Enigma,22-vjecari ekzekuton nenen e tij.

[kolombi]

Dila Guraleci, nënë e 8 fëmijëve, është vrarë për motive të panjohura nga djali i saj 22-vjeçar

Anila Dushi

SHKODËR - Një 22-vjeçar ka ekzektuar nënë e tij në rrethana enigmatike. Ngjarja ka ndodhur në mëngjesin e djeshëm në fshatin Toplanë të komunës malore të Temalit në Dukagjin të Shkodrës, ndërkohë që ky është rasti i dytë i krimit brenda familjes që regjistrohet në këtë fshat në harkun kohor të tre javëve. Dila Lulash Guraleci është vrarë në mëngjesin e djeshëm, me armë zjarri automatik, nga djali i saj Marku, 22 vjeç, thanë për gazetën burimet. Vrasja ka ndodhur në oborrin e banesës, ku Dila jetonte bashkë me 7 fëmijët e saj, pasi bashkëshorti i kishte vdekur vite më parë. Sipas policisë, akoma nuk dihen motivet e këtij krimi. Madje ajo nuk ka dalë me një komunikatë zyrtare, pasi grupi hetimor që ka shkuar në fshatin e thellë nuk ishte kthyer në Shkodër deri në orët e vona të ditës së djeshme. Mësohet se djali vrasës ende nuk është kapur nga policia. Gjithsesi largësia e madhe nga Shkodra dhe moskomunikimi për shkak edhe të një defekti në centralin telefonik të policisë së Shkodrës, bënë që motivet e këtij krimi brenda familjes të jenë ende të mjegullta.
Ngjarja
Familja Guraleci jeton në një varfëri të madhe. Kështu pohojnë për gazetën të njohur të familjes ku ndodhi tragjedia, të cilët janë zhvendosur nga fshati i largët në qytetin e Shkodrës. Të njëjtat burime thanë se kryefamiljari Gjeloshi ka vdekur dy vjet më parë, nga një sëmundje e pashërueshme. Ai ka lënë pas gruan Dilën dhe 8 fëmijë, katër vajza dhe katër djem. Njëra nga vajzat është martuar në fshatin Vilë, ndërsa në shtëpi viktima jetonte me 7 fëmijët e tjerë, të moshës 5- 22 vjeç. Më i madhi i tyre është Marku 22 vjeç. Bashkëfshatarët e familjes Guraleci tregojnë se Marku ishte një djalë i urtë, por pas vdekjes së të atit, ai kishte ndryshuar mjaft. Duke qenë djali më i madh i shtëpisë, duket se mbi të ka rënë gjithë barra e familjes, që jetonte në varfëri. Ato jetojnë vetëm me ndihmën ekonomike që u jep komuna dhe me çfarë u falin të tjerët. Shtëpia e tyre është përdhese, me dy dhoma, ku një pjesë është e ndërtuar me mur, ndërsa pjesa tjetër me dërrasa, tregojnë të njohurit e tyre. Tavani është prej dërrase që mbahet me rrasa guri sipër, dhe shtëpia i ngjan më tepër një barake. Tokë kanë vetëm 600 metër, dhe atë të përbashkët me xhaxhanë që jeton në qytet. Marku, thotë një kushëri i tij, filloi të sillej ashpër me njerëzit e familjes, pasi e kishte shumë të vështirë që të të përballonte vështirësitë e jetës dhe përgjegjësinë për motrat e vëllezërit më të vegjël. Ai nuk kishte mundësi as të provonte emigracionin si bashkëmoshatarët e tij nga fshati dhe as të vendosej diku afër qytetit, për të gjetur një punë. Të gjitha këto ndikuan në karakterin e tij, duke e bërë më të ashpër dhe më agresiv. Ai nuk pinte, pasi nuk kishte lekë për këtë, thotë një i njohur i tij. Gjithsesi të njohurit nuk e shpjegojnë dot atë që ka ndodhur në familjen Guraleci. Atyre u dhimbset Dila, por dhe Marku.
Policia
Policia ka marrë njoftim për ngjarjen e ndodhur në paraditen e djeshme dhe ka shkuar menjëherë në fshatin e largët për të bërë veprimet dhe për të prangosur autorin. Fshati Toplanë ndodhet larg Shkodrës rreth 7 orë, nga të cilat 4 orë duhet të ecësh në këmbë për shkak të terrenit të thyer. Kjo ka sjellë dhe vonesën e madhe në mbërritjen e informacionit zyrtar për krimin e ndodhur brenda familjes, pasi në atë zonë nuk ka as valë të telefonisë së lëvizshme. Ky është rasti i tretë i krimit brenda familjes që ndodh në qarkun e Shkodrës gjatë këtij viti, dhe i dyti brenda muajit në fshatin Toplanë. Më 24 maj ishte 20- vjeçari Rito Qarri që vrau motrën e tij Leze dhe më pas veten. Gjatë vitit 2003, në këtë qark u regjistruan tre raste të krimit brenda familjes, ndërsa në vitin 2002 5 të tilla. Kjo është e 13-ta viktimë e vrasjeve të ndodhura gjatë këtij viti në Shkodër.

[rudi c33]

Fukaralluk,maskaralluk.
Thot populli