Kur komunizmi i la vendin demokracisë shumëpartike në fund të viteve 1980, në Shqipëri kishte vetëm 2000 makina.
Ndërsa rrugët e kryeqytetit janë kryesisht të bllokuara nga trafiku i dendur i rreth 300 mijë veturave, kamionëve e autobuzëve, që djegin karburante të ndaluara në vendet e BE-së, Tirana konsiderohet tani si kryeqyteti më i ndotur në Evropë.
Auto-anarkia ka arritur një pikë krize ndërsa rrugët janë të tejmbushura me mijëra mercedese të vjetra të sjella nga vendet perëndimore.
Në orët e pikut tymi dhe pluhuri formojnë një smog të trashë, ajëri është i rënduar nga plumbi dhe pjesëza të vogla të quajtura PM10, që dëmtojnë mushkëritë dhe shkaktojnë kancer.
Në një mëngjes mesatar volumi i PM10-s është më shumë se 10 herë më i lartë se kufiri i lejuar nga Organizata Botërore e Shëndetësisë.
Ndonjëherë është edhe më keq. Ekspertë të Ministrisë së Shëndetësisë kanë kalkuluar se gjatë vitit 2003 nga trafiku në Tiranë është emetuar 35 mijë ton ndotës ajri, dmth 49 kg për person.
Drejt përkeqësimit
Ekspertë të Ministrisë së Shëndetësisë thonë se ndotja e ajrit nga makinat është ende e pakontroluar ligjërisht dhe tendenca shkon drejt përkeqësimit për shkak të futjes masive të makinave të vjetra.
Një nga problemet kryesore është se 83 përqind e makinave janë me nafte dhe 90 përqind e tyre janë më shumë se nëntë vjeçare.
Makina të tilla emetojnë dhjetë herë më shumë tymra se modelet më të reja. Vetëm dy përqind e makinave në Tiranë janë më pak se dy vjeçare.
Gjithashtu, ekspertët ankohen se karburanti i importuar nga Italia ka një përmbajtje më të lartë sulfuri se ajo që lejohet në vendet e BE-së. Benzina me plumb që po hiqet gradualisht nga pjesa tjetër e Evropës, ende shitet në Shqipëri.
Serioziteti i këtij problemi pranohet nga autoritetet dhe ministria e Mjedisit dhe ajo e transportit kanë ngritur një grup emergjence për të përgatitur ligje për të kontrolluar futjen e makinave dhe për të larguar nga rrugët sa më shumë nga ndotësit më të mëdhenj.
Krijoni Kontakt