Demaçi themelon "Forumi Qytetar i Kosoves"

[mani]

A do i bashkangjitet Qosja athue... ???


Adem Demaçi do të krijojë një parti të re politike


PRISHTINE ( 24 Janar) - Veprimtari i njohur kosovar dhe ish i burgosur politik Adem Demaçi, i cili pak kohë më parë dha dorëheqjen nga Bordi i Drejtortëve të RTK-së, ka vendosur që të formojë një parti të re politike. Bëhet e ditur se deri në fillim të muajit shkurt, pritet të bëhet promovimi i këtij subjekti, në krye të të cilit do të jetë Demaçi. "Kam dëshirë të angazhohem në punë më kreative dhe më të rëndësishme për Kosovën dhe për veten time", thuhej në letrën e dorëheqjes së tij nga posti i drejtorëve të Bordit të RTK-së. ro/ro (Balkanweb)

[Llapi]

ADEM DEMAÇI LËVIZË SPEKTRIN POLITIK TË KOSOVËS



Krijimi i një partie të re politikee cila do të jetë gjithpërfshirëse dhe do të plotësojë spektrin politik në Kosovë



"Kemi filluar me një grup shokësh që të marrim masat konkrete për krijimin e një partie të re në Kosovë"

Adem Demaçi



BBC: Çfarë nënkupton institucioni i dorëheqjes nga të gjitha funksionet e tij jopolitike, përfshirë edhe atë në Bordin e RTK-së dhe në KMDLNJ ?

Adem Demaçi: Unë mendoj se duhet që shqiptarët të mësohen që të dijnë edhe kur të largohen nga institucioni dhe që të dijnë të marrin edhe detyra pak më të vështira dhe jo të 'rutinohen'. Dy vjet e ca, sa i kalova si drejtor i Bordit të RTK-së, ishin interesante, por vazhdimi u bë jointeresant...

BBC: ...pra për ju interesante është diçka tjetër zoti Demaçi?

Adem Demaçi: Është fjala këtu që këtë kohë, energji dhe jetë që e kemi, unë mendoj se është e mençur që të përdoret më mirë dhe të investohet aty ku ka rezultate sa më shumë...

BBC: ..dhe ky vend është...

Adem Demaçi: Kemi filluar me një grup shokësh që të marrim masat konkrete për krijimin e një partie të re në Kosovë, për të cilën tani për tani nuk mund të flas më shumë. Në platformën politike jemi duke punuar intensivisht dhe ajo po përsoset e kompletohet për çdo ditë. Ne po bisedojmë me njerëz që eventualisht do ta pranonin këtë platformë politike dhe që do ta pranonin organizimin tonë. Por ne ende jemi në hulumtime, përgatitje, punë dhe parapërgatitje. Sa i përket këtij problemi unë nuk mund të flas më shumë.

BBC: Zoti Demaçi a do të thotë kjo se ju po përgatiteni që të rekrutoni njerëz nga partitë e tjera politike në Kosovë për të formuar partinë tuaj?

Adem Demaçi: Shikoni, unë po përgatitem që popullit të Kosovës, duke përfshirë këtu edhe të gjitha etnitetet e tjera, t'u ofrojë një rrugë tjetër dhe variant tjetër e rrugëdalje tjetër. Sepse, më duket se kemi rënë në një pellg ose më mirë në një kënetë politike e ekonomike, së cilës po i vie era çdo ditë e më shumë dhe e cila nuk po sjell rezultate për të dalë nga kjo situatë. Pra, dëshira dhe qëllimi im do të varet shumë nga fakti se a do të na pranojë ne populli i Kosovës.

Ka parti të vogla që na janë ofruar duke shprehur gatishmërinë për të bashkëpunuar me ne. Ky është qëllimi im që edhe njëherë dua t'i jap një shans dhe ta ndez një dritë në këtë errësirë politike dhe të jap një shenjë se ka rrugëdalje nga kjo situatë e të shpëtojmë nga kjo letargji e madhe, indiferencë e madhe dhe dëshpërim i madh i cili ka pushtuar shtresa të gjëra.

Të dalim nga kjo krizë e madhe politike e ekonomike, nga korrupsioni dhe të zezat që na kanë pllakosur, me fjalë tjera është një përpjekje që të hapet një rrugë tjetërfare, me njerëz që fjalën do ta mbajnë dhe me njerëz që Kosovën e kanë mbi të gjitha dhe jo interesat e veta grupore e partiake.

BBC: Zoti Demaçi por ju keni udhëhequr më heret me një parti politike, keni qenë madje edhe përfaqësues politik i UÇK-së, jeni shprehur në një periudhë të caktuar kohore se jeni të dëshpëruar me politikën. Çka e shtynë Adem Demaçin që sërish të hyjë në politikë, në kohën kur ne kemi aq shumë parti politike. Pse edhe një?

Adem Demaçi: Ashtu është. Por unë e kam tezën ndoshta pak të tepruar. Këto parti për kuptimin tim nuk janë parti. Sepse një parti, ose një udhëheqës a më shumë syresh, që i humbin zgjedhjet ose nuk kanë sukses apo pësojnë fiasko në politikë, sikur të ishte parti ajo nuk do t'i duronte ata njerëz në krye. Ne po përballemi me një lloj bajraktarizmi. Kësaj nuk i vie era parti dhe për hesapin tim nuk është në rregull.

Unë mendoj se duhet të formohet një parti e vërtetë e stilit evropian dhe botëror, në të cilën do të krijohej sistemi i cili do të pranonte individë, do të varej nga individët dhe jo nga një ose dy persona. Kjo parti do të shkonte tutje duke marrë cilësinë më të lartë të njerëzve. Pra të formohet një parti ashtu si i ka hije.

Duhet të mësohen shqiptarët, edhe pse nuk duan të mësohen, që udhëheqësit e dështuar, ata që kanë dhënë njëqind mijë prova se nuk janë për këtë punë, t'u thonë lamtumirë. Unë kam përshtypjen se udhëheqësit e deritashëm kanë vepruar në atë mënyrë që njerëzit e zot i kanë larguar nga partia dhe i kanë hedhur poshtë me qëllimin e vetëm që ata të mbesin bajraktarë.

BBC: Zoti Demaçi, a do të merrni pjesë ju në zgjedhjet e përgjithshme në Kosovë këtë vjeshtë?

Adem Demaçi: Ne ende nuk i kemi definuar gjërat prandaj më tutje nuk mund të shkojmë. Kjo që ju thashë besoj se është mjaft tani për tani.


Besiana-Info

[Brari]

Le te urojme kte parti te re..


Ne se punon mire hallall..
Ne ktu jemi..e do shikojme e degjojme..

[Arb]

Demaci gjithmone marron kudo qe gjindet. Ai eshte nje figure e piste e Kosoves. Mjere Kosova qe ka nje qelbesire si Demaci.

Ja veq si shprehet qeni plak, "Duhet të mësohen shqiptarët, edhe pse nuk duan të mësohen, që udhëheqësit e dështuar, ata që kanë dhënë njëqind mijë prova se nuk janë për këtë punë, t'u thonë lamtumirë."

Kush na qenka ky pleh qe na tregojka se cfare duhet mesuar e cfare duhet bere?

Formimi i partise se eshte vazhdim i rruges se tij kunder-kombetare. Demacit "nuk i ka pre asnjehere sopata ne nje vend." Gjenden 10-15 personalitete brenda tij.

[DriniM]

Adem Demaçi ,sikur duket vetë ( se jo njerzit siç përllasën ai ) nuk e ka kuptuar ,se ai duhet të jetë i pari që të mos i rasën hundët më në politik ,se ku ka hyrë m-ut e fare ka bërë .


Për çak i nevoitet partia e re tani Ademit ??!!!!
E pati formuar njëherë partinë e tij personale poltike PPK- ë ( partinë parlamentare të Kosovës ) .
Nuk bëri asgjë , se ka pasur lektorat edhe më pak se LBD-ja e Qoses ( nën 0.1% ) .

Mirë e ka Arb-i ,ai ka 15 karaktere mrenda vetës .
As është njeri i fjalës ,as është njeri i vendosur ,por syç fryn era e kthen gzofin .
Sa që më nga inati ndaj Rugëvës ,e propzoi rada trajkoviç-kën për kryetare të Kosovës .
Ashtu tru anomale ,ka ky Baca i burgjeve .
Këti duhet ti thuhet shkurt e shqip ,çërohu o tru p-jerdhur .

[Llapi]

Mos ofendo anetaret, shkruaj per temen. Anetari u paralajmeruar.

[Arb]

Vështrim: Me ç’njerëz do ta formojë partinë Adem Demaçi ?
--------------------------------------------------------------------------------

14 shkurt 2004 / TN

Duke e formuar këtë parti, ky vetes do t’ia shtojë edhe një minus në veprimin e tij politik të pasviteve të 90-ta. Tash, më mirë do të ishte që të heshtte fare në politikë, për shkak se ka bërë shumë gafe në të. Po të heshtte përfundimisht, dhe t’i kalonte këto vitet e fundit të jetës në qetësi, edhe do të mund të shpëtonte diçka nga autoriteti që ka pasur nga 28-vjetëshi në burgjet e Serbisë. Mbase, kështu, edhe do ta rikthente paksa atë. Për një hap të tillë, ai duhet të mendojë seriozisht, nëse një vepër të mirë e ka ndërmend t’ia lërë vetes.

Shkruan: Nazmi LUKAJ

Këta dy-tre muajt e fundit është përfolur kuleareve të kryeqendrës se Adem Demaçi, pas dështimit të tij në të gjitha postet që ka pasur, po përgatitet të dalë me një parti të re. Këtë, në një intervistë që e ka dhënë këto ditë për një medium elektronik, e ka pohuar edhe vetë ky. Si thonë këto kuleare, Demaçi ka vënë kontaktet edhe me disa politikanë të lartë të LDK-së dhe më pak të lartë, për t’i bindur se duhet t’i bashkëngjiten partisë së tij.

Në këtë përfolje, ka diçka të vërtetë e diçka jo, sepse veç disa emrave që shpeshherë janë treguar të luhatshëm në deklaratat dhe intervistat e tyre prej pasluftës e këndej, po përmenden edhe emra që gjithmonë janë dëshmuar të devotshëm ndaj programit të LDK-së.

Edhe të parët, edhe të dytët që përfliten, përbëjnë një numërim në gishtërinj, por janë emra të rëndësishëm të kësaj partie. Po ashtu, përfliten edhe emra nga PDK-ja dhe AAK-ja, që do të kalojnë në partinë e Demaçit. Nga këto parti, si “përforcim” në partinë e tij, përflitet se do të kalojnë një pjesë politikanësh, që tashmë veç janë mësuar t’i ndërrojnë partitë shpesh.

Në bazë të emrave që janë përfolur si kandidatë të mundshëm të kësaj partie të re, Demaçi do t’i tubojë rreth vetes një pjesë politikanësh, që i ndërrojnë konceptet nga frika, nga të menduarit se përfaqësojnë një elitë të mendimit politik, nga karrieristët që nuk gjejnë vend në asnjë parti dhe nga disa emra që asnjëherë nuk janë përfshirë askund, mirëpo që kurrë nuk janë shquar për ndonjë mendim të aftë politik. Një parti e këtij lloj konglomerati, që në start është e dënuar të dështojë, për shumë arsye.

Por, tri janë më të rëndësishmet:

E para: politikanët e përmendur nga LDK-ja, vetëm deri sa të jenë brenda saj, do të përfaqësojnë ndonjë autoritet në masë. Jashtë saj, do të veniten më shpejt seç e ndërrrojnë partinë. Pra, thjesht, do të jetë i papeshë veprimi i tyre në partinë që e ka pohuar Demaçi, se është duke bërë përpjekje për ta formuar. Shembull i kemi politikanët e mëparshëm të kësaj partie. Sapo e ndërruan partinë, brenda natës u shndërruan në njerëz të parëndësishëm edhe në partitë ku kaluan, po edhe në opinion.

E dyta: politikanët që përmenden nga radhët e AAK-së dhe PDK-së, me lëvizjet e tyre të shpeshta të koncepteve dhe të partive, nuk kanë peshë jo vetëm në masë, por as brenda partive të veta.

Dhe, e treta: Adem Demaçi ka vite që ka humbur autoritetin politik.

Emërimi i tij në krye të kësaj partie, nuk do të shënonte asnjë rëndësi për opinionin. Madje, do të ishte sinjifikim i një partie dështakësh. Një parti e tillë, është fare e pavlerë të formohet në Kosovë, sepse, si e tillë, që në start nuk pritet se ajo do të mund të krijonte ndonjë ndikim për ndryshimin e rrjedhave politike, me të cilat nuk u pajtuakan Demaçi dhe demaçianët!!!

Nga krejt kjo, do të dilte vetëm se është rritur për një parti më shumë spektri politik yni. Asgjë më shumë. Do të mbetej, si shumë parti të tjera të parëndësishme- vetëm e shënuar se është formuar dhe që posedon një zyrë për konferenca shtypi dhe për komunikata. Prandaj, kjo përpjekje e Demaçit do të dilte shterpe. Duke e formuar këtë parti, ky vetes do t’ia shtojë edhe një minus në veprimin e tij politik të pasviteve të 90-ta.

Tash, më mirë do të ishte që të heshtte fare në politikë, për shkak se ka bërë shumë gafe. Po të heshtte përfundimisht, dhe t’i kalonte këto vitet e fundit të jetës në qetësi, edhe do të mund të shpëtonte diçka nga autoriteti që ka pasur nga 28-vjetëshi në burgjet e Serbisë. Mbase, kështu, edhe do ta rikthehente paksa atë. Për një hap të tillë, ai duhet të mendojë seriozisht, nëse një vepër të mirë e ka ndërmend t’ia lërë vetes.

Se krijimi i kësaj partie do ta nxjerrte përfundimisht qesharak në politikë. E, duke u tërhequr prej saj, ka mundësi që të mbetet, së paku, në kujtesën e popullit, si atdhetar. Në fushën e politikës, populli e di mirë se nuk e ka dhënë asnjë provim me notë pozitive. Që të ruajë diçka nga rejtingu i tij i dikurshëm, ia preferoj heshtjen. Adem Demaçi i politikës, dhe baca Adem i kombëtarizmit të para viteve të 90-ta, është mirë ta mendojë shumë sinqerisht këtë. Tashmë i kanë mbetur vetëm dy rrugë:

rruga edhe e një dështimi në politikë, e cila përfundimisht do t’ia rrënonte edhe atë pak respekt që i ka mbetur në popull, dhe rruga e tërheqjes nga politika, për të rikthyer diçka nga rejtingu i tij i dikurshëm. Adem Demaçi është në atë lojën “Zgjidh e merr”. Ai ka dy mundësi: të mundohet të mbetet baca Adem ose Adem dështaku.

Të gjithë ata që e kanë identifikuar përpjekjen kombëtare me emrin e tij para viteve të 90-ta, dëshirojnë të mbetet baca Adem. Se politika dhe ky tashmë janë diametralisht të kundërt. Edhe vetë dinamika e saj, e ka nxjerrë jashtë rrjedhave. Sot është vetëm një Don Kishot në politikë. Gjatë shëtive nëpër ambientet e bukura të Prizrenit, ka edhe pak kohë ta mendojë këtë. Ndoshta klima e këtij qyteti të lashtë, më në fund, do ta kthjellojë, po e vuri gishtin në kokë për ta analizuar thellësisht lojën “Zgjidh e merr…”.

[Llapi]

Demaçi: Stop rrëshqitjes së Kosovës drejt Serbisë


Prishtinë, 17 shkurt (Kosovapress) Time: 17 : 39

Qëllimi është që ta shpëtojmë njëherë e përgjithmonë këtë popull tonin nga indiferenca, nga letargjia, nga vetkënaqësia, nga vetmashtrimi, të cilat na kanë pllakosur të gjithëve, për të cilat po intersohen këta që nuk janë brengosur njëherë për Kosovën, edhe forcat e huaja tjera që janë duke u munduar që në këtë mënyrë, me këto mjete, të na hipnotizojnë edhe të na grahin e të na fusin nën Serbi edhe njëherë, e pastaj kur t’iu del gjumi njerëzve, atëherë pyesin çka u bë e si u bë, i ka thënë Adem Demaçi të martën Kosovapressit, i pyetur përkitazi me nismën e tij të bërë pak a shumë publike për formimin e një partie politike.

[DriniM]

Qosja kishte dy autobusë elektorat, Demaçi do ti mbledhë padyshim së paku dy minibusë, Surroi ëndërron të bëhet President !


--------------------------------------------------------------------------------

17 shkurt 2004 / TN

Shkruan: Jahir DEMAJ

Duhët të jemi të sinqertë se në kuptimin kohorë, zgjedhjet Parlamentare dhe Presidenciale të këtij viti, (të dytat në Kosovën e pasluftës) janë ende larg. Mirëpo, kryesisht të vegjlit dhe humbësit e të gjitha zgjedhjeve në Kosovë, i kanë shaluar atëllartë e tyre të zi dhe i kanë mbrehur shpatat për situatat duke çarë frontet në të gjitha anët. Kush në mënyrë spektakulare e kush pak sa më tinëzisht. Ca duke sharë e duke mallkuar, ca duke fyer e duke kërcnuar. Ka një kryetar Partie, Hashimi i PDK-së, i cili jo që nuk priton ti vizitojë Komunat ku partia e tij qeverisë, por ai viziton edhe ato komuna në Kosovë ku të pakët janë ata që së paku e njofin si person, si në Gjilan p.sh. Larg asaj që t’ia ndalojë kush Hashimit vizitat e tilla, ruana Zot, por ka shumë që mendojnë se do të lodhet shumë deri sa të vijnë zgjedhjet.



Dhe kjo nuk i mjafton Hashimit, por e thërret edhe Kryeministrin e Kosovës Dr.B. Rexhepin që të drekojnë së bashku, aty ku nuk mungojnë edhe kamerat e RTK-së, të cilat së paku harruan të paraqesin në ekran dy politikanët tanë, (të së njejtës parti siq na e bëri të ditur vet Hashimi) duke pastruar dhëmbët pas drekës së majme. Kjo do të ishte shumë më spektakulare. Përndryshe, Hashimi po të donte mund ta thërriste Kryeministrin kur të dojë që ti raportoi edhe në selinë e partisë. Dorën në zemër më erdhi pak keq që në këtë takim dreke nuk ishte ftuar edhe Qosja, ( i ashtuqujturi Akademik) kolumnisti i Epokës së Re, zëdhëndëses së PDK-së. I cili në mos më shumë, sëpaku do ti kishte sjellë të përmbledhura të gjitha kolumnet e tij, të botuara në këtë ( të ashtuquajtur gazetë), të titulluara “Të rivdekurit e penduar”.
Sa për sqarim, i kam përdorur kllapat në këto dy raste duke e imituar vetë Qosjen. Kur ky, si Akademik që i thot vedit ka të frejtë të thotë i ashtuquajturi president, pse të mos ta kem unë të drejtën time që një gazetë të një formati të këtillë ta quaj të ashtuquajtur, së bashku me kolumnistin e saj. Për Qosjen është thënë dhe është shkruar shumë. Edhe padyshim se ka për tu thënë e për për tu shkraur akoma. Mirëpo, ai nuk po i lë kujt rend, pra po i thot vetë, pa e pyetur kush. Nuk ka lënë gjë pa përfolur e pa fyer. Nuk ka lënë kë pa e sharë e pa përlyer. Që nga Presidenti i Kosovës Dr.Ibrahim Rugova e deri te Akademik Nexhat Daci. Edhe derën e Akademisë së Shkencave, anëtar i së cilës ishte nuk e la pa pështyrë dhe jargisur. Marrja nuk hahët me bukë o “Akademiku ynë”.



I mjeri ti për vedi ku ke rënë. Nga “baba i kombit” të përfundosh në një kolumnist të të ashtuquajturës gazetë “Epoka e Re”, mozomakeq. Unë nuk do të merrem sot me analizën e shkrimeve të Qosjes, sepse nuk është kjo temë e këtij shkrimi.


Do të mjaftonte vetëm sa për kujtesë të cekën vetëm disa nga titujt dhe nëntitujt e kolumnave të tij, si: “Komprementimi i idesë së shtetit” me disa nga nëntitujt “Korrupsioni dhe nepotizmi”, “Krimi i organizuar”, “Uzurpimi i simboleve të shtetit”, “Daci dje ka degraduar Akademinë...sot Kuvendin” , “Lëreni aman Akademinë të bëjë gjumin” e të tjera marifete si këto, pa e lënë anash Kryeveprën e tij “I ringjalluri i penduar”.


Demaçi për një politikë tjetërfare

Nuk dua t’a përdorë krejt pa qëllim titullin e intervistës së “Bacës” dhënë BBC-së në shqip e cila doli në faqet e internetit. Prandaj ma thot mendja se Adem Demaçi i magjepsur nga një lëvizje studentore e para pak kohësh në Univerzitetin e Kosovës e cila doli me emrin “Për një Univerzitet tjetërqysh”, u frymëzua kaq shumë sa që i polli ideja që t’a lë rehatinë e Bordit të RTK-së, ku edhe zbathë mund të kontribonte ( i kishte lënë opangat te dera, si nëpër odat Llapiane), dhe thirri me kumbim; e gjeta formulën. Nga një Univerzitet tjetërqysh, një “Politikë tjetërfare”.

Vërtetë nuk do të kishte kuptim që “Baca” ( kështu jemi mësuar ta thrrasim që kur ishte me pushime në burgjet e Serbisë , ishalla nuk na i zë për të keq ), t’a kopjonte pikë për pikë këtë inisiativë dhe t’a përvetsonte si emër për Parinë tij të dytë. Partinë e parë nuk po ia përmandi sepsemund që i hidhërohet Bajram Kosumi i AAK-së. Siç edhe mund ta marrin me mend lexesit, “Baca” nuk ka çka thotë tjetër përpos asaj që e ka përsëritë e stërpërsëritë tashmë vend e paven, poshtë e lartë, andej e këndej , etjerë etjerë. (Edhe këto janë pikë përpikë fjalët e “Bacës”). Për hirë të së vërtetes unë jam përpjekur që t’a nxjerr thelbin e asaj që “Baca” ka thënë në këtë intervistë, por nuk po ia dal dot. Jo pse edhe është krejt bosh, por vërtetë nuk ia vlenë. Përgjegjet e tij mund të vlerësohen kryekëput “shukarije-mapirundi-parllamande”.

Ja për shembull se si përgjigjet “Baca” në pyetjen e Arbër Vllahiut (BBC) se çfarë nënkupton institucioni i dorëheqjes që ai po e vendos: Unë mendoj, thotë “Baca”, se duhët që shqiparët të mësohen që të dijnë edhe kur largohen nga institucioni dhe që të dijnë të marrin edhe detyra pak më të vështira dhe jo të ‘rutinohën’.Dhe vazhdon: “Është fjala këtu që këtë kohë, energji dhe jetë që e kemi, unë mendoj se është e mençur që të përdoret më mirë dhe të investohet aty ku ka rezultate sa më shumë....” . Hajt dreq e mere vesh se ku po na e qet Falltori “Baca Adem”.

Pra, se u largua Adem Demaçi nga RTK-ja që ai e quan institucion, e muarëm vesh edhe pse jo krejt të vërtetën e largimit. Por kjo nuk ka edhe aq rëndësi, sepse ai nuk na e ka zbuluar ende përmes kësaj inerviste se cilat detyra pak më të vështira do të dijë ai ti marrë, dhe nga kush ka për ti marrë..., në mënyrë që të mos ‘rutinohet’ siq thotë “Baca”. Se çka ka dashtë me thënë ai me fjalën ‘rutinohët’, unë nuk e gjejë dot. Pyeteni Falltorin.

Ndërsa sa i përket vazhdimit të përgjigjjes së tij se ku do ta investoj “Baca” atë kohë, energji dhe jetë që i ka mbetur atij (edhe pse ai është shprehur në shumës:...kur thotë: kohë, energji dhe jetë që e kemi), duhët të kemi edhe ne pakëz durim dhe të presim e të shohim. Unë dua shkurtimisht të ndalem vetëm edhe në një pyetje që gazetari i BBC-së ia shtron “Bacës”:...se ju ishit më herët udhëheqës i një partije politike, bile-bile edhe përfaqësues politik i UÇK-së, se jeni shprehur në një periudhë të caktuar kohore se jeni të dëshpruar me politikën. Çka e shtynë Adem Demaçin që sërishë të hyjë në politikë, në kohën kur ne kemi aq shumë parti politike. Pse edhe një? Vëni re; para se “Baca”Adem të përgjigjet, unë do të ju këshilloja, kush nuk e ka lexuar ta bëjë këtë.

Nëse jo për tjetër gjë së paku për ta mbajtë barkun së qeshuri. Kam përshtypjen që baca Adem duke qenë se ishte kohë të gjatë në Brodin ( më falni në Bordin e RTK-së) do ti ketë frymëzuar me ide dhe materiale të shumta edhe Shtupcat, edhe Quzat edhe Meseleshat, padyshim, se ka ide njeriu. Ja se si përgjigjet ai: Ashtu është. Por unë e kam tezën ndoshta pak të tepruar. Këto parti për kuptimin tim nuk janë parti. Sepse një parti, ose një udhëheqës a më shumë syresh, që i humbin zgjedhjet ose nuk kanë sukses apo pësojnë fiasko në politikë, sikur të ishte parti ajo nuk do t’i duronte ata njerëz në krye. Kësaj nuk i vije era parti dhe për hesapin tim nuk është në rregull. Ja kështu përgjigjet “Baca Adem”

Për të mos vazhduar më shumë t’a komentoj atë që thotë “Baca” unë mund të them sinqerisht se jo vetëm që gjërat të tilla të shkaktojnë të qeshura dhe dhimbje barku, por ato edhe t’a turbullojnë barkun aq keq sa që......! Prandaj, mua më mbetët që së paku të uroj sinqerisht që Partia e “Bacës” sido që ta quaj ai, të jetë parti e vërtetë, me taza (apo teze ) të tepruara, që i vie era (sepse ai thotë që këtyre partive që i kemi nuk po u vie era parti), dhe që të mos pësojë fiasko, sikur partia e Qosjes në zgjedhjet e para. Por ky është vetëm një urim dhe hiq më shumë se kaq. Bindja ime ma thot se Partia alla Shukarie e “Bacës” ka pësuar fiasko më shpejt se edhe e Qosjes, pa lindur akoma.


Prijesit i shtrohen qilimat e kuq, kurse Surroit i mbetët vetëm lëkura e murroit

Koha Ditore, Surronjane dhe botuesi i saj poashtu Sorroist, jo rrallë na sjell sihariqe, sikur shkrimin “Kthimi i prijesit në qilim të kuq”. Mirëpo, unë nuk dua me këtë rast që të bëjë komente të shumëta rreth shkrimit në fjalë, sepse përgjigje të merituar edhe ka marrë ai në lidhje më këtë shkrim. Dhe sa bukur ia thanë, si Luan me lëkurë të Gomarit. Mua personalisht nuk ma ka bërë as më të voglen përshtypje kjo shkarravinë e tillë, përpos faktit që unë këtë shkrim e gjeta te “Korrieri” në internet, sepse Gazetën e Surroit nuk e pëlqej dhe nuk e blej shpesh.

Aq shumë artikuj të përkëthyer nga Serbishtja, dhe jo rrallë është e “zbukuruar” me fotgarfi kriminelësh kjo gazetë, saqë nuk e meriton, sado indiferent që të provish të jesh. Por edhe diç të vërtetë ka në këtë shkrim. Që ju shtrua qilimi i kuq Presidentit të Kosovës Dr.Ibrahim Rugova në aeroportin e Prishtinës, vërtetë ju shtrua. Sikur për inatë të disave. Dhe se çka thot, se si e thot dhe për çfar interesash e thot Surroi kjo është krejt një gjë tjetër. E kam bindjen se ka bërë shumë mirë Surroi që ka shkruar bash kësisoi.

Pse e them këtë? Krejt e natyrëshme është përgjegjja. Po sikur të mos e kishte thënë ashtu siq e tha, si do ta kishim kuptuar na të tjerët që nuk na ka penguar, përkundrazi na ka gëzuar fakti që elita më prestigjioze e politikës, shkencës, kulturës etj. që e pamë në aeroprt e cila po organizaonte një pritje kaq madhështore dhe shumë të merituar për të zotin e shtëpisë së vet. Atëherë , ndoshta do të mendonim se edhe Surroi dhe Surratet e tjerë si ai do të jenë lumturuar për pritjen madhështore që iu bë Presidentit. Prandaj pra mendoj unë, që është shumë gjest i mirë kur ai tjetri ta thotë vet se sa poshtë mund të bien dhe sa thellë mund të zhytën në urrejtjet e tyre tipat e tillë si ky. Bëjnë shumë mirë që na e thonë vetë.

Veton Surroi, si dhe disa tipa si ky, mendimtar dhe ideator të një kallëpi të njetë, tejet dinak dhe shumë dredharak, dhe jo të padijtur dhe të pashëtitur, mjerisht, nuk kanë lënë gurë pa luajtur dhe pa e provuar imponimin dhe imponencën deri edhe në politikë, qoftë në atë kombëtare si dhe në atë ndërkombëtare, por fatmirësisht pa ndonjë sukses që ia vlenë të cekët me këtë rast. Mua më ka rënë rasti të dëgjoi me veshët e mijë se Vetoni do ishte mirë që të kandidonte edhe për postin e Presidentit. Dhe pse jo. Le ta matë guximin burri i dheut dhe të dalë në mejdan. Atëherë, nëse fiton kuptohët, edhe këtij do ia shtrojmë qilimat e kuq (të cilët siq dukët nuk rreshtë së ëndërruari), por deri atëherë Surroit vetëm lëkurën e murroit.

[Llapi]

Rruga me therra e Marathonomakut

Shkruan: Xhafer SHATRI

Ditë më parë, në një nga ditarët e tij, RTK lajmëroi shikuesit se Adem Demaçi paskesh dhënë dorëheqje nga kryesimi i bordit të telelevizionit publik të vendit. As RTK e as Demaçi nuk dhanë sqarime për shkaqet e dorëheqjes, dhe, si duket, edhe nuk i kërkoi kush, sepse, sipas një rregulli, në Prishtinë asnjë lajm nuk bëhet 'publik' pa u përtypur disa ditë nëpër fëlçitë e çarshisë.

Dhe, sipas çarshisë, Demaçi së shpejti po formoka një parti politike.

Ç’e paska shtyrë, athua, Demaçin të hiqet nga OJQ-të, për t'u futur në xhunglën e pafund të partive politike?

Shkaqet duhet të jenë të shumta, por mendja ma thotë se ndër kryesoret duhet të jenë: ngecja e proceseve në Kosovë për pasojë të një lidershipi të pa ide, të përçarë, të korruptuar dhe për më keq të shantazhuar; për mungesë të një elite që imponohet me ide e kredibilitet moral, dhe, në fund, për shkak të përballjes së paevitueshme e të shpejtë me shtetin serb lidhur me statusin e ardhshëm të Kosovës.

Demaçi më i zhgënjyeri duhet të jetë me partitë që vetëquhen "krah i luftës", sepse ato edhe më parë por edhe si koalicion qeveritar morën pjesë në shfaktorizimin e Kosovës, në gllabërimin e 5 viteve të vlefshme të pasluftës, kur pyrgu i pavarësisë duket gjithnjë e më larg nga velatorja e leckosur shqiptare.

Shtrohet pyetja se ku gjinden sot anëtarët e partisë së ardhshme të Demaçit? Mendoj se udhëheqja e partisë së tij duhet të dalë nga shoqata "Dardania", e cila kishte emra të nderuar në fushën e shkencës, por në një moshë të thyer për të përballuar kërkesat gjithnjë e më të mëdha që ka një parti politike.

Ndërkaq struktura organizative pse jo dhe një pjesë e anëtarësisë do të përbehet nga një sërë idealistësh që panë nga afër me sa pa cipë harxhuan karaxhozët 'e luftës' kredibilitetin e madh moral të Lëvizjes politike ilegale të Kosovës. Por këta janë të paktë dhe larg mediave që krijojnë opinionin në Kosovë e akoma më larg nga kapitali aq i nevojshëm për të financuar një parti politike që formohet, të thuash, në prag të zgjedhjeve.

Veç tyre do të ketë aktivistë të PDK-së dhe AAK-së, por dhe aktivistë të subjekteve te tjera të lodhur nga praktikat e lëkundjes së derës, që doemos do të shkojnë "te Baci"; por edhe politikanë apo 'veprimtarët' endacakë që kanë kërkuar çorbën e gati të gjitha partive politike…

Krejt në fund, baza e partisë së Demaçit do të përbëhet nga një vistër njerëzish të paktë, por kudo nëpër Kosovë, te të cilët emri Adem Demaçi për një gjysmëshekulli ka ushqyer, me sakrifica që nuk merren me mend, ëndërrën e tyre për një Kosovë të lirë.

Këta të fundit do të jenë detashmenti kryesor i partisë së ardhshme të Demaçit, sepse këta i kanë mbetur besnikë këtij emri edhe kur e kanë arrestuar serbët dhe e kanë dënuar bastardët shqiptarë, edhe kur kriminelët ia kanë shkërmoqur familjen, edhe kur pas burgimeve e përpjekjeve të gjata e kanë përbuzur në format më të neveritshme liderxhuxhët e shumtë që kishim e që kemi…

Nuk duhet harruar gjithashtu edhe një shtresë të inteligjencies së re, e mbetur krejtësisht anash, e cila po sheh se klasa aktuale politike po ha pamëshirë jo vetëm të sotmen, por edhe të ardhmen e Kosovës, dhe kjo shtresë mund të shohë te Demaçi personin që meriton të mbështetet në përpjekje për t'i kthyer Kosovës shpresën dhe dinjitetin.

Por a mjaftojnë këto kategori kandidatësh të mundshëm për të formuar një parti, në një inflacion përmbytës partish? Droj se jo. Sepse të formosh sot një parti në Kosovë domosdo duhet të kesh mbështetje të fuqishme financiare, e ne e dijmë se pronarët kryesorë të kapitalit në Kosovë jo vetëm kanë gjenezën te shteti serb, por edhe nuk do të mbështesin ndryshime rrënjësore në vend, sepse ato ndryshime nënkuptojnë gjithsesi edhe hulumtimin e prejardhjes së pasurisë së tyre.

Pashmangshëm shtrohet edhe pyetja se kush janë kundërshtarët kryesor të Demaçit në rendjen e tij të fundit për të bërë realitet ëndërrën e tij të kahershme për një Kosovë të lirë e të mosvarme, sepse ai tash ka 68 vjet, dhe përkundër vullnetit të hekurt, megjithatë jeta ka ligjet e saj…?

Kundër përpjekjeve të Demaçit do të jetë Serbia dhe i gjithë rrjeti i saj i shpeshtë në Kosovë, sepse ajo nuk do kurrsesi ta ketë përballë në vënien e kufirit mes shqiptarëve dhe serbëve një personalitet të guximshëm, të pathyeshëm dhe të papërlyer në pisllëqe, siç është rasti me Demaçin. Serbia është në gjendje të rrotullojë edhe malet, vetëm që në ditën vendimtare të përballjes të mos ketë përpara saj shqiptarë që kanë guximin dhe biografinë me prova që i shkon pas për ta shikuar shtetin serb drejt në sy.

Kundër Demaçit do të jenë të gjithë ata që me vite kanë ngrënë në çanakun e shtetit serb, sidomos peshkaqenët e UDB-së, të cilëve emri i tij ua kujton gabimet dhe fajet e panumërta që kanë bërë e për të cilat askush nuk u ka kërkuar llogari deri sot. Përkundrazi, ata janë bërë veprimtarë dhe këshilltarë të çmuar të partive kryesore politike të vendit.

Demaçi do ta ketë kundër mentalitetin provincial, dominues në Kosovë, i cili nuk duron tallazitje të mëdha, nuk mbështet veprimet energjike, nuk bën dallimin mes çashtërisë në politikë që pranon se i kemi punët llugë dhe demagogjisë që edhe nënshtrimin e dukshëm e quan pavarësi…

Kundër Demaçit do të jetë edhe UNMIK-u sepse kjo administratë politikanëve tanë aktualë ua di dhëmbë e dhëmballë: i ka pëcjellë në çdop hap, e di se sa dhe si janë të korruptuar, se ku, kur dhe si kanë shkelur aty ku njeriu që merret me punët e një populli nuk guxon të shkelë kurrë, prandaj me shumë prej tyre nuk e ka vështirë të merret vesh për t'u vënë kapakun shumë punëve (edhe të pista) në Kosovë. Me Demaçin këto punë nuk bëhen.

Si gjithnjë, kundër Demaçit do të jetë LDK dhe satelitët e saj, sepse aktualisht në skenën politike të Kosovës vetëm ai mund ta sfidojë realisht Ibrahim Rugovën, figurën politike dominuese në vend.

Kundër Demaçit do të jetë PDK dhe AAK, sepse askush sa Demaçi nuk mund t'i kërkojë llogari Thaçit, Sylës, Krasniqit, Hysenit, Haradinajt, Kosumit e sa e sa të tjerëve, të cilët me mosbërjet dhe keqbërjet e tyre i kanë shkaktuar dëme të pafalshme imazhit dhe sakrificave të panumërta të një lëvizjeje të fuqishme me një traditë më shumë se një shekull.

Kundër Demaçit do të jenë edhe bosët e mediave në Kosovë, sepse në këto pesë vjet të pasluftës ato nuk janë dëshmuar për profesionalizëm e vendosmëri në denoncimin e shumë të këqijave në vend, por të shumtën janë bërë pjesë e provincializmit mbytës në Kosovë.

Kundër Demaçit shpeshherë do të jetë edhe ai vetë. Ai ka për të vazhduar të kritikojë Rambujenë, edhe pse e di fort mirë se mosshkuarja e shqiptarëve aty do të ishte vetëvrasje. Ai shpeshherë do t'i grahë siç ia merr mendja, pa pyetur askënd si atëherë, në verën e vitit 1998, kur amerikanët përpiqeshin që të bëjnë shqiptarët me institucione të mirëfillta e ai të jetë kryetar qeverie, por Demaçi nuk donte, sepse thoshte se do ta bëj këtë me një kush të vetëm: që të largohet Rugova përgjithmone nga skena politike, gjë që ishte e vazhdon të jetë edhe sot krejt e pamundur… Demaçi mund të vazhdojë t'i dëgjojë edhe tash ata që e nxitën t'ia mbyllë telefonin Madelein Olbrajt-it, asaj Zonje të Madhe të cilës shqiptarët i detyrohen brez pas brezi.

Përkundër të gjithave, rifutja e Demaçit në politikë është ngjarje me rëndësi të dorës së parë. Ai, natyrisht do të humbë shumë energji për krijimin e rrjetit të partisë së tij, në ngutje e sipër në këtë strukturë do të ketë edhe njerëz që futen aty veçse për të përfituar diçka, apo edhe për të torpeduar Demaçin 'nga brenda'.

Por Demaçi do të sjellë freski në jetën politike të Kosovës; ai politikës së vendit do të përpiqet t'ia kthejë atë që nuk e ka fare: një çik njerëzillëk, një komunikim normal, larg arrogancës, imoralitetit dhe hipokrizisë që dominon gjerë e thellë skenën tonë politike.

A do të fitojë Demaçi?

Në këtë rast çdo parashikim rrezikon të jetë i paqëndrueshëm. Nga kjo perspektivë mund të përvijohet një ide nëse jo përpara, pas zgjedhjeve do të ketë një aleancë mes grupeve të ndryshme parlamentare, i cili zor se do ta marrë vota të mjaftueshme për të formuar qeverinë, për të zgjedhur presidentin etj., por sidoqoftë do ta rrudhë sadopak spektrin që dominon LDK-ja. Në këtë rast bashkëqeverisja do të jetë krejt e pamundur. Dhe ndoshta ky do të jetë një kontributi tjetër i madh që Demaçi i bën vendit: të krijohet një opozitë serioze, pa të cilën nuk mund të mendohet demokracia; të kontribuojë në konsolodimin e institucioneve, në futjen e moralit dhe përgjegjësisë si kategori të domosdoshme edhe në prakrikat politike në Kosovë.

Po ndonjë rezultat tjetër? Vështirë të identifikohen që tash, por do të jetë një përpjekje e sinçertë e serioze në favor të pavarësisë së Kosovës, siç është maratonë pas maratone e gjithë jeta e Demaçit... dhe janë këto rendje e përpjekje që atë e bëjnë të jetë i respektuar jo vetëm nga ithtarët po edhe nga kundërshtarët e armiqtë e tij.

Në qërshor të vitit të kaluar, njëri prej kryetarëve më të mëdhenj që ka pasur SHBA, Bill Klinton, në një ceremoni të organizuar për nder të tij nga Këshilli Shqiptaro-Amerikan, u tha të pranishmëve: shqiptarëve ju mungon Mendela, personi që do të komunikonte me minoritetet e Kosovës…

Kosova e ka pasur dhe vazhdon ta ketë edhe sot Mandelen e vet, të cilin në moshë të thyer, lahperët e Kosovës e detyruan të formojë një parti politike… Sepse Demaçi është i vetmi që ka komunikuar me komunitetet në gjuhën e tyre, ai u ka ndejtur atyre pranë në orët më të liga dhe në gëzimet e tyre… Me këtë qëndrim ai e ka nderuar Kosovën në botë, por nga populli i vet ka marrë si shpërblim përqeshjen dhe përbuzjen, ‘dhuratat’ më të shpeshta që popujt e vonuar kanë për vlerat e tyre më të mëdha.

[Llapi]

2004-02-19 20:05:00 - Adem Demaçi: Se shpejti Kosova me nje Parti te re te quajtur: FORUMI I QYTETAREVE TE KOSOVES (FQK)
Se shpejti ne Kosove fillon veprimtarine e saj edhe nje parti e re politike e cila do te quhet FORUMI I QYTETAREVE TE KOSOVES. Burime te lajme.net nga Prishtina bejne te ditur se ne krye te saj qendron personaliteti i shquar politik dhe publik i Kosoves Adem Demaçi Nen drejtimi e Demaçit nje grup nismetaresh kane bere gati projektplatformen e Partise se Re. Agjensia Lajme.net ka arritur ta kete kete Projektplatforme. Ne te midis te tjerash thuhet se: Kosova po perjeton nje krize te thelle politike, ekonomike dhe morale dhe nga kjo krizë tepër e thellë, nuk do të mund të dalë pa një opozitë të fuqishme e të bashkuar të të gjithë banorëve të saj; Projekt Platforma vazhdon se: Prandaj ne, një grup nismëtarësh, nuk mund të qëndrojmë edhe më tutje indiferentë dhe të shikojmë se çfarë është duke ndodhur e duke mos ndodhur rreth e rrotull nesh. Ne, në mënyrë më serioze dhe energjike, ngremë zërin tonë kundër indiferentizmit, apatisë, letargjisë, konformizmit, vetëkënaqësisë dhe vetëmashtrimit, mjete këto hipnotike, me të cilat disa nga liderët tanë të paralizuar dhe disa faktorë ndërkombëtarë, po mundohen të na vënë në gjumin e dorëzimit e të nënshtrimit. Me poshte ne ProjektPlatforme thuhet se: Ne gjithashtu po shohim se rinia jonë, e frymëzuar me idealet e lirisë, e frymëzuar me idealet e demokracisë perëndimore e humaniste, çdo ditë e më tepër, po kërkon rrugëdalje nga kjo situatë e paperspektivë. Rinia jonë heroike, e mbushur me hov e me energji pozitive, gjithnjë e më vrullshëm, po kërkon rrugëdalje nga kjo kënetë politike, ekonomike e kriminale në të cilën është katandisur atdheu ynë i vetëm – Kosova. Prandaj, duke mos dashur të pajtohemi që kjo energji e pakufishme rinore të shpërthejë në mënyrë të pakontrolluar, ne, një grup nismëtarësh, jemi vënë në aksion që, së bashku me të gjithë qytetarët brenda e jashtë Kosovës, pa dallim gjinie, kombësie a përkatësie etnike, pa dallim feje, besimi a ideologjie, por 1. që në zemër kanë formimin e konusit udhëheqës politik, kompetent, qytetar, që synon lirinë e pavarësinë e Kosovës; 2. që në zemër kanë themelimin e ngritjen e shtetit demokratik që synon edukimin humanist, parandalimin e krimeve në mbështetje të vetorganizimit qytetar, që synon pluralizmin e vërtetë politik, mendimin e lirë, fjalën e lirë, veprimin e lirë qytetar , të drejtat dhe barazinë për të gjithë qytetarët e Kosovës; 3. që në zemër kanë paqen, tolerancën, bashkëpunimin dhe dashurinë midis të gjithë qytetarëve të Kosovës e midis të gjithë popujve të mbarë botës; të themelojmë Organizatën Politike Paqësore: FORUMI QYTETAR I KOSOVËS (F. Q. K.) ProjektPlatforma politike e Partise se re perfundon: Me këtë rast, thërrasim të gjithë qytetarët e pjekur të Kosovës dhe gjithë njerëzit e vullnetit të mirë nga mbarë bota, që ndërmarrjen tonë tejet të vështirë, por tejet fisnike, ta ndihmojnë e përkrahin, me të gjitha mjetet e mundësitë që kanë në dispozicion, por pa kushtëzime e ndërhyrje interesash personale a grupore. Së shpejti, Organizata Politike Paqësore në formim, F.Q.K. do ti ketë edhe Programin e Statutin e vet. |||Lajme.Net|||

--------------------------------------------------------------------------------

[Albo]

Ndryshimi i emrit te partise nuk ka per te kthyer ne politike Demacin. Ndryshimi i botekuptimit dhe qendrimeve te Demacit ka per te rizgjuar interesin e elektoratit shqiptar ne Kosove per Demacin dhe formacionin e tij politik.

[Drini]

Prishtinë, 20 shkurt (QIK) - Pas paralajmërimeve të shumta, veprimtari shumëvjeçar për të drejtat e njeriut Adem Demaçi ka dalë me një projekt për formimin edhe të një partie politike në Kosovë. Forumi Qytetar i Kosovës është emërtuar subjekti që do ta drejtojë Demaçi. Në një projekt të grupit nismëtar për formimin e kësaj partie, cila u është shpëndarë mediave, u bëhet thirrje "qytetarëve të pjekur të Kosovës dhe të gjithë njerëzve të mirë nga mbarë bota" që ta përkrahin këtë iniciativë. Më tutje thuhet: "Na vjen keq që liderët aktualë kosovarë me vlerësimet e tyre të gabuara sollën veten dhe krejt Kosovën në një gjendje të mjerë dhe në rrugën pa krye", duke shtuar se "për të gjitha këto që po ndodhin para syve tanë nuk mund të shfajsohen as vetë qytetarët e Kosovës".
Deri më tash nuk janë bërë të njohur emrat e grupit nismëtar për formimin e kësaj partie, përveç Demaçit.

--------------------------------

Neper kuluaret dhe cajtoret e Prishtines po flitet se nenkryetare e partise (shumenacionale te Demacit) Forumi Qytetar i Kosovës, do te behet Rada Trajkovici. Ende nuk dihet se cfare postit do te kete Qosja ne ate parti, apo edhe me tutje do te mbetet keshilltar ne prapaskene. Nderkaq dihet se ne ate parti do te hyjne te gjithe marksistet e lene pa pushtet, integralistet titiste, magjupte e gabelte dhe i tere llum-takemi i Kosoves, qe deri me tani kane nderruar se paku tri parti.

Urime e pergezime baces, rrugen per ne postin e presidentit te Kosoves e ka te shtruar me lule. Por cka do te beje i gjori me kuroren e mbretit te magjupeve?

[Llapi]

Drini
Neper qajtoret e Prishtines po flitet se ne ket parti do te futen te gjith ata qe jan te paknaqur me partit e tyre dhe natyrisht edhe ata qe kan qen te pa parti.
Drini nuk e di perse kaq heret te kan kaplue ethet dhe po frigsohesh aq shum se cilet personalitete do de largohen nga LDK-ja dhe do ti bashkangjitet Baces,dhe kqyrni qysh tani filloni ti quani ata qe do te largohen prej partis tradhtar siq keni veprue me te gjith ata qe e braktisen LDK-ne siq jan:
Y.Hysa M.Krasniqi.I.Berisha. M.Kraja.J.Bugjovi B.Bukoshi.I Tolaj.R.Buja H.Hyseni.M.Hajrizi eshume e shume te tjer qe sa ishin ne LDK ishin patriot siq jau kthyen shpinen LDK-se filluet ti quani tradhtar e qka jo.

[Llapi]

Projektplatforma politike e organizatës politike paqësore në themelim: FORUMI QYTETAR I KOSOVËS ( FQK)

PËR DISKUTIM INTERN E PUBLIK







ADEM DEMAÇI LËVIZË SPEKTRIN POLITIK TË KOSOVËS


Dy çështje thelbësore politike të Kosovës që kërkojnë zgjidhje sa më të shpejtë:



KONUSI UDHËHEQËS POLITIK

QYTETAR I KOSOVËS

E SOVRANITETI E INTEGRITETI I SAJ TERRITORIAL



NGA NJË GRUP NISMËTAR

KONUSI UDHËHEQËS POLITIK



Burimi i të gjitha problemeve politike, ekonomike, arsimore, kulturore etj. të Kosovës sot qëndron te mungesa e konusit udhëheqës politik qytetar të Kosovës dhe te rrezikimi i sovranitetit e integritetit të saj territorial. Sa i takon konusit udhëheqës politik qytetar, të gjithë e kanë të qartë rëndësinë dhe domosdonë e tij. Mirëpo, që nga fillimi e deri në ditët e sotme, politika vetjake e përçarëse e kreut të LDK-së pengoi arritjen e këtij qëllimi me rëndësi thelbësore për politikën kosovare e më gjerë. Gjithashtu as partitë që dolën nga krahu i luftës, për shkak të dijes së tyre të vogël politike dhe për mungesë të vetëdijes së mjaftueshme patriotike, nuk qenë në gjendje të luanin këtë rol me rëndësi thelbësore e historike.









ÇËSHTJA E SOVRANITETIT



Sa i takon çështjes së sovranitetit, ka ndoshta në Kosovë qytetarë që nuk e kanë krejt të qartë kuptimin e fjalës sovranitet. Një spjegim i thjeshtë dhe i kuptueshëm për të gjithë mund të jetë ky: ata që disponojnë, ose edhe më shqip, ata që kanë në dorë fatin e Kosovës me gjithë çka ka mbi tokë e nën tokë, ata janë sovranë të Kosovës. Këtu, bashkë me njerëzit përfshihen edhe pasuritë si tokat, ujërat e madje, deri në lartësinë ku mund të kontrollohet edhe qielli mbi tokën e Kosovës.

Si po shihet çështja e sovranitetit, për një popull, për qytetarët e një vendi, është çështje mbi të gjitha çështjet. Sovraniteti dhe integriteti janë shfaqje konkrete, janë mishërim i atyre fjalëve që ne përdorim përditë si liri e pavarësi.



SOVRANITETI NË BOTËN E SOTME



Ç’është e vërteta, sot, shumë shtete të Evropës kanë hequr dorë e po heqin dorë nga pjesë të konsiderueshme të sovranitetit të vet dhe atë e kanë bartur e po e bartin në organizmat rajonale ndërkombëtare, në interes të bashkëpunimit e të zhvillimit ekonomik, teknologjik, shkencor, kulturor, arsimor e shoqëror. Edhe ne kosovarët duam ta bëjmë një gjë të tillë, por nga pozitat e shtetit të lirë, të pavarur e sovran dhe me vullnetin tonë e, jo t’i bashkohemi Bashkësisë Evropiane si koloni e Serbisë.



KU ISHIM E KU JEMI SOT?



Tash dy mijë e sa vjet ne, në Kosovë, nuk ishim as nuk jemi as të lirë as sovranë mbi tokën tonë. Prandaj edhe bëmë gjithë ato kryengritje gjatë historisë sonë për të siguruar sovranitetin, përkatësisht lirinë për ne dhe për tokën tonë.

Ku jemi sot? Të gjitha përpjekjet tona, në njërën anë dhe lojrat e botës me ne dhe rreth nesh, në anën tjetër, janë bërë dhe po bëhen lidhur me sovranitetin mbi Kosovën. Populli i Kosovës, që nga pranvera e 1996-tës, nën udhëheqjen e heroit tonë Adem Jashari, u ngrit në kryengritje dhe luftoi heroikisht duke u flijuar vetë me gjithë familje dhe, bashkë me ta edhe mijëra liridashës, me të vetmin qëllim për të pasur sovranitetin mbi Kosovën, përkatësisht për të gëzuar lirinë tonë të merituar.

Nga kjo luftë e pabarabartë, me ç’rast erdhi në shprehje gatishmëria e pamasë e shqiptarëve dhe jo vetëm e shqiptarëve për t’u flijuar për lirinë e shtetin e vet të pavarur, faktorët ndërkombëtarë u alarmuan seriozisht. Ata u bindën se regjimi serb nuk do të mund të shuante kryengritjen liridashëse kosovare as me masat më brutale dhe prandaj u bënë gati që të ndërhynin me qëllim që të parandalonin turrin kriminal-gjenocidal e të vendosnin paqen në këto hapësira. Mirëpo, midis këtyre faktorëve ndërkombëtarë pati edhe të atillë që ndërhynë me qëllim që të shpëtonin Serbinë nga falimentimi i plotë politiko-moral, duke synuar edhe ruajtjen e statusit kolonial të Kosovës brenda territorit të shtetit serb. Në nxitim për ndërprerjen e gjakderdhjes, të gjithë faktorët ndërkombëtarë u pajtuan në një pikë se duhej urgjentisht ndalur luftimet e pastaj të shihnin se kush çka do të mund të përfitonte nga qëllimet dhe interesat e veta gjeostrategjike në Kosovë e rreth Kosovës. Për të arritur këtë objektiv, faktorët ndërkombëtarë, me anën e “bindjeve” në formën e kërcënimeve dhe premtimeve, ia dolën që, në fillim të vitit 1999, të bindnin udhëheqjen e asokohshme të UÇK-së që të ndalte kryengritjen dhe të pranonte, nën kushte nënshtruese, bisedime me faktorët ndërkombëtarë dhe me regjimin gjenocidal e kriminal serb, në Kështjellën Rambuje, pranë Parisit. Kushti nënshtrues ishte pikërisht ai që në ftesën e ministrit të atëhershëm të Britanisë së Madhe Z. Kuk, midis dhjetë pikave tjera, e para ishte edhe ajo që shkruante se çështja e sovranitetit dhe integritetit të (atëherë) Jugosllavisë mbi Kosovën do të ishte pikë e panegociueshme!

Dhe, s’kishte si të ndodhte ndryshe, ata kosovarë që u nisën për negociata në Rambuje nën kushtin e njohjes së sovranitetit të (atëherë) Jugosllavisë mbi Kosovën, pas disa ditë shtrydhjesh e ndrydhjesh të mundimshme, nënshkruan njohjen e sovranitetit dhe integritetit të Jugosllavisë mbi Kosovën.



RASTI PËR TË SHMAGUR GABIMIN



Dihet se këtë dokument kosovarët e patën nënshkruar vetëm me palën ndërkombëtare. Pala serbe nuk e pati nënshkruar. Mirëpo, pala kosovare, të paktën gjatë veprimeve të egra ushtarake të regjimit serb, me ç’ rast aktet gjenocidale dhe pastrimet etnike, me përmasa biblike, të ushtruara mbi popullin e pambrojtur të Kosovës tmerruan gjithë botën, nuk shfrytëzoi të drejtën që të tërhiqte nënshkrimin e vet mbi dokumentin Rambuje-Paris. Arsyet dhe argumentet për të hequr dorë nga nënshkrimet e tyre në Rambuje ishin jashtëzakonisht të forta dhe të pakontestueshme.



MARRËVESHJA E KUMANOVËS



Mirëpo, meqë ata që nuk duhej të heshtnin heshtën, makineria ndërkombëtare vazhdoi realizimin e neneve të Marrëveshjes Rambuje-Paris. Me përfundimin e veprimeve ushtarake, në Kumanovë, u nënshkrua Marrëveshja ushtarake-teknike midis forcave ushtarake të NATO-s dhe të Jugosllavisë, por pa UÇK-në si palë ndërluftuese. Pa UÇK-në, sepse pala Kosovare me nënshkrimin e dokumentit Rambuje-Paris, përkatësisht me njohjen e sovranitetit të Jugosllavisë mbi Kosovën, kryengritjen e lavdishme çlirimtare të popullit të Kosovës, kundër pushtuesve dhe kolonizatorve serbë, e kishte shndërruar e pranuar si konflikt qytetar brenda shtetit (të atëhershëm) jugosllav.



REZOLUTA 1244 E KS TË OKB



Fillë pas kësaj, Këshilli i Sigurimit i Organizatës së Kombeve të Bashkuara, mbështetur në dokumentin e Rambuje-Parisit, nxori Rezolutën 1244, në të cilën u përforcuan dhe u vulosën nenet nga dokumenti Rambuje-Paris për njohjen ndërkombëtare të sovranitetit të (atëherë) Jugosllavisë mbi Kosovën. Edhe pas kësaj kosovarët nuk bënë asgjë që të kundërshtonin Rezolutën e padrejtë 1244 të OKB-së brenda të cilës nuk përfshihej e drejta e kosovarëve për vetvendosje. Për t’u bërë edhe më keq e më tragjike krerët e partive kosovare, nënshkruesë të dokumentit të Rambuje-Parisit, filluan që të thirreshin në Rezolutën 1244. Kur Kosovës iu shkëput një copë e territorit, siç ishte rasti me Debelldenë dhe me 20% të Kosovës veriore, atëherë “naivët politikë” të Kosovës u thirrën në terësinë territoriale që Rezoluta 1244 i garanton Kosovës duke harruar që e njëjta Rezolutë 1244 i garanton (atëherë) Jugosllavisë e tash Unionit Serbi-Mali i Zi (USMZ) sovranitetin dhe integritetin mbi krejt territorin e Kosovës.



E KEQJA NUK KA FUND !



Mirëpo, disa individë të skenës sonë politike ende po sillen si të dehur dhe si rosat në mjegull. Ata ende po qëndrojnë të hutuar brenda qarkut të mbyllur politik pa koncepte të qarta të veprimit për të dalur nga kjo gjendje e mundimshme. Ata nuk po dinë apo nuk po duan të dinë se koha demantoi dhe zhvlerësoi përfundimisht Rezolutën 1244 të OKB-së. Rezoluta kështu si është, - pa të drejtën për vetvendosje për kosovarët, është burimi i të gjitha dokumenteve e rrjedhave që erdhën e po vijnë pas saj. Ata, duke qenë të pushtuar nga interesat e veta të mjera personale, harrojnë fare se cili është interesi i dorës së parë për Kosovën dhe se për çfarë duhet të përpiqen. Ata kapen pas lloj-lloj “lodrash”, por kurrsesi nuk guxojnë të merren me atë që është thelbësore, sepse rrezikojnë të humbasin kolltuqet. Prandaj merren me fshehjen e të vërtetës, ndërsa Kosova mbetet, e ngarkuar me kriza ekstreme politike, ekonomike e shoqërore, dhe realisht është në rrezik që, përsëri, të rikolonizohet edhe me ushtri e polici nga shteti serb.



ARGUMENTE TË PAKONTESTUESHME



Sovraniteti i Serbisë mbi Kosovën, nga Rezoluta 1244 e KS, hap pas hapi, para syve tanë, po jetësohet.

Ja disa argumente më kryesore për këtë fakt: 1. Askush nga faktorët ndërkombëtarë nuk i njeh kufijt midis Kosovës e Serbisë si kufij shtetëror, por vetëm si kufij administrativ. 2. Në bazë të këtij fakti, Serbisë iu bë e mundur që disa mijëra hektarë tokë të Kosovës t’ia falte Maqedonisë. 3. Në bazë të këtij fakti Serbisë iu bë e mundur që të ripushtonte pothuaj 20% të Kosovës: pjesën e Mitrovicës në veri të Ibrit, Zubin Potokun e Leposaviqin, bashkë me Zveçanin. Këtu nuk po përmendim enklavat serbe të cilat, në të vërtetë, janë duke bërë jetë eksterritoriale në brendi të territorit të Kosovës. 4. Në bazë të këtij fakti, pjesëtarët e policisë vendore – kosovare, nuk i kanë në dorë kompetencat thelbësore, por vetëm kompetencat ndihmëse dhe të dorës së dytë. 5. Në bazë të këtij fakti UÇK u çarmatos dhe u demobilizua, kurse TMK-ja, gjoja si trashëgimtare e UÇK-së, hap pas hapi, por në mënyrë këmbëngulëse, po shkallmohet dhe po shndërrohet në organizatë civile për nevojat emergjente, ashtu si e përshkruajnë nenet e Rezolutës 1244. 6. Në bazë të këtij fakti u nënshkrua marrëveshja e fshehtë partneriste mbi Kosovën midis z. Hakerup dhe z. Çoviq. 7. Në bazë të këtij fakti u sajua dhe u miratua “Korniza Kalimtare Kushtetuese e Kosovës”. (Mendoni përse “kornizë” dhe përse “kalimtare?!) e cila, të gjitha kompetencat që mund të ndikojnë në marrjen e sovranitetit të kosovarëve mbi Kosovën, lehen në duar të të Dërguarit Special të Sekretarit të Përgjithshëm të OKB-së. Mos të harrojmë të përmendim me këtë rast se në hartimin e kësaj Kornize Kushtetuese, përveç ekspertëve të Hakerupit, morën pjesë edhe 18 juristë të pandërgjegjshëm kosovarë. Këtë Kornizë, pas një rezistence të mefshtë që u zhvillua në Këshillin Tranzitor të Kosovës që, edhe ashtu, nuk kishte kompetencë vendimmarrjeje, e miratoi Këshilli i Përkohshëm Administrativ i Kosovës, atëherë organi më i lartë i pushtetit vendor të Kosovës. 8. Në bazë të faktit të sovranitetit të Serbisë mbi Kosovën, telefonia fikse në Kosovë vazhdon të funksionojë vetëm sipas kodit të Serbisë. 9. Në bazë të këtij fakti Kosova nuk ka të drejtë të ketë as numrin e vet të telefonisë celulare, por me çmim enorm huazon numrin nga Monako-Franca. 10. Në bazë të këtij fakti gjithandej Kosovës qarkullojnë lirshëm automjetet me targat e shtetit serb, ndërsa automjetet me targat “KS” nuk guxojnë të hyjnë në territorin e Serbisë e madje as në territorin e Mitrovicës përtej Ibrit! 11. Në bazë të këtij fakti për t’u pajisur me dokumentet e udhëtimit ose pasaportat e UNMIK-ut, për të dëshmuar identitetin personal, duhen patjetër edhe dokumentet me origjinë të shtetit serb.

12. Në bazë të faktit se USMZ i njihet sovraniteti mbi Kosovën, më në fund, Serbia arriti që të bllokojë plotësisht funksionimin e Agjencisë Kosovare për Mirëbesim që do të duhej të organizonte dhe të mbikëqyrte privatizimin në Kosovë. Lidhur me këtë duhet shtuar se UNMIK-u po insiston që AKM-ja të punojë sipas ligjeve okupuese të shtetit serb, të cilat në kohën e vet qenë nxjerrë nën dirigjimin e kryemafiozit dhe kriminelit Millosheviq! 13. Në bazë të faktit se Sërbisë i njihet sovraniteti mbi Kosovën, Kuvendi i Kosovës nuk mund të marrë asnjë vendim efektiv që mund të lëndojë sado pak sovranitetin e Serbisë mbi Kosovën. Mos të përmenden të gjitha ato rezoluta të cilat i nxori Kuvendi i Kosovës dhe të cilat u hodhën poshtë menjëherë dhe me përbuzje nga udhëheqësit e UNMIK-ut. 14. Në bazë të faktit se USMZ gëzon sovranitetin mbi Kosovën, shteti serb, më 28 dhjetor 2003, organizoi e zhvilloi zgjedhjet e veta parlamentare duke përfshirë edhe territorin e Kosovës - pa u penguar nga askush!

Ka edhe pika të tjera që mund të përmenden, si: siguria, gjyqësia, marrëdhëniet e Kosovës me jashtë, ekonomia e financat, Rregullorja për sistemin zgjedhor, etj.



PYETJA E MADHE



Tash, shtrohet pyetja e madhe: përse ndodhi e po ndodhë kështu? Ndodhi kështu, sepse ata që bënë e po bëjnë vlerësime politike, duke qenë të ngarkuar nga interesa vetjake, këto vlerësime politike i bënë dhe po i bëjnë gabimisht. Dhe, gabimet politike, nëse nuk korrigjohen me kohë e rrënjësisht, me kalimin e kohës vijnë e rriten, zgjerohen e thellohen si metastaza kanceroze. Por, edhe më keq, me kalimin e kohës, gabimet politike, gjithnjë e më zor mund të mbulohen e fshihen dhe ato gjithmonë përfundojnë me pasoja të hidhura për vlerësuesit e gabuar politik, për ithtarët e tyre dhe për mbarë qytetarët e Kosovës.

Mirëpo, në natyrën e njerëzve shpirtvegjël është që të mos i pranojnë gabimet e veta dhe prandaj as nuk mund t’i korrigjojnë ato. Njerëzit shpirtvegjël, kur, falë rrethanave të caktuara, vijnë në pozita udhëheqëse domosdo bëhen shkaktarë të konflikteve e gjakderdhjeve, përndryshe, të panevojshme shoqërore. Gjëra të tilla po ndodhin jo vetëm te ne, por edhe gjithandej botës së sotme.



Ç’BËJNË KUKULLAT TONA POLITIKE?



Udhëheqësit politik të Kosovës sot, nuk janë duke bërë asgjë serioze që të shtyjnë Këshillin e Sigurimit të OKB-së që të reflektojë seriozisht mbi çështjen e Kosovës. Pas njohurive të sakta e të thella mbi Kosovën, KS, nuk do të mund të mos ndërrojë qëndrimin e vet pasiv sot e të mos marrë masat e duhura aktive në favor të njohjes së të drejtës për vetvendosje të popullit të Kosovës. Përmes një referendumi, nën mbikëqyrjen ndërkombëtare, qytetarët e Kosovës, edhe një herë, do shprehin vullnetin e vet politik e do të vendosin vetë për të ardhmen e vet e jo, për të ardhmen e Kosovës e të popullit të saj, të vendosë dikush tjetër.



RIKOLONIZIMI SERB I KOSOVËS



UNMIK-u, me bërjet dhe mosbërjet e veta, si servis i KS-së, sistematikisht, pa hasur në kundërshtim serioz të kosovarëve, është duke përgatitur rikolonizimin e Kosovës nën shtetin serb, në formën e trajnimit dhe konsolidimit të strukturave të dëgjueshme kosovare që do të pajtoheshin me një rikolonizim serb të Kosovës. Paralel me këtë proces, UNMIK-u, hap pas hapi, është duke përgatitur largimin nga Kosova, të forcave ushtarake të KFOR-it dhe të mekanizmave të administratës civile, në mënyrë që vakuumin e shkaktuar nga kjo tërheqje, dalngadalë, ta përmbushin forcat ushtarako-policore e administrative serbe.

Ja, pikërisht këto ditë, njeriu i parë i OKB, z. Kofi Anan, po i kritikonte liderët aktualë të Kosovës kinse janë duke bërë pak për të drejtat e pakicave në Kosovë! Ai i kritikonte këta që, me një rezolutë “të butë si pambuku”, ishin munduar që të shprehnin mospajtimin e shumicës së Kuvendit të Kosovës me pjesëmarrjen e pakicës serbe në zgjedhjet parlamentare të Serbisë më 28 dhjetor 2003. Me fjalë tjera, zotëria i lartë nga Nju Jorku kërkon nga liderët aktualë të Kosovës që haptazi të marrin pjesë në rivendosjen e sovranitetit të shtetit serb mbi tërë Kosovën.



RRUGA PA KRYE



Ne na vjen keq që liderët aktualë kosovarë me vlerësimet dhe veprimet e tyre të gabuara sollën veten e tyre dhe krejt Kosovën në një gjendje të mjerë dhe në rrugë pa krye. Mirëpo, për të gjitha këto që po ndodhin para syve tanë, nuk mund të shfajsohemi as vetë ne qytetarët e Kosovës që vetëm po bëjmë sehir. Prandaj, nuk kemi të drejtë që gjithë fajin, për këtë katandisje të palakmueshme në të cilën ndodhet Kosova sot, t’ua mëveshim vetëm liderëve aktualë të Kosovës dhe UNMIK-ut.



“NËSE DUAM QË T’I KEMI TË GJITHA TË DREJTAT QYTETARE, ATËHERË DUHET QË TË MARRIM MBI VETE EDHE TË GJITHA OBLIGIMET QYTETARE”.



NË SERBI RANË MASKAT !



Nga ana tjetër, çetnikët dhe monarkistët si dhe klerofashistët e Serbisë, si po shihet qartazi, nuk kanë ndërmend që të heqin dorë lehtë nga ambicjet e tyre për rikolonizimin e plotë të Kosovës. Ata nuk po e fshehin, por po e njoftojnë gjithë botën haptazi se një Korpus i Armatës serbe, i ashtuquajturi “Korpusi i Prishtinës” është vetëm duke pritur komandën për të marshuar në territorin e Kosovës. Ndërsa njësitet e xhandarmerisë së Serbisë, janë duke bërë inkursione të përditshme dhe të papengueshme në brendi të territorit të Kosovës dhe, vetëm po presin urdhërin që të instalohen në qytetet dhe fshatrat e Kosovës. Shërbimi Sekret Informativ Ushtarak Serb, nuk po e fsheh se, pa kurrëfarë vështirësishë, përsëri, ka depërtuar nëpër të gjitha strukturat politike, partiake e institucionale kosovare e, ndoshta, edhe në disa struktura civile të UNMIK-ut dhe se prej andej është duke përcjellur çdo gjë që po ndodhë në Kosovë. Zgjedhjet e fundit parlamentare, 28 dhjetor 2003, që u organizuan dhe u zhvilluan jo vetëm brenda shtetit serb, por dhe në Kosovë, dhanë edhe një herë, pasqyrën objektive të vetëdijes politike të popullit serb sot. Kjo pasqyrë habiti e tmerroi gjithë botën demokratike. Shumica e popullit serb, në Serbi e në Kosovë, politikisht mbeti atje ku ishte. Mbeti në krah e në mbështetje të çetnikëve të kriminelit Sheshel që pret të gjykohet në Hagë, në krah e në mbështetje të neofashistëve të kriminelit Millosheviq që po gjykohet në Hagë dhe në krah e në mbështetje të kopjes së tyre besnike, të Koshtunicës pseudodemokrat. Këto forca politike që përsëri, me vrull, dolën në skenën politike, janë duke farkuar “gërshërët djallëzore” me anën e të cilave duan të presin fatin e Kosovës. Njëri krah i “gërshërëve djallëzore” është riokupimi i plotë i Kosovës, duke na pagëzuar me emërin “Republika Autonome e Kosovës dhe Metohisë”. Krahu tjetër i “gërshërëve djallëzore”, mprehet për variantin që, nëse nuk do të jetë i mundur riokupimi i plotë i Kosovës, nën pretekstin e decentralizimit të Kosovës - sipas vijave etnike, të copëtohet edhe një herë Kosova, duke na i rrëmbyer tokat më të mira dhe duke na lënë të shkretënuar përgjithmonë.



POR GJAKU NUK ËSHTË BËRË UJË



Ndërkaq, në anën tjetër, kemi shumicën dërmuese të qytetarëve të Kosovës, e cila gati për një shekull, me rezistencë të vazhdueshme dhe me kryengritje të përgjakshme, dëshmoi se nuk duron dot robërinë serbe. E, sidomos pas gjithë atyre tmerreve e mizorive që ka përjetuar nga regjimet komuniste e neofashiste serbe, nuk mund as ta marrë me mend jetën nën shtetin serb, çfarëdo forme ai qoftë.



EDHE NJË PAMJE E KOSOVËS SË SOTME



Por, le të japim në mënyrë telegrafike edhe disa të dhëna për gjendjen aktuale të Kosovës. Kriza politike dhe krizat tjera shoqërore, për shkak se njerëz jokompetentë kanë marrë udhëheqjen politike të Kosovës, është në kulm. Korrupsioni, veprimet mafioze dhe kriminaliteti i të gjitha llojeve në shoqërinë kosovare ka marrë përmasa brengosëse. Prandaj, nëse nuk vehen në lëvizje qytetarët, është rrezik që të gjitha këto të këqia të rrënjosen edhe në krye të qarqeve të shoqërisë kosovare. Të gjitha këto maskarallëqe e abuzime ndodhin, të gjithë i shohin dhe i dëgjojnë, por askush nuk merr masa efikase që ato të ndalohen e të parandalohen; gjithë këto krime ndodhin dhe askush nga kriminelët nuk kapet. Ekonomia e Kosovës është në gjendje skajshmërisht të rëndë: Kosova eksporton nga prodhimet e veta vetëm tre përqind, ndërsa importon nga bota nëntëdhjetë e shtatë përqind! Fshati kosovar, dalngadalë po shuhet dhe nëse vazhdon kjo situatë ai një ditë do të vdesë fare. Nën goditjet e importit të pakontrolluar të prodhimeve ushqimore nga jashtë, fshatarët tanë nuk po kanë llogari që të merren me bujqësi, prandaj po derdhen nëpër qytete, duke ngulfatur edhe më tepër qytetet e varfëruara dhe të mbibanuara. Pa punë janë afër gjashtëdhjetë përqind e popullatës që është e aftë për punë dhe shumica nga këta janë të rinj. Nuk beson askush se një shifër e tillë mund të gjendet sot në hapësirat evroaziatike. Nuk beson askush se në hapësirat evroaziatike, përveç në Kosovë, ka pensionistë që duhet të mbijetojnë me 35 evro në muaj! Flitet me hipokrizi për barazinë e grave, ndërsa ato janë kategoria më e goditur nga papunësia në Kosovë, ndërsa dihet nga të gjithë se pa pavarësi ekonomike nuk mund të ketë as barazi gjinore e njerëzore. Gjendja e ish-luftëtarëve dhe e familjeve të tyre është e mjerë dhe e padurueshme. Ish të burgosurve dhe ish të përndjekurve politikë po u bashkohen të dënuarit dhe të përndjekurit e ditëve tona, me qëllim që veprat e flijimet e tyre për liri, pavarësi e demokraci të kriminalizohen. Eshtrat e të kidnapuarve e të të vrarëve nga legjionarët e “beretave të kuqe”, edhe pas pesë vjetësh, ende po qëndrojnë të shpërndarë në dherat e Serbisë, duke mbushur me pezëm e me mllef dhjetëra mijëra qytetarë të Kosovës.

Arsimi, shënetësia e kultura janë në gjendje të palakmueshme. Zyrtarët e institucioneve lokale e vendrore kanë rënë terësisht në provim. Ata po sillen sikur qytetarët janë në shërbim të tyre e jo ata në shërbim të qytetarëve. Nuk është për t’u habitur që pakënaqësia e qytetarëve ndaj këtyre institucioneve po rritet në mënyrë brengosëse.



PASOJAT FATALE TË PAPERSPEKTIVËS



Prandaj, nga kriza e padurueshme ekonomike, nga paperspektiva për të ardhmen e vet dhe nga frika prej një robërie të re serbe, me dhjetra mijëra qytetarë tanë, me zemra të thyera e buzë të përvëluara, po largohen, pa kthim, për në hapësirat e Kanadasë, Australisë, Zelandës së Re, në vendet skandinave e gjetkë.



BRENGAT QË SHTYJNË NË AKSION



Duke pasur parasysh këtë pasqyrë dramatike nëpër të cilën po kalon Kosova, e cila pandalshëm po rrëshqet drejt një robërie të re të përgjakshme;

duke pasur parasysh se politikanët aktualë të Kosovës, as pas pesë vjetësh, nuk treguan aftësi elementare politike për t’i prirë Kosovës drejt lirisë, pavarësisë, demokracisë, drejt krijimit të një shoqërie të shëndoshë dhe të aftë për të luftuar me efikasitet të gjitha llojet e krimeve dhe të padrejtësive;

duke pasur parasysh se në Kosovën aktuale opozita politike, konstruktive, si forcë e domosdoshme në frymën e demokracive perëndimore, për të mbrojtur shoqërinë nga të gjitha monopolet dhe devijimet e rrezikshme, është eliminuar fare;

duke pasur parasysh faktin se shumica e qytetarëve të Kosovës i nënshtrohet një procesi të hapur të shpërlarjes së trurit, do të thotë fshirjes së kujtesës historike e kulturore;

duke pasur parasysh se “Korniza Kalimtare Kushtetuese e Kosovës” nuk garanton as kushtet më elementare për ushtrimin, zhvillimin e forcimin e një sistemi parlamentar të lirë e të barabartë, në frymën qytetare;

duke qenë thellësisht të bindur se Kosova, nga kjo krizë tepër e thellë politike, ekonomike e shoqërore, nuk do të mund të dalë pa një opozitë të fuqishme e të bashkuar të të gjithë banorëve të saj;

ne, një grup nismëtarësh, nuk mund të qëndrojmë edhe më tutje indiferentë dhe të shikojmë se çfarë është duke ndodhur e duke mos ndodhur rreth e rrotull nesh. Ne, në mënyrë më serioze dhe energjike, ngremë zërin tonë kundër indiferentizmit, apatisë, letargjisë, konformizmit, vetëkënaqësisë dhe vetëmashtrimit, mjete këto hipnotike, me të cilat disa nga liderët tanë të paralizuar dhe disa faktorë ndërkombëtarë, po mundohen të na vënë në gjumin e dorëzimit e të nënshtrimit.



VETËDIJA POLITIKE PO NGRITET



Mirëpo, në anën tjetër, ne gjithashtu po shohim se rinia jonë, e frymëzuar me idealet e lirisë, e frymëzuar me idealet e demokracisë perëndimore e humaniste, çdo ditë e më tepër, po kërkon rrugëdalje nga kjo situatë e paperspektivë. Rinia jonë heroike, e mbushur me hov e me energji pozitive, gjithnjë e më vrullshëm, po kërkon rrugëdalje nga kjo “kënetë politike, ekonomike e kriminale” në të cilën është katandisur atdheu ynë i vetëm – Kosova.

Prandaj, duke mos dashur të pajtohemi që kjo energji e pakufishme rinore të shpërthejë në mënyrë të pakontrolluar, ne, një grup nismëtarësh, jemi vënë në aksion që, së bashku me të gjithë qytetarët brenda e jashtë Kosovës, pa dallim gjinie, kombësie a përkatësie etnike, pa dallim feje, besimi a ideologjie, por

1. që në zemër kanë formimin e konusit udhëheqës politik, kompetent, qytetar, që synon lirinë e pavarësinë e Kosovës;

që në zemër kanë themelimin e ngritjen e shtetit demokratik që synon edukimin humanist, parandalimin e krimeve në mbështetje të vetorganizimit qytetar, që synon pluralizmin e vërtetë politik, mendimin e lirë, fjalën e lirë, veprimin e lirë qytetar, të drejtat dhe barazinë për të gjithë qytetarët e Kosovës;

që në zemër kanë paqen, tolerancën, bashkëpunimin dhe dashurinë midis të gjithë qytetarëve të Kosovës e midis të gjithë popujve të mbarë botës;

të themelojmë Organizatën Politike Paqësore:



FORUMI QYTETAR I KOSOVËS (FQK)



Me këtë rast, thërrasim të gjithë qytetarët e pjekur të Kosovës dhe gjithë njerëzit e vullnetit të mirë nga mbarë bota, që ndërmarrjen tonë tejet të vështirë, por tejet fisnike, ta ndihmojnë e përkrahin, me të gjitha mjetet e mundësitë që kanë në dispozicion, por pa kushtëzime e ndërhyrje interesash personale a grupore.

Së shpejti, Organizata Politike Paqësore në formim, FQK do t’i ketë edhe Programin e Statutin e vetë.

Na priftë e mbara!



Nga Zyra e Organizatës Politike Paqësore në formim: FORUMI QYTETAR I KOSOVËS (FQK)



Adresa e selisë:

Lagj. “DARDANIA”, Rr. IDRIZ GJILANI, 4/10 T. Fax:038. 542742; /e-mail: demaci@alb-net. com

[Llapi]

ADEM DEMAÇI : LIDERËT E KOSOVËS JANË LODRA TË UNMIK

PRISHTINE (25 Shkurt) - Institucionet dhe liderët e Kosovës janë kthyer në lodra të ndërkombëtarëve, duke e lënë vendin në mëshirë të fatit e duke vonuar pavarësinë. Kështu ka deklaruar dje politikani kosovar Adem Demaçi, pak javë pas themelimit të një partie të re që, sipas tij, do ta nxjerrë vendin nga kjo situatë. Dikur lider politik i UÇK-së, armik i betuar i Marrëveshjes së Rambujesë, status quo-së aktuale të Kosovës, Demaçi është tashmë në krye të "Forumit Qytetar të Kosovës". Në një intervistë ekskluzive për "Gazetën Shqiptare" ai shpjegon vendimin për krijimin e partisë, kritikat për ndërkombëtarët dhe akzuat për gjendjen e pakënaqësisë në Kosovë.


Gazeta Shaqiptare : Ju keni drejtuar disa vjet më parë Partinë Parlamentare të Kosovës, që me platformën e saj do të ndikonte në të ardhmen e vendit. Pse vendosët të krijonit një tjetër parti?

Adem Demaçi : Sepse të gjitha partitë politike kosovare deri tani kanë dështuar apo nuk kanë arritur rezultate në atë që kërkohet për Kosovën. Synohej çlirimi, pavarësia, rritja e nivelit ekonomik, liria në vendimmarrje. Ne donim të vendosnim vetë, ndërsa tani po e kuptojmë çdo ditë më shumë se jemi totalisht të varur nga ndërkombëtarët. Kjo ka shkaktuar një gjendje pakënaqësie dhe frike për të ardhmen në Kosovë. Partia e re "Forumi Qytetar i Kosovës", që do të mbledhë intelektualët kosovarë, politikanët dhe aktivistë të shoqërisë publike, për të sinjalizuar shoqërinë, politikën dhe ndërkombëtarët se ku duhet të shkojmë.

Gazeta Shaqiptare : Ç'synime keni dhe sa mund t'i realizoni?

Adem Demaçi : Çështja jonë në thelb është të vendosim vetë për të ardhmen tonë, të marrim vetë vendimet tona. Së dyti, duhet të mos lejojmë cënimin e sovranitetit. Këto janë edhe dy pikat themelore të platformës sonë. Ajo që duam të bëjmë është të japim alarmin se vendimet po na mohohen, se çështja e statusit ka mbetur pezull dhe peng i kushteve që s'mund t'i realizojmë ne. Qeveria, institucioni i presidentit, parlamenti, marrin vendime që hidhen poshtë nga UNMIK-u dhe ata që marrin vendimet për ne janë drejtuesit e tij. Gjithçka nisi që me Marrëveshjen e Rambujesë, që u firmos pa marrë parasysh pasojat, vazhdoi me miratimin e rezolutës 1244 dhe po shtjellohet me këtë situatë të padëshiruar në vend.

Gazeta Shaqiptare : Ju e keni kundërshtuar Marrëveshjen e Rambujesë dhe drejtimin e Kosovës nga ndërkombëtarët. A mendoni se çështja e Kosovës mund të zgjidhet duke i përjashtuar ata?

Adem Demaçi : Ne nuk jemi kundër ndërkombëtarëve, jemi për bashkëpunim me ta. Por jemi kundër trajtimit të Kosovës si një protektorat, si një vend që nuk mund të drejtohet dot nga liderët e saj. Proceset e gabuara që po zhvillojmë na dëmtojnë. Është gjendja e paqëndrueshmërisë në Kosovë ajo që po na dëmton të gjithëve.

Gazeta Shaqiptare : A do të pranoni aleanca me partitë e tjera për këtë ndërgjegjësim?

Adem Demaçi : Jo me partitë e mëdha që kanë dështuar në punën e tyre, pasi ato janë kthyer në lodra të ndërkombëtarëve. Me partitë e vogla ndoshta po, do të bashkëpunojmë.

Gazeta Shaqiptare : A do të merrni pjesë në zgjedhjet e shtatorit në Kosovë?

Adem Demaçi : Ende nuk e kemi vendosur një gjë të tillë. Kjo do të varet nga vendimi i drejtuesve të partisë. Edhe nëse nuk marrim pjesë në zgjedhjet e ardhshme, nuk humbasim shumë. Ne nuk duam të hyjmë në një autobus që nuk di se ku shkon. Kjo është pikërisht situata ku ka arritur politika shqiptare.

Gazeta Shaqiptare : A do të ketë emra të njohur të politikës kosovare partia juaj?

Adem Demaçi : Nuk jemi të orientuar drejt emrave. Jemi të orientuar drejt njerëzve që dinë të punojnë për një Kosovë të lirë e demokratike.

[Albo]

Me sa shoh, baca Adem nuk paska ndryshuar fare, ai i vjetri eshte. Mbaji keto qendrime bac, se per te fituar ke ne zgjedhje.

Albo

[Ari-Intimidator]

Demaci eshte duke bere manevra politike. Ai eshte i vetedijshme per apatine politike ne Kosove. Ai gjithashtu e kupton rendesine e ketij fakti. Me krijimin e ksaj partie te re(yea, right)Demaci mundohet qe te mashtroj kete pjese te popullates. Demaci e din se sa injorant shumica e njerezve jane. ME nderrimin e emrit te partise, ai mundohet te kontrolloje kete pjese te popullates. NE mendimnin tim, kjo parti nuk do te kete signifikim te vecante. Demaci ma qon mallin e Drashkovicit te Serbise. Vetem han..lap lap lap.
Ari

[Albo]

Ari, te ngresh nje strategji politike mbi pakenaqesine popullore eshte dicka e ligjshme per nje force politike. Ajo qe nuk eshte e ligjshme por anti-kombetare jane qendrimet kunder forcave paqeruajtese dhe administrates civile nderkombetare. Kjo eshte ne vazhdim te qendrimeve te meparshme anti-kombetare te Demacit qe ishte i vetmi ze kunder Rambujese. Atehere qindra mijra shqiptare perballeshin me vdekjen dhe shpernguljen me dhune, Demaci mbronte "parimet" e tij. Parimet dhe bindjet e Demacit jane te pavlera kur derdhet gjaku i pafajshem shqiptari.

Sot lavdi Zotit Kosova nuk ka me kembe ushtari serb dhe jeton prej plot 5 vjetesh ne paqe, pavaresisht nga problemet e shumta shoqerore te pazgjidhura. UNMIK mund te mos kete bere nje pune perfekte, reformat dhe pushteti mund te mos kene ecur me hapat qe duan shqiptaret, por e rendesisshme ne keto momente nuk eshte pavaresia ne leter aqsa eshte ndertimi i institucioneve te forta demokratike ne Kosove. Qe keto institucione te ngrihen e fuqizon aqsa duhet, kane ende nevoje si per perkushtimin ushtarak te sigurise edhe ndihmat ekonomike te akorduara nga komuniteti nderkombetar.

Ka vende ne bote qe e kerkojne vemendjen dhe perkushtimin qe Kosova gezon prej vitesh nga komuniteti nderkombetar dhe nuk e gjejne. Ne e kemi dhe nuk dime as ta vleresojme dhe as ta shfrytezojme sic duhet.

Albo

[AsgjëSikurDielli]

Nuk duhet shikuar kjo gje vetem ne raportin IPQV (Institucionet e Perkohshme te Vete-Qeverisjes)- UNMIK, po ne aspektin me te gjere, qe Baca Adem, po mundohet ta fus ne loje.

Ai eshte per radikalizim te votuesve, per zgjuarje nga apatia. Ky eshte fjalori i tij i rregullt, nuk pret retorike e shume-fjale-qe-s'thone-gje, nga nje njeri qe shpenzoi 30 vite neper burgjet e Serbise, duke luftuar per ceshtjen shqiptare.

30 vite jane gjysma e jetes se tij, kete mos e harroni. Mund te mos pajtoheni me idete e tij politike, e as me qendrimin e tij per Rambujene, mirepo duhet qe te kuptojme se, ky person eshte i rendesishem per skenen e sotshme politike, jo per faktin se prodhon ndonje alternative politike, po sepse duke hedhur nje llaf ketu e nje atje (qe nuk jane gjithmone bosh, jo!), ai stimulon tjeret per pune me te mire e per qeverisje me te mire, edhepse indirekt e pavetedije, duke u dhene atyre arsye qe te permiresohen ne udheheqesi e qe elektorati te mos zgjedhe Bacen Adem, po ata prape.

Kjo e fundit vlen sidomos per LDK-ne, qe ka deshmuar se, i ka ardhur koha te pushoje pak.