do të përfundojë edhe projekti i plotë i tij. Vizita e Ministri malazes ka qenë në kuadër të prezantimeve reciproke midis vendeve në fushnë e infrastrukturës në përgjithësi. Ministrat kanë diskutuar edhe projekte për të ardhmen si shtimi i trasporteve ujore detare dhe rrugore. Me Malin e Zi është edhe projekti për ndërtimin e hekurudhës që do të lidhë kryeqytetin malazes Podgorica me Shkodrën.

[Gerrard]

KESH-i ka nisur një aksion për ndërprerjen e lidhjeve të paligjshme, ku është përqendruar kryesisht në zonat më problematike në Tiranë. Grupet e punës të shpërndara në 12 ninigrupe, kanë nisur nga zona e Kodrës së Priftit në Tiranë. Grupet e KESH-it janë ndjekur personalisht nga kreu i KESH Gjergj Bojaxhi. Banorët nuk kanë rezistuar nga ky aksion duke i hapur rrugën ndërprerjes së lidhjeve të paligjshme. Kodra e Priftit, një nga zonat më problematike për nivelin e pagesës, ku në 3884 abonentë vetëm 42.6 për qind paguajnë ndërkohë që pjesa tjetër janë debitorë në KESH. Ishin 12 grupe pune të kësaj njësie në bashkëpunim me policinë elektrike, që e shtrinë punën në të gjithë zonën për prerjen e lidhjeve të paligjshme, lidhjeve dyfishe si dhe linjave të abonentëve debitorë. Nga 650 kontrolle të kryera në Kodrën e Priftit në ditët e mëparshme janë realizuar rreth 290 prerje ndërkohë që është arritur një shlyerje prej 50 për qind. Drejtori i Njësisë nr.2 Sali Toçi u shpreh për mediat se “ecuria është e kënaqshme”. Deri në mesditën e ditës së sotme janë mbledhur rreth 8 milionë lekë të vjetra në arkën nr.24 si edhe 1.5 milionë lekë të vjetra në arkën nr.10 ndërkohë që shumë prej tyre vazhdojnë ti drejtohen arkave për të paguar si edhe për të lidhur kontratat. Puna e kësaj njësie vijon paralelisht edhe në lagjen Besa, Kolonia Gjermane, Shkozë, rrethinat e qytetit Studenti. Në targetin e punës së saj do të përfshihen të gjitha kategoritë e abonentëve që rezultojnë problematike dhe do të ketë vijimësi edhe ditët në vazhdim për eliminimin e nivelit të mospagesës dhe vjedhjes së energjisë.

[Gerrard]

Kontrollet kanë gjetur me lidhje të paligjshme dhe mospagues të energjisë edhe drejtorin lokal të policisë elektrike, funksionarë të prokurorisë, përfaqësues të bashkisë dhe komunave, sindikatave të pavarura, anëtarë të OJQ-ve ambientaliste, përfaqësues të gjykatës së rrethit, këshilltarë të këshillit bashkiak, përfaqësues të të dy krahëve politike



Korporata e energjisë ka kryer dje një operacion të gjerë për ndërprerjen e energjisë tek të gjithë personat që kishin lidhje të paligjshme apo që nuk e paguanin energjinë elektrike. Nga kontrollet e kryera është vërejtur se edhe shumë zyrtarë, madje vetë përgjegjësi i policisë elektrike, Hysen Bala, kishte probleme. Ndërkohë, atij i është ndërprerë energjia dhe është pezulluar nga detyra prej kreut të KESH-it Bojaxhi. Aksioni ka çuar në ndërprerjen e energjisë edhe të mjaft zyrtarëve të tjerë, midis të cilëve disa këshilltarë bashkiakë të pozitës dhe opozitës si edhe ish-Ministres së Kulturës, Esmerdalda Uruçi. Grupet e ngritura nga filiali i KESH-it në Shkodër, me mbështetjen e drejtorit Gjergj Bojaxhi, kanë patur si synim prerjen dhe copëtimin e linjave të paligjshme dhe dyfishe për të evituar rilidhjen, si dhe ndërprerjen për debitorët. Disa nga rastet e hasura kishin të bënin me debi të prapambetura, lidhje dyfishe të paligjshme me qëllim vjedhjen e energjisë (përfshirë këtu edhe abonentë të pajisur me matësa) etj. Ndërprerjet kanë përfshirë disa kategori abonentësh si ata familjarë, privatë, biznese etj. Ndërkohë që, kontrollet kanë hasur edhe në abonentë “VIP” si funksionarë të lartë të policisë elektrike, prokurorisë, përfaqësues të bashkisë dhe komunave, sindikatave të pavarura, anëtarë të OJQ-ve ambientaliste, përfaqësues të gjykatës së rrethit, këshilltarë të këshillit bashkiak përfaqësues të të dy krahëve politik etj. Brenda dy javësh, në këtë qytet që vazhdimisht ka rezultuar problematik në shlyerjen e detyrimeve ndaj KESH-it dhe abuzimin me energjinë elektrike do të shikohet me imtësi dhe verifikohen të gjitha kontratat e abonentëve buxhetorë të institucioneve shtetërore, duke përfshirë edukimin dhe sidomos Policinë e Shtetit.

[Gerrard]

Deri në qershor do të rishikohen 44 licenca



Reforma parashikon mbështetjen e kërkesës për licencë në autodeklarimin e përgjegjësive nga kërkuesi për garantimin e kërkesave të ligjit dhe aplikimin e sanksioneve të forta në rastet e deklarimeve të rreme. Gjithashtu, do të realizohet regjistrimi i menjëhershëm për efekt tregtar, fiskal, sigurime shoqërore, shëndetësore, si dhe të punës në një hap të vetëm





Reforma rregullatore për biznesin do të përfshijë, përsa i përket sektorit të licencimit, rishikimin e dyzet e katër lejeve dhe licencave deri në qershor të këtij viti. Të dhëna nga Ministria e Ekonomisë dhe e Privatizimit bëjnë me dije se, reforma në fushën e licencimit parashikon futjen e disa risive dhe parimeve të reja, sikurse janë kalimi nga parakontrolli tek postkontrolli dhe kontrolli i vazhdueshëm; aplikimi i parimit të miratimit në rastet kur institucionet përgjegjese nuk përgjigjen në kohë si dhe aplikimi i sanksioneve për këto institucione, ç'ka siguron zbatimin e parimit të përgjegjshmërisë së administratës. Nga ana tjetër, reforma parashikon mbështetjen e kërkesës për licencë në autodeklarimin e përgjegjësive nga kërkuesi për garantimin e kërkesave të ligjit dhe aplikimin e sanksioneve të forta në rastet e deklarimeve të rreme, ç’ka siguron zbatimin e parimit të përgjegjshmerisë së biznesit. Gjatë vitit 2006, nga Ministria e Ekonomisë si dhe ato të linjës u rishikuan 135 licenca, leje dhe autorizime në fusha të tilla si: në miniera, karburante, transport, bujqësi, ushqim, peshkim, mjedis, administrim ujërash, pyje dhe kullota, shëndetësi, dogana, mbrojtje nga zjarri.

Por, nisur nga fakti se licencimet janë fushë problematike, Ministria e Ekonomisë dhe e Privatizmit ka propozuar që të eliminohen si të panevojshme 24 lloje licencash, si dhe të reduktohen kërkesat për numrin e dokumenteve për pjesën tjetër në masën 30-40%. Për këtë qëllim, deri tani janë zbatuar rekomandimet për 35 leje dhe licenca. Deri në muajin qershor 2007 do të zbatohen rekomandimet siç edhe u tha më lart edhe për 44 leje dhe licenca, ndërsa pjesa tjetër do të zbatohet deri në fund të vitit. Sipas burimeve nga Ministria e Ekonomisë, në këtë kuadër, parashikohet edhe heqja e të gjitha kërkesave të tepërta për licencimin në një fushë specifike. E gjithë reformë ligjore do të kërkojë edhe mjaft akte nënligjore për t’u vënë në jetë dhe për këtë gjë, ministria ka përgatitur 16 akte nënligjore, të cilat do të plotësojnë zbatueshmërinë e ligjit për reformën rregullatore, të përbërë nga ligji bazë, si dhe 9 amendime të tjera, të cilat lidhen me regjistrin tregtar, fiskal, të punës, për ngritjen e Qendrës Kombëtare të Regjistrimit të Biznesit, që pritet të miratohen në Kuvend. Gjithçka për ngritjen e Qendrës Kombëtare të Regjistrimit të Biznesit bazohet në projektin e mbështetur nga USAID-i, "Marrëveshja e pragut të sfidës së mijëvjeçarit për Shqipërinë" dhe synon që kjo qendër të ketë autonomi të plotë vendimmarrëse si një zyrë me një ndalesë "one stop shop" për regjistrimin e biznesit. Gjithashtu, realizohet regjistrimi i menjëhershëm për efekt tregtar, fiskal, sigurime shoqërore, shëndetësore, si dhe të punës në një hap të vetëm.

Ky sportel thjeshtëzon kërkesat e dokumentacionit të nevojshëm për regjistrimin e bizneseve, ul kostot e regjistrimit, eliminon kontaktet me nëpunësit administrativë dhe rrjedhimisht redukton korrupsionin.