Prokuroria: Krimi eshte rritur me 9% ne Shqiperi

[Albo]

“Për një vit janë regjistruar 13.893 procedime dhe janë marrë të pandehur 9904 vetë, ku 3888 prej tyre të burgosur”

Sollaku: Kriminaliteti në Shqipëri është rritur 9%

Prokurori i Përgjithshëm në raportin e tij vjetor pohon se edhe këtë vit kriminaliteti në Shqipëri është rritur

Shekulli

TIRANË - Prokurori i Përgjithshëm, Theodhori Sollaku, pohon fakti që edhe këtë vit kriminaliteti në Shqipëri është rritur. Sipas shifrave të raportit zyrtar që kreu i prokurorisë shqiptare pritet të lexojë sot në parlament, kriminaliteti në Shqipëri është rritur më nëntë për qind. “Gjendja e kriminalitetit, sipas procedimeve penale të regjistruara në vitin 2003, e krahasuar me të njëjtën periudhë të vitit të kaluar, evidenton tendencën në rritje në masën 9 për qind.”, thuhet në raportin e kreut të organit të akuzës. Sipas tij, në vitin 2003, prokuroria ka punuar për të dokumentuar veprimtarinë kriminale në 13.893 procedime penale. Nga këto, 2314 procedime janë të mbartura nga viti 2002 dhe 11173 procedime janë të filluara gjatë vitit 2003. Në total numri i personave të marrë të pandehur është 9904, ku për 3888 persona është aplikuar si masë sigurimi ajo e arrestit.
Sipas raportit që Theodhori Sollaku pritet të lexojë sot në parlament tre janë drejtimet kryesore të përhapjes dhe shtrirjes së kriminalitetit në grup veprat penale. Këto tre drejtime janë krimet kundër personit, që zënë 20 %, krimet kundër pasurisë dhe në sferën ekonomike, që zënë 45. 6 % si dhe krimet kundër autoritetit të shtetit, që zënë 21. 7 %. Sollaku konsideron luftën kundër krimit të organizuar trafiqeve të paligjshme dhe korrupsionit si prioriteti kryesor i organit të akuzës për këtë vit. Gjatë vitit të kaluar për veprat penale që lidhen me krimin e organizuar, trafiqet e të gjitha llojeve dhe korrupsionin, prokurioria ka ndjekur penalisht 1014 procedime, me 920 të pandehur. “Është ngritur akuzë në gjykatë për 521 të pandehur, që zënë 7.2 % të të pandehurve të dërguar në gjyq, si dhe ka përfunduar gjykimi dhe janë dënuar 329 prej tyre, që zënë 5.6 % të të dënuarve në vitin 2003.”, thuhet në raportin e Sollakut. Ndërkohë përsa i përket trafiqeve të paligjshme të qenieve njerëzore dhe të prostitucionit janë ndjekur penalisht 270 procedime, me 327 të pandehur. Është ngritur akuzë në gjykatë për 184 të pandehur dhe janë dënuar 105 prej tyre, që zënë 31.9 % të të pandehurve të dënuar për këtë grup veprash penale. Kultivimi dhe trafikimi i lëndëve narkotike zë një vend të rëndësishëm në raportin e kreut të akuzës shqiptare. Sipas tij, janë ndjekur penalisht 333 procedime, me 364 të pandehur. Është ngritur akuzë në gjykatë dhe janë dënuar 148 të pandehur, që zënë 44.9 % ose numrin më të lartë, të të pandehurve të dënuar për këtë grup veprash penale. Për të gjithë llojet e trafikantëve prokuroria ka marë si synim që në bashkëpunim dhe me policinë të rrisë forcën zbuluese dhe goditëse ndaj organizatorëve që merren me trafikim, të sekuestrojë dhe të konfiskojë e pasurive të tyre, si dhe krahas dënimit me burgim, të aplikojë dhe dënimin me gjobë. “Në luftën kundër krimit të organizuar, trafiqeve të paligjshme dhe korrupsionit, krahas arritjeve, veç sa më sipër, nënvizojmë se mbetet shumë për të bërë, si nga prokuroria ashtu dhe nga strukturat e specializuara të policisë dhe të Shërbimit Informativ Shtetëror, jo vetëm nëpërmjet forcimit të bashkëpunimit të këtyre organeve, por mbi të gjitha për të ndërtuar një strategji dhe një luftë më efektive në të ardhmen. Veçanërisht duhen vënë në përdorim mjete dhe teknika shkencore në hetim, si dhe duhen trajnuar dhe ngritur profesionalisht policia gjyqësore dhe prokurorët që do të drejtojnë dhe kontrollojnë hetimin e këtyre veprave penale. Vlerësojmë për të nënvizuar se mungesat në funksionimin dhe profesionalizmin e policisë, mungesa e mjeteve të nevojshme shkencore, dhe mungesa e ligjit për mbrojtjen e dëshmitarëve, kanë qenë dhe mbeten pengesë serioze për ushtrimin e funksioneve me efektivitet nga organi i prokurorisë në luftën kundër krimit të organizuar dhe parandalimin e tij.”, thuhet në raportin e kryeprokurorit Sollaku. Përsa i përket veprave penale që lidhen me veprimtarinë e kundraligjshme të punonjësit shtetëror ose në shërbimin publik, janë ndjekur penalisht 407 procedime, me 224 të pandehur ose krahasuar me vitin 2002 me rritje 5.5 % të procedimeve të regjistruara. “Ndonëse në ndjekjen penale dhe gjykimin e këtyre veprave penale ka tregues pozitivë në rritje, deri dhe dënimin e disa nëpunësve të lartë të shtetit, gjendja e procedimeve penale nuk i përgjigjet realitetit të veprave penale që ekzistojnë në këtë fushë. Kontrolli i brendshëm në institucionet e Administratës Shtetërore, duhet të përmirësojë veprimtarinë e tij dhe metodikat e kontrollit, për të zbuluar dhe dokumentuar veprimtaritë abuzive dhe në kundërshtim me ligjin të nëpunësve të të gjithë niveleve, si dhe të kallëzojnë pa hezitim për ndjekje penale personat përgjegjës.”,- thotë kreu i akuzës shqiptare në raportin e tij.
Gjatë një viti në Shqipëri janë vrarë 271 personave dhe janë plagosur rëndë ose lehtë 421 të tjerë


Viti 2003, më shumë vrasje se një vit më parë

TIRANË - Veprat penale kundër personit janë edhe plaga më e rëndë e kriminalitetit në Shqipëri. Kjo për faktin se këto vepra penale janë kryer kundër individëve të veçantë të shoqërisë shqiptare dhe janë më të prekshme për popullin. “Për vepra penale kundër përsonit, janë regjistruar 2240 procedime, ose krahasuar me vitin 2002, me ulje 5.5 %.”, thuhet në raportin e Sollakut. Sipas tij, ndonëse në përgjithësi rezulton një tendencë në ulje e këtyre grup veprave penale, evidentohet një numër në rritje: 63 procedime për vrasje, neni 76 i Kodit Penal. Këto krime kanë sjellë pasoja të ndjeshme ndaj jetës dhe shëndetit, siç janë vdekja e 271 personave dhe plagosja e rëndë ose e lehtë e 421 personave. Nga këto procedime penale janë dërguar për gjykim, gjykuar dhe dënuar 863 të pandehur dhe për 642 të pandehur të tjerë vazhdon gjykimi. Për këto lloj krimesh të rënda organi i akuzës ka synuar ndjekjen e një politike të ashpër procedimi dhe gjykim, për të ndikuar në zbutjen dhe parandalimin e këtij fenomeni shumë negativ, me pasoja të rënda jo vetëm për viktimat dhe familjet e tyre, por edhe për sigurinë publike të shoqërisë në tërësi. Sipas Sollakut, në krimet e vrasjes vazhdon të ngelet shqetësues fenomeni i gjakmarrjes dhe konflikteve të pronësisë. “Ky fenomen përveç angazhimit të organeve të drejtësisë, kërkon marrjen e përgjegjësive dhe angazhimin e të gjithë strukturave të shtetit në luftën kundër tij.”, thotë kreu i akuzës shqiptare Sollaku. Në veprat që dëmtojnë rëndë shtetasit janë edhe ato kundër pasurisë dhe në sferën ekonomike. Ky grup veprash penale ka patur tendencë në rritje dhe krahasuar me grup veprat penale të tjera kanë patur përhapjen më të gjerë. Për këto vepra penale janë regjistruar 5101 procedime ose krahasuar me vitin 2002, me rritje 32.6 %. “Nga ana jonë janë dërguar në gjykatë dhe janë gjykuar e dënuar 2413 të pandehur, ndërsa për 1227 të pandehur vazhdon gjykimi. Në hetim janë 1312 procedime, me 579 të pandehur. .

Janë gjykuar e dënuar 145 të pandehur ndërsa janë ende në shqyrtim gjyqësor 62 persona të tjerë

Doganat, 206 çështje në hetim nga prokuroria
Krimet në fushën e doganave dhe për vepra penale në lidhje me takstat dhe tatimet janë regjistruar 206 procedime, me shifra pothuajse të njëjta me vitin 2002. Janë gjykuar e dënuar 145 të pandehur dhe janë në shqyrtim gjyqësor 62 të pandehur. Analiza e numrit të procedimeve për këto vepra evidenton tendecën në rritje 21.7 për qind të procedimeve për krime në fushën e doganave. Tendenca në ulje në masën 57 për qind të procedimeve për vepra penale në lidhje me taksat dhe tatimet, nuk pasqyron realisht gjendjen e kriminalitetit në këtë fushë të rëndësishme, ku vilen të ardhurat për buxhetin e shtetit. “Vazhdon të ndiehet mungesa e efektivitetit të kontrollit të brendshëm në taksa dhe tatime, si dhe për rrjedhojë nuk është zbuluar dhe kallëzuar kriminaliteti real në këtë sektor, që ka të bëjë jo vetëm me fshehjen e të ardhurave, por edhe me pastrimin e parave të pista”,- thuhet në raportin e Sollakut. Sipas tij, në këtë vështrim, një ndër prioritetet e punës së prokurorisë për këtë vit është rritja e efektivitetit të ndjekjes penale, për veprat penale që lidhen me evazionin fiskal, duke forcuar bashkëpunimin me autoritetet doganore dhe tatimore. “Ato duhet të përmirësojnë metodikat e kontrolleve fizike, të dokumentacionit dhe të bilanceve, të rrisin cilësinë e administrimit të dokumentacionit dhe evidentimin e pasojave që kanë ardhur nga veprimtaria e paligjshme, si dhe mbështetur në nenin 281 të K. Pr. Penale, në cilësinë e nëpunësve publik të bëjnë kallëzime për ndjekje penale në prokurori”,- thotë kreu i akuzës shqiptare.


Shifrat e krimit

Për trafiqe të paligjshme janë ndjekur 270 procedime, me 327 të pandehur. Është ngritur akuzë në gjykatë për 184 të pandehur dhe janë dënuar 105 prej tyre

Për kultivim dhe trafikim të lëndëve narkotike, janë ndjekur 333 procedime, me 364 të pandehur. Është ngritur akuzë në gjykatë dhe janë dënuar 148 të pandehur

Për vepra penale që lidhen me veprimtarinë e kundraligjshme të punonjësit shtetëror ose në shërbimin publik, janë ndjekur 407 procedime, me 224 të pandehur

Për vepra penale kundër përsonit, janë regjistruar 2240 procedime nga të cilat 63 për vrasje. Këto krime kanë sjellë vdekjen e 271 personave dhe plagosjen e 421 personave

Për veprat penale kundër pasurisë dhe në sferën ekonomike janë regjistruar 5101 procedimenga të cilat janë dënuar 2413 vetë, ndërsa për 1227 të tjerë vazhdon gjyqi

Për vjedhje të pasurisë, janë regjistruar 2693 procedime nga të cilta janë dërguar në gjyq dhe janë gjykuar e dënuar 1198 të pandehur, ndërsa 653 të tjerë janë gjyq

Për krime në fushën e doganave dhe për vepra penale në lidhje me takstat dhe tatimet janë regjistruar 206 procedime dhe janë dënuar 145 të pandehur 62 të tjerë janë në gjykim