Presidenti i Shërbimit Sekret Gjerman August Hanning flet në një simpozium për globalizimin dhe krimin e organizuar
“Krimi shqiptar kërcënon Evropën”
Shekulli
TIRANE- Shërbimi Sekret Gjerman mendon se kriminaliteti i organizuar i shqiptarëve përbën sot kërcënimin më të madh për Evropën. Radio “Dojçe Vele” deklaroi dje se presidenti i Shërbimit Sekret Gjerman (BND) August Hanning sqaroi gjatë një simpoziumi për globalizimin e terrorizmit dhe të kriminalitetit të organizuar në Berlin, se ende nuk është arritur që të fitohen “zemrat dhe mendjet” e banorëve të atyre zonave të Evropës dhe të botës që janë të përfshira në krizë. Presidenti i Shërbimit Sekret Gjerman, August Hanning tërhoqi që në fillim të fjalës së tij vëmendjen se gjatë viteve të kaluara është vënë re një shtim i ndjeshëm i kriminalitetit të organizuar dhe një përzierje e kriminalitetit të organizuar dhe e terrorizmit. Si ndër rreziqet më të mëdha për Evropën, presidenti i Shërbimit Sekret Gjerman, August Hanning përmendi kriminalitetin e organizuar në radhët e shqiptarëve për vetë shtrirjet e tij tentakulare jo vetëm në Evropë, por edhe në SHBA apo Australi.
“Në fushën e kriminalitetit të organizuar na duhet të konstatojmë, se gjatë viteve të kaluara ky e ka zgjeruar ndjeshëm fushën e tij të veprimit dhe të ndikimit. Tepër i suksesshëm ka qenë kriminaliteti i organizuar i shqiptarëve. Në tërësinë e tij, kriminaliteti i organizuar shqiptar përbën sot kërcënimin më të madh të Evropës, me një rrjet që shtrihet deri në SHBA dhe në Australi. Kriminaliteti i organizuar po ndërkombëtarizohet dhe sot ekziston një ndarje ndërnacionale e veprimtarive kriminale, sidomos në fushën e trafikimeve. Por sikur të mos mjaftonte kjo, vihet re edhe një përzierje e kriminalitetit të organizuar dhe terrorizmit”, - tha Hanning.
Më tej presidenti i Shërbimit Sekret Gjerman tërhoqi vëmendjen se në vendet myslimane po shtohet numri i predikuesve të urrejtjes. Megjithë vrasjen e disa prej terroristëve të rëndësishëm dhe shkatërrimin e disa strukturave terroriste, nuk është arritur që terrorizmit t’i vihet pre.
“Në vendet myslimane unë vërej një rritje të përgjithshme të ndjenjave antiperëndimore. Ideja e kultivuar prej Bin Ladenit se islamizmi është i kërcënuar prej përpjekjeve hegjemoniste dhe imperialiste të kryqëzatave të Perëndimit, vazhdon të mbetet tërheqëse për shumë myslimanë të deziluzionuar”, - tha Hanning.
Opinionet e kreut të Shërbimit Gjerman duket se i referohen të dhënave për elementët kriminalë shqiptare qe sipas tij veprojnë jo vetëm në Evropë por edhe të shtrirë në SHBA e Australi. Por, në shumë konferenca rajonale dhe evropiane jo vetem nga zyrtarët shqiptarë por edhe të huaj është theksuar fakti se elementët kriminalë shqiptarë veprojnë në bashkëpunim me ata vendas. Vetëm para një jave ambasadori ynë në OSBE Zef Mazi ndërsa i bënte oponencën raportit të Liponen dhe, duke ju referuar edhe situatës së kriminalitetit në vend të ekspozuar nga ish-kreu i OSBE-së në Tiranë tha se “Pse ne qenkemi qendra e gjithë të këqijave, e krimit të organizuar, trafikut të qenieve njerëzore, drogës dhe korrupsionit? Le të ndalemi në veçanti tek trafiku i qënieve njerëzore. Shohim një mospërputhje mes paraqitjes që bën BE dhe diskutimit të ministrave të Rendit Publik në Bruksel, ku ministri thotë se trafikimi i qenieve njerëzore ka zbritur në nivelin zero. Si është e mundur që një vend i vogël si Shqipëria të konkurrojë në trafikimin e njerëzve dhe prostitucionin, nëpër Evropë, dhe të ketë një numër të madh grupesh kriminale ngado. Prej mediave, ku mungojnë “dylbitë” e OSBE-së ne mësojmë për kolapse bankare, veprimtari mashtruese me pasoja të rënda, korrupsion, e të tjera si këto, megjithatë, pak dëgjojmë për këto këtu. Këto veprimtari janë absolutisht të dënueshme, pse ne i harrojmë këta lloj kriminelësh që veprojnë në apo prej Shqipërisë, të cilët mund të kenë homologët e tyre në vende të tjera të Evropës”
Krijoni Kontakt