Eksportet mbysin importet

[StormAngel]

INSTAT: Më shumë para për eksportet gjatë periudhës janar-mars krahasuar me tremujorët e mëparshëm

Eksportet mbysin importet


Florian Papadhimitri

TIRANË - Më shumë para janë “hedhur” për eksportet gjatë fillimit të këtij viti. Janë të dhënat për tremujorin e parë të këtij viti të cilat publikohen nga Instituti i Statistikave që tregojnë se eksportet vazhdojnë të rriten. INSTAT ka bërë të ditur ditën e djeshme nëpërmjet statistikave se për periudhën janar-mars, eksportet kanë pësuar një rritje krahasuar me tremujorin e fundit të vitit. Kështu shifra që jepet nga përllogaritjet e Institutit të Statistikës tregon se për eksportet janë lëvruar 280 milionë lekë më shumë gjatë tre muajve të parë të 2004 krahasuar me tre muajt e fundit të 2003. “Në tremujorin e parë të këtij viti eksportet janë llogaritur me 14.449 miliardë lekë, ndërkohë që në tremujorin e parë të vitit të kaluar janë llogaritur në 14.169 miliardë lekë”, -thuhet në publikimin e djeshëm të INSTAT. Për më tepër në deklaratën e INSTAT, formuluesit shpjegojnë se kjo do të thotë se në këtë tremujor, janë lëvruar më shumë para përsa i përket eksporteve në përgjithësi. Lidhur me importet bëhet e ditur se vendi ynë vazhdon të llogarisë më shumë para të shpenzuara për importe, ku për këtë tremujor shifra llogaritet me 50.1 miliardë lekë. “Megjithatë, kjo shifër për importet është më e ulët sesa e njëjta periudhë e vitit të kaluar, 53.7 miliardë lekë, dhe më e ulët sesa tremujori i fundit i vitit të kaluar, ku kjo shifër ishte afro 59.5 miliardë lekë”, -shpjegojnë specialistët e Institutit të Statistikës. Duke e ndarë në zëra të veçantë, importi është ndarë në dy zëra, në atë tregtar dhe në ndihmat. Kështu përsa i përket importit tregtar, ky zë xhiron më të madhe të parave me diçka më shumë se 50 miliardë lekë, ndërsa ndihmat nga ana e INSTAT janë llogaritur me rreth 88 milionë lekë. “Të dhënat për ndihmat, në këtë tremujor janë më të ulëta sesa viti i kaluar, ku në tremujorin e parë të vitit që lamë pas u llogaritën ndihma me një vlerë 278 milionë lekë dhe në tremujorin e fundit të po të njëjtit vit afro 196 milionë lekë”, -u deklarua dje nga INSTAT. Sipas INSTAT nga shifrat duket se në vend ka filluar të lëvizë pozitivisht prodhimi, sepse importi për makineri e pajisje llogaritet me 16.6 miliardë lekë, kur në tremujorin e parë të vitit të kaluar, kjo shifër ishte më e ulët 12.5 miliardë lekë dhe në tremujorin e fundit afro 12.6 miliardë lekë.