Vrasja mister e oficerit te ShIKU-ut nga vellai i tij.

[kolombi]

Vëllai vrasës: “Më lini të qetë, nuk e di ç’kam bërë”


S. Gozhina

KUÇOVË- Ndërsa oficeri i SHIK-ut është përcjellë dje për në banesën e fundit, vëllai që e ekzekutoi atë nuk ka thënë asgjë rreth motiveve të këtij krimi. “Më lini të qetë se nuk e di se ç’kam bërë”, mësohet të jetë shprehur Hekuran Velçani që dy ditë më parë vrau me armë vëllanë e tij Gramozin, oficer i SHIKU-ut në Vlorë, baba i 3 fëmijëve. Ngjarja ndodhi në mjediset e Albtelekomit në Kuçovë, ku vëllai vrasës, baba i 5 fëmijëve, punonte si roje. Me armën që ai mbante për shkak të detyrës ka qëlluar për vdekje mbi vëllanë më të vogël, që kishte shkuar për t’u sqaruar me të. Por edhe 48 orë pas ngjarjes, motivet e këtij krimi mbeten enigmë. Autori që u arrestua nga policia nuk ka folur për grupin hetimor, të cilët thanë se “vëllai vrasës ndodhet në gjendje të rënduar psiqike”. Grupi i hetimit pret fjalën e autorit për të zbardhur të vërtetën, që sipas tyre, e dinin vetëm dy vëllëzërit.
Në fshatin ku jeton autori
Familja e Hekuran Velçanit, 50-vjeçari që vrau vëllanë e tij, jeton në fshatin Kozare të rrethit të Kuçovës. Shtëpia e tij ndodhet në katin e dytë të një pallati, ku ai banonte së bashku me gruan e tij Shpresën , vajzën, dy djemtë, ndërsa dy vajza i kishte të martuara. Pas vrasjes makabre, familja e Hekuran Velçanit është shpërngulur tek të afërmit e tyre. Të gjithë bashkëfshatarët e Hekuranit kanë mbetur të habitur nga krimi që ai ka kryer, pasi siç shprehen ata , dy vëllezërit nuk kanë pasur asnjë konflikt më parë mes njëri-tjetrit. Halil Mara, banor i fshatit Kozare thotë se Hekurani njihej si njeri punëtor, i papërzier me të tjerët. Ndërsa Merushja, 65 vjeç, thotë se lajmin e mësuam nga fëmijët e Hekuranit të cilët vunë kujën. Por askush prej tyre nuk di të thotë shkakun e krimit. Bashkëfshatarët ngrejnë supet dhe të çuditur pohojnë se ende nuk e besojnë atë që ka bërë Hekurani. Disa prej tyre mendojnë se shkaku ka qënë xhelozia mes dy vëllezërve, por nuk bëjnë të ditur se ndaj kujt ishte kjo xhelozi.
Oficerit të SHIK-ut i jepet lamtumira
Trupi i pajetë i Gramoz Velçanit, babait të 3 fëmijëve që u ekzekutua nga vëllai i tij është tërhequr nga morgu i spitalit rajonal të Beratit 8 orë pas vrasjes dhe është dërguar pranë familjes së tij në qytetin e Vlorës, atje ku banonte. Dje rreth orës 14:30, trupi i pajetë i babait të 3 fëmijëve është përcjellë në varrezat e këtij qyteti. Të afërmit nuk kanë ditur të thonë asgjë rreth motiveve të vrasjes së tij. Ata janë shprehur se « nuk e dimë ç’e shtyu Hekuranin në këtë krim ». Gramoz Velçani punonte që prej 18 vjetësh si oficer i Shërbimit Informativ Kombëtar.

[Genti^Itali]

Skam cte them per kete lajm, me vjen keq per qytetin tim dhe patriotet e mi qe vazhdokan akoma me vrasje makaber.

Edhe pse nuk i njof, ngushellimet e mija per familjaret e viktimes.

Genti:

[Genti^Itali]

Akuza: Oficeri i SHIK-ut u vra me dashje nga vëllai


S. Gozhina

BERAT- Gjykata e rrethit të Beratit ka dhënë dje masën e sigurisë burg pa afat për 50- vjeçarin Hekuran Velçani, banor i fshatit Kozare (Kuçovë) që katër ditë më parë vrau vëllanë e tij, Gramoz Velçani, baba i 3 fëmijëve, oficer i SHIK-ut në Vlorës. Gjyqtarja Margarita Bualli dha këtë masë sigurie me kërkesë të prokurorit të çështjes, Skënder Mestani. Ky i fundit ngriti akuzën vrasje me dashje ndaj të pandehurit, ndërsa mbrojtja e përfaqësuar nga avokati Qazim Koxhai kërkoi ndryshimin e akuzës. Sipas avokatit, Hekuran Velçani e vrau vëllanë në kushtet e tronditjes së rëndë psiqike. I pandehuri Velçani nuk ka pranuar të flasë përpara trupit gjykues, përveçse ka thënë se e pranon autorësinë e krimit. Krimi i rëndë ndodhi katër ditë më parë në mjediset e Albtelekomit të qytetit të Kuçovës, ku i pandehuri Hekuran Velçani punonte si roje i këtij institucioni. Sipas policisë, viktima oficer i SHIK-ut në Vlorë, kishte shkuar të takonte të vëllanë si dhe të sqarohej për një problem por është përballur me armën që vëllai i tij 50-vjeçar, baba i 5 fëmijëve, mbante për shkak të detyrës. Pas krimit, autori nuk është larguar nga vendngjarja për t’u arrestuar në flagrancë nga policia.

24/06/2004