Delijorgji del nga burgu, po pranoi kompromisin e Xhoanës

[ALBA]

Zbardhet skenari i grupit të biznesit pranë bashkëshortes së kryeministrit, për të futur në zotërim klubin sportiv "Dinamo" e për të kthyer terrenet sportive, në sheshe ndërtimi

Burime pranë klubit sportiv "Dinamo" zbardhën dje edhe historinë e arrestimit të Mihal Delijorgjit, presidenti i deritanishëm i klubit të njohur të kryeqytetit. Mes tij dhe Xhoana Nanos kishin lindur prej kohësh disa polemika të ashpra, pasi ajo i kishte kërkuar atij që të jepte dorëheqjen nga drejtimi i klubit, meqenëse grupi i biznesit që përkrah bashkëshorten e kryeministrit, ka treguar një interes të posaçëm për klubin me terrenet më të mira sportive në kryeqytet. Ky grup biznesi i propozoi Delijorgjit që të tërhiqej e njëkohësisht, kishte nisur përgatitjet për të marrë drejtimin e ekipit me perspektivën e privatizimit të plotë të tij. Pas privatizimit, grupi i biznesmenëve parashikonte zhvendosjen e grupit gjetkë dhe shndërrimin e terreneve sportive, në terrene ndërtimi për grupin. Beteja për troje u bë e ashpër dhe kjo solli edhe provokimin e polemikave mes drejtuesve burokratë të klubit, të rreshtuar me Xhoanën dhe presidentit Delijorgji, një biznesmen që ishte munduar shumë për t'u shfaqur si mecen i sportit në këto ditë të vështira. Pas refuzimit të propozimit për t'u tërhequr, Xhoana i është kthyer metodave të forta, duke provokuar arrestimin e Mihal Delijorgjit për evazion fiskal, kur në fakt, kjo është një kundravajtje që mund të zgjidhet thjesht në rrugë bankare, pa asnjë masë penale. Po të jetë për evazion fiskal, shembulli klasik është Xhoana Nano, e cila dihet botërisht se ka futur pa asnjë tarifë doganore në vend, heliopterët e firmës së saj. Sipas burimeve të mirëinformuara, mendohet se Mihal Delijorgji mund të dalë sot në burgu, në rast se pranon kompromisin e Xhoanës për t'u tërhequr pa zhurmë nga klubi, në këmbim të zgjidhjes xhentëlmençe të çeshtjes së evazionit fiskal, por mbetet për t'u parë se sa të vendosur do të jenë biznesmenët e grupit të saj, për të privatizuar shumë shpejt klubin sportiv e për ta shndërruar atë, në një shesh ndërtimi.

Gazeta 55