Merr gjakun pas 60 vitesh!!

[Shpirt Njeriu]

SHKODER

Murtaja e gjakmarrjes, e mbjellur shekujve në Shqipëri, vijon të marrë jetë njerëzish. Jo vetëm plagët e gjakut të hapura rishtaz, por edha ato të vjetrat hapen si pa të keq. Kështu, pas plot 60 vitesh kanuni ka hapur portën e vdekjes midis familjeve Matja (banuese në fshatin Jubicë të Malësisë së Madhe) dhe Kodra (banuese në fshatin Dome të Shkodrës). E ndërsa në kohën e diktaturës familja Matja nuk mundi të shkrepte këmbëzën e pushkës, hakun e pinjollit të saj të këputur nga hasmi Kodra e mori në vitin 1993. Dhe pse familjet ishin një me një me viktima lumi i gjakut nuk mbaroi këtu. Pas dhjetë vitesh dhe pikërisht në mars të këtij viti shtetasi Asllan Kodra mori hakun e vëllaut të tij, duke ekzekutuar gjaksin Xhevdet Matja. Prita e vdekjes është bërë në aksin rrugor Shkodër-Malësi e Madhe në afërsi të fshatit Shtoj. Burime nga policia e Shkodrës pohojnë se 65-vjeçari i hipur në një motoçikletë ka qëlluar me automatik në drejtim të 34-vjeçarit Matja, i cili po udhëtonte në drejtim të fshatit të tij me një makinë tip BMV. E ndërsa ky i fundit ka mbetur i vdekur në vend, autori i krimit është larguar nga vendi i ngjarjes. Kodra ka lënë shtëpinë e tij në lagjen "Guerile" të Shkodrës dhe është fshehur për shtatë muaj në shtëpinë e tij në fshatin Dome, nga ku ishte shpërngulur prej disa vitesh. Vetëm pas një sërë veprimesh hetimore policia e prokuroria e Shkodrës kanë bërë të mundur identifikimin e vrasësit dhe të motivit të ngjarjes në fjalë. Pas mbledhjes së provave ekspertët janë vënë në ndjekje të shtetasit Asllan Kodra. Ky i fundit është vënë në pranga rreth orës 22 të së dielës. Burimet e mësipërme citojnë se gjatë kontrollit të banesës në fshatin Dome është gjetur një automatik dhe një krehër fishekë. Nga ekspertiza ka rezultuar se kjo ishte arma e krimit. Asllan Kodra tashmë akuzohet për kryerjen e veprës penale të vrasjes dhe të armëmbajtjes pa leje.


Në pranga dhe i biri, i gjetën një pistoletë

SHKODER - Pranga dhe djalit të të kërkuarit për vrasje. Mbrëmjen e së dielës policia e Shkodrës ka arrestuar edhe shtetasin Riza Kodra banues në lagjen "Ahmet Haxhia" të qytetit verior. Burime nga dikasteri i Rendit bëjnë të ditur se arrestimi i të birit të Kodrës është bërë vetëm pak minuta pas kapjes së babait të tij. Pas kontrollit në kullën ku ishte fshehur Kodra, policia ka mësyer dhe banesën e djalit të tij. Sipas burimeve të mësipërme, ekspertët kanë gjetur në banesën e Riza Kodrws një pistoletë tip beretë, të cilën e mbante pa leje. Menjëherë pas arrestimit të djalit të të kërkuarit për vrasje, materialet në ngarkim të tij i janë përcjellë organit hetimor. Riza Kodra akuzohet për armëmbajtje pa leje.