Njëzet mijë të vdekur nga tërmeti
Autoritetet qeveritare në Iran thonë se tërmeti i fuqishëm në juglindje të vendit ka vrarë së paku 20 mijë persona dhe lënduar më shumë se 50 mijë të tjerë.
Numri i të vdekurve po rritet
Pjesa më e madhe e qytetit historik të Bamit është shkatërruar, ndërkohë që ekziston frika se shumë njerëz të tjerë kanë mbetur nën gërmadha të shtëpive, dyqaneve dhe spitaleve.
Procesi i gjatë dhe i ngadaltë i operacioneve të ekipeve të shpëtimit po vazhdon pa pushim për të përballuar numrat e shumtë të njerëzve të prekur nga kjo tragjedi.
Pamje televizive tregojnë njerëz që ende nxirren të gjallë nga gërmadhat, disa që hapin e mbyllin sytë të hutuar pas shumë orëve të varrosur nën gërmadha.
Presidenti Khatami ka mbajtur një fjalim në televizor duke thënë se shkatërrimi i shkaktuar është shumë i madh për Iranin për ta manaxhuar dhe i bëri thirrje gjithë vendit të mobilizohej për të ndihmuar.
Irani gjithashtu ka kërkuar ndihmë ndërkombëtare veçanërisht me ekipe të kërkimit dhe shpëtimit, furnizime mjekësore dhe pajisje për pastrimin e ujit.
Këto thirrje kanë gjetur përgjigje në gjithë botën duke përfshirë Zvicrën, Britaninë dhe Gjermaninë.
OKB gjithashtu ka dërguar një ekip për të koordinuar operacionin e shpëtimit duke ofruar edhe një fond prej 90 mijë dollarësh.
Presidenti amerikan ka shprehur ngushëllimet dhe tha se Amerika ishte gati për të ndihmuar me operacione humanitare.
Në Bam njerëzit ndërtuan zjarre jashtë për t'u ngrohur pasi temperaturat ranë ndjeshëm.
BBC
Krijoni Kontakt